Kamwaabelesya Kabotu Mali

IBBAIBBELE lyaamba kuti: “Kuyandisya [mali] ngomuyanda wabubi boonse.” (1 Timoteo 6:10) Masimpe, bamwi bantu balaayandisya mali alimwi bajisi bubi kuyanda kuvwuba. Bamwi baba bazike bamali alimwi abanjizya mumapenzi aataambiki. Nokuba boobo, ikuti mali abelesyegwa kabotu, alagwasya kapati. Ibbaibbele lyaamba kuti “mali ngaacita zintu zyoonse.”—Mukambausi 10:19.

Nokuba kuti Bbaibbele talili bbuku liyiisya makani aamali, lilijisi malailile mabotu aakonzya kumugwasya kwaabelesya kabotu mali. Basyaabusongo mumakani aakubelesya kabotu mali, kanji-kanji bakulwaizya bantu kubweza ntaamu zyosanwe zitobela kutegwa baabelesye kabotu mali aabo, alimwi ntaamu eezyi zileendelana anjiisyo zyamu Bbaibbele izyakalembwa kaindi.

Kamuyobola Mali. Imakani aamu Bbaibbele atondezya kuti bana Israyeli bansiku bakali kuyiisyigwa bubotu bwakuyobola mali. Bakali kwaambilwa kuti kabayobola “cipanzi cakumi” (naa 10 pesenti) amwaka kutegwa kababelesya kumapobwe. (Deuteronomo 14:22-27) Awalo mwaapostolo Paulo wakakulwaizya Banakristo bakusaanguna kuti amvwiki kabayobola zyintu zyakuti bakasange kutegwa bakagwasyilizye Banakristonyina bacete. (1 Ba-Korinto 16:1, 2) Ibunji bwabasyaabusongo mumakani aakubelesya mali bakulwaizya kuyobola. Aboobo, kamwaayobola mali. Mbomwavwolela buyo, amwaayobole amwi mali kubbanga naa abusena bumbi mpaakonzya kuyobolwa kabotu. Eeci cilakonzya kumugwasya kutegwa mutaabelesyi cabuyamba.

Amulembele Limwi Mbomuyanda Kwaabelesya Mali. Eeyi nenzila ilikke iikonzya kumugwasya kuzyiba mali ngomubelesya naa mbomukonzya kwaabelesya kabotu. Ikulemba kabotu mbomwaabelesya mali inga camugwasya kuzyiba nkwaamanina akuzuzikizya makanze ngomujisi. Mweelede kwaazyiba mali ngomuvwola, alimwi mutani kubelesyi manji kwiinda waawo. Amubelesye mali kuzyintu ziyandika kapati. Kujatikizya makani aaya, Jesu wakakulwaizya baswiilizi ‘kubala mali’ kabatana kwaabelesya. (Luka 14:28) Ibbaibbele litwaambila kutaba aciyanza cakukweleta mali.—Tusimpi 22:7.

Kamuyeeya Zyakumbele. Amukkale ansi akuyeeya zyintu nzyomuya kucita kumbele. Mucikozyanyo, ikuti kamujisi makanze aakuula  ŋanda, ikukweleta mali kubbanga ngomukonzya kupilusya inga waba muzeezo mubotu. Mbubwenya buyo, mutwe wamukwasyi ulakonzya kunoobbadela mali kuinsyuwalansi kutegwa walo abanamukwasyi bakagwasyigwe kumbele ikuti naa umwi walemana, waciswa, wafwa naa kwacitika ntenda iili yoonse. Kuyeeyela limwi zyakumbele kulabikkilizya akuyeeya ncomuya kucita mwaakuleka kubeleka. Lugwalo lwa Tusimpi 21:5 lwaamba kuti “makanze aabasungu alaleta zilyo zinji.”

Amwiiye. Amubelesye mali aanu ikwiiya milimo imwi akulikwabilila kumalwazi kwiinda mukuba aziindi zyakulikondelezya akulya kabotu. Eeyi nzila ilakonzya kumugwasya kumbele. Amuzumanane kwiiya. Ibbaibbele litukulwaizya kuzumanana kuba “[a]maanu abusongo.”—Tusimpi 3:21, 22; Mukambausi 10:10.

Amwaalange Munzila Yeelede Mali. Kuvwuntauzya kwakacitwa kutondezya kuti bantu babikkila maano kukugwasya bamwi balikkomene kwiinda baabo bayandisya mali. Bantu bamwi balalibilika akaambo kakuti mbalyato. Munzila nzi? Nokuba kuti balijisi kale zyintu ziyandika mubuumi, balazumanana kuyanda kuvwuba. Pele, ino ncinzi muntu ncayandika kunze kwazyakulya, zyakusama alimwi aŋanda? Nkakaambo kaako sikulemba Bbaibbele, iwakalemba majwi aambwa kumatalikilo aacibalo eeci ncaakaambila kuti: “Kufwumbwa twanoojisi cakulya acakulivumba, nciconya eeco mbubo ncinji.” (1 Timoteo 6:8) Kukkutila azyintu nzyotujisi kutugwasya kuti tutabi basimuyanda mali alimwi kulatukwabilila kumapenzi aaboola akaambo kakwaayandisya.

Masimpe, ikuyandisya mali ngomuyanda wabubi boonse. Mulakonzya kuba bazike bamali ikuti kamutaabelesyi kabotu. Pele kuti mali abelesyegwa kabotu alakonzya kumugwasya kucita zyintu ziyandika kapati mubuumi mbuli kuyumya cilongwe canu abeenzyinyoko, abanamukwasyi alimwi a Leza. Nokuba boobo, kuboneka kuti bantu lyoonse munyika eeyi banakulibilika akaambo kamali. Sena lyoonse tunakulibilika akaambo kamali? Sena bucete kuli nobuya kumana? Cibalo camamanino mumulongo ooyu cilijisi bwiinguzi bwamibuzyo eeyi.

[Majwi aakwelelezya sikubala aali apeeji 5]

Mweelede kwaazyiba mali ngomuvwola, alimwi mutani kubelesyi manji kwiinda waawo

[Majwi aakwelelezya sikubala aali apeeji 5]

Amubelesye mali kuzyintu ziyandika kapati

[Majwi aakwelelezya sikubala aali apeeji 6]

Ino ncinzi muntu ncayandika kunze kwazyakulya, zyakusama alimwi aŋanda?

 [Kabbokesi/Cifwanikiso icili apeeji 7]

AMUBAYIISYE BANA BENU KUTEGWA KABAABELESYA KABOTU MALI

Akaambo kakuti mazuba aano bantu banji bajisi mapenzi aamali, bahaazibwene bakulwaizya bazyali kuyiisya bana babo mbobakonzya kwaabelesya mali alimwi beelede kucita oobo bana kabacili baniini. Ikuti mwababuzya bana mali nkwaazwa, baamba kuti “kuli Bataata” naa “kubbanga.” Ikuti mwabayiisya bana mbwaayandika mali, mbwaayelede kubelesyegwa ambobakonzya kwaayobola akucita makwebo, mulakonzya kubagwasya kutegwa batani kubi azikwelete zinji akuba bazike bamali. Nzyeezi nzila zikonzya kugwasya:

1. Amubape cikonzyanyo cibotu. Ibana benu baya kwiiya zyintu nzyomucita kwiinda nzyomwaamba.

2. Amuzyibe mali ngomubelesya. Amubandike ambabo kujatikizya mali ngomweelede kubelesya abalo ngobeelede kubelesya. Mutani kubazumizyi kubelesya mali aainda yaayo ngomwakamvwana.

3. Amubaleke balisalile beni mbobayanda kwaabelesya mali aabo. Ikuti naa balabeleka, bavwola mweelede kubalailila buyo mbobakonzya kwaabelesya. Mpoonya amubaleke balisalile mbobayanda kwaabelesya.

4. Amubayiisye bwaabi. Kamubakulwaizya bana benu kuba baabi akupa Leza kwiinda mukusanga.