Bakubusi Balabuzya

Ino mbuti mbondikonzya kukukkomanina kubala Bbaibbele?

Ino Bbaibbele ulibala ziindi zyongaye? (Kocconga mukabbokesi komwe)

□ Abuzuba

□ Ansondo

□ Ziindi zimwi ․․․․․

Manizya kulemba muzila ooyu uutobela.

Bunji bwaziindi tandikukkomanini kubala Bbaibbele akaambo kakuti . . . (Kocconga mutubbokesi toonse tutondezya mbolimvwa)

□ Tandizikkomanini nzyondibala

□ Tandizimvwisyi nzyondibala

□ Kuli zindinyonganya

Zyintu zimwi ․․․․․

SENA tokukkomanini kubala Bbaibbele? Ikuti naa mbocibede oobo, ulakonzya kubona kuti ngamasimpe majwi ngaakaamba Will uujisi myaka iili 18 aakuti: “Ikubala Bbaibbele kulakonzya kulibonya mbuli kuti mulimo uujazya butolo.” Pele wakazumanana kwaamba kuti “Oobo mbocibede kuti kotacizyi mbolyeelede kubalwa.”

Ino nkaambo nzi ncoyelede kwiiya mbokonzya kubala Bbaibbele? Sena ulayanda kuzyiba mbokonzya

▪ kusala camaano?

▪ kuba abalongwe beni-beni?

▪ kuliyumya ciindi notyompedwe?

Ibbaibbele lijisi lulayo lugwasya kujatikizya twaambo ootu alimwi atumwi. Masimpe ngakuti, tacili cuuba-uba kutujana twaambo ootu. Weelede kubeleka canguzu mbubonya mbuli muntu uuyandaula lubono: Muntu uubeleka canguzu nayandaula cintu cimwi ulakkomana kapati ikuti wacijana ncaali kuyandaula!—Tusimpi 2:1-6.

Ino mbuti mbokonzya kujana twaambo itugwasya mu Bbaibbele? Kabbokesi nkokonzya kutenda ikali kululyo kalatondezya mbokonzya kulibala Bbaibbele alimwi nkokali kunze katondezya mpokonzya kutalikila kulibala. Alimwi ulakonzya kusola nzila zimwi zikonzya kukukkomanisya izili mumapeeji aatobela.

 Zibalo azimbi zijisi mutwe wakuti “Bakubusi Balabuzya” zilakonzya kujanwa a Intaneti akkeyala ya www.watchtower.org/ype

Ikuti kokonzya kubelesya Intaneti, ulakonzya kubala Bbaibbele akkompyuta kwiinda mukubelesya kkeyala ya www.watchtower.org/e/bible

ZYAKUYEEYESYA

Basikale bakati, ‘Cibuye tapi.’

▪ Ino mbuti mbokali kamasimpe kaambyo aaka caboola kukubala Bbaibbele?

▪ Ino ndilili nokonzya kujana ciindi cakubala Bbaibbele?

[Kabbokesi/Cifwanikiso icili apeeji 23]

MBOKONZYA KULIBALA IBBAIBBELE

Kotanatalika kubala . . .

▪ Bona masimpe kuti abusena mpokkede kwiina cintu cisabila kutegwa ucikonzye kubikkila maano kuzyintu nzyobala.

▪ Kopailila kuti uzimvwisye nzyobala.

Ciindi nobala . . .

▪ Belesya mamaapu alimwi azifwanikiso zyaambidwe muzibalo zyamu Bbaibbele kutegwa zikugwasye kubona zyintu zilembedwe mu Bbaibbele mbozyakali kucitika.

▪ Langa-langa mbozyakacitika alimwi atwaambo toonse tujatikizyidwe.

▪ Langa-langa bupanduluzi ibuli mumajwi aayungizyidwe alimwi a Magwalo aamba makani aakozyenye.

▪ Kolibuzya mibuzyo eeyi:

TWAAMBO TWAMASIMPE: Ino eeci cakacitika lili? Ino nguni wakaamba majwi aaya? Ino nguni wakali kwaambilwa majwi aaya?

BUPANDULUZI: Ino inga muntu uumbi ndamupandulwida buti makani aaya?

MPINDU: Ino nkaambo nzi Jehova Leza ncaakaabikkilizya makani aaya mu Jwi lyakwe? Ino ayubununa nzi kujatikizya bube mbwajisi naa nzila mbwacita zyintu? Ino nziiyo nzi nzyondikonzya kubelesya mubuumi bwangu?

Wamana kubala . . .

▪ Zumanana kuvwuntauzya. Belesya mabbuku aamwaigwa a Bakamboni ba Jehova, mbuli lyakuti Insight on the Scriptures alimwi alyakuti “All Scripture Is Inspired of God and Beneficial.”

▪ Kopaila alimwi. Komwaambila Jehova nzyooiya alimwi ambokanza kuzibelesya. Komulumba akaambo ka Bbaibbele.

 [Kabbokesi/Cifwanikiso icili apeeji 24]

INO UYOOTALIKILA AALI KUBALA BBAIBBELE?

Nzila ziindene-indene . . .

□ Bala kuzwa kumatalikilo kusikila kumamanino.

□ Bala zibalo zyamu Bbaibbele kweelana ambozitobelene zyintu zyakali kucitika naa mbwaakatobelana kulembwa mabbuku.

□ Abuzuba, bala cibeela ca Magwalo cijisi makani aaindene.

Mu Muhulo: Makani aansiku aakkomanisya (Matalikilo kusika kubbuku lya Esita)

Muli Bwabili: Makani aajatikizya buumi bwa Jesu anzyaakali kuyiisya (Matayo kusika kubbuku lya Johane)

Muli Bwatatu: Makani aajatikizya mbungano ya Bunakristo yakusaanguna (Incito)

Muli Bwane: Makani aabusinsimi amalailile aatondezya mbotweelede kulilemeka (Isaya kusika kubbuku lya Malaki alya Ciyubunuzyo)

Muli Bwasanu: Kweema anyimbo (Jobu, Intembauzyo, Lwiimbo lwa-Solomoni)

Mu Mujibelo: Mabbuku aatondezya mbotukonzya kubelesya busongo mubuumi bwesu (Tusimpi, Mukambausi)

Mu Nsondo: Magwalo aakatuminwa kumbungano (Ba-Roma kusika kulugwalo lwa Juda)

Kufwumbwa mpokonzya kusala kutalikila kubala, toyelede kuluba mpoogolela kubala! Kocconga (✔) afwaafwi acaandaano ncoomanizya kubala naa munzila imwi njokonzya kusala, lemba zyaandano nzyoobala.

Tenda kabbokesi aaka akukabikka mu Bbaibbele lyako!

[Box/Diagram on page 24]

MBOKONZYA KUZIKKOMANINA NZYOBALA MU MAGWALO!

Jana nzila zikonzya kupa kuti kozikkomanina nzyobala. Mucikozyanyo:

□ Lemba mulongo wamazyina aabantu bamukowa omwe.

□ Lemba twaambo mubufwaafwi. Mucikozyanyo, nobala makani aajatikizya mubelesi wa Jehova uusyomeka, lemba twaambo mubufwaafwi tutondezya bube bwamuntu ooyo, nzyaakacita alimwi azileleko nzyaakajana.—Tusimpi 28:20.

Citondezyo

Mulongwe wa Leza

↑ Kumvwida

↑ Kusyomeka

↑ Abrahamu

□ Lemba zifwanikiso zitondezya makani aali mucibalo.

□ Lemba zifwanikiso ziindene-indene izitondezya zyintu mbozyakacitika. Pandulula cicitika mucifwanikiso acimwi.

□ Panga tuntu tukozyenye azyintu zyansiku, mbuli bwaato bwa Nowa.—Mucikozyanyo, bona Sinsimuka! ya January 2007, peeji 22.

□ Bala cakupozya antoomwe abeenzinyoko naa banamukwasyi. Muzeezo: Ulakonzya kupa umwi kuti abale cibeela casikuluula. Bamwi balakonzya kupegwa kuti babale majwi aabantu baindene-indene bali mucaandano ncomubala.

□ Sala cibalo comwe akucibala mbuli kuti makani aalimumo naazwa akucitika. Bala munzila iitondezya mbuli kuti ubuzya-buzya bantu bakacitikilwa zyintu eezyo abaabo bakalibonena nozyakali kucitika.

□ Kosala cibalo cijisi muntu watakasala cabusongo alimwi koyeeyela ncaakeelede kucita. Mucikozyanyo, langa-langa cibalo citondezya Petro mbwaakakaka Jesu. (Marko 14:66-72) Ino Petro wakeelede kucita buti mubukkale oobu bukatazya?

□ Kweebelela naa kuswiilila zisobano zyamu Bbaibbele zyakalekkoodwa.

□ Kolilembela cisobano. Kobikkilizya aziiyo zikonzya kujanika mucisobano eeco.—Ba-Roma 15:4.

MUZEEZO: Kocita cisobano eeci abeenzyinyoko.

 [Kabbokesi/Cifwanikiso icili apeeji 25]

Zyintu Zikonzya Kukukulwaizya

▪ Kolibikkila mbaakani! Lemba buzuba mboyanda kuyootalika kubala Bbaibbele ansi aawa.

․․․․․

▪ Kosala cibalo camu Bbaibbele cikukkomanisya. (Bona kabbokesi kakuti “Ino Uyootalikila Aali Kubala Bbaibbele?”) Mpoonya lemba cibeela ca Bbaibbele ncoyanda kusaanguna kubala.

․․․․․

▪ Notalika-talika, ulakonzya kubala buyo kwaciindi cisyoonto. Kubala Bbaibbele kwamaminiti aali buyo 15 kuli kabotu ikwiinda kutalibalila limwi. Lemba ciindi ncoyanda kubelesya kucita boobo ansi aawa.

․․․․․

Muzeezo: Weelede kuba a Bbaibbele ndyobelesya buyo ciindi nobala. Lemba twaambo mumabali. Ulakonzya kweengela tupango tukukkomanisya kapati.

[Kabbokesi/Zifwanikiso izili apeeji 25]

NZYOBAAMBA BEENZINYOKO

“Ndilabala Bbaibbele kwaciindi cisyoonto masiku kanditana koona lyoonse. Eeci cipa kuti kandiyeeya zyintu zibotu kanditana koona.”—Megan.

“Ndilalanga-langa kapango komwe mumaminiti aali 15. Ndilabala bupanduluzi ibuli mumajwi aayungizyidwe, Magwalo aamba makani aakozyenye aatondezyedwe mukapango aako alimwi ndilavwuntauzya. Zimwi ziindi tandimanizyi kumvwuntauzya makani oonse aali mukapango aciindi comwe nondibelesya nzila eeyi, pele ndilagwasyigwa kapati.”—Corey.

“Ciindi cimwi, ndakamanizya kubala Bbaibbele mumyezi iili kkumi. Kwiinda mukufwambaana kulimanizya kubala, ndakabona mbozyeendelana zibeela zya Bbaibbele, cintu ncondatakazyi kanditana kulibala boobo.”—John.

[Kabbokesi kali apeeji 25]

ULAKONZYA KUSALA!

□ Sala Cibalo. Ibbaibbele lijisi twaambo twakacitika ncobeni. Sala cibalo cikukkomanisya akucibala coonse.

Muzeezo: Kutegwa uzyibe mbokonzya kugwasyigwa kapati acibalo ncoosala, bona apeeji 292 mubbuku lyakuti Mayankho a Zimene Achinyamata Amafunsa, Buku Lachiwiri, lyakamwaigwa a Bakamboni ba Jehova.

□ Sala cibalo ca Makani Mabotu. Bala bbuku lya Matayo (bbuku lya Makani Mabotu lyakasaanguna kulembwa), Marko (bbuku libelesya majwi masyoonto kwaamba zyintu zinji zyakacitika), Luka (bbuku lijisi makani manji aajatikizya mupailo alimwi azyintu nzyobakali kucita bamakaintu), naa Johane (bbuku lijisi makani manji aatajaniki mumabbuku aambi aa Makani Mabotu).

Muzeezo: Kotanatalika kubala, mubufwaafwi langa-langa makani aamwi aajatikizya bbuku eelyo lyamu Bbaibbele alimwi asikulilemba kutegwa uzyibe icipa kuti bbuku lya Makani Mabotu eelyo kaliindene aamwi.

□ Sala lugwalo lwa Intembauzyo. Mucikozyanyo:

Ikuti walendelelwa akubula beenzyinyoko, bala Intembauzyo 142.

Ikuti kotyompedwe akaambo kakulezya kumwi nkojisi, bala Intembauzyo 51.

Ikuti kotaboni mbozigwasya zyeelelo zya Leza, bala Intembauzyo 73.

Muzeezo: Lemba zibalo zikukulwaizya kapati zizwa mubbuku lya Intembauzyo.

[Kabbokesi kali apeeji 26]

KOVWUNTAUZYA

▪ Kolanga-langa mbozyakacitika zyintu. Langa-langa ciindi nozyakacitika, busena abukkale bwakaliko aciindi eeco.

Cikozyanyo: Kobala Ezekieli 14:14. Ino kweelede kuti Daniele wakajisi myaka yongaye ciindi Jehova naakaamba kuti wakapa cikozyanyo cibotu mbubonya bwakacita Nowa a Jobu?

Kaambo kagwasya: Lugwalo lwa Ezekieli caandano 14 lwakalembwa kakwiindide myaka yosanwe kuzwa ciindi Daniele naakatolwa mubuzike ku Babuloni—kweelede kuti wakacili mukubusi.

Makani ngokonzya kujana ikuti wavwuntauzya: Sena Jehova tanaakakubona kusyomeka kwa Daniele akaambo kakuti wakacili mwana? Ino nzyakusala nzi zibotu izyakapa kuti alelekwe? (Daniele 1:8-17) Ino mbuti cikozyanyo ca Daniele mbocikonzya kukugwasya kusala kucita zyintu zibotu?

▪ Kotulanga-langa twaambo tujatikizyidwe. Zimwi ziindi, kulakonzya kuba bbala lyomwe naa obile aayandika kapati.

Cikozyanyo: Ezyanisya Matayo 28:7 a Marko 16:7. Ino nkaambo nzi Marko ncaakabikkilizya kaambo kakuti Jesu wakali kuyoolibonya kuli basikwiiya akuli “Petro”?

Kaambo kagwasya: Marko tanakalibonena zyintu eezyi nozyakali kucitika; kweelede kuti makani aaya wakaajana kuli Petro.

Makani ngokonzya kujana ikuti wavwuntauzya: Nkaambo nzi ncotukonzya kwaamba kuti Petro wakaleka kulibilika naakamvwa kuti Jesu uyanda kumubona? (Marko 14:66-72) Ino mbuti Jesu mbwaakatondezya kuti wakali mulongwe mwini-mwini wa Petro? Ino mbuti mbokonzya kutobela cikozyanyo ca Jesu akuba mulongwe mwini-mwini kubantu?

▪ Zumanana kuvwuntauzya. Langa-langa mabbuku aapandulula zyamu Bbaibbele kutegwa ujane twaambo tumbi.

Cikozyanyo: Bala Matayo 2:7-15. Ino ndilili basikupandulula bweende bwanyenyeezi nobakamuswaya Jesu?

Kaambo kagwasya: Bona Ngazi Yamulindizi ya January–March, 2008, peeji 31, yakamwaigwa a Bakamboni ba Jehova.

Makani ngokonzya kujana ikuti wavwuntauzya: Ino kuboneka kuti Jehova wakamugwasya buti Jesu abazyali bakwe nobakali mucisi ca Egepita? Ino mbuti lusyomo lwakuti Leza ulakonzya kukugwasya mbolukonzya kukuyumya-yumya noli mumapenzi?—Matayo 6:33, 34.