Zikozyanyo Zyamikwasyi Iyazwidilila—Cibeela Cabili

Kweelana ambokulembedwe mucibalo cakuti, “Zikozyanyo Zyamikwasyi Iyazwidilila—Cibeela Cakusaanguna,” njiisyo zyamu Bbaibbele zilakonzya kukwabilila mikwasyi ciindi camapenzi. * Kuli baabo ibatobela zyeelelo zya Leza mubuumi bwabo, Jehova Leza ubasyomezya kuti: “Njookulaya akukutondezya inzila njoelede kutola, njookweenzya kukubika liso lyangu alinduwe.”—Intembauzyo 32:8.

Kuliyumya mupenzi lyakubula mali. Twaambo itujatikizya mali kanji-kanji ntotuleta mapenzi mulukwatano. Pele njiisyo zyamu Bbaibbele zilakonzya kugwasya mikwasyi kwaalanga kabotu makani aajatikizya mali. Jesu wakaamba kuti: “Mutalibiliki kubuumi bwanu, kuti tukalyenzi, tukanywenzi? nikuba kumibili yanu kuti, tukasamenzi? . . . Usowanu uuli kujulu ulizi kuti zintu ezi zyoonse zilayandwa kulindinywe.”—Matayo 6:25, 32.

Apeeji 23, ba Issachar, ibakkala ku United States, baamba mbobakacikonzya kuliyumya antoomwe amukwasyi wabo mupenzi lyakubula mali ciindi ŋanda yabo noyakanyonyoonwa aguwo pati litegwa Hurricane Katrina.

Ikuti umwi wamumukwasyi waciswa. Bantu boonse balaciswa. Kanji-kanji, muntu uciswa buyo kwaciindi cisyoonto mpoonya ulapona. Pele ino mbuti kuti umwi wamumukwasyi watalika kuciswa bulwazi butaponi? Ibbaibbele lyaamba kuti Jehova ulakonzya kubatabilila aabo ibaciswa. (Intembauzyo 41:1-3) Ino mbuti Jehova mbwakonzya kubelesya mukwasyi kutegwa atabilile baabo baciswa?

Apeeji 24, ba Hajime, ibakkala ku Japan, bapandulula mbuli balo abana babo basimbi mbobakagwasyanya kulanganya bakaintu babo, ba Noriko, nobakaciswa cilwazi cibyaabi.

Ikuti mwana wafwa. Lufwu lwamwana luleta kuusa kupati mumukwasyi. Jehova usyomezya kuyakusindula misozi iiboola akaambo kakusweekelwa ooku. (Ciyubunuzyo1:1-4) Nociba ciindi cino, ulabaumbulizya aabo ibafwidwa.—Intembauzyo 147:3.

Apeeji 25, ba Fernando aba Dilma, ibakkala ku United States, baluula mbolyakabayumya Bbaibbele ciindi mwanaabo musimbi naakafwa kacili muvwanda.

Ibbaibbele lilapa busolozi ibusyomeka kumikwasyi iijisi mapenzi, kweelana ambokutondezyedwe muzibalo zitobela.

Bupanduluzi buyungizidwe

 [Kabbokesi/Zifwanikiso izili apeeji 23]

Kuliyumya Mupenzi Lyakubula Mali

Akaluulwa aba Issachar Nichols, ibakkala ku United States

“Guwo pati liitwa kuti Hurricane Katrina lyakanyonyoona ŋanda yesu, kwakacaala buyo ntalisyo. Cikolo mpondakali kubeleka cakali mumeenda kwamwezi omwe acisela.”

CIINDI cacilimo mu 2005, mebo, mukaintu wangu alimwi amwaneesu musimbi Sydney, iwakajisi myaka yakuzyalwa yobile, twakali kukkala ku Bay St. Louis, ku Mississippi mu U.S.A. Mbotuli Bakamboni ba Jehova, mebo a Michelle twakali kuyanda kuti katubelesya ciindi cinji mumulimo wa Bunakristo wakukambauka. Ndakali kuyiisya bantu bapati kubamba makkompyuta, alimwi ambwaabeleka, alimwi cikolo nkondakali kuyiisya cakali afwaafwi adolopo lya New Orleans, ku Louisiana. Ndakali kubeleka buyo kwamazuba otatwe mumvwiki, aboobo mazuba aaya amwi ndakali kuyiisya bantu makani aamu Bbaibbele. Twakalikkomene abuumi mbotwakali kupona. Mpoonya kwakaambilizyigwa kuti iguwo pati litegwa Hurricane Katrina lyakali munzila. Cakutasowa ciindi twakalibambila kuzwa mubusena oobu.

Ciindi nolyakatontomana guwo, twakajana kuti ŋanda yesu iyakali ku Bay St. Louis yakanyonyoonwa kubikkilizya acikolo cakali ku New Orleans nkondakali kuyiisya. Mali aa insurance (naa aabukwabilizi) alimwi ayaayo ngotwakapegwa amfwulumende (government grant) akatugwasya kujana ŋanda yakubbadelela, pele cakandikatazya kujana mulimo mubotu. Kuyungizya waawo, mukaintu wangu wakatalika kuciswa akaambo kakunywa meenda aatali kabotu. Mubili wakwe teewakacili kukonzya kulwana malwazi, alimwi akaambo kakulumwa masenya wakanjilwa kazunda kaitwa kuti West Nile virus. Aciindi mpoonya aawa mali aakeelede kubbadelwa ku insurance akayungizigwa alimwi zyintu zyakatalika kudula.

Ikutegwa tukonzye kupona buumi oobu bupya, twakaiya kwaabelesya kabotu mali, nomuba mukuula zyintu ziyandika. Ndakaleka kusalaula ncito.

Kwaamba masimpe, tiicakali cuuba-uba kusweekelwa lubono. Pele twakakkomana kuti twakafwutuka. Eeci cakacitika cakatuyiisya kuti lubono luli ampolugolela. Twakayeeya majwi ngaakaamba Jesu aakuti: “Buumi bwamuntu tabuzwi kukuvuba kwazintu nzyajisi.”—Luka 12:15.

Alimwi twakazyiba kuti nokuba kuti twakaluuside akaambo kakusweekelwa zyintu, pesi kuli bamwi ibakasweekelwa kwiinda ndiswe—bamwi bakafwa buya. Nkakaambo kaako, cakutasowa ciindi ndakajata bubi mukugwasyilizya akuumbulizya bamwi ibakasweekelwa.

Muciindi eeci camapenzi, lugwalo lwa Intembauzyo 102:17 lwakatuumbulizya kapati. Lwaamba kuti, Jehova Leza ‘uyakuswiilila cikombyo cabasweekede, tasampauli cikombyo cabo.’ Mumukwasyi wesu, twabona mbwaatugwasya.

Kabbokesi kali apeeji 23]

Naakamana maguwo mapati, Hurricane Katrina a Rita mu U.S. Gulf Coast mu 2005, Bakamboni ba Jehova bakabamba masena aali 13 aakugwasyila bantu bakajanika muntenda eezyi, maanda aakuyobweda zyintu aali fwuka, alimwi amasena aakuyobweda mungwimba one. Bakamboni ibabalilwa ku 17,000 ibazwa mumasena aandeene-andeene aamu United States alimwi amuzisi zimbi zili 13 bakaunka kuyakugwasilizya mumulimo ooyu. Bayaka maanda manji kapati.

 [Kabbokesi/Zifwanikiso izili apeeji 24]

Ikuti Umwi Wamumukwasyi Waciswa

Akaluulwa aba Hajime Ito, ibakkala ku Japan

“Twakali kuyandisisya kujika antoomwe kusikila ciindi Noriko naakatalika kuciswa. Lino tacikonzyi kulya akunywida kumulomo nokuba kwaambaula. Weendela ancinga yabalema alimwi ubelesya kapila kuyoya.”

MU May 2006, mukaintu wangu, Noriko, wakatalika kukatazyigwa kwaambaula. Mumwaka ngomunya ooyu, wakatalika kukatazyigwa kulya alimwi akunywa. Mumwezi wa September, wakajanika kuti ulaabulwazi bwiitwa kuti amyotrophic lateral sclerosis (ALS)—bulwazi ibunyonganya nsinga kubongo alimwi amumoongola. Mumyezi buyo yone, buumi bwesu bwakacinca. Alimwi aaya ngaakali matalikilo aamapenzi aakwe.

Mukuya kwaciindi mulaka alimwi akwaanza kwakwe kwalulyo zyakaleka kubeleka. Mpoonya kucibbadela bakamwaandula ada kutegwa bamubikke kapila kakulida (gastrostomy) alimwi bakamwaandula amoyo akumubikka kapila kakuyoyela (tracheostomy) calo icakamupa kuti atanikucikonzyi kwaambaula. Noriko wakapenga kapati akaambo kakuti wakali muntu uuyandisisya kukutauka. Tuli Bakamboni ba Jehova, alimwi Noriko abana besu basimbi bakali kucita mulimo wa Bunakristo wakukambauka iwaciindi coonse. Pele lino Noriko uyoyela mukapila, alimwi ciindi coonse uli mubulo.

Nokuba boobo, eeci kunyina nocimulesya Noriko. Mucikozyanyo ulajanika kumiswaangano ya Bunakristo kali ancinga yabalema iijisi muncini wakuyoyela. Aalo matwi aakwe akasinka, aboobo mwaneesu musimbi ulamulembela zyintu zili mukubandikwa kutegwa awalo agwasyigwe kumapulogilamu. Nokuba kuti Noriko wakaleka kucita mulimo wakukambauka waciindi coonse, uciyiisya bantu mulumbe wamu Bbaibbele kwiinda mukubalembela magwalo kubelesya kkompyuta.—2 Petro 3:13; Ciyubunuzyo 21:1-4.

Tobanamukwasyi toonse tubelekela antoomwe kugwasya Noriko. Bana besu basimbi bakaleka nkobakali kubeleka akujana ncito kumbi kutegwa kabajana ciindi cinji cakugwasyilizya aŋanda. Toonse totatwe tulagwasyanya kucita milimo minji yaaŋanda njaakali kucita Noriko.

Zimwi ziindi mafwumina, Noriko inga uboneka kukatala. Ndilaakuyeeya kumwaambila kuti ‘sunu ulyookezye.’ Pele walo uyanda kukambaukila bantu mulumbe wamu Bbaibbele. Inga ulakkomana kapati ndatalika kumubambila kkompyuta kuti abelesye. Atalika kulemba, ulimvwa kabotu. Ndazyiba mbociyandika ‘kuba azyintu zinji zyakucita mumulimo wa Mwami.’—1 Ba-Korinto 15:58.

Cikozyanyo ca Jason Stuart, awalo uuciswa bulwazi oobu bwa ALS, icilembedwe mu Sinsimuka! yamu January 2006 camugwasya kapati Noriko kuti atatyompwi. Ciindi babelesi bakucibbadela nobakali kuyanda kuzyiba cakali kumupa kukkomana, Noriko wakabaambila kujatikizya cibalo eeci, alimwi twakabapa makopi aacibalo eeci. Mukaintu wangu ulayumizigwa kwiinda mukuyiisya bantu kujatikizya nzyasyoma.

Tulikwetene kwamyaka iili 30, pele mumyaka yotatwe yainda ndatalika kuyandisya bube bwakwe bumwi mbondatakali kubikkila maano. Ndilikkomene kapati kuti ndakamukwata.

 [Kabbokesi/Zifwanikiso izili apeeji 25]

Ikuti Mwana Wafwa

Akaluulwa aba Fernando aba Dilma Freitas, ibakkala ku United States

“Lufwu lwamwana luleta buumba ibutaambiki. Kunyina cintu cicisa kwiinda lufwu lwamwana.”

MWANEESU musimbi ngotwakaulikide kuti Precious, wakafwa mu April 16, 2006. Wakapona buyo kwamazuba aali kkumi. Ida nolyakajisi buyo myezi yotatwe, badokotela bakajana kuti mwaneesu iwakali mwida wakajisi bulwazi bupati ibujatikizya moyo. Mazuba aakutumbuka naakaswena, twakazyiba kuti nokuba kuti akazyalwe kali muzumi, takaponi kwaciindi cilamfwu. Makani aaya akatunyonganya kapati. Twakajisi bana botatwe baumbulu. Cakatukatazya kusyoma kuti mwaneesu muvwanda uyakufwa.

Naakazyalwa Precious, dokotela iwakamupima wakajana kuti wakali abulwazi butajaniki-janiki cakunga akati kabana ibali 5000, ndiza inga kwajanika buyo kuti omwe nguubujisi, bwalo ibwiitwa kuti Trisomy 18. Cakasalala kuti takaponi kwaciindi cilamfwu. Zyakatumana nguzu nkaambo kunyina ncotwakali kukonzya kucita. Calikke buyo ncotwakali kukonzya kucita nkuba anguwe kwaciindi cisyoonto ncaakali kulangilwa kupona. Aboobo, twakacita mbubwenya oobu.

Tulalumba kapati akaambo kakuti twakakonzya kuba a Precious kwamazuba aali kkumi. Muciindi eeci, twakaba acilongwe ciyumu anguwe. Twakali kumulela, twakali kumwaambauzya, twakali kumukumbata, twakali kumumyonta, alimwi twakali kwiinzyanya kubweza zifwoto anguwe kusikila mpoceela. Alimwi twakali kubuzyanya kuti naa ukozyede ni mumukwasyi. Dokotela iwakamupima wakali kuboola kutuswaya kucibbadela abuzuba. Awalo wakali kulila antoomwe andiswe, alimwi wakali kutwaambila kujatikizya mbwaakauside. Wakalemba zifwanikiso zya Precious kutegwa kamuyeeyela mpawo. Andiswe wakatupa comwe.

Mbotuli Bakamboni ba Jehova, tulasyoma ncolyaamba Bbaibbele kuti Leza uyakuleta paradaiso anyika akuti ulayanda kapati kuti akabusye bafwu—kubikkilizya abana bavwanda mbuli Precious. (Jobu 14:14, 15; Johane 5:28, 29) Tulangila buzuba notuyakumulela akumukumbata alimwi. Tulakulwaizigwa kapati lyoonse notumvwa bbala lyakuti “paradaiso.” Kwaciindi cino tulaumbulizyigwa kuzyiba kuti Leza ulamuyeeya Precious alimwi akuti wakaleka kupenga.—Mukambausi 9:5, 10.