Bakubusi Balabuzya

Ino nkaambo nzi ncotuzwangana lyoonse?

Mubukkale butondezyedwe ansi aawa, Rachel wapa kuti kube mazwanga munzila zyotatwe. Sena ulakonzya kuzyibona? Lemba bwiinguzi bwako ansi aabukkale butondezyedwe, mpoonya ulakonzya kulanga mukabbokesi kajisi “Bwiinguzi” ikali kumamanino aacibalo kutegwa ubone naa bwiinguzi bwako buliluzi.

Muuli Bwatatu kumangolezya. Rachel, uujisi myaka iili 17, wamanizya milimo yakwe yaaŋanda alimwi uyanda kulyookezya lino! Wajalula cipekupeku amane wakkala acuuno ncayandisya kapati.

Ucimana buyo kukkala, abalo banyina banjila, alimwi balibonya kuti tabakkomene. “Rachel! Nkaambo nzi ncosowa ciindi kweebela cipekupeku muciindi cakugwasya musyoonto wako kulemba mulimo ngwaapegwa kucikolo? Tomvwi kwaambilwa!”

Kaambila ansi-ansi, Rachel ulaamba, “Mwatalika kale alimwi.”

Banyina baswena afwaafwi akumubuzya kuti: “Rachel, wati nzi?”

Kumwi kabalanga cabukali, Rachel wabaingula kuti, “Taaku baama.”

Lino banyina banyema kapati. Mpoonya balaamba, “Utani kubelesyi majwi aali boobu kulindime!”

Kumane Rachel wavwiila kuti: “Ede andinywe ngomajwi ngomubelesya kulindime?”

Ciindi cakulyookezya camana . . . Mazwanga aambi atalika.

1. ․․․․․

2. ․․․․․

3. ․․․․․

SENA bukkale bwaambwa atala aawa bwakakucitikila kale? Sena ulazwangana lyoonse abazyali bako? Kuti naa mboobo, weelede kukkala ansi akuyeeya cipa kuti kamuzwangana. Ino makani aali buti aapa kuti kamuzwangana? Kkwenyuna ansi aawa aali twaambo tupa kuti kamuzwangana—naa ulembe kaambo kamwi acibeela cakuti “Twaambo tumwi.”

◯ Mbomuzilanga zyintu

◯ Milimo yaaŋanda

◯ Zyakusama

◯ Ciindi cakusika aŋanda

◯ Zyakulikondelezya

◯ Balongwe

◯ Makani aabasimbi naa basankwa

◯ Twaambo tumwi

 Kufumbwa naa makani ngomubandika ajatikizya nzi, kukazyanya kupa kuti yebo—alimwi abazyali bako—mutakkomani. Ulakonzya kuumuna buyo akuliceengezya mbuli kuti ulazizumina zyoonse nzyobaamba bazyali bako. Pele sena Leza uyanda kuti kocita boobo? Peepe. Ncamasimpe kuti Ibbaibbele likwaambila kuti, “lemya uso abanyoko.” (Ba-Efeso 6:2, 3) Alimwi likukulwaizya kuti ujane “lumvwisyo” alimwi akubelesya “nguzu [zyako] zyakuyeeya.” (Tusimpi 1:1-4; Ba-Roma 12:1, NW.) Kuti wacita oobu, cakutadooneka unooamba zyintu cakusinizya, nokuba kuti zimwi banikuzikazya bazyali bako. Nokuba boobo, mumikwasyi mobatobela njiisyo zyamu Bbaibbele, bazyali abakubusi balabandika caluumuno—nokuba kuti tabeendelani muzyintu zyoonse.—Ba-Kolose 3:13.

Ino mbuti mbokonzya kubandika kabotu kutegwa kutabuki mazwanga? Ncuuba kwamba kuti: “Bazyali bangu balaakumulomo. Kayi, lyoonse balo mbobanditalika!” Pele ngooyu mubuzyo ngoelede kulanga-langa: Sena ulaanguzu zyakucinca bamwi, kubikilizya abazyali bako? Mubwini, ujisi buyo nguzu zyakulicinca omwini. Bubotu mbwakuti, ikuti wacita lubazu lwako kutegwa kutabi kunyemezyanya, bazyali bako abalo balangilwa kukkazika moyo akukuswiilila ciindi nojisi cakwaamba.

Atubone ncoelede kucita kutegwa mutazumanani kuzwangana. Kobelesya mizeezo iitobela, kucita boobo kulakonzya kupa kuti bazyali bako bakkomane akaambo kakuti watalika kwaambaula kabotu ambabo—alimwi anduwe—ulakonzya kukkomana.

(Muzeezo: Kkwenyuna aawo aali mizeezo njoelede kubelesya.)

◯ Koyeeya kabotu kotanaingula. Ibbaibbele lyaamba kuti: “Moyo wamululami ulayeeya kabotu mbweelede kuvuwa.” (Tusimpi 15:28) Ikuti kuli wakunyonganya toelede kufwambaana kwaamba kufumbwa caboola mumizeezo pe. Mucikozyanyo, ikuti banyoko bakubuzya kuti: “Ino walekela nzi kusanzya mitiba? Lyoonse tociti mboambilwa!” Ikuti waingula kotaninga yeeya, ulakonzya kwaamba kuti, “Nkaambo nzi ncomunditongooka?” Pele weelede kubelesya nguzu zyako zyakuyeeya. Weelede kuzyiba capa kuti banyoko baambe boobu. Bunji bwaziindi, majwi mbuli aakuti “lyoonse” akuti “tonabuzuba,” taambi kuti mbozibede ncobeni zyintu oobo. Pele majwi aayo atondezya kuti kuli ciliko mumoyo. Ino eeci cikonzya kuba nzi?

Andiza banyoko balinyemede akaambo kakuti babona kuti mulabalekela milimo minji yaaŋanda. Ndiza bayanda buyo kuzyiba kuti mulayanda kubagwasya. Naa, kwaamba masimpe, ambweni ujisi cilengwa cakukaka kubeleka. Kufwumbwa kaambo kabanyemya,  ikwiingula kuti “Nkaambo nzi ncomunditongooka?” tacigwasyi pe—ciletela buyo mazwanga! Muciindi cakwaamba boobo, ulakonzya kwaamba majwi aakonzya kubakkazyika moyo banyoko. Mucikozyanyo, ulakonzya kwaamba kuti: “Ndabona kuti tiimwakkomana baama. Ndilaisanzya mitiba ino-ino aawa.” Kucenjezya: Toelede kubbodola buya. Kwiingula calubomba kulakonzya kupa kuti mutazwangani.

Ansi aawa, lemba kaambo nkobakonzya kwaamba bauso naa banyoko ikakonzya kukunyemya.

․․․․․

Lino koyeeya mbokonzya kwiingula calubomba kutegwa batanyemi.

․․․․․

◯ Koambaula cabulemu. Kwiinda muzyintu zyamucitikila, Michelle waiya mbwakonzya kwaambaula kabotu abanyina. Waamba kuti: “Kufwumbwa naa makani aali buti aapa kuti tuzwangane, Baama ncobatayandi ndijwi lyangu mbolilimvwisya nondaambaula.” Kuti naa mbocibede oobo akuli nduwe, nkokuti weelede kwiiya kwambaula calubomba acakutabinda, alimwi toelede kubalanga cabukali naa kucita zyintu zitondezya kuti wanyema. (Tusimpi 30:17) Kuti naa walimvwa kuti uyanda kunyema, kopaila mubufwaafwi alimwi cakaumu-umu kuli Leza. (Nehemiya 2:4) Pesi, toelede kuba amakanze akuti Leza akugwasye kuti ‘bazyali bako baleke kukutongooka,’ pele kuti ucikonzye kulijata kutegwa makani ataindili kubija.—Jakobo 1:26.

Kolemba ansi aawa, majwi amicito njoelede kweeleba.

Majwi (nzyoamba):

․․․․․

Micito (mboboneka kubusyu ambonyanyaazya mubili):

․․․․․

◯ Koswiilila. Bbaibbele lyaamba kuti: “Mukuvula kwamajwi tamubuli mulandu.” (Tusimpi 10:19) Aboobo weelede kubapa ciindi bauso naa banyoko kuti baambaule, alimwi weelede kubaswiilila nobaambaula. Nobaambaula, weelede kuzima cilimba, kubikka ambali bbuku naa magazini kutegwa ubikkile maano. Toelede kubanjila mukanwa pe. Koswiilila buyo. Bamanizya kwaambaula, ulajana ciindi lino cakubuzya naa kupandulula mboyeeya. Kulubazu lumwi, kuti waba ankazi akuzumanana kwaamba mboyeeya, andiza ulapa buyo kuti zyintu ziindile kubija. Nokuba kuti ujisi zyintu zinji zyakwaamba, eeci andiza ceelede kuba “ciindi cakuumuna.”—Mukambausi 3:7.

◯ Kolilekelela. Cileelela lyoonse kwaamba kuti “Mundijatile” ikuti naa wacita cintu cimwi capa kuti muzwangane. (Ba-Roma 14:19) Alimwi ulakonzya kwamba kuti wausa akaambo kakutamvwana kuliwo. Kuti naa tocikonzyi kukanana abalo mulomo mpande, kosola  kupandulula mbolimvwa mukagwalo. Mpoonya, ulakonzya kubambulula bukkale buli boonse bwapa kuti kube mazwanga. (Matayo 5:41) Mucikozyanyo, ikuti mazwanga atalisyigwa akaambo kakutabeleka mulimo umwi waaŋanda, nkaambo nzi ncotaubeleki buyo mulimo ooyo kutegwa bazyali bako bakkomane? Nokuba kuti toukkomanini mulimo ooyo, tee kayi inga cabota kuti waubeleka buyo kwiinda kuzwangana abazyali bako?—Matayo 21:28-31.

Mukuya kwaciindi, kumana mazwanga naa kucita zyintu zikonzya kupa kuti kamutazwangani, kuyoopa kuti kamupona kabotu. Mubwini, Ibbaibbele lyaamba kuti muntu “siluzyalo ulaligwasya mwini.” (Tusimpi 11:17) Aboobo koyeeya mpindu njokonzya kujana ikuti wacita lubazu lwako kutegwa ucesye mazwanga akati kabazyali bako anduwe.

Bantu bali mumikwasyi iikkala kabotu balazwangana zimwi ziindi, pele balaamanizya mazwanga caluumuno. Ikuti watubelesya twaambo twabandikwa mucibalo eeci, uyootalika kubandika twaambo tukatazya abazyali bako kakutakwe kuzwangana.

Zibalo zimwi zyakuti “Bakubusi Balabuzya” zilakonzya kujanwa a Intaneti akkeyala ya www.watchtower.org/ype

ZYAKUYEEYESYA

● Ino nkaambo nzi beenzinyoko bamwi ncobakukkomanina kukazyanya?

● Ino nkaambo nzi Jehova ncabona muntu sinkazi kuti mufubafuba?—Tusimpi 20:3.

[Kabbokesi/Zifwanikiso izili apeeji 13]

NYYOBAAMBA BAKUBUSINYOKO

“Nokuba kuti ndilabeleka alimwi ndilalyuulila zyintu ziyandika, ndilizyi kuti ndicikkala muŋanda yabaama aboobo ndeelede kubamvwida. Bandibamba kwamyaka minji, aboobo nobabikkila kapati maano kuzyintu nzyondicita—mbuli ciindi ncondisika aŋanda—ndilabamvwisya kapati.”

“Ikuti mebo abazyali bangu twaba amizeezo iindene mukaambo kamwi, tulakapailila akuvwuntauzya makani aajatikizya kaambo aako, alimwi akukabandika. Ikucita boobo kupa kuti tube amuzeezo omwe. Lyoonse notumubikkilizya Jehova mumakani aaya, zyintu zyeenda buyo kabotu.”

[Zifwanikiso

Daniel

Cameron

[Kabbokesi kali apeeji 15]

BWIINGUZI

1. Kubbodola (“Mwatalika kale alimwi”) kwakaile kupa kuti baama baindile kunyema.

2. Rachel wakapa kuti mapenzi aindile akaambo kakuti wakali kulibonya kuti wanyema (mbwaakali kubalanga cabukali).

3. Bunji bwaziindi, ikwiingula cabukali (“Ede andinywe ngomajwi ngomubelesya kulindime”).

[Kabbokesi kali apeeji 15]

KUBAZYALI

Amulange-lange bukkale bwaambwa kumatalikilo aacibalo eeci. Sena inga mwazizyiba nzyobakacita banyina Rachel izyakapa kuti bazwangane amwanaabo? Ino ncinzi ncomukonzya kucita kutegwa mutani kuzwangani amwaneenu mukubusi? Nzila eezyi zitobela inga zyamugwasya:

Mutani kwaambi twaambo twakuyeeyela mbuli twakuti, “Lyoonse ula . . .” naa kuti “Tona buzuba . . .” Majwi aali boobo apa buyo kuti mwaneenu anyeme. Masimpe ngakuti mulakonzya kuciindizya kwaambaula, alimwi mwaneenu ulizyi oobo. Mwaneenu ulakonzya kuzyiba kuti twaambo twakuyeeyela ooto tulaboola akaambo kabukali bwenu kutali akaambo kakulubizya kwakwe.

Muciindi cakubelesya majwi aatondezya kuti mumupa mulandu mbuli aakuti, “yebo,” amumupandulwide mbomulimvwa akaambo kakulilemeka kwakwe. Mucikozyanyo inga mwaamba kuti, “Ciindi no . . ., ndilimvwa . . .” Amuzyibe kuti mwaneenu weelede kuzyiba mbomulimvwa. Kuti mwamwaambila mbomulimvwa, mwaneenu unoomumvwida.

Mutabandiki kamunyemede, amulindile kusikila bukali bwenu bumane nokuba kuti ikucita boobo tacili cuuba-uba. (Tusimpi 10:19) Ikuti naa milimo yaaŋanda njiipa kuti kamuzwangana, amwaabandike makani aaya amwaneenu. Amulembe nzyomuyanda kuti acite, alimwi ikuti kakuyandika kucita boobo, amumwaambile cisubulo ncomukonzya kumupa kuti watacita ncaambilwa. Amumuswiililisye napandulula mbwazilanga zyintu nokuba kuti mulimvwa kuti ncaamba taciluzi. Bakubusi banji balakkomana ciindi nobaswiililwa abazyali babo kwiinda ciindi nobapegwa malailile manji.

Mutafwambaani kuyeeya kuti mwaneenu wanjilwa muuya wabuzangi, amuzyibe kuti bunji bwazyintu nzyacita zitondezya kuti uyaabukomena. Mwaneenu ulakonzya kukazya nomubandika kaambo kamwi kutegwa atondezye kuti uyaabukomena. Pele mutabi acilengwa cakukazyanya anguwe. Mutalubi kuti mumupa ciiyo mwaneenu ciindi nabona mbomucita ikuti naa kuli wamunyemya. Ikuti kamukkazika moyo alimwi akuba basicamba, mulakonzya kupa cikozyanyo cibotu kumwaaneenu.—Ba-Galatiya 5:22, 23.

[Cifwanikiso icili apeeji 14]

Kukazyanya abazyali bako cili mbuli kubelesya nguzu kulunduka amuncini wakulundukila wamana taaku ankoya pe