Mbomukonzya Kulyeendelezya Mukubelesya Ciindi

“Zyintu zyoonse zilijisi ciindi cazyo.”—Mukambausi 3:1.

KUTEGWA mukonzye kucita zyintu ziyandika kapati, mweelede kuzizyiba zyintu eezyi. Eeci cilakonzya kumuubila ikuti kamuzyi zyintu ziyandika kapati mubuumi, mbaakani zyenu alimwi azyintu nzyomweelede kucita kutegwa muzizuzikizye.

Aboobo, cakusaanguna mweelede kuzyiba zyintu ziyandika mubuumi. Mulakonzya kulemba cintu acintu ncomwayeeya kuti cilayandika, mbuli mukwasyi, balongwe, kubeleka canguzu, lwiiyo, kuzwidilila muzyintu nzyomucita, kulibonya kabotu, mali, lukkomano, cikwati, lubomba, buumi naa buponi bubotu bwakumubili alimwi akumuuya. Mpoonya amulibuzye kuti, ‘Akati kazyintu eezyi, ino nziizili ziyandika kapati mubuumi bwangu?’

Mwamana, amulange-lange mbaakani zyoonse nzyomuyanda kuzuzikizya mubuumi. Ino ndwiindano nzi luliko akati kazyintu ziyandika kapati mubuumi alimwi ambaakani? Mucibalo eeci, tulakonzya kwaamba kuti zyintu nzyotuyandika tazimani pele mbaakani zilakonzya kuzuzikizyigwa, naa kumanina limwi buya.

Ino nimbaakani nzi nzyomukonzya kulibikkila? Sena muyanda kuti kamujana ciindi cakuba amukwasyi wenu? Kujana mulimo weelede? Kusumpula luzyibo ndomujisi mukucita mulimo ngomukkomanina ciindi nomulyookezya? Naa kuyandaula umwi mupya? Kuba abube bumwi? Kuunka kuya kulyookezya? Kubala bbuku? Naa kulemba bbuku?

Mpoonya, amusale mbaakani akati kazyeezi nzyomubona kuti zilayandika kapati. Amubone masimpe kuti mbaakani nzyomwasala zileendelana azyintu ziyandika kapati mubuumi bwenu. Mucikozyanyo, ikuti mwalibikkila mbaakani yakuti mube alubono lunji kapati, pele muyandika kuti kamujana ciindi cinji cakuba amukwasyi  wenu, andiza kucita boobu inga kwapa kuti mulete buyumu-yumu mubuumi bwenu.

Lino, kumbaakani nzyomwasala, amulange-lange zyintu zikonzya kumugwasya kuti muzuzikizye mbaakani aimwi. Mucikozyanyo, ikuti mbaakani yenu yomwe njakuti mukoke-koke asyoonto, kucita zisobano zinyanyaazya mubili kulakonzya kumugwasya kuti muzwidilile.

Ino Mbuti Kulemba Zyintu Eezyi Mbokukonzya Kumugwasya?

Ikuti naa mbaakani zyenu zileendelana azyintu ziyandika kapati mubuumi bwenu alimwi akuti mucita zyintu zipa kuti muzuzikizye mbaakani zyenu, nkokuti zyintu ziya kumweendela kabotu mubuumi bwenu. Muya kujana kuti mucita zyintu ziyandika kapati mubuumi bwenu. Mubwini, eeci tacaambi kuti tamweelede kubikkila maano kuzyintu nzyobayandika bantu bambi. (Ba-Filipi 2:4) Pele caamba kuti muya kucikonzya kuzyiba alimwi akukaka kucita zyintu zitakwe mpindu mubuumi.

Kwaamba masimpe, kunakuli buyumu-yumu. Kuli milimo imwi iitayandiki kapati pele mulawo buya kuti icitwe. Milimo eeyi ilakonzya kumulesya kucita zyintu ziyandika kapati mubuumi bwenu. Mulakonzya kusikilwa mapenzi naa ntenda cakutayeeyela. Alimwi kucinca ooku inga kwapa kuti bubambe mbomubikkide bunyonganizyigwe. Pele kwiinda mukujana ciindi cinji cakucita zyintu ziyandika kapati mubuumi, muya kucikonzya alimwi kubelesya kabotu ciindi cenu akulyeendelezya mubuumi.

 [Kabbokesi kali apeeji 28]

SENA MINCINI YAMALAITI ILAKONZYA KUMUPA KUTI KAMUBELESYA KABOTU CIINDI?

Bantu bamwi ilabagwasya munzila eeyi, pele bambi ibasowela buyo ciindi. Mucikozyanyo, kancini kamwi nkobaamba mucingisi kuti, personal digital assistant (PDA), kalakonzya kuba akkalenda, mulongo wamanamba aaluwaile alimwi amakkeyala, mulongo wazyintu zyeelede kucitwa, kkompyuta, busena bwakulembela bantu tugwalo tufwaafwi kuncito, kufwotola , alimwi akutambula magwalo naa kutuma magwalo aa Intaneti. Kancini aaka kalakonzya kumugwasya kuti kamubelesya kabotu ciindi ikuti kakatondezya zyintu nzyomweelede kucita aciindi ceelede alimwi akuti, kamukatolelezya kufwumbwa nkomwaunka. Nokuba boobo, inga kamusowela ciindi ikuti kamwiile kukatyanka-tyanka nokuba kuti kunyina zyamaano nzyomusola kucita.

Muzeezo: Amuvwuntauzye nomutanaakuula. Kuti, muncini uubelesya malaiti kaufwaafwa, kuya kuyandika ciindi cilamfwu kuti ubambwe. Kuyungizya waawo, ikuti kamuli bantu ibayanda kusowa ciindi awalo muncini uyakucita mbubwenya. Aboobo, ikuti kamuujisi muncini ooyu, amuubelesye kabotu kutegwa mutasowi ciindi.

[Cifwanikiso icili apeeji 27]

Sena mulakonzya kujana ciindi cakucita zyintu ziyandika kapati?