Bakubusi Balabuzya

Sena koonana kulakonzya kuyumya cilongwe cesu?

Heather a Mike balisyabene kwamyezi buyo yobile, pele walo Heather ulimvwa mbuli kuti bakazyibene kaindi. Balatuminana tugwalo twaaluwaile lyoonse, balabandika aluwaile kwamawoola manji kapati alimwi balakonzya kuzyiba nzyayanda kwaamba mweenzinyina nokuba kuti taninga manizya kwaambaula. Pele lino nciindi camasiku, balikkede mumootokala wiinvwi, anze kuli mumuni wamwezi, Mike uyanda kuti bacite cintu cimwi.

Mumyezi eeyi yobile yainda, Mike alimwi a Heather, kunyina nobakacita cintu cimwi kunze lyakujatana kumaanza alimwi akumyontana kwaciindi buyo cisyoonto. Heather tayandi kuti bacite zyintu ziinda aali zeezyo nzyobakali kucita. Pele alimwi tayandi kuti cisyabo cabo cimane. Kunyina musankwa uumukkomanisya mbuli yooyu. Ulalyaambauzya mumoyo kati, ‘Alimwi buya mebo a Mike tulisyabene alimwi tulayandana kapati, . . . sena tabusyi oobo?’

ULAKONZYA kuyeeyela zyintu nkozitozya mubukkale oobu. Pele ndiza ncotakonzyi kuzyiba ncakuti, koonana kulakonzya kupa kuti zyintu zibacincile, Mike alimwi a Heather—alimwi kutali munzila mbotu. Kolanga-langa kaambo ncocili boobu:

Ikuti wacita zyintu ziteendelani amulawo wanguzu zikwelelaansi naa nguzu zipa kuti cintu cafwusigwa mujulu ciwide ansi, uyakujana cisubulo cakutautobela. Alimwi eeci ncamasimpe akuti watyola mulawo uujatikizya bantu mbobeelede kulilemeka, mbuli yooyo iwaamba kuti: “Mulilesye kubwaamu.” * (1 Ba-Tesalonika 4:3) Ino ncisubulo nzi ciya kuboola akaambo kakutatobela mulawo ooyu? Ibbaibbele lyaamba kuti: “Sibwaamu ulabisizya mubili wakwe mwini.” (1 Ba-Korinto 6:18) Ino aaka  kaambo nkamasimpe buti? Kosola kulemba zyintu zyotatwe izikonzya kucitikila bantu iboonana nokuba kuti tabana kwatana.

1. ․․․․․

2. ․․․․․

3. ․․․․․

Lino kolanga nzyoolemba. Sena wazibikkilizya zyintu zili mbuli malwazi aayambukila kwiinda mukoonana, mada aamusyokwe, naa kunyonganya cilongwe muntu ncajisi a Leza? Mubwini eezyi nzyintu zitakkomanisyi zyalo zikonzya kucitikila muntu uuli woonse uutyola mulawo wa Leza uujatikizya bantu mbobeelede kulilemeka mumakani aabwaamu.

Nokuba boobo, ulakonzya kusunkwa. Ulakonzya kuyeeya kuti, ‘kunyina ciya kundicitikila.’ Kunyina buya abubi kayi boonse baloonana. Beenzinyoko kucikolo balalisumpula akaambo kakuti baloonana alimwi baboneka kuti tabapengede mumizeezo. Ambweni, mbuli Heather waambwa mubukkale buli kumatalikilo aacibalo, ulimvwa kuti koonana kulakonzya kuyumya cilongwe cenu amuntu ngosyabene limwi. Alimwi toyandi kusekwa akaambo kakuti toningalede amusankwa. Sena taciindi kubotu kuzumina buyo?

Kotana! Cakusaanguna, tabali boonse ibacita boobo. Masimpe, ndiza wakabala makani aagambya aatondezya kuti bakubusi banji kapati baloonana. Mucikozyanyo, buvwuntauzi bumwi ibwakacitwa ku United States butondezya kuti ciindi nobaya kumana cikolo, bakubusi bobile akati kabakubusi botatwe mucisi eeci bakatalika kale koonana. Pele eeci alimwi caamba kuti mukubusi omwe akati kabakubusi botatwe—mweelwe mupati-pati—taciti oobo. Lino, ino mbuti kujatikizya baabo ibacita boobo? Basikuvwuntauzya bajana kuti bunji bwabakubusi iboonana balacitikilwa penzi lyomwe naa manji akati kayaaya aatobela.

Penzi Lyakusaanguna: KUUSA. Bakubusi banji iboonana nokuba kuti tabakwetene baamba kuti nobakamana koonana bakausa.

Penzi Lyabili: KUTASYOMANA. Bamana koonana, boonse bobile batalika kulizinza akuyeeya kuti, ‘Ino ngwani umbi ngwakoonana limwi kunze lyandime?’

Penzi Lyatatu: KUTASYOMEKA. Bamana koonana, musankwa ulangilwa kumuleka musimbi wakwe alimwi akuyandaula umbi.

Penzi Lyane: KUTYOMPWA. Ansi amoyo, musimbi uyanda muntu uukonzya kumukwabilila kutali kumubelesya.

Kuyungizya waawo, kolanga-langa makani aaya: Basankwa banji bakaamba kuti tabakonzyi kukwata  musimbi ngobakoona limwi. Ino nkaambo nzi? Nkaambo kakuti bayanda muntu uulilemeka kapati!

Sena eeci cakugambya—andiza kukunyemya? Ikuti naa mbocibede oobu, kunyina makani naa uli musimbi naa musankwa, koyeeya kuti: Zyintu zicitika naa zitobela ikuti bantu batakwetene boonana ziliindene azyeezyo zitondezyegwa muzisobano zyaacipeku-peku. Muzisobano eezyi batondezya koonana kwabakubusi kuti ncintu cibotu alimwi akuti bajisi luyando lwini-lwini. Pele yebo kocenjela! Aabo ibasola kukuyunga kuti moonane bayanda buyo kulikkomanisya beni. (1 Ba-Korinto 13:4, 5) Sena muntu uukuyanda ncobeni ulakonzya kukubikka muntenda yakuba amapenzi aajatikizya mizeezo alimwi aambi aaboola akaambo kakoonana kwabantu ibatakwetene? (Tusimpi 5:3, 4) Alimwi sena muntu uukulanganya ncobeni ulakonzya kukusungilizya kuti mucite zyintu zikonzya kunyonganya cilongwe cako a Leza?—Ba-Hebrayo 13:4.

Masimpe ngakuti, ikuti wazumina koonana kotaninga kwatwa, ulalisampula alimwi nkusowa cintu ciyandika kapati. (Ba-Roma 1:24) Nkakaambo kaako banji balatyompwa alimwi balausa nobamana kucita boobu, balimvwa mbuli kuti akaambo kabuyamba bapa kuti cibeela camubili wabo cimwi ciyandika kapati cisweeke! Utalekeleli kuti eeci cikucitikile. Ikuti muntu usola kukoongelezya kuti moonane kwiinda mukukwaambila kuti, “Noolikundiyanda noozumina,” komvwiila cakusinzya kuti, “Noolikundiyanda, nootandilomba kuti toonane!”

Mubili wako tacili cintu cakusobanya. Kotondezya kuti uli muntu uukonzya kutobela mulawo wa Leza wakuti utantamuke kubwaamu. Mpoonya buzuba bumwi waakukwatwa naa kukwata, inga mwaakoonana. Alimwi uyakukukkomanina kapati koonana mbokunga aciindi aawa tokalibiliki naa kutyompwa alimwi akuyoowa kuti uyakucitikilwa mapenzi aaboola akaambo kakoonana kutali mumulawo.—Tusimpi 7:22, 23; 1 Ba-Korinto 7:3.

Zibalo azimbi zijisi mutwe wakuti “Bakubusi Balabuzya” zilakonzya kujanwa aa Intaneti akkeyala ya www.watchtower.org/ype

Bupanduluzi buyungizidwe

ZYAKUYEEYESYA

● Nokuba kuti koonana kwabantu batakwetene kulakonzya kulibonya mbuli kuti ncintu cibotu, ino nkaambo nzi ncoteelede kucita boobo yebo?

● Ino uyakucita buti kuti muntu wakwaambila kuti moonane?

[Kabbokesi/Zifwanikiso izili apeeji 21]

NZYOBAAMBA BAKUBUSINYOKO

“Kwaamba buyo kuti tandiyandi tacimukasyi muntu kusoleka alimwi. Ciya mbuli mbomwaambila. Kuti cakulibombya waile kuti tandiyandi pele kolimvwisya kuti uladooneka, cilakonzya kulibonya mbuli kuti ulayanda. Weelede kwaamba cakusinizya!”

“Kwaamba buyo kuti tandiyandi kanji-kanji tacibeleki pe. Nokuba kupandulula nzyosyoma cimwi ciindi inga takugwasyi. Ndizyi bantu bamwi balidunda kuti bakacikonzya ‘kumoongelezya’ Munakristo kuti acite bwaamu. Zimwi ziindi uyandika buyo kuzwa akumusiya. Cilakatazya kucita boobo, pele cilagwasya.”

“Mboli Munakristo ulijisi bube bubotu bukonzya kupa kuti bamwi kabayanda kuba andiwe. Aboobo weelede kucenjela akukaka kuti umwi wakulomba kuti mucite cintu citaluzi. Kobukwabilila bube oobo. Utayungwi!”

[Pictures]

Diana

James

Joshua

[Caption on page 22]

MUZEEZO

[Caption on page 22]

Caboola kumakani aakulilemeka noli abantu mboindene limwi zizo, mulawo mubotu kutobela ngwakuti: Ikuti kacili cintu ncotayandi kuti bazyali bako bakubone kocita, nkokuti toelede kucicita.

[Kabbokesi kali apeeji 22]

KOMUTONDEZYA BUBE BUBOTU!

Ikuti naa ulisyabide, sena ulamulanganya ncobeni musimbi wako? Ikuti naa mboobo, komutondezya kuti . . .

● ulakonzya kutobela milawo ya Leza

● ulimusongo aboobo tolibikki mubukkale bukonzya kupa kuti usunkwe

● ulamuyanda alimwi ulamubikkila maano

Ikuti wacita oobu, musimbi wako awalo ulangilwa kuti uyakulimvwa mbuli musimbi muna Sulamiwe, iwakaamba kuti: “Muyandwi wangu nguwangu, ambebo ndi wakwe.” (Lwiimbo Lwa Solomoni 2:16) Mubufwaafwi, uyakukusyoma!

Kobala Tusimpi 22:3; 1 Ba-Korinto 6:18; 13:4-8.

[Kabbokesi kali apeeji 22]

Koonana kotaninga kwatwa naa kukwata nkutabelesya kabotu cipego ca Leza. Cili mbuli kubweza cifwanikiso cibotu ncaakupa muntu umwi alimwi akucibikka amulyango kutegwa kolipukuta kumaula wayanda kunjila muŋanda