Mbomukonzya Kuubya-ubya Bukkale Bwenu

KUTEGWA mukonzye kupona buumi buuba-uba, muyandika kukkala ansi akuyeeya kabotu. Jesu wakakankaizya kaambo ncociyandika kucita boobo. Wakabuzya kuti: “Ino nguuli akati kanu, uuyanda kuyaka ŋanda ndamfu, uutasaanguni kukala sansi, abale mali ngati yasye ŋanda, abone na ulijisi aakwiizyulizya?” (Luka 14:28, 29) Kutobela njiisyo eeyi inga kwayandika kuti ‘mwaabale mali’ ngomujisi mpoonya akulemba mulongo wazyintu ziyandika izikonzya kukkwana mumali aayo kutegwa mutanjili munkongole. Ino mbuti mbomukonzya kucita boobo? Amusole nzila eeyi:

Mwavwola, amwaapaule kabotu mali akuula naa kubbadelela zyintu ziyandika aciindi aawo akuyobola ngomuyoobelesya kumbele. (Amubone kabbokesi  apeeji 8.) Ikuti kamulemba mulongo  wazyintu ziyandika kubbadelela naa kuula, mulakonzya kubona nkwaamanina mali eenu alimwi mulazyiba mweelwe wamali ngomusowa kuzyintu zinyina mpindu. Eeci inga camugwasya kucesya zyakuulaula.

Ikutegwa kamukonzya kulemba mulongo weelede wazyintu ziyandika, amutobele nzila eezyi.

 Kuula Zyintu Camaano

Ba Raúl nowakabamanina mulimo, bakaintu babo ba Bertha, bakacinca mbobakali kuula zyintu. Baamba kuti: “Ndakatalika kuula zyintu muzintoolo mobasambala zyintu zitaduli.” Njeeyi aimbi mizeezo:

● Amuule zyakulya nzyomunoolya ansondo nkobasambala zyintu amuulo ulaansi.

● Amuule zyakulya ziyandika akulijikila nobeni.

● Kuti naa kuli zyintu zyajolwa aansi muulo, amuulile limwi zinji akuyobola.

● Amuule zinji, pele mweelede kucenjela kuti zitavwulisyi cakunga zyaakwiile kunyonyooka buyo.

● Amucesye mali aakuula zisani kwiinda mukuula zyasalaula.

● Kuti kacikonzyeka kamuula kumasena nkomuzyi kuti zyintu taziduli.

● Amucesye zyakuulaula. *

Amulembele Limwi

Ba Fred bakaamba kuti: “Twakatalika kulemba mulongo wazyintu ziyandika. Aboobo ndakalizyi zyintu zyakali kuyandika kubbadelela mpoonya-mpoonya alimwi amali ngotwakeelede kubelesya kusikila kumamanino amwezi.” Bakaintu babo, ba Adele, bakaamba kuti: “Lyoonse ndakalizyi mali ngondakeelede kubelesya ndaunka kukuula zyintu. Zimwi ziindi nindakali kuyanda kuulila bana zyintu naa zyakubelesya muŋanda, kwakali kunga ndalanga mulongo ngotwakalemba ndati ‘pe mali taakookwana, tuyakuzyuula buyo mwezi uuboola.’ Mulongo ooyu wakali kundigwasya kapati.”

Kamutanaula Cintu, Amuyeeyesye

Lyoonse kamulibuzya kuti: ‘Sena cintu eeci cilayandika ncobeni? Sena cakaindi camana ncobeni naa ndiyanda buyo cipya?’ Ikuti kacitali cintu ncomubelesya abuzuba, sena inga tiicagwasya kubbadela buyo kuti mubelesye cabantu kwiinda kuti muule cenu? Ikuti naa mwabona kuti mulalangilwa kucibelesya ziindi zinji, sena inga cagwasya kuula buyo cakabelesyegwa kale icicili kabotu muciindi cakuula cipya?

Nokuba kuti nzila eezi zilakonzya kulibonya mbuli kuti tazigwasyi, zilakonzya kugwasya kapati ikuti naa zyatobelwa. Kaambo kapati nkakuti, ikuti mwalizyibizya kwaabelesya kabotu mali mutuntu tusyoonto-syoonto, muyoocikonzya kwaabelesya kabotu amuzyintu zipati.

Amube Bankutwe

Muyandika kubelesya bupampu kutegwa muleke kusowa mali kuzyintu zitayandiki kapati. Mucikozyanyo, ba Adele bakaamba kuti: “Twakajisi myoota yobile, pele yomwe twakayuulisya alimwi twaatalika kweendela antoomwe mumukwasyi naa abambi bantu. Kutegwa tutasowi mali manji kuula mungwimba, twakali kucitila limwi zyintu zinji mulweendo lomwe. Mali twakali kwaabelesya buyo kuula naa kubbadelela zyintu ziyandika ncobeni.” Inzila zitobela azyalo inga zyamugwasya kuba bankutwe:

● Amulilimine cisyu.

● Kamutobela malailile aabasikupanga zyintu nzyomubelesya kutegwa zitafwambaani kufwa.

● Kamucinca zisanu zyacipaale mbomwasikila buyo aŋanda kutegwa kazilibonya kabotu lyoonse akuti zitamani kufwambaana.

Mutalizanduli

Bantu banji balalizandula ikuti bagusyigwa mulimo. Pele ba Fred kunyina nobakacita oobo pe. Bakagwasyigwa kapati abamukwasyi wabo. Baamba kuti: “Twakaiya kwaabilana zyintu alimwi eeci cakatupa kukamantana. Twakali kulimvwa kuti ‘eeli ndipenzi lyesu toonse.’”

Ba Fred alimwi bakayumizigwa a Banakristonyina nobakali kuswaangana lyoonse ambabo ku Ŋadna ya Bwami ya Bakamboni ba Jehova. Baamba kuti: “Kumamanino aamiswaangano ya Bunakristo, ndakali kulimvwa kukulwaizigwa. Bantu boonse bakali alubomba. Akaambo kakuti bakali kutugwasya alimwi akutukulwaizya, twakabona kuti tatuli tolikke pe.”—Johane 13:35

Lusyomo Mbolugwasya

Kugusyigwa milimo kwapa bantu banji kukalala akulimvwa kuti ibakabagusya milimo bakabaunina. Ba Raúl, ibaambwa muzibalo zyainda, bakagusyigwa milimo cakutayeeyela ziindi zyobile, kusaanguna mucisi cabo ca Peru mpoonya lwabili mudolopo lya New York. Nobakagusyigwa lwabili, bakati: “Mazuba aano, kunyina cintu nociba comwe muntu ncanga wasyoma munyika eeyi.” Kwamyezi iili mbwiibede, cakaala kujana mulimo. Ino ncinzi cakabagwasya kuti baliyumye? Bakaamba kuti: “Ndakayumya cilongwe cangu a Leza alimwi ndakazyiba kuti ndakeelede kusyoma buyo nguwe.”

Ba Raúl Mbaakamboni ba Jehova, alimwi ikubala Bbaibbele kwakabapa kumusyoma kapati Taateesu wakujulu siluyando iwakasyomezya kuti: “Nsikwe nenti kamulekelezye nokuba kuyoomuleka buyo pe, pe.” (Ba-Hebrayo 13:5) Buumi bwakayuma. Baamba kuti: “Lyoonse twakali kupaila kuti Leza atupe nzyotwakali kuyandika alimwi twakaiya kumulumba akaambo kazyintu nzyatupa.” Bakaintu babo ba Bertha bakayungizya kuti: “Zimwi ziindi ndakali kulibilika kapati kuti naa bumwi buzuba balumi bangu bayoojana mulimo. Nokuba boobo, twakabona kuti Jehova wakali kuyiingula mipailo yesu kwiinda mukutupa zyintu zyakali kuyandika buzuba abuzuba. Nokuba kuti aciindi aawa tiitwakajisi mali mbuli ngotwakajisi kaindi, lino twakali kupona buumi buuba-uba.”

Mbwaanga ba Fred Mbaakamboni ba Jehova, ikubala Bbaibbele kwakabagwasya mubukkale oobu bukatazya. Bakaamba kuti: “Zimwi ziindi, inga tuyeeya kuti imulimo, cuuno caatala amulimo naa mali manji zilakonzya kutukwabilila. Pele ndakabona kuti Jehova Leza alikke nguukonzya kutukwabilila ncobeni akuti ikuba acilongwe anguwe ncecintu cipati.” *

Bupanduluzi buyungizidwe

Majwi aakwelelezya sikubala aali apeeji 9]

“Lyoonse twakali kupaila kuti Leza atupe nzyotwakali kuyandika alimwi twakaiya kumulumba akaambo kazyintu nzyatupa”

 [Kabbokesi/Cifwanikiso icili apeeji 8]

 Mbomukonzya Kulemba Mulongo Wazyintu Ziyandika Kuula

(1) Amulembe mweelwe wamali ngomubelesya kuula zyintu ziyandika amwezi. Amulembe akuyobola pepa litondezya mweelwe wamali ngomwabelesya mumwezi omwe kuula zyakulya, kubbadelela ŋanda, kubbadelela meenda amalaiti, kubambya mootokala alimwi azyintu zimwi ziyandika. Kuli zeezyo zibbadelwa amwaka, mweelede kujana mweelwe waakati-kati mumyezi iili 12.

(2) Amubikke ziyandika kubbadelelwa muzibeela-beela. Zyakulya, ŋanda, mootokala, mali akweendela alimwi azimwi buyo.

(3) Amali ngomujisi amubalile ngomweelede kubelesya amwezi mucibeela cilicoonse. Kumali aabbadelwa amwaka, “amubalile” kuti muzyibe ngomweelede kubikka ambali amwezi.

(4) Amulembe mweelwe wamali woonse ngobavwola banamukwasyi. Amali aayo amugusye aayelede kubbadelela zyintu mbuli mitelo. Mpoonya acaala amwaayezyanisye amweelwe wamali akuula akubbadelela zyintu ziyandika.

(5) Amwezi amubikke ambali mali aakkwana kuula ziyandika mucibeela-acibeela. Ikuti naa mubelesya mali kwaagama, nzila nguba-uba njakubelesya mamvwulupu alembedwe cibeela acimwi. Ciindi aciindi kamubikka mali mumvwulupu yeelede aayandika kuula naa kubbadelela zyintu ziyandika kweelana acibeela eeco.

Kucenjezya: Kuti kamubelesya kakkaadi kamuzumizya kukweleta zyintu, mweelede kucita oobo camaano! Banji banjila mupenzi lyamali akaambo kakuula zyintu kwiinda mukukweleta.

Cifwanikiso

(Kutegwa mubone bwini mbwaakkede mabala, amubone bbuku lini)

Mali Ngomuvwola Amwezi

MALI NGOMUVWOLA AMWEZI K MALI AAMBI K

MALI OONSE NGOBAVWOLA BAMWI MBOMUKKALA LIMWI K MALI OONSE ANTOOMWE

Mali Aayandika Mali Aabelesyegwa

Amwezi Amwezi

K․․․․․ Kubbadelela Ŋanda K․․․․․

K․․․․․ Insyuwalensi/Mitelo K․․․․․

K․․․․․ Kubbadelela Zyintu Mbuli Meenda Amalaiti K․․․․․

K․․․․․ Mootokala K․․․․․

K․․․․․ Zyakulikondelezya/Kuswaya K․․․․․

K․․․․․ Luwaile K․․․․․

K․․․․․ Zyakulya K․․․․․

K․․․․․ Zyintu Zimbi K․․․․․

MALI OONSE AAYANDIKA MALI OONSE AABELESYEGWA

K․․․․․ K․․․․․

Amweezyanisye Mali Ngomuvwola Angomubelesya

MALI NGOMUVWOLA AMWEZI K․․․․․

AMUGUSYE− MALI ACAALA

MALI NGOMWABELESYA AMWEZI K․․․․․ K․․․․․