Ncolyaamba Bbaibbele

Ino Nkaambo nzi Leza Ncatamunyonyooni Diabolosi?

NIMWALI kukonzya kumana mapenzi aabantu, sena inga mwacita oobo? Basikugwasya bantu bacitikilwa ntenda balafwambaana kuunka kubusena kwacitikila ntenda kutegwa bagwasye bantu balicisa alimwi akufwutula bantu mbobatazyi. Aboobo, umwi ulakonzya kubuzya kuti, ‘Ino nkaambo nzi Leza tafwambaani kumunyonyoona Diabolosi, walo uupa kuti bantu kabapenga kapati?’

Kutegwa mubuzyo ooyu wiingule, amweezeezye kuti kuli mulandu uubetekwa kunkuta. Sikujaya muntu, walo uyanda kuti mulandu umane, waamba kuti mubetesi tasyomeki. Aboobo, bakamboni banji balaitwa kutegwa bape bumboni bwabo.

Mubetesi ulizyi kuti nzila yakweendelezya makani aaya ilaleta buyumu-yumu, aboobo uyanda kuti babandike mulandu cakufwambaana kutegwa baumanizye. Pele, wayeeya kuti kutegwa baukosole kabotu mulandu ooyu alimwi kutegwa kube nzila mbotu yakweendelezya mulandu mbuli yooyu kumbele, ibajatikizyidwe mukaambo aaka beelede kupegwa ciindi cakupandulula mulandu wabo.

Ino cikozyanyo eeci ceendelana buti akukazya Diabolosi—uutegwa “simwaaba,” “imuzoka,” a “Saatani”—nkwaakaamba kujatikizya Jehova, “Mupatikampatila atala anyika yoonse”? (Ciyubunuzyo 12:9; Intembauzyo 83:18) Ino mubwini Diabolosi nguni? Ino ntwaambo nzi ntwaamubejelezya Jehova Leza? Alimwi, ino Leza uyoomunyonyoona lili Diabolosi?

Nzila Mbotu Yakweendelezya Milandu Kumbele

Kumatalikilo ooyo wakazooba Diabolosi wakali muntu wa muuya uulondokede, wakali  umwi wabangelo ba Leza. (Jobu 1:6, 7) Walo wakalicita mwini kuba Diabolosi ciindi naakaba amuuya wabulyato wakuyanda kukombwa abantu. Aboobo wakakazya nguzu zya Leza zyakweendelezya akunyansya Leza kuti teeleli kuswiililwa. Walo wakati bantu babelekela Leza lilike ikuti wabalongezya. Saatani wakati bantu boonse “bayoosinganya” Leza wabo kuti naa baba abuyumu-yumu.—Jobu 1:8-11; 2:4, 5

Kutegwa aingule kutamikizya ooku ikwakacitwa a Saatani, Jehova tanaakayanda kubelesya buyo nguzu mpoonya-mpoonya. Kunyonyoona Saatani mumuunda wa Edeni ambweni nikwakapa bamwi kuyeeya kuti Diabolosi wakaliluzi. Aboobo Leza singuzu zyoonse, wakatalika kweendelezya makani aaya munzila iikonzya kumanizya twaambo ootu mumizeezo yabasikweebelela boonse.

Kweelana anzila zyakwe abululami bwakwe bulondokede, Jehova Leza wakatondezya kuti boonse bajatikizidwe bakape bumboni bujatikizya lubazu lwabo kukaambo aaka. Kutanyonyoonwa kwa Saatani kwapa coolwe kubana ba Adamu kutegwa bapone akupa bumboni bwabo kuli Leza kwiinda mukusyomeka kuli nguwe akaambo kakuti balamuyanda nokuba kuti bajisi buyumu-yumu.

Nciindi Cilamfwu Buti Ciceede?

Jehova ulizyi kuti ciindi cino makani aaya naalangwa-langwa, bantu balazumanana kupenga. Nokuba boobo, ukanzide kumanizya kaambo cakufwambaana. Ibbaibbele limwaamba kuti ngu “Taata siluse a Leza siluumbulizyo loonse.” (2 Bakolinto 1:3) Aboobo cilasalala kuti, “Leza siluumbulizyo loonse” takamuzumizyi Diabolosi kupona kwaciindi cilamfwu naa kulekelela bubi buletwa anguwe kuzumanana. Kulubazu lumwi, Leza takamunyonyooni Diabolosi ciindi kacitanasika cakumanizya mulandu uujatikizya bubumbo boonse.

Twaakumana kulanganizigwa twaambo, kweelela kwa Jehova kwakweendelezya kuyoosumpulwa. Kweendelezegwa kwamulandu uujatikizya Saatani kuyooba citondezyo mane kukabe kutamani. Kwaakubbuka mulandu uukozyenye ayooyu kumbele, cikozyanyo ca Saatani ciyooba citondezyo cakukosolwa kwamulandu citakaindululwi alimwi.

Muciindi ceelede, Jehova Leza uyoolailila Jesu mwanaakwe kutegwa akanyonyoone Diabolosi amicito yakwe yoonse. Ibbaibbele litwaambila ciindi Kristo “[na]yoopa Bwami kuli Leza wakwe alimwi Usyi, aakumana kunyonyoona mfwulumende zyoonse abweendelezi boonse alimwi anguzu zyoonse. Nkaambo weelede kuba mwami uulela kusikila Leza akabikke basinkondonyina boonse kunsi aamaulu aakwe. Sinkondo wamamanino uuyoonyonyoonwa, ndufwu.”—1 Bakolinto 15:24-26.

Cikkomanisya ncakuti Bbaibbele lisyomezya bukkale bwa Paradaiso munyika yoonse mbwiizulwa. Bantu bayoopona mu Paradaiso yaluumuno kweelana amakanze a Leza aakumatalikilo. “Babombemyoyo bayoovuba nyika, bayookondwa muluumuno lunji.” Inzya, “balulami bayookona nyika, bayookala alinjiyo lyoonse.”—Intembauzyo 37:11, 29.

Amuyeeye bulangizi bupati bwaambwa mubbaibbele mbubajisi bantu ba Leza: “Amubone! Tente lya Leza lili aabantu, alimwi uyookkala ambabo, eelyo bayooba bantu bakwe. Alimwi Leza lwakwe uyooba ambabo. Eelyo uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.”—Ciyubunuzyo 21:3, 4.

SENA KULI NOMWAKALIBUZYIDE KUTI:

● Ino Diabolosi wabejelezya buti Leza a bantu?—Jobu 1:8-11.

● Mbube nzi mbwajisi Leza bupa kuti tusyome kuti muciindi ceelede uyakumunyonyoona Diabolosi?—2 Bakolinto 1:3.

● Ino Bbaibbele lipa bulangizi buli buti?—Ciyubunuzyo 21:3, 4.

[Cifwanikiso icili apeeji 10]

Kutegwa baukosole kabotu mulandu ooyu, ibajatikizyidwe mukaambo aaka beelede kupegwa ciindi cakupandulula mulandu wabo