“Tiindakafwa Pe”

“MUTANOOIMI BUYO ACUUMBWE CANGU AKULILA,

TANDIMO. TIINDAKAFWA PE.”

● Majwi aali atala aawa ngakumamanino aalwiimbo lwakweema lwalo iluzyibidwe kapati mumasi mobabelesya mwaambo wa Cingisi. Kuzwa kaindi, lwiimbo oolu lwabaumbulizya bantu banji munyika yoonse. Mulembi walwiimbo oolu tazyizilwe pe. Bamwi baamba kuti ndwiimbo lwabana Navajo lwamupailo waambwa ciindi cakuzikka.

Lwiimbo oolu, lwakaba lwiimbo lwakazyibidwe kapati ku Japan myaka misyoonto yainda, pele alimwi lwakabanyonganya kapati bantu. Bana Japan balaunka-unka kuzyuumbwe zyamukwasyi akucita zilengwa nzyobayeeya kuti zipa bulemu kubanamukwasyi ibafwide balo mbobayeeyela kuti bacipona. Akaambo kakuyiisya kutaluzi kuli munyimbo eeyi, bantu banji balabuzya kuti, “Ino mpoonya lino bafwide bali kuli?”

Ba Buddha baku Japan balikucita cilengwa eeci kwaciindi cilamfwu, alimwi balacita mweesyo. Pele ba Buddha banji balaalilwa kuwiingula mubuzyo wakuti, Ino bafwide bali kuli? Alimwi balaalilwa kwiingula mibuzyo iimbi, mbuli yakuti: Sena bafwide bamuzikombelo zimbi alimwi amumasi aambi baunka kubusena bomwe? Nkaambo nzi bafwide ncobatakonzyi kucita cintu cili coonse?

Bantu banji bayeeya kuti mibuzyo iili boobu taikonzyi kwiingulwa alimwi akuti kuyandaula bwiinguzi, nkusowa buyo ciindi. Nokuba boobo, mulakonzya kulibuzya kuti, ‘Ino ncinzi cicitika kulindiswe twafwa?’ Ino nkuuli nkotukonzya kujana bwiinguzi? Ibbaibbele lyaamba kuti Leza wakalenga banabukwetene bakusaanguna kabalondokede akubabikka mumuunda mubotu. Bakajisi bulangizi bwakupona kukabe kutamani mu Paradaiso anyika ikuti nobakazumanana kumumvwida Leza. Pele tiibakamumvwida pe.

Aboobo Leza wakabweza ntaamu. Wakabatanda banabukwetene aaba mumunzi wabo wa Paradaiso akuleka kubakwabilila. Wakabaambila cakali kuyoobacitikila akaambo kakuzanga kwabo. Wakabaambila kuti: “Nkaambo uli bulongo alimwi kubulongo nkoyoojokela.” Muntu wakalengwa kuzwa kubulongo, alimwi mukuya kwaciindi—afwa—ulajokela kubulongo.—Matalikilo 2:7; 3:19.

Mwaalumi wakudolopo lya Kofu, ku Japan, uulanganya busena bwanamaumbwe wakaamba kuti: “Kwainda buyo myaka iili 10 kuzwa twazikka muntu, kujanika kuti kunyina cilimo mucuumbwe.” Mibili yesu yakapangwa atubeela-beela tuli mubulongo, mpoonya mukuya kwaciindi, ulaba bulongo alimwi. Aboobo, ino ncinzi cicaala?

Nikuba kuti zyintu zyoonse zilaleka kubeleka muntu afwa, Mulengi wesu, walo uuzyiba ciindi katiiti nokafwa, caluyando ulatuyeeya. (Matayo 10:29-31) Mbubwenya mbwaakasyomezya, uyootubusya, kuti tukapone alimwi. Uyootubusya kuzwa muŋonzi zyalufwu.—Jobu 14:13-15; Johane 11:21-23, 38-44.

Ikuti kamuyanda kumvwa twaambo tunji kujatikizya makani aaya, mulakonzya kulembela basikumwaya bamagazini eeyi, inga bakkomana kumugwasya mumakani aaya, alimwi mulakonzya kubelesya kkeyala ya www.watchtower.org.