“Amumulembele Anton!”

● Kamboni wa Jehova mukubusi wazyina lya Anton wakali kukkala kucisi ca Russia, mumunzi wa Schelkan ku Stavropol’ Kray. Naakacili mwana, wakaciswa bulwazi bwamilambi (Duchenne muscular dystrophy), bulwazi butasilikiki bwalo bunyonyoona milambi alimwi bujaya muntu katanasisya myaka iili 20 yakuzyalwa. Ciindi naakakkwanya myaka iili fwuka yakuzyalwa, tanaakacili kukonzya kweenda nokuba kwiimikila.

Ciindi ba Yevgeny abakaintu babo ba Diana nobakaswaya mbungano ya Bakamboni ba Jehova, bakaswaangana a Anton. Ba Diana bakaamba kuti: “Anton wakalilebukide mubili, pele kumuuya wakali muyumu. Akaambo kakuti mupati wakwe musankwa wakafwa abulwazi mbubwenya oobu kajisi myaka iili 19 yakuzyalwa, Anton wakalizyi kuti kwakaceede buyo ciindi cisyoonto kuti awalo afwe. Nokuba boobo, wakalikkomene akuba abulangizi.”

Ba Diana abalumi babo bakamukulwaizya Anton kuti ayungizye mulimo wakwe wakukambauka kwiinda mukulemba magwalo kubantu bali kuminzi yakule. Mumwaka wa 2005, wakalemba magwalo aatandila ku 500 akwaatuma kuminzi yakali afwaafwi. Cuusisya ncakuti, kunyina wakasandula lugwalo noluba lomwe kumagwalo ngaakalembede. Nokuba kuti wakatyompwa, wakazumanana kulemba magwalo akupaila camoyo woonse kuli Jehova, kulomba busolozi bwakuti acikonzye kuzyala micelo mumulimo wamumuunda kweelana abukkale bwakwe.

Bumwi buzuba Anton naakali kubala muteende, wakajana lugwalo lwakalembwa amukaintu umwi wakali kuciswa, iwakali kuyandika luumbulizyo. Anton wakamulembela lugwalo mukaintu ooyo, alimwi cibeela cimwi calugwalo oolo cakalembwa mumuteende nguwenya ooyo. Wakalemba kuti: “Nokuba kuti bulwazi bwangu tabusilikiki, kubala Bbaibbele kulandigwasya kuba abulangizi. Ndilakkomana kutambula magwalo alimwi ndilaalangila lyoonse.”

Akaambo kalukkomano, mukaintu ooyu wakalemba lugwalo, lwalo lwakazoosimbwa mumuteende nguwenya ooyo akabeela kamwi ikakajisi mutwe wakuti, “Amumulembele Anton!” Mulugwalo oolu, mukaintu wakalumba kumajwi ngaakaamba Anton aakumukulwaizya kubala Bbaibbele alimwi wakayungizya kulemba kuti: “Atumugwasye Anton! Atumwiingule kwiinda mukumulembela magwalo. Nkaambo mukubusi ooyu uyandika majwi aakumulwaizya.” Mpoonya ayalo kkeyala ya Anton yakabikkilizyigwa.

Anton wakatalika kutambula magwalo aasika ku 30 mubuzuba bomwe. Magwalo aaya akali kuzwa ku Russia, ku Baltics, ku Germany, alimwi aku France. Wakatambula magwalo manji kuzwa kuli basikubala miteende. Diana wakaamba kuti: “Eelo kaka Anton wakalikkomene kapati! Nkaambo lino wakajisi bantu banji mbakonzya kulembela magwalo akubaambila zyalusyomo lwakwe lwamu Bbaibbele.”

Anton wakatola ciindi ciinda kumwaka omwe kalembelana abaabo bakali kumulembela magwalo akubaambila kujatikizya kasimpe kamu Bbaibbele. Mukuya kwaciindi, wakatalika kulomba bantu kuti bamugwasye kulemba, nkaambo maanza aakwe akaleka kubeleka. Mu September 2008, Anton wakafwa naakajisi myaka yakuzyalwa iili 20. Nokuba kuti wakalilebukide mubili, lusyomo lwakwe alimwi aluyandisisyo lwakukambauka lwakapa kuti acikonzye kukambaukila bantu banji.