Basayaansi bayeeya kuti zintu zimwi nzyobacita bantu nzezyakatalisya muzuzumo wanyika mu 2011 mudolopo lya Lorca ilili kumusanza mu Spain, kwalo bantu banji nkobakalicisa alimwi bali fwuka bakafwa. Basyaazibwene mukulanga-langa mboipangidwe nyika, bakajana kuti kuli kuswaangana kuliko akati kabusena aakacitikila muzuzumo wanyika ooyu alimwi awaawo mpobakadonkola migoti yamaanzi njobabelesya kutilila zisyango.

Basikuswaya masena ibazwa ku China kuya kuzisi zimbi bakabelesya mali aasika ku $102 bbiliyoni (U.S.) mu 2012. Kweelana alipooti iyakapegwa Acibeela Cilanganya Basikuswaya Masena ca UN, mweelwe ooyu upa kuti China cibe ncecisi cakabelesya mali manji kwiinda zisi zyoonse mukuswaya masena aamuzisi zimbi. Mpoonya zisi zitobela ngu Germany a United States. Basikuswaya masena ibazwa muzisi eezyi zyobilo bakabelesya mali aasika ku $84 bbiliyoni (U.S.), cisi cimwi acimwi.

Ibuvwuntauzyi ibwakalembwa mumuteende waamba zyabusilisi waku Britian bwakatondezya kuti ku Japan, bantu batandila ku 68,000 bakali kulingulwa kwamyaka iili 23. Basikuvwuntauzya bakajana kuti bamakaintu bakazyalwa akati ka 1920 a 1945 ibatana buzuba bafweba mubuumi bwabo bakali kupona myaka iili kkumi kwiinda baabo ibakatalika kufweba kabatanasika amyaka iili 20 yakuzyalwa; mpoonya bamaalumi balo bakali kupona myaka iili lusele kwiinda baabo bafweba.

Mucisi eeci, kupanga, naa kuula mapulasitiki bbaagi kunze aacisi alimwi akwaabelesya kulakasyigwa. Kucita boobo, nkukwabilila banyama nkaambo kuti naa baalya mapulasitiki bbaagi aayo inga bafwa. Mfwulumende ikulwaizya bantu kuti kababelesya mapepa aakonzya kubola.

Mwaka amwaka, imakkampani ainsyuwalansi alasweekelwa mali aasika ku $50 bbiliyoni (U.S.) kubbadela bantu banyonyookelwa zintu akaambo kantenda zilicitikila. Kusweekelwa kuli boobu kwapa kuti mumyaka iili kkumi iiliyoonse kutalikila mu 1980 myuulo yazintu itante ziindi zyobilo.