BA WHISTON bakali bantu bazyibidwe kapati kuli basikwiiya Bbaibbele, akaambo kabusanduluzi bwabo bwamalembe aamu Cingisi aamumwaanda wamyaka wakusaanguna aakalembwa asikwiiya zyakaindi wazina lya Flavius Josephus imu Juda. Ibbuku ndyobakalemba ba Josephus lyakayubununa makani manji aakaindi aaba Juda alimwi ayaayo aajatikizya Banakristo bakusaanguna.

Ba Whiston bakali basongo kapati alimwi bakaiya ziiyo zinji, ikapati sayaansi alimwi abukombi. Bakali kusyoma kuti makani aamu Bbaibbele aajatikizya kulenga aliluzi alimwi akuti mbozipangidwe zintu kutondezya kuti kuli Sikuzipanga mupati.

Kuyungizya waawo, ba Whiston bakali kusyoma kuti zikombelo zya Bunakristo bwanyika zyakatalisya tubunga tunji akaambo kakuti basololi babo bakaalilwa kutobela ncolyaamba Bbaibbele, bakalombozya njiisyo zitali zyamu Bbaibbele alimwi azilengwa zyazikombelo kubikkilizya abaabo balyaamba kuti Mbaamafwala ba Cikombelo.

Akaambo kakuti ba Whiston bakali kusyoma kuti Bbaibbele ndibbuku liyubununa kasimpe kajatikizya Leza, bakaikaka njiisyo yakuumpwa mumulilo uutamani wahelo. Bakali kusyoma kuti kuumpa bantu mumulilo ndunya alimwi nkutukila Leza. Nokuba boobo, icakapa kuti bazwangane kapati abasololi bazikombelo, nkukaka njiisyo Yabutatu, yalo ipandulula kuti Leza uli muzibeela zyotatwe zyeelene alimwi ziswaangene, nkokuti Taata, Mwana alimwi a Muuya Uusalala. Pele mubwini, kuli buyo Leza omwe, kutali botatwe.

Nobakamana kuvwuntauzya cakusitikila, ba Whiston bakajana kuti njiisyo Yabutatu tiiyakali kuyiisyigwa a Banakristo bakusaanguna, pele mukuya kwaciindi yakazuminwa ciindi njiisyo zyabasyaabusongo nozyakavwula mu Bunakristo. * Beenzinyina bakabacenjezya kujatikizya ntenda yakumwaya makani ngobakajana, pele ba Whiston tiibakaumuna buyo kwaamba makani aajatikizya ciimo ca Jesu kuti Mwana wa Leza alimwi akuti wakalengwa buya.

Baku University of Cambridge bakali kumugwisya acuuno cipati muntu uuli woonse iwakali kuyiisya mizeezo iindene anjiisyo yacikombelo ca Anglican, eeci cakali kwaamba kuti ba Whiston bakali kuyoogwisyigwa acuuno cabo. Nokuba boobo, ba Whiston kunyina nobakaumuna buyo mbuli ba Newton, balo ibakazyiba kuti Butatu ninjiisyo yakubeja, pele bakayoowa kwaamba mbobayeeya. Ba Whiston bakaamba kuti: “Kunyina nondiyooyungwa amizeezo iili yoonse yamunyika.”

Mu 1710, ba Whiston bakatandwa ku Cambridge. Akaambo kakukaka kunyonganya zintu nzyobakali kusyoma, “bakaleka kuba ampuwo akuba muntu-muntu buyo”. Nokuba boobo, kunyina nobakazungaana. Alimwi buya, nociba ciindi nobakali kutamikizyigwa atwaambo tutali twamasimpe, bakalemba makani aakajisi zibalo zitobelene izyakajisi mutwe wakuti Bunakristo Bwakaindi Bwatalisyigwa, icaamba kuti Bunakristo bwakali kutobelwa abasikwiiya ba Jesu bakusaanguna. Kumbele, ba Whiston bakatalisya Kabunga Kabunakristo Bwakaindi, kalo kakali kuswaangana muŋanda yabo ku London.

Nokuba kuti bakasweekelwa mulimo wabo uusumpukide alimwi akubula mali kwaciindi cili mbocibede, ba Whiston bakazumanana kulemba akuyiisya muŋanda yabo ku London. Mu 1737, kutegwa bagwasyilizye kupa bupanduluzi bwamakani aakaindi aamba zya Bunakristo bwakusaanguna, bakalemba busanduluzi bwabo bwamalembe aa Josephus. Makani aayo nkwali kusikila asunu.

Mulembi wamabbuku, wazina lya James E. Force waamba kuti akaambo kabusicamba bwabo alimwi akusyoma zintu banji nzyobatakali kusyoma, bantu banji bakali kubona ba Whiston kuti “muntu wakaindene kapati abantu bamwi.” Nokuba boobo, bamwi bakali kubanyomenena kabali basikwiiya zyamu Bbaibbele, basikuvwuntauzya kasimpe, alimwi mbuli mwaalumi iwakajisi makanze aakupona kweelana anzyasyoma.