“Utalicitili cikozyano cibezedwe cacintu cili buti cili kujulu nanka cili ansi ano nanka cili mumaanzi kunsi anyika. Utazikotamini nekuba kuzimanina milimo.”—Kulonga 20:4, 5.

Mu Magwalo aa Chihebrayo, kanji- kanji aaitwa kuti Cizuminano Cakale, kukomba zikozyanyo kulaambwa cakwiinduluka kuti takuli kabotu.

BANJI MBOBAAMBA

Kweelana abbuku litegwa New Catholic Encyclopedia, ba Juda bakalijisi zikozyanyo zinji nzyobakali kubelesya mubukombi “alimwi eezyi zyakali kulemekwa akukombwa.” Mucikozyanyo, mubbuku eeli kutondezyedwe zintu zyakuzekaula mbuli micelo, maluba alimwi abanyama ibakali kupa kuti tempele lyaku Jerusalem kalyeebeka.—1 Bami 6:18; 7:36.

NCOMWEELEDE KUZYIBA

Kwiindana ancolyaamba bbuku litegwa New Catholic Encyclopedia, ba Juda basyomeka tiibakali kukomba zyakuzekaula naa zintu zimwi zyamutempele. Alimwi buya, taakwe mpotubala mu Bbaibbele kuti kuli muna Israyeli uusyomeka iwakali kubelesya zikozyanyo mukukomba.

NCOLYAAMBA BBAIBBELE

Kwiinda mumusinsimi Isaya, Leza wakaamba kuti: “Bulemu bwangu nsikooyoobupa umbi, akulemekwa kwangu nsikooyookupa zikozyano zifulidwe.”—Isaya 42:8.

“Nkumvwana kuli buti nkolijisi tempele lya Leza amituni?” . . . Amuleke kuguma cintu cisofweede.”—2 Bakolinto 6:16, 17.

“Banakristo bakusaanguna nobatakaukkomanina muzeezo wakubikka zikozyanyo muzikombelo, alimwi kuzikotamina naa kupaila kumbele lyanzizyo nobakakubona kuti nkukomba mituni.”—History of the Christian Church.

BANJI MBOBAAMBA

Bbuku litegwa New Catholic Encyclopedia lyaamba kuti :“Kubelesya zikozyanyo mubukombi bwa Bunakristo bwakusaanguna takukonzyi kudoonekwa. Masena aansi mobakali kuzikkila bantu Banakristo ngamasena aajisi zintu zyakufwala zya Banakristo bakusaanguna. . . . Mubusena busalala bwakukombela alimwi amumasena mobakali kuzikkila, kuli zintu zikatazya kumvwisya izibikkidwe izipa masena aaya kweebeka.” *

NCOMWEELEDE KUZYIBA

Zikozyanyo zyakaindi kapati zijanika mumasena aakuzikkila aaya, nzyamumwaanda wamyaka watatu, nkokuti nokwakainda myaka iili 200 kuzwa ciindi Jesu naakafwa. Aboobo, bbuku lya New Catholic Encyclopedia ncoliita kuti “bukombi bwa Bunakristo bwakusaanguna” mubwini tabuli bwakusaanguna—bwalo mbobakali kucita basikwiiya bakusaanguna baambidwe mu Magwalo aa Bunakristo aa Chigiliki, kanji-kanji aaitwa kuti Cizuminano Cipya. Akaambo kakuti zikozyanyo eezyi zyakali mumasena aakuzikkila, ncitondezyo cakuti kuzoosika mumwaanda wamyaka watatu, Banakristo basikulitaminina bakatalika kutobela ziyanza zyabantu batakali Banakristo mukubelesya zikozyanyo kutegwa bakkomanisye bantu bakasanduka kuba Banakristo. *

NCOLYAAMBA BBAIBBELE

“Amukutije kukomba mituni.”—1 Bakolinto 10:14.

“Amwiitantamuke mituni.”—1 Johane 5:21.

Kukomba mituni ncilengwa cabukombi citayeeme a Bbaibbele. Akaambo kaceeci, Bakamboni ba Jehova tabakombi zikozyanyo alimwi tababikki zikozyanyo mumaanda aabo naa mumasena mobakombela.

BANJI MBOBAAMBA

Bbuku litegwa New Catholic Encyclopedia lyaamba kuti: “Mbwaanga bukombi ibupegwa kucikozyanyo buunka kumuntu ngociiminina cikozyanyo eeco, nkokuti bukombi mbubwenya ibupegwa kumuntu bulakonzya kupegwa kucikozyano ciiminina muntu.”

NCOMWEELEDE KUZYIBA

Jesu naakayiisya basikwiiya bakwe mbokupailwa, tanaakabaambila kuti kababelesya zikozyanyo. Alimwi mu Magwalo aa Bunakristo aa Chigiliki, muzeezo wakubelesya cikozyanyo mukukomba Leza wakasimpe tauko.

NCOLYAAMBA BBAIBBELE

“Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.”—Matayo 4:10.