“Ndakamunyemena mwanookwesu musimbi akucijalula cijazyo cabukali cakuti kabulo kakali kusyule kwacijazyo kakapanga cipulo kubwaanda. Cipulo eeci lyoonse cakali kundiyeezya mbondakacita zintu cabwana.”—Diane . *

“Ndakaambila bataata kuti, ‘Tamulomene!’ mpoonya akucijala cijazyo. Pele kacitanajala, ndakabona mbobakausa bataata, mpoonya ndakalimvwa bubi.”—Lauren.

Sena andinywe cakamucitikila kale eeci cakacitikila Lauren alimwi a Diane? Ikuti kacili boobo, nkokuti cibalo eeci cilakonzya kumugwasya.

Bukali bupa kuti ube ampuwo mbyaabi. Briana uujisi myaka iili 21 wakaamba kuti: “Ndakali kuyeeya kuti bantu bakeelede kundizyibila kuti ndili mukali. Pele ndakatalika kubona kuti bantu batalijati nobanyemede balafwubaala, aboobo ndakabona kuti andime mbobakali kundibona bantu bamwi!”

Bbaibbele lyaamba kuti: “Ooyo uufwambaana kunyema ulacita cintu cabufwubafwuba.”—Tusimpi 14:17.

Bukali bulakonzya kupa kuti bantu kabakutantamuka. Daniel, uujisi myaka iili 18 wakaamba kuti: “Kuti wanyema, cipa kuti bantu kabatakulemeki.” Awalo Elaine uujisi myaka iili 18 wakaamba kuti: “Muntu mukali takwelelezyi. Cipa buyo kuti bantu kabakuyoowa.”

Bbaibbele lyaamba kuti: “Utanoomvwani amuntu mukali alimwi utanikweendi amuntu uunyema-nyema buyo.”—Tusimpi 22:24.

Ulakonzya kucita kabotu. Sara uujisi myaka iili 15 wakaamba kuti: “Talili lyoonse nokonzya kweendelezya zintu zicitika, pele ulakonzya kweendelezya mbolimvwa. Toyelede kukalala buya.”

Bbaibbele lyaamba kuti: “Muntu uumuka kunyema uli kabotu kwiinda muntu singuzu, alimwi ooyo uujata moyo wakwe uli kabotu kwiinda yooyo uuzunda munzi.”—Tusimpi 16:32.

Kolibikkila mbaakani. Muciindi cakwaamba kuti, “Mbondibede oobu,” kosolekesya kucinca mbobede muciindi cigaminide, ambweni mumyezi iili cisambomwe. Muciindi eeci, kolemba kucinca nkoocita. Lyoonse wanyema, kolemba (1) cacitika, (2) mbowacita, alimwi (3) ambooyelede kucita kabotu zintu alimwi akaambo ncooyelede kucitila boobo. Mpoonya weelede kusola kuyoocita mbubwenya waakunyema alimwi. Muzeezo: Kozyiba kuzwidilila nkoocita! Kolemba bubotu mboojana akaambo kakulilesya.—Njiisyo yamu Bbaibbele: Bakolose 3:8.

Kojata moyo. Ikuti muntu wakunyemya, utaambi cintu casaanguna kuboola mumizeezo yako. Muciindi caboobo, kolijata. Kuti kacikonzyeka, koswa ciya. Erik uujisi myaka iili 15 wakaamba kuti: “Ciindi nondiswa ciya, cindipa ciindi cakuyeeya kanditanacita cintu naa kwaamba cintu cimwi cikonzya kundipa kuusa kumamanino.”—Njiisyo yamu Bbaibbele: Tusimpi 21:23.

Kolanga-langa mbazu zinji. Ziindi zimwi inga wanyema akaambo kakubona mbazu yomwe mukaambo—mbazu iijatikizya nduwe. Kosola kulanga-langa mbobakonzya kulimvwa bamwi. Jessica mukaintu mwana-mwana wakaamba kuti: “Noliba leelyo bantu nobali bakali, kanji-kanji inga kuli kaambo kakonzya kundigwasya kubamvwisya.”—Njiisyo yamu Bbaibbele: Tusimpi 19:11.

Ikuti kacikonzyeka, kozwa abusena aawo. Bbaibbele lyaamba kuti: “Kubwesyanya kakutanatalika, kozwa buyo aawo.” (Tusimpi 17:14) Mbubwenya mbolutondezya lugwalo oolu, zimwi ziindi cilayandika kuzwa abusena aawo. Mpoonya muciindi cakuzumanana kuyeeya cacitika akupa kuti kunyema kwiindile, kocita zintu zimwi. Danielle mukaintu mwana-mwana wakaamba kuti: “Ndajana kuti kunyanyaasya mubili kulandigwasya kukkazika moyo akulijata kuti nditanyemi.”

Koiya kutabikkilila. Bbaibbele lyaamba kuti: “Amukopane, pele mutabisyi pe. Amulyaambauzye mumyoyo yanu, . . . akuumuna.” (Intembauzyo 4:4) Amubone kuti kukopana takulubide pe. Mubuzyo ngwakuti, ino ncinzi citiitobele? Richard mwaalumi mwana-mwana wakaamba kuti: “Ikuti wazumizya bamwi kukunyemya, cipa kuti babe anguzu. Inga cainda kugwasya kutababikkilila.” Kuti wacita boobo, unooyendelezya bukali bwako kutali kulekela bukali kukweendelezya.