NCOLYAAMBA BBAIBBELE
Mesiya
Bbaibbele lyakasinsima kuti Mesiya uyakuboola munyika akunununa bantu kumalwazi, kupenga, alimwi alufwu. Sena Jesu Kristo ngonguwe Mesiya?
Ino bantu bakali kuyoomuzyiba buti Mesiya?
Kweelana abusinsimi bwamu Bbaibbele, Mesiya, naa Kristo, wakali kuyakuboola kajisi milimo yobilo iindene, alimwi kwakali kuyakwiinda ciindi cilamfwu akati kamilimo yobilo eeyi. * Mumulimo wakwe wakusaanguna, wakali kuyooba muntu. Kutegwa bantu bakonzye kumuzyiba, basikulemba Bbaibbele bakaambila limwi zintu zinji kujatikizya buumi alimwi amulimo wakwe. Mubwini, “bumboni bujatikizya Jesu” ngamakani mapati aabusinsimi ibuli mu Bbaibbele.—Ciyubunuzyo 19:10.
Kali muntu, Jesu wakacita buyo asyoonto zintu nzyayoocita cakumaninina kali cilenge camuuya canguzu
NCOLYAAMBA BBAIBBELE
Mesiya wakali . . .
-
Kuyooba waluzubo lwa Mwami Davida.—Isaya 9:7; Luka 3:23-31. *
-
Kuyoozyalilwa mudolopo lya Betelehemu.—Mika 5:2; Luka 2:4-7.
-
Kuyooba mukambausi ‘wamakani mabotu’ uulicesya.—Isaya 61:1; Luka 4:43.
-
Kuyoonyansyigwa alimwi akubonwa kuti unyina mpindu.—Isaya 53:3; Matayo 26:67, 68.
-
Kuyakwaabwa amali aansiliva aali 30.—Zekariya 11:12, 13; Matayo 26:14, 15.
-
Kuyakuumuna kumbele lyabasikumutamikizya nobamubeteka kuti ajaigwe.—Isaya 53:6, 7; Matayo 27:12-14.
-
Kuyooba “mbelele” yacipaizyo, yakali kuyoogusya cibi akupa kuti bantu basalale kumbele lya Leza.—Isaya 53:7; Johane 1:29, 34, 36.
-
Kuyoojaigwa kakunyina kutyolwa mafwuwa.—Intembauzyo 34:20; Johane 19:33, 36.
-
Kuyoozikkwa abantu bavwubide.—Isaya 53:9; Matayo 27:57-60.
-
Kuyoobusyigwa mubuzuba bwatatu.—Matayo 16:21; 28:5-7.
Jesu wakabuzuzikizya businsimi boonse oobu alimwi abumbi. Alimwi wakaponya baciswa akubusya bafwide. Aboobo Jesu wakatupa bumboni bwakuti wakali Mesiya pele alimwi wakapa kuti tube alusyomo luyumu muzisyomezyo zyamu Bbaibbele zyakuti uyoozicita zintu eezyi zyoonse munyika yoonse kumbele. (Luka 7:21-23; Ciyubunuzyo 21:3, 4) Naakabusyigwa, Jesu wakakkala kujanza lya Leza “lyalulyo,” kulindila ciindi nayoomana mulimo wakwe wabu Mesiya.—Intembauzyo 110:1-6.
“Aakuboola Kristo, sena uyoocita maleele manji kwiinda ngaacita muntu ooyu?”—Johane 7:31.
Ino Mesiya uyakuumanizya buti mulimo wakwe?
Bama Juda bakuciindi ca Jesu bakali kulangila kuti Mesiya ulabanununa kubulelo bwabana Roma alimwi akweendelezya bwami bwa Israyeli bubukulusyidwe. (Milimo 1:6) Mukuya kwaciindi basikutobela Jesu bama Juda ndendilyo nobakazyiba kuti Jesu uyoomanizya mulimo wakwe kujulu kali cilenge camuuya canguzu cipedwe nguzu zyoonse.—Matayo 28:18.
NCOLYAAMBA BBAIBBELE
Mumulimo wakwe wabili, Mesiya . . .
-
Uyoolela kali Mwami wa Bwami bwa Leza, mfwulumende yanyika.—Daniele 7:13, 14; Ciyubunuzyo 11:15.
-
Uyoobaleleka bantu boonse bamusyoma.—Matalikilo 22:17, 18; Intembauzyo 72:7, 8.
-
“Uyoogambya masi manji” alimwi abeendelezi bangawo aakubanyonyoona akaambo kakumukazya.—Isaya 52:15; Ciyubunuzyo 19:19, 20.
-
Uyoofwutula “nkamu mpati” yabantu baluleme nyika yoonse akubanjizya munyika mpya yaluumuno.—Ciyubunuzyo 7:9, 10, 13-17.
-
Antoomwe a Jehova Leza, uyoobusya bafwide akubaleta mu Paradaiso anyika.—Luka 23:43; Johane 5:21, 28, 29.
-
Uyooyiisya balelwa bakwe nzila zyaluumuno lwini-lwini.—Isaya 11:1, 2, 9, 10.
-
Uyoogusya cibi, calo cileta malwazi alimwi alufwu.—Johane 1:29; Baroma 5:12.
-
Kumamanino uyoonyonyoona milimo yoonse ya Saatani alimwi akukamantanya bantu boonse mubweendelezi bwa Jehova Leza.—1 Bakorinto 15:25-28; 1 Johane 3:8.
Jesu wakaubeleka mulimo wakwe wakusaanguna wabu Mesiya. Alimwi uyakuumanizya wabili. Aboobo, bantu basongo balaiya kujatikizya nguwe, akaambo kakuti Jesu wakaamba kuti: “Ndime nzila, kasimpe alimwi abuumi.”—Johane 14:6.
“Mumazuba aakwe balulami bayoozwidilila, alwalo luumuno luyoovwula kusikila mane mwezi utakabi limbi. Uyooba abalelwa . . . kusikila kumagolelo aanyika.”—Intembauzyo 72:7, 8.
^ par. 5 Bbala lyakuti “Mesiya” ndibbala lya Chihebrayo ilyaamba cintu comwe abbala lyamu Chigiriki lyakuti “Kristo.”—Johane 1:41.
^ par. 7 Cibeela cakusaanguna aawa caamba businsimi; cabili caamba kuzuzikizyigwa.
Andiza Inga Mwaakkomanina Ayaaya
MIBUZYO YAMU BBAIBBELE YAINGULWA
Sena Businsimi Bwaamba Mesiya Businizya Kuti Jesu Ngowakali Mesiya?
Sena kulangilwa kuti kwakali ba Mesiya banji?
NGAZI YAMULINDIZI
