MAKANI AAYEEME AMUTWE UULI ACIVWUMBYO | SENA MULABWEENDELEZYA BUUMI BWANU?

Buyumuyumu: Kutalimvwa Kabotu

AMULIZYE

SENA kuli nomutalimvwi kabotu akaambo kakuusa, kunyema naa kubikkilila muntu umwi? Ikuti kacili boobo, nkokuti tamukabi aciindi cinji alimwi anguzu zyakucita zintu ziyandika ncobeni. Ncinzi ncomukonzya kucita kujatikizya makani aaya? *

CIKOZYANYO CAMU BBAIBBELE: DAVIDA

Mwami Davida wakapenga mumizeezo munzila ziindene-indene. Wakali kulibilika alimwi akulimvwa buumba. Ncinzi cakamugwasya kutegwa azumanane kupona? Davida wakaasiya mumaanza aa Leza makani oonse. (1 Samuele 24:12, 15) Kuyungizya waawo, wakalemba mbwaakali kulimvwa. Alimwi mbwaanga wakajisi lusyomo, wakali kupaila lyoonse. *

NCOBACITA BA GREGORY

Mbubwenya mbokwaambwa mucibalo cakusaanguna, ba Gregory baciswa bulwazi bwakulibilika. Bakaamba kuti: “Ndakali kuciindizya kulibilika.” Ino ba Gregory bakalyeendelezya buti penzi eeli lyakulibilika? Bakaamba kuti: “Ndakalutambula lugwasyo lwabakaintu bangu alimwi abeenzuma. Alimwi ndakabandika abadokota akuzyiba zinji kujatikizya bukkale bwangu. Nindakacinca bukkale bwangu, ndakatalika kulimvwa kuti ndilabweendelezya bukkale bwangu kutali bwalo kundeendelezya. Nokuba kuti zimwi ziindi ndilalibilika, ndilizyi lino cipa kuti kandilimvwa boobo, alimwi ndilizyi cakucita kutegwa ndilimvwe kabotu.”

“Moyo uukkomene musamu mubotu uuponya.” —Tusimpi 17:22

NCOMUKONZYA KUCITA

Ikuti kamutalimvwi kabotu, amusole kucita zintu zitobela:

Amulembe mbomulimvwa mubbuku.
Amwaambile wacibbululu naa mweenzinyoko mbomulimvwa.
Mutafwambaani kusyoma kuti mbomulimvwa kuli buyo kabotu. Mucikozyanyo, amulibuzye kuti, ‘Sena ncobeni kuli bumboni butondezya kuti ndileelede kulimvwa boobu?’
Tamweelede kulibilika, kunyema naa kubikkilila kwaciindi cilamfwu. Muciindi caboobo amucite zintu zimwi zikonzya kuzwidilila. *

Masimpe Ngakuti: Kanji-kanji, kutalimvwa kabotu kulaboola akaambo kambotububona bukkale pele ikutali akaambo kabukkale.

^ par. 3 Zimwi ziindi kutalimvwa kabotu kulakonzya kuboola akaambo kapenzi lyakuciswa likonzya kuyandika busilisi. Sinsimuka! kunyina noyaamba kujatikizya nzila yabusilisi iigaminide njomweelede kubelesya. Muntu umwi aumwi weelede kuzilanga-langa nzila nzyakonzya kutobela katanasala.

^ par. 5 Ntembauzyo zinji zili mu Bbaibbele mipailo ya Davida njaakalemba.

^ par. 13 Kutegwa muzyibe zinji, amubone makani aayeeme amutwe uuli acivwumbyo aakuti “Mbotukonzya Kulwana Penzi Lyakulibilika,” “mu Ngazi Yamulindizi yamu July 1, 2015.