MUMWAKA wa 2010, mungwimba uutegwa crude oil uutandila kumalita aali 800 miliyoni wakatikila mulwizi lutegwa Gulf of Mexico ciindi muncini uubelesyegwa kubbola mungwimba nowakabboloka akubbila mumaanzi. Nokuba boobo, mumyezi buyo misyoonto, mungwimba ooyu iwakapede kuti maanzi asofwaale wakamana. Ino eeci cakakonzyeka buti?

Ncobaamba basayaansi: Buvwuntauzi bwasayaansi butondezya kuti ma microorganisims aamumaanzi aatalibonyi alakonzya kulya ma molecules aa carbon aajanika mumungwimba. Syaazibwene mulwiiyo lwa environmental microbiology Terry Hazen, wakaamba ma microorganisms aaya kuti ‘mivwi iiyandaula mungwimba.’ Ma microorganisms aaya akatola lubazu mukupa kuti mungwimba umane mu Gulf of Mexico, kweelana ambotwaamba atala aawa.

Mulipooti yakapegwa aba BBC kujatikizya makani aaya, kwaambwa kuti “mubwini, tacigambyi kuti mulwizi mulajanika ma microorganisms aajisi nzala yamungwimba.” Alimwi buya kwamyaka minji, “mungwimba wali kunjila mumaanzi asyoonto-syoonto kuzwa mulwizi mpoluli aansi.”

Masimpe kuti nzila nzyobabelesya bantu zyakusalazya nokwatika mungwimba zilabeleka. Nokuba boobo, nzila eezyi zyakusalazya zilakonzya kuleta ntenda. Misamu iisalazya ipa kuti ma microorganisims aalya mungwimba kaatabeleki kabotu—kubikkilizya amumuni wazuba alimwi amuya uutegwa ozone gas. Kuyungizya waawo, misamu iili boobo ilajaya alimwi ilanyonyoona zilengwaleza. Pele nzila yacilengwaleza iiliko yakulya mungwimba kubikkilizya ama microorganisms alaanzala yamungwimba, ipa kuti lwizi lulipangile nzila yakulisalazya kakunyina kuleta mapenzi aaboola akaambo kakubelesya misamu yakupanga. *

Ino muyeeya buti? Sena icipa kuti ma microorganisms aamulwizi kaalya mungwimba cakabako akaambo kakusanduka naa cakalengwa buya?