Mbotuyaabubuzyiba bube mbwajisi muntu umwi, tulakonzya kumuzyiba kabotu muntu ooyo calo cikonzya kutupa kuba acilongwe ciyumu anguwe. Mbubwenya buyo, mbotuyaabubuzyiba bube mbwajisi Jehova, tulakonzya kumuzyiba bwini mbwabede alimwi cilongwe cesu anguwe cilakonzya kuyuma kapati. Akati kabube boonse mbwajisi Leza, kuli bube bone ibulibedelede kapati: nguzu, busongo, bululami alimwi aluyando.

“O Mwami Singuzuzyoonse Jehova! Bona yebo nduwe wakalenga majulu alimwi anyika kwiinda munguzu zyako zinji.”—JEREMIYA 32:17.

Zilenge zilapa bumboni bwakuti Leza ngusinguzu. Mucikozyanyo, ikuti mwaimikila anze ciindi cacilimo, ino inga ncinzi ncomumvwa alukanda lwanu? Inga nkukasaala kwazuba. Cili boobo akaambo kanguzu zya Jehova zyakulenga. Ino zuba lijisi nguzu zinji buti? Mpolili akati eeni, lyaambwa kuti lilapya kutandila ku 15,000,000°C. Mukavwalu-vwalu kamwi akamwi, zuba lilagwisya nguzu izyeelene anguzu zizwa nokubboloka mamiliyoni aamabbomba aanyukkiliya.

Nokuba boobo, zuba ndisyoonto kapati twalyeezyanisya anyenyeezi zimwi zinji izili mububumbo. Basayaansi bayeeyela kuti akati kanyenyeezi ziinda kukomena, nyenyeezi imwi iitegwa UY Scuti, nimpati cakuti ikuti yabikkwa abusena mpolibede zuba, ilakonzya kwiivwumba nyika alimwi apulaneti iitegwa Jupiter. Ambweni eeci inga catugwasya kwaamvwisya kabotu majwi aa Jeremiya aakuti Jehova Leza wakapanga majulu alimwi anyika, nkokuti bubumbo, kwiinda mukubelesya nguzu zyakwe zinji.

 Ino tugwasyigwa buti anguzu zya Leza? Buumi bwesu buyeeme azintu nzyaakalenga Leza mbuli zuba alimwi azintu zitaliboteli izili anyika. Kuyungizya waawo, Leza ubelesya nguzu zyakwe kugwasya muntu umwi aumwi kumugama. Munzila nzi? Mumwaanda wamyaka wakusaanguna, Leza wakapa Jesu nguzu zyakucita maleele aagambya ncobeni. Tubala kuti: “Boofwu lino balabona alimwi, balema baleenda, basicinsenda balasalazyigwa, basinkematwi balamvwa, bafwide balabusyigwa.” (Matayo 11:5) Ino mbuti kujatikizya mazuba aano? Bbaibbele lyaamba kuti: “Muntu uukatede ulamupa nguzu. Aabo balangila Jehova bayooba anguzu alimwi.” (Isaya 40:29, 31) Leza ulakonzya kutupa “nguzu zigambya iziinda zyabantu” kutegwa tucikonzye kulwana naa kuliyumya kumakatazyo alimwi amasunko aamubuumi. (2 Bakorinto 4:7) Kweelede kuti mulayanda kuba acilongwe a Leza walo uutuyanda kapati cakuti ubelesya nguzu zyakwe zitalivwulili kutugwasya ciindi notuli mumapenzi.

“Eelo kaka minji kapati milimo yako, O Jehova! Yoonse buyo wakaicita cabusongo.”—INTEMBAUZYO 104:24.

Mbotuyaabwiiya zinji kujatikizya zintu nzyaakalenga Leza, citupa kugambwa kapati akaambo kabusongo mbwajisi. Mane buya, basayaansi bamwi balasola kwiiya zilenge zya Jehova mpoonya akusola kupanga zintu zikozyenye anzizyo kutegwa kazilibonya kabotu. Eeci cilalibonya kutalikila kuzintu zinamatila kusikila kundeke mboipangidwe.

Mubili wamuntu, ncikozyanyo cigambya kapati icitondezya busongo bwa Leza. Mucikozyanyo, amuyeeye buyo mbwapangika mwana. Eeci cilatalika aseelo lyomwe buyo ilipangwa kwiinda mukuswaanganya seelo lizwa kumwaalumi amukaintu, lyalo ilijisi malailile woonse aayandika. Seelo eeli lilalyaandaanya akuba maseelo manji aakozyenye. Pele aciindi ceelede, maseelo aaya alatalika kulyandaanya akuba maseelo manji aaindene-indene, mbuli maseelo aamubulowa, aamunsinga alimwi aamumafwuwa. Mpoonya kwainda buyo ciindi cisyoonto, zizo zyamubili zilatalika kulibonya alimwi akutalika kubeleka. Kumane mumyezi buyo iili fwuka, seelo liya lyakusaanguna lilakomena akuba kavwanda. Busongo ibuli mukupangwa kwamwana ooku kupa kuti bantu banji bazumine ncaakaamba mulembi umwi wa Bbaibbele naakati: “Ndilakutembaula nkaambo ndilengedwe munzila iigambya, mbotu kapati.”—Intembauzyo 139:14.

Ino tugwasyigwa buti abusongo bwa Leza? Mulengi wesu ulizyi nzyotuyandika kutegwa tube bantu bakkomene. Mbwaanga ulijisi luzyibo lunji alimwi abusongo, ulatupa lulayo lugwasya mu Jwi lyakwe, Bbaibbele. Mucikozyanyo, Bbaibbele litwaambila kuti: “Amuzumanane . . . kulekelelana camoyo woonse.” (Bakolose 3:13) Sena lulayo oolu lulagwasya? Inzya. Bamadokota bakajana kuti kulekelela kulakonzya kupa muntu koona kabotu alimwi akucesya ntenda yakuciswa bulwazi bwa BP. Alimwi kulakonzya kucesya ntenda yakuciswa bulwazi bwakutyompwa alimwi amalwazi aambi buyo. Leza uli mbuli mulongwe musongo alimwi uutubikkila maano walo uuzumanana kutupa lulayo lugwasya alimwi iluli kabotu. (2 Timoteyo 3:16, 17) Sena inga tiimwayanda kuba amulongwe uuli boobu?

“Jehova uyandisya bululami.”—INTEMBAUZYO 37:28.

Lyoonse Leza ucita zintu ziluzi. Mane buya Bbaibbele lyaamba kuti: “Leza mwini-mwini takonzyi kucita bubi nokuceya, alimwi Singuzuzyoonse takonzyi kubisya pe!” (Jobu 34:10) Mbeta zyakwe zililuleme kweelana ambwaakaamba sintembauzyo ciindi naakaamba Jehova kuti: “Uyoobeteka bantu mubululami.” (Intembauzyo 67:4) Akaambo kakuti “Jehova ubona zili mumoyo,” takonzyi kweenwa abusikuupaupa ameso, pele lyoonse ulakonzya kuzyiba masimpe alimwi akubeteka munzila iiluzi. (1 Samuele 16:7) Kunze lyaboobo, Leza ulaibona micito yoonse iitaluleme amakulo aacitika munyika, alimwi usyomezya kuti ino-ino “babi bayoonyonyoonwa munyika.”—Tusimpi 2:22.

Nokuba boobo, Leza tali mubetesi silunya walo uuyandisya buyo kusubula bantu. Ulatondezya luse ikuti kwayandika. Bbaibbele lyaamba kuti: “Jehova ngusiluse alimwi ngusilweetelelo,” nokuba kubantu babi kufwumbwa buyo kuti beempwa kuzwa ansi aamoyo. Sena oobu tabuli bululami bwini-bwini?—Intembauzyo 103:8; 2 Petro 3:9.

Ino tugwasyigwa buti abululami bwa Leza? Mwaapostolo Petro wakaamba kuti: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.” (Milimo 10:34, 35) Tulagwasyigwa abululami bwa Leza nkaambo walo tasalululi pe. Aboobo ulakonzya kututambula alimwi akuba bakombi bakwe tacikwe makani amubala wesu, cisi nkotuzwa, lwiiyo ndotujisi naa mpuwo.

Mbwaanga Leza uyanda kuti tubuzyibe bululami bwakwe alimwi akugwasyigwa ambubo, wakatupa manjezyeezya. Magwalo aamba manjezyeezya kuti mulawo ‘uulembedwe mumyoyo yesu,’ walo ‘uupa bumboni’ ikuti naa bukkale bwesu buliluzi naa tabuluzi. (Baroma 2:15) Ino atugwasya buti? Ikuti ayiisyigwa kabotu, manjezyeezya eesu alakonzya kutukulwaizya kuleka micito iitali kabotu naa iitaluleme. Alimwi kuti naa twalubizya, alakonzya kutukulwaizya kweempwa akubambulula bukkale bwesu. Masimpe, kuzyiba bululami bwa Leza kulatugwasya kapati alimwi kutupa kuswena kulinguwe.

“Leza nduyando.”—1 JOHANE 4:8.

Leza ulatondezya nguzu, busongo alimwi abululami, pele Bbaibbele kunyina mpolyaamba kuti Leza ninguzu, mbusongo naa mbululami. Pele lyaamba kuti nduyando. Nkaambo nzi? Nkaambo mubwini tulakonzya kwaamba kuti nguzu nzyajisi Leza zimupa kuti abweze ntaamu mpoonya bululami bwakwe alimwi abusongo nzezyeendelezya ntaamu eeyo njabweza. Pele luyando ndwajisi Jehova ndolumukulwaizya kubweza ntaamu. Aboobo luyando ndolweendelezya zintu zyoonse nzyacita.

Nokuba kuti Jehova kunyina cintu ncaakabulide, luyando lwakamukulwaizya kulenga zilenge zilaamaano zyakujulu alimwi azyaanyika zyalo izigwasyigwa kapati akaambo kaluyando ndwajisi alimwi akubikkila maano kwakwe. Caluyando, wakalenga nyika kutegwa bantu kabakkala mpawo. Alimwi wazumanana kutondezya luyando kubantu boonse mukuti “ulapasuzya zuba lyakwe kubantu babi ababotu alimwi ulapa mvwula kubantu baluleme abataluleme.”—Matayo 5:45.

Kuyungizya waawo, “Jehova ulaalubomba kapati aluse.” (Jakobo 5:11) Ulatondezya luyando kuli baabo ibayanda kumuzyiba ncobeni alimwi akuswena kulinguwe. Leza ulababikkila maano bali boobu umwi aumwi kumugama. “Mubwini tali kulamfwu kuli umwi aumwi wesu.”—Milimo 17:27.

Ino tugwasyigwa buti aluyando lwa Leza? Tulakkomana kubona mboliboneka zuba ciindi nolibbila. Tulabotelwa kuswiilila mbwaseka mwana muvwanda. Tulakkomana kubikkilwa maano abanamukwasyi. Ambweni eezyi tazili zintu ziyandika kapati, pele zipa kuti buumi kabukkomanisya citaambiki.

Alimwi tulagwasyigwa akucitondezyo cimbi caluyando lwa Leza: mupailo. Bbaibbele litwaambila kuti: “Mutalibiliki acintu nociba comwe, pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba.” Mbubwenya mbuli usyi bana siluyando, Leza uyanda kuti katumwaambila zintu zitupa kulibilika kapati kutegwa atugwasye. Alimwi buya Jehova, kwiinda muluyando lwakwe utusyomezya kutupa “luumuno lwa Leza oolo lwiinda maano oonse.”—Bafilipi 4:6, 7.

Sena cibalo eeci icibandika bube bwa Leza buyandika kapati, mbuli nguzu, busongo, bululami alimwi aluyando camugwasya kumuzyiba kabotu mbwabede Leza? Kutegwa muzumanane kumuzyiba kabotu Leza, tumukulwaizya kuti mwiiye kujatikizya zintu nzyaakacita kale alimwi anzyayoocita kumbele kutegwa mugwasyigwe.