“Aboobo amulangile, nkaambo tamuzyi buzuba nociba ciindi.”—MATAYO 25:13.

“Amulangile, amupakamane, nkaambo tamuzyi ciindi cibikkidwe nociyoosika.”—MARKO 13:33.

Aboobo, kunyina naba omwe aano anyika uuzyi ciindi cini mamanino abweende bwazintu oobu naayoosika. Nokuba boobo, Leza ‘wakabikka kale ciindi’ nkokuti “buzuba alimwi aciindi” mamanino naayoosika. (Matayo 24:36) Sena eeci caamba kuti kunyina nzila mbotukonzya kuzyiba kuti mamanino alaafwaafwi? Peepe. Jesu wakaambila basikwiiya bakwe kulanga zintu zili mbozibede izyakali kuyootondezya kuti mamanino alaafwaafwi.

Zintu eezyo cakali kuyooba citondezyo “camamanino aabweende bwazintu.” Jesu wakaamba kuti: “Cisi ciyoobukila cisinyina abwami buyoobukila bwaminyina, alimwi kuyooba nzala amizuzumo yanyika mumasena aaindene-indene.” (Matayo 24:3, 7) Alimwi wakaamba kuti kuyooba “zilwazi” nkokuti malwazi aayambukila cakufwambaana. (Luka 21:11) Sena mulazibona zintu eezyi Jesu nzyaakaamba?

Mazuba aano bantu balapenga akaambo kankondo, nzala, mizuzumo yanyika alimwi amalwazi aayindene-indene. Mucikozyanyo, mu 2004, muzuzumo wanyika iwakacitika ku Indian Ocean wakapa kuti maanzi apaye alo aakajaya bantu babalilwa ku 225,000. Mumyaka yotatwe, ibulwazi butegwa COVID-19 bwakajaya bantu babalilwa ku 6.9 miliyoni nyika yoonse. Jesu wakaamba kuti zintu zili mbuli zyeezyi, zyakali kuyootondezya kuti mamanino aabweende bwazintu oobu alaafwaafwi.

Bbaibbele, lyaamba ciindi mamanino kaatanasika kuti “mazuba aamamanino.” (2 Petro 3:3, 4) Lugwalo lwa 2 Timoteyo 3:1-5 lwaamba kuti kumazuba amamanino, bantu bakali kuyoozikaka zyeelelo zyakulilemeka zibotu. (Amubone kabbokesi kakuti “ Kaatanasika Mamanino Aanyika.”) Sena mulababona mazuba aano bantu baliyanda, balyato, bakali alimwi ibatatondezyi luyando kuli bamwi? Oobu abwalo mbumboni bwakuti mamanino aanyika alaafwaafwi kapati.

Ino mazuba aamamanino ayootola ciindi cilamfwu buti? Kweelana ancolyaamba Bbaibbele, ayootola buyo “kaindi kaniini.” Mpoonya Leza, uyoobanyonyoona ‘aabo banyonyoona nyika.’—Ciyubunuzyo 11:15-18; 12:12.

Leza wakabikka kale buzuba alimwi aciindi nayoonyonyoona bweende bwazintu oobu bubyaabi. (Matayo 24:36) Pele kuli makani mabotu, Leza “tayandi kuti muntu uuli woonse anyonyoonwe.” (2 Petro 3:9) Watupa coolwe cakwiiya kujatikizya kuyanda kwakwe alimwi akumuvwida. Nkaambo nzi? Akaambo kakuti uyanda kuti tukafwutuke ciindi nyika eeyi yaakunyonyoonwa alimwi akupona munyika mpya yaparadaiso.

Leza wabikka bubambe bwakuyiisya bantu nyika yoonse kutegwa bayiye mbobakonzya kuyoopona munyika mpya iiyakweendelezyegwa a Bwami bwakwe. Jesu wakaamba kuti makani mabotu aajatikizya Bwami bwa Leza akali kuyookambaukwa “munyika yoonse.” (Matayo 24:14) Mu 2019, Bakamboni ba Jehova nyika yoonse, bakabeleka mawoola manji kapati kukambauka akuyiisya bantu mulumbe wamu Bbaibbele uupa bulangizi. Jesu wakaamba kuti mulimo ooyu iwakukambauka wakali kuyoocitwa munyika yoonse, kaatanasika mamanino.

Ciindi cabweendelezi bwabantu, cilaafwaafwi kumana. Pele makani mabotu ngakuti, mulakonzya kuyoofwutuka ciindi nyika yaakunyonyoonwa alimwi akuyoopona munyika yaparadaiso njaakasyomezya Leza. Cibalo citobela cilabandika mbomukonzya kuyoopona munyika eeyo mpya.