Ino-ino, ciindi mfwulumende mpya ya Leza yakujulu yakutalika kweendelezya bantu, nyika buyooba busena bukkomanisya mwalo bantu mobakonzya kukkala calukamantano alimwi akucita mulimo mubotu uukkomanisya. Leza wakasala Jesu Kristo kweendelezya nyika. Mukwiimpana abeendelezi banji bamazuba aano, Jesu unoobabikkila maano kapati balelwa bakwe. Bweendelezi bwakwe bunooyeeme aluyando, alimwi unooli Mwami siluzyalo, siluse alimwi uyooyendelezya cabululami.—Isaya 11:4.

Bantu ibayookkala munyika eeyo tabakaandaani akaambo kacisi nkobazwa naa mubala. Bantu boonse banookamantene. (Ciyubunuzyo 7:9, 10) Bantu boonse ibanookkala munyika banoomuyanda Leza alimwi abasimukobonyina. Alimwi bayoobelekela antoomwe caluumuno kuzuzikizya makanze aa Leza aakusaanguna akulanganya munzi wabo, nkokuti nyika.—Intembauzyo 115:16.

Ciindi Bwami bwa Leza bwaakutalika kweendelezya, Mulengi uyoozimana ntenda zilicitikila. (Intembauzyo 24:1, 2) Ciindi Jesu naakaumuzya guwo, wakatondezya ncakonzya kucita akaambo kanguzu zya Leza. (Marko 4:39, 41) Mubweendelezi bwa Kristo, kunyina uunooyoowa kujatikizya ntenda zilicitikila. Ciindi Bwami bwa Leza bwaakutalika kweendelezya, tunoopona muluumuno antoomwe abanyama alimwi tatucinoonyonyooni busena mpotukkala.—Hosea 2:18.

Bantu boonse banoopona buumi buli kabotu. Kunyina uyoociswa, kucembaala naa kufwa. (Isaya 35:5, 6) Bantu banookkala mubusena bweebeka alimwi ibunyina tombe, ibukozyenye aboobo banabukwetene bakusaanguna mobakali kukkala mumuunda wa Edeni. Mbubonya mbuli mumuunda wa Edeni, munyika mpya nyika iiyoopa zyakulya zinji, aboobo aabo banookkala mumo bayooba azyakulya zinji. (Matalikilo 2:9) Mbubonya mbuli cisi ca Leza cabana Israyeli cansiku, mu Paradaiso bantu boonse ‘bayoolya cakulya cabo akukkuta.’—Levitiko 26:4, 5.

Mubweendelezi bwamfulumende ya Leza yanyika yoonse, boonse bayookkala caluumuno alimwi akweendelezyanya caluzyalo acabululami umwi amweenzyinyina. Kunoonyina nkondo, kutazibelesya kabotu nguzu zyabweendelezi, alimwi bantu boonse banoojisi nzyobayandika. Bbaibbele lisyomezya kuti: “Bayookkala umwi aumwi munsi lyamusaansa wakwe amunsi lyamukuyu wakwe, alimwi takukabi muntu naaba omwe uuyoobayoosya.”—Mika 4:3, 4.

Mikwasyi yoonse inoojisi maanda aanjiyo aayigeme kakunyina akulibilika kutandwa, alimwi milimo yoonse njotunoocita inoojisi mpindu. Kweelana ambolyaamba Bbaibbele, aabo bayoopona munyika mpya ya Leza “tabakabelekeli maliminya pe,” naa cabuyo.—Isaya 65:21-23.

Bbaibbele lisyomezya kuti: “Nyika iyoozula luzyibo lwa Jehova.” (Isaya 11:9) Bantu ibayoopona mubweendelezi bwa Bwami bwa Leza bayooyiya busongo bwa Mulengi wabo butagoli alimwi azintu zibotu nzyaakalenga. Tabakabelesyi luzyibo lwabo kupanga zilwanyo zyankondo naa kucisa bamwi. (Isaya 2:4) Muciindi caboobo, bayooyiya mbobakonzya kukkala muluumuno abantunyina alimwi akulanganya nyika.—Intembauzyo 37:11.

Leza wakabeleka canguzu kubamba nyika kutegwa katupona buumi bukkomanisya buzuba abuzuba. Uyanda kuti bantu kabapona anyika mane kukabe kutamani. (Intembauzyo 37:29; Isaya 45:18) Kutegwa eeci cikakonzyeke, Leza “uyoolumena lufwu mane kukabe kutamani.” (Isaya 25:8) Bbaibbele lisyomezya kuti: “Lufwu talukabi limbi, akwalo koomoka, kulila nokuba kucisa takukabi limbi pe.” (Ciyubunuzyo 21:4) Leza uyoopa bantu boonse coolwe cakupona kukabe kutamani, nkokuti aabo boonse bayoofwutuka ciindi aakunyonyoona nyika eeyi mbyaabi alimwi abaabo boonse bayoobusyigwa munyika mpya.—Johane 5:28, 29; Milimo 24:15.

 Noliba lino, mamiliyoni aabantu balalibambila kale kuyoopona mubweendelezi bwa Bwami bwa Leza oobo buli afwaafwi kapati. Nokuba kuti tabalondokede, balasolekesya kale kuba bantu aabo Leza mbayanda kuti bakapone munyika yakwe mpya. Mubuti? Kwiinda mukwiiya kujatikizya Jehova Leza alimwi ayooyo ngwaakatuma, Jesu Kristo.—Johane 17:3.

Amuzyibe zinji kujatikizya mbomukonzya kuyoofwutuka, inyika eeyi yaakunyonyoonwa akuyoopona munyika iili kabotu iili afwaafwi kapati. Amuzumine ciiyo ca Bbaibbele kuzwa kuli umwi wa Bakamboni ba Jehova kakunyina kubbadela, kubelesya bbuku lyakuti Amupone Kukabe Kutamani!