MU AUGUST 22, 2014, kwakacitika cintu cakumuuya cipati alimwi cikkomanisya: Bbaibbele lya Busanduluzi Bwanyika Mpya lyakamwaigwa mu Chitonga.

Bbaibbele lya Busanduluzi Bwanyika Mpya lino alyalo lyaba akati kama Bbaibbele aambi aali kubelesyegwa kwaciindi cilamfwu abantu bayoowa Leza mu Zambia. Pele ino nkaambo nzi ncokwakali kuyandika busanduluzi bwa Bbaibbele abumbi? Ino mbaani bakalisandulula? Alimwi mbuti mbomukonzya kuba masimpe kuti Bbaibbele lya Busanduluzi Bwanyika Mpya lilasyomeka?

Kwamwaigwa ma Bbaibbele mapya manji mumyaka yalino-lino aawa. Ma Bbaibbele amwi mapya apa kuti kube Jwi lya Leza mumyaambo imwi kwaciindi cakusaanguna. Pele, ma Bbaibbele mapya asandululwa amumyaambo iijisi kale ma Bbaibbele aambi alo aali kubelesyegwa kwaciindi cilamfwu. Nkaambo nzi? Ibbuku litegwa So Many Versions?, ilyakalembwa aba Sakae Kubo alimwi aba Walter Specht, lipandulula kuti: “Kunyina busanduluzi bwa Bbaibbele ibunga bwaambwa kuti bulikkwene cakumaninina. Busanduluzi bwama Bbaibbele bweelede kweendelana aluzyibo lwabasyaazibwene mumakani aa Bbaibbele alimwi akucinca kwamwaambo.”

Mumyaka yaino-ino, kwaba kusumpuka kapati mukumvwisya myaambo ya Chihebrayo, Chiaramu, alimwi a Chigiriki—imyaambo eeyo yakabelesyegwa kulemba Bbaibbele kumatalikilo. Kunze lyaboobo, kwajanwa malembe aa Bbaibbele aakaindi kapati alimwi aaluzi kwiinda yaayo aakabelesyegwa abasanduluzi ba Bbaibbele bamusyule oomu. Aboobo Jwi lya Leza lilakonzya kusandululwa munzila iiluzi kapati mazuba aano ikwiinda kaindi!

Syaazibwene mumakani aamakwebo aazisi, Declan Hayes wakalemba kuti: “Mwaka amwaka, Bbaibbele ndebbuku lisambalwa kapati mumwaka kwiinda mabbuku aambi.” Alimwi zimwi ziindi akaambo buyo kakuyanda kupanga mali, bantu babikkila buyo maano kukumwaya ma Bbaibbele manji, pele aatajisi makani aaluzi. Mu Bbaibbele limwi basanduluzi bakagusya zibalo nzyobayeeya kuti “tazinonezyi kubala.”  Mu Bbaibbele limbi, basanduluzi bakacinca mabala naa twaambo ntobayeeya kuti inga twafwumpula babali bamwi bamazuba aano. Mucikozyanyo, mukusola kukkomanisya bantu bamwi, Bbaibbele eelyo lyaamba Leza kuti ngu “Taata-Baama.”

Cilengwa cimwi citakkomanisyi cijatikizya kugusya zina lya Leza lyakuti Jehova. (Basyaazibwene bamwi mumakani aamu Bbaibbele basandulula zina lya Leza kuti “Yahweh.”) Mumalembe aakaindi aa Bbaibbele, izina lya Leza lilembedwe mumabala aa Chihebrayo one sunu aakonzya kulembwa kuti YHWH naa JHVH. Izina eeli lilibedelede lilajanika ziindi zitandila ku 7,000 mucibeela cilikke buyo ca Bbaibbele bamwi ncobaamba kuti Cizuminano Cakaindi. (Kulonga 3:15; Intembauzyo 83:18) Aboobo cilisalede kuti, Mulengi wesu uyanda kuti bakombi bakwe balizyibe akulibelesya zina eeli!

Nokuba boobo, imyaanda yamyaka yainda, ikuyoowa zintu zitako kwakapa kuti ba Juda baleke kulyaamba zina lya Leza. Kumbele, abalo Banakristo bakatalika kutobela mizeezo eeyi. (Milimo 20:29, 30; 1 Timoteyo 4:1) Aboobo cakaba cilengwa cidumide akati kabasanduluzi ba Bbaibbele ikugusya zina lya Leza akubikka zina lyabulemu lyakuti “Mwami” mubusena bwazina lyakwe lini. Mazuba aano, muma Bbaibbele manji izina lya Leza lyakagusyigwa mumasena oonse molyakabede. Muma Bbaibbele amwi aamazuba aano tamulembedwe noliba bbala lyakuti “zina” kulugwalo lwa Johane 17:6, ooko Jesu nkwaakaamba kuti: “Ndabazyibya zina lyako.” Mucikozyanyo, mu Bbaibbele litegwa Good News Translation, ikapango aaka kasanduludwe kuti: “Ndakuzyibya.”

Ino nkaambo nzi bamwi ncobataliyandi naaceya zina lya Leza? Amulange-lange cakaambwa mumagazini iigwasya basanduluzi bama Bbaibbele iitegwa Practical Papers for the Bible Translator. Magazini eeyi ilamwaigwa ambunga ya United Bible Societies (UBS), yalo iilanganya mulimo wakusandulula ma Bbaibbele nyika yoonse mbwiizulwa. Cibalo cimwi mumagazini eeyi cakaamba kuti: “Mbokunga mabala aakuti YHWH cakutadooneka aiminina zina lini ligaminide, inga cainda kubota kusandulula zina eeli kweelana ambolilembwa mumwaambo ooyo uusandululwa.” Pele cibalo eeco cakacenjezya kuti: “Nokuba boobo kuli twaambo itweelede kubikkilwa maano.”

Sena “twaambo” ooto tulaamunse? Kweelana amagazini eeyi, basyaazibwene bamwi bayeeya kuti: “Ikuti naa twabelesya zina mbuli lyakuti Yahweh, bantu inga bacimvwida mumbi . . . , balakonzya kuyeeya kuti ‘Yahweh’ ngu Leza ngobatazyi, naa Leza mweenzu alimwi uutazyizyilwe, iwiimpene a Leza ooyo ngobazyi kale.” Nokuba boobo, cakusinizya Bbaibbele liyiisya kuti Jehova Leza uliindene abaleza bakombwa abantu batali Banakristo!—Isaya 43:10-12; 44:8, 9.

Basyaazibwene bamwi baamba kuti batobela buyo cilengwa ncobakajana ciindi nobagusya zina lya Leza akubikka zina lyabulemu lyakuti “Mwami.” Pele Jesu wakaamba kuti ncibi kapati ikutobela zilengwa zisampaula Leza. (Matayo 15:6) Kunze lyaboobo, muzeezo ooyu wakugusya zina lini akubikka zina lyabulemu mubusena bwandilyo tauli wamu Magwalo pe. Jesu Kristo ulijisi mazina aabulemu manji, mbuli aakuti “Jwi lya Leza” a “Mwami wabami.” (Ciyubunuzyo 19:11-16) Aboobo, sena zina lyakuti Jesu lyeelede kugusyigwa mumasena molijanika akulidwa busena azina limwi akati kamazina aaya aabulemu?

Cibalo acimbi mumagazini njimunya njotwaamba musyule oomu caamba kuti: “Bunji bwaziindi ndembelo yakuti ‘Jehova’ tayeelede kubelesyegwa pe.” Ino nkaambo nzi kapedwe? Magazini eeyo yaamba kuti: “Basyaazibwene basyoma kuti ndembelo yakuti ‘Yahweh’ njiikozyenye kapati ambolyakali kwaambwa zina lya Leza kumatalikilo.” Nokuba boobo, imazina aazyibidwe kapati aamu Bbaibbele mbuli Isaya, Jeremiya, alimwi a Jesu aalo alembwa munzila iitatolezyi abuniini ambwaakali kwaambwa kaindi mu Chihebrayo cakusaanguna (Yeshaʽ·yaʹhu, Yir·meyahʹ, alimwi a Yehoh·shuʹaʽ). Mbwaanga ndembelo yakuti “Jehova” nenzila iizumizyidwe mumulawo yakulemba zina lya Leza—alimwi buya eeli ndezina ndyobazyibide bantu alimwi ndyobali kubelesya kwamyaanda yamyaka mu Chitonga amumyaambo iimbi—itwaambo ntobaamba bamwi twakuti talyeelede kubelesyegwa tatuyi koomoonga pe. Masimpe, cilisalede kuti ikutayanda kubelesya zina lya Leza kujatikizya buyo mbobalimvwa bantu anzyobasyoma beni, ikutali akaambo kakutobela bumboni atwaambo twamasimpe itwakavwuntauzyigwa.

Pele makani aaya taajatikizyi buyo busyaabusongo pe. Mucikozyanyo, syaazibwene umwi wamumbunga ya UBS mucisi ca India wakalemba kujatikizya mapenzi aakonzya kuboola akaambo kakugusya zina lya Leza mu Bbaibbele mumasena molyakabede kaindi. Waamba kuti: “Ba Hindu tabayandi kuzyiba zina lyabulemu lya Leza pe; bayanda kuzyiba zina lini lya Leza ilimugeme, alimwi ccita kuti balizyiba zina lini eelyo, kunyina nobanga bamusyoma akuba acilongwe a Leza mukamwini zina eelyo.” Mubwini, oobo mbocibede kubantu boonse buyo ibamuyandaula Leza. Ikuzyiba zina lya Leza kulayandika kapati kutegwa tumuzyibe kabotu, ikutali kuti ngwakweezyeezya buyo pe, pele kuti ngu  Leza uupona ngotukonzya kuzyiba. (Kulonga 34:6, 7) Aboobo Bbaibbele lyaamba kuti: “Muntu woonse wiita zina lya Jehova uyoofwutulwa.” (Baroma 10:13) Bakombi ba Leza baleelede kulibelesya zina lyakwe!

Aboobo cakali cintu cipati alimwi cikkomanisya mumwaka wa 1950 ciindi Bbaibbele lya Chingisi lya Busanduluzi Bwanyika Mpya bwa Magwalo aa Banakristo aa Chigiriki nolyakamwaigwa ciindi cakusaanguna. Mumyaka iili kkumi yakatobela, izibeela zya Magwalo aa Chihebrayo, naa Cizuminano Cakaindi, zyakamwaigwa muzibeela-beela. Mumwaka wa 1961, Bbaibbele lyoonse likkwene mu Chingisi lyakamwaigwa kalili bbuku lyomwe buyo. Cipati ncakuti, Bbaibbele lya Busanduluzi Bwanyika Mpya lyapilusya zina lya Leza lyakuti “Jehova” mumasena oonse aatandila ku 7,000 molijanika mu Cizuminano Cakaindi. Cintu acimbi cilibedelede kapati ncakuti zina lya Leza lyapilusyigwa iziindi zili 237 mu Magwalo aa Banakristo aa Chigiriki, naa mu “Cizuminano Cipya.”

Ikupilusya zina eelyo mumasena molyeelede kuba takulemeki buyo Leza pe, pele alimwi kutugwasya kumvwisya twaambo. Mucikozyanyo, kuli Matayo 22:44 ima Bbaibbele manji aamba kuti: “Mwami wakati ku Mwami wangu.” Pele ino Mwami ooyo waambila Mwami uumbi nguni? Mu Bbaibbele lya Busanduluzi Bwanyika Mpya ikapango aaka kaamba kuti: “Jehova wakaambila Mwami wangu kuti,” ooko ikuli nkokuzubulula kuluzi kwalugwalo lwa Intembauzyo 110:1. Aboobo busanduluzi oobu bulabagwasya babali ikubona kwiindana kuliko akati ka Jehova Leza alimwi a Mwanaakwe.

Bbaibbele lya Busanduluzi Bwanyika Mpya lilamwaigwa ambunga ya Watch Tower Bible and Tract Society, imbunga yamumulawo iyiiminina Bakamboni ba Jehova. Kwamyaka yiinda kumwaanda, Bakamboni ba Jehova bali kusimba akumwaya ma Bbaibbele munyika yoonse mbwiizulwa. Bbaibbele lya Busanduluzi Bwanyika Mpya lyakapegwa kuli Bakamboni ba Jehova akakamu ka Banakristo ikakali kusandulula Bbaibbele ikaitwa kuti New World Bible Translation Committee. Muciindi cakuyanda kulijanina mpuwo munzila iili yoonse, ibamukkomiti eeyi bakalomba kuti mazina aabo atakazyibwi pe neliba leelyo banoofwide.—1 Bakorinto 10:31.

Pele ino nkaambo nzi Bbaibbele eeli ncoliitwa kuti Bbaibbele lya Busanduluzi Bwanyika Mpya? Makani aantalisyo mu Bbaibbele ilyakamwaigwa mu 1950 akapandulula kuti mutwe wamakani ooyu utondezya lusyomo luyumu ndotujisi lwakuti bantu bali “amulyango wanyika mpya” kweelana acisyomezyo icili kulugwalo lwa 2 Petro 3:13. Mbubonya mbobakalemba bamukkomiti eeyi, “muciindi eeci cakuzwa munyika eeyi yakaindi akunjila munyika mpya,” cilayandika kapati kuti busanduluzi bwama Bbaibbele kabupa kuti “kasimpe keni-keni ikali mu Jwi lya Leza” kamunike.

Cintu icakabikkilwa kapati maano nkusandulula munzila iiluzi. Basanduluzi ba Bbaibbele lya Chingisi bakasandulula cacigaminina kuzwa mumyaambo yakusaanguna ya Chihebrayo, Chiaramu, alimwi a Chigiriki, kwiinda mukubelesya malembe aaluzi kapati aakaliko aciindi eeco. * Bakasolekesya kwaasandulula cakusyomeka malembe aayo aakaindi—kubelesya  mwaambo muuba-uba ngobakonzya kumvwa ibabali bamazuba aano.

Aboobo tacigambyi pe, kuti basyaazibwene bamwi balalilumbaizya Bbaibbele lya Busanduluzi Bwanyika Mpya akaambo kakuti lilasyomeka alimwi lililuzi. Mucikozyanyo, mumwaka wa 1989, Benjamin Kedar, wakucisi ca Israel alimwi syaazibwene mumwaambo wa Chihebrayo wakati: “Nendivwuntauzya mwaambo uubelesyedwe mu Bbaibbele lya Chihebrayo alimwi amuma Bbaibbele aamumyaambo iimbi, bunji bwaziindi inga ndibelesya Bbaibbele lya Chingisi litegwa Bbaibbele lya Busanduluzi Bwanyika Mpya. Lyoonse nendicita boobo, ndijana kuti basanduluzi ba Bbaibbele eeli bakasyomeka alimwi bakasoleka kapati kusandulula malembe munzila iimvwika alimwi iiluzi.”

Aboobo cileela kuti Bakamboni ba Jehova babikkide bubambe bwakuti Bbaibbele lya Busanduluzi Bwanyika Mpya lijanike mumyaambo iimbi ikutali buyo mu Chingisi. Kusikila lino, Bbaibbele eeli lyoonse mbolibede naa zibeela buyo zyandilyo lyamwaigwa mumyaambo iisika ku 130. Ikutegwa mulimo ooyu ucitwe, kwakajanwa nzila yakusandulula Bbaibbele iigwasya basanduluzi kuvwuntauzya mabala aamu Bbaibbele akwaasandulula kwiinda mukubelesya makkompyuta. Kunze lyaboobo, cibeela cilanganya busanduluzi citegwa Translation Services cakatalisyigwa kutegwa cigwasye basanduluzi. Kabunga Keendelezya ka Bakamboni ba Jehova kalabikkila maano kweendelezya mulimo ooyu wakusandulula Bbaibbele kwiinda mukkomiti yankako iitegwa Kkomiti Yakulemba. Pele ino mulimo ooyu ucitwa buti?

Cakusaanguna, kabunga ka Banakristo balyaabide kalasalwa kuti kabe kabunga kabasanduluzi. Mumyaka minji, kwabonwa kuti ciindi basanduluzi nobabelekela antoomwe kabali kabunga muciindi cakuti umwi aumwi kasandulula alikke, busanduluzi inga mbubotu kapati. (Tusimpi 11:14) Ibasalwa kuba mukabunga kasandulula Bbaibbele inga mbaabo ibakaubeleka kale mulimo wakusandulula kwaciindi cili mbocibede kabali basanduluzi bamabbuku aambi aa Bakamboni ba Jehova. Mpoonya kabunga aako kalayiisyigwa nzila zigwasya kusandulula Bbaibbele cakusitikila alimwi amukubelesya mapulogilamu aakkompyuta aakapangilwa mulimo wakusandulula Bbaibbele.

Kabunga kabasanduluzi kalaililwa kuti kasandulule Bbaibbele munzila iiluzi alimwi njobakonzya kumvwa bantu boonse. Ikuti kacikonzyeka, busanduluzi bweelede kuba bwabbala limwi alimwi pele tabweelede kwiimpya aali ceeco cakali kwaambwa mumalembe aakusaanguna. Ino eeci cicitwa buti? Amuyeeye Bbaibbele lyakamwaigwa lino-lino aawa. Kakamu kabasanduluzi kakasaanguna kwaasandulula mu Chitonga mabala oonse mapati-pati aamu Bbaibbele aali mu Bbaibbele lya Busanduluzi Bwanyika Mpya lyamu Chingisi. Mpoonya pulogilamu yaakkompyuta iitegwa Watchtower Translation System yakagwasya basanduluzi kwiinda mukubatondezya mabala aamu Bbaibbele oonse aaswaangene amabala aayo alimwi amabala aamba cintu comwe angawo. Pulogilamu eeyi alimwi yakatondezya mabala mumwaambo wa Chigiriki naa Chihebrayo ikutegwa basanduluzi babone mbwaakali kusandululwa mabala aayo mu Chingisi mumasena aambi mu Bbaibbele. Eezyi zyoonse zyakagwasya kapati mukusala mabala aa Chitonga aamba cintu comwe amabala aayo. Kakamu kabasanduluzi nokakazuminana kujatikizya mabala aayo aamu Chitonga, bakatalika kusandulula Bbaibbele kapango akapango, kababelesya kkompyuta kubatondezya mabala aamu Chitonga ngobakazuminana.

Pele kusandulula tacaambi buyo kwiile kubikka bbala lya Chitonga aawo aali bbala lya Chingisi pe. Basanduluzi bakali kubona masimpe kuti mabala aa Chitonga aayo aakasalwa apa muzeezo wamu Magwalo uuluzi mukapango naa cibalo cimwi acimwi. Bakabikkila maano kubona kuti mabala akkalana akutobelana bweelede alimwi kweelana ambocaambaulwa Chitonga. Nomubala Bbaibbele eeli, mulalibonena nobeni kuti basanduluzi bakalitakata ncobeni ikubeleka mulimo ooyu. Mu Bbaibbele lya Busanduluzi Bwanyika Mpya lyamu Chitonga, Jwi lya Leza lyakasandululwa munzila iitakatazyi kubala, iisalede, iilimvwisya, alimwi yeendelana azili mumalembe aakaindi. *

Tumukulwaizya kuti mulibale akulilanga-langa cakusitikila Bbaibbele lya Busanduluzi Bwanyika Mpya. Mulakonzya kulijana kuli basikumwaya bamagazini eeyi naa kumbungano ya Bakamboni ba Jehova yankomuzwa. Amuzyibe kuti mulakonzya kulibala kamusyomede kuti imajwi aa Leza akasandululwa cakusyomeka mumwaambo wanu. Cakutadooneka, lino-lino muyoozuminizya kuti ikumwaigwa kwa Bbaibbele eeli ikwakacitika calino-lino aawa masimpe ncintu cakumuuya cipati alimwi icikkomanisya!