Nkaambo nzi bantu ncobayanda kupona buumi butamani? Magwalo atwaambila kuti Leza nguwakabikka kulombozya ooku mumyoyo yesu. (Mukambausi 3:11) Bbaibbele alimwi lyaamba kuti “Leza nduyando.” (1 Johane 4:8) Mbwaanga Leza ulatuyanda, takonzyi kubikka kulombozya kuli boobu mulindiswe ikuti naa kacitakonzyeki kupona kukabe kutamani.

Kwaamba masimpe, kunyina muntu uuyanda kufwa. Nkakaambo kaako Bbaibbele lyaamba lufwu kuti ‘ngusinkondo’ mubyaabi. (1 Bakorinto 15:26) Ibamwi balafwa kabacili baniini, pele bamwi balakkala kwamyaka minji mpoonya abalo balafwa. Bantu banji balayoowa ciindi nobayeeya kujatikizya lufwu. Pele sena lufwu kuli noluyoomana? Sena cilakonzyeka ncobeni kulumana lufwu?

Sena inga mwagambwa kuzyiba kuti tanaakali makanze aa Leza kuti bantu kabafwa? Ibbaibbele, kulugwalo lwa Matalikilo lilapa bumboni bwakuti makanze aa Leza akali aakuti bantu kabapona anyika mane kukabe kutamani. Jehova Leza wakalenga nyika azintu zyoonse nzyobakali kuyandika bantu kutegwa kabapona kumwi kabakkomene. Mpoonya wakalenga muntu wakusaanguna Adamu, akumubikka muparadaiso, mumuunda wa Edeni. Naakamana kucita boobo, “Leza wakabona kuti zintu zyoonse nzyaakalenga, nzibotu kapati.”—Matalikilo 1:26, 31.

Adamu wakalengwa kali muntu uulondokede, wakalengwa mucinkozya ca Leza. (Deuteronomo 32:4) Mukaintu wa Adamu, Eva, awalo wakanyina kampenda kali koonse, wakalilondokede mumizeezo alimwi  akumubili. Jehova wakabaambila kuti: “Amuzyalane muvwule, muzuzye nyika akuyeendelezya, alimwi amweendelezye nswi zyamulwizi azilenge zyuuluka mujulu azilenge zyoonse zyeenda anyika.”—Matalikilo 1:28.

Kuzyala bana akuzuzya nyika, kwakali kuyootola ciindi. Eva wakeelede kuzyala bana, abalo bana aabo bakeelede kuzyala bana kusikila mane nyika yoonse yazula kweelana ambwaakali kuyanda Leza. (Isaya 45:18) Sena inga caba camaano kuyeeya kuti Jehova naakabapa ba Adamu a Eva coolwe eeci, ikuti naa bakeelede kupona buyo myaka misyoonto yakubona bana babo ambweni abazyukulu babo, pele kakunyina kuzyiba buumi mbobwakali kuyooba kumbele?

Amuyeeye buyo alimwi kujatikizya mulimo wakweendelezya banyama. Adamu wakaambilidwe kubaulika mazina banyama alimwi eeco cakali kuyandika ciindi cinji. (Matalikilo 2:19) Pele kutegwa abeendelezye, caamba kuti wakeelede kubazyiba kabotu alimwi akuzyiba mbwaakeelede kubalanganya. Eeci cakali kuyandika ciindi cinji kwiinda ciindi cakubaulika buyo mazina.

Aboobo, malailile aa Leza aakuzuzya nyika alimwi akweendelezya banyama atondezya kuti banabukwetene bakusaanguna bakalengedwe kuti kabapona ciindi cilamfwu kapati. Alimwi buya, Adamu wakapona kwamyaka minji kapati.

Bbaibbele litondezya kuti aciindi cimwi bantu bakali kupona myaka minji kapati kwiinda mbotupona mazuba aano. Lyaamba kuti: “Myaka yoonse njaakapona Adamu yakali 930.” Mpoonya lilazumanana kwaamba abamwi bamaalumi bali cisambomwe ibakapona myaka iinda ku 900. Bamaalumi aaba mbaa Seti, Enosi, Kenani, Jaredi, Metusela alimwi a Nowa. Boonse aaba bakapona kalitanacitika Zambangulwe lyakuciindi ca Nowa alimwi Nowa wakaponede kale myaka iili 600 kalitanacitika Zambangulwe. (Matalikilo 5:5-27; 7:6; 9:29) Ino cakali kukonzyeka buti kupona myaka minji boobu?

Bamaalumi aaba boonse bakapona kakwiindide buyo ciindi cisyoonto kuzwa ciindi Adamu a Eva nobakalondokede. Kulangilwa kuti eeci ncecakapa kuti bapone myaka minji. Pele ino kulondoka kuswaangene buti akupona myaka minji? Alimwi ino lufwu luyoomana buti? Kutegwa tujane bwiinguzi, cakusaanguna tweelede kuzyiba kaambo ncotucembaalila akufwa.