Bantu banji munyika yoonse bayandika lugwasyo lwazyakulya alimwi akwakukkala. Bamwi bayandika buyo kubaambila bulangizi bwakumbele. Ino mbuti kusolekesya kwesu kugwasya bantu bali boobu mbokuyoopa kuti Leza atukkomanine alimwi akutulongezya?

“Ooyo uufwida luzyalo muntu uupengede ukweletesya Jehova, eelyo walo uyoomupa bulumbu akaambo kazintu eezyo nzyacita.”—TUSIMPI 19:17.

Jesu wakaamba cikozyanyo camuntu iwakaumwa kapati ababbi akumusiya kanetukide. (Luka 10:29-37) Mpoonya mwaalumi umwi siluzyalo wakaima akumulanganya muntu ooyu wakaliciside kapati. Wakamugwasya nokuba kuti bakaliindene musyobo.

Mwaalumi siluzyalo ooyu tanaakamusilika buyo zilonda alimwi akumupa lugwasyo lwakumubili mwaalumi iwakaliciside, pele alimwi wakamukatalusya kumapenzi aakwe.

Ino ncinzi ncotwiiya kucikozyanyo eeci? Jesu wakatondezya kuti tweelede kubagwasya aabo bayandika lugwasyo munzila iili yoonse njotukonzya. (Tusimpi 14:31) Jwi lya Leza liyiisya kuti ino-ino Leza uyoobumana bucete alimwi akupenga. Pele tulakonzya kulibuzya kuti, ino Leza uyookumana buti, alimwi lili? Cibalo citobela cilabandika zilongezyo nzyamubambilide Mulengi wanu siluyando.