Mbotuli bana bamuntu wakusaanguna, Adamu, toonse tuli mukwasyi omwe. Nokuba kuti banamukwasyi beelede kuyandana alimwi akulemekana, mazuba aano nciyumu kuyandana munzila iili boobu. Pele Leza wesu siluyando tayandi kuti kacili boobo pe.

“Weelede kuyanda mweenzinyoko mbubonya mbuli mboliyanda omwini.”—LEVITIKO 19:18.

“Amuzumanane kuyanda basinkondonyoko.”—MATAYO 5:44.

Amubone Leza mbwalupandulula luyando mu Jwi lyakwe kulugwalo lwa 1 Bakorinto 13:4-7:

“Luyando lulakkazika moyo alimwi lulaaluzyalo.”

Amuyeeye kaambo aaka: Ino mulimvwa buti ciindi bamwi nobamukkazikila moyo akumweendelezya caluzyalo alimwi akutamunyemena kapati ciindi nomwalubizya?

“Luyando talukwe munyono.”

Amuyeeye kaambo aaka: Ino mulimvwa buti ciindi bamwi nobamudooneka naa kumufwida munyono?

Luyando “talubikkili buyo maano kuzintu nzyoluyanda.”

Amuyeeye kaambo aaka: Ino mulimvwa buti ciindi bamwi nobaiswiilila mizeezo yanu alimwi akutazumanana kucita buyo nzyobayanda balo?

Luyando “talubikkilili.”

Amuyeeye kaambo aaka: Leza ulilibambilide kubalekelela bantu babisya ikuti beempwa. “Tatuyandawidi tumpenda ciindi coonse, nokuba kutubikkilila lyoonse.” (Intembauzyo 103:9) Tulakkomana ciindi muntu ngotwakalubizyila natulekelela. Aboobo tweelede kuba bantu balibambilide kulekelela bamwi ciindi nobatulubizyila.—Intembauzyo 86:5.

Luyando “talukkomanini kutalulama.”

Amuyeeye kaambo aaka: Ciindi notwacitikilwa cintu cibyaabi, tatukkomani bamwi nobasekelela akaambo kakupenga kwesu. Aboobo tatweelede kusekelela ciindi bamwi nobacitikilwa cintu cibyaabi, nokuba kuti tiibakali kutweendelezya kabotu.

Kutegwa Leza atulongezye, tweelede kubayanda bantu tacikwe makani aciimo cabo, cisi nkobazwa naa bukombi bwabo. Nzila imwi mbotukonzya kutondezya luyando nkwiinda mukugwasya baabo bayandika lugwasyo.