BUMWI BUZUBA mu Nsondo mafwumofwumo kumatalikilo amyaka yakuma 1520, bantu bakkala mudolopo syoonto lya Meaux, ilili munsi-munsi adolopo lya Paris, tiibakasyoma ncobakamvwa mucikombelo. Bakali kuswiilila kubalwa kwa Makani Mabotu mumwaambo wabo waci French kutali waci Latin!

Musanduluzi wa Bbaibbele iwakapa kuti Bbaibbele lisandululwe mumwaambo waci French wazina lya Jacques Lefèvre d’Étaples (muci Latin, Jacobus Faber Stapulensis), mukuya kwaciindi wakalembela mweenzinyina kuti: “Tokonzyi kweezyeezya Leza mbwagwasya bantu banji kumvwisya Jwi lyakwe.”

Aciindi eciya, Cikombelo ca Katolika alimwi abasyaazibwene mumakani aabukombi mu Paris bakali kukaka muzeezo wakubelesya busanduluzi bwama Bbaibbele mumyaambo iizyibidwe kapati abantu. Aboobo, ino ncinzi cakakulwaizya Lefèvre kusandulula Bbaibbele mumwaambo waci French? Alimwi ino wakacikonzya buti kugwasya bantu-bantu buyo kumvwisya Jwi lya Leza?

Katanatalika kusandulula Bbaibbele, Lefèvre wakalyaaba kubukulusya bupanduluzi bwini bwabusongo bwabantu alimwi amakani aajatikizya bukombi. Wakazikuzyiba kuti malembe aakaindi akanyonganizyigwa abulubizi bwakaliko amizeezo iitali kabotu yakaindi. Naakali kuvwuntauzya bupanduluzi bwini bwamalembe aakaindi, wakatalika kulibala cakusitikila Bbaibbele lya Cikombelo ca Katolika litegwa Latin Vulgate.

Kwaabala cakulomya Magwalo kwakamupa kwaamba kuti, “kwiiya kasimpe ka Leza kulikke . . . kuletela lukkomano kapati.” Aboobo, Lefèvre wakazikucileka kwiiya busongo bwabantu akutalika kusandulula Bbaibbele.

Mu 1509, Lefèvre wakamwaya busanduluzi bwiindene abusanduluzi bwama Bbaibbele osanwe aabusanduluzi bwaci Latin bwabbuku lya Intembauzyo, * kubikkilizya abusanduluzi bwakwe bwa Vulgate. Mukwiimpana abasyaazibwene mumakani aabukombi bamuciindi cakwe, walo wakayandisisya kusandulula tupango twamu Bbaibbele munzila nguba-uba. Nzila yakwe yakusandulula Magwalo yakabakwelelezya kapati basikwiiya Bbaibbele bamwi alimwi abasikubambulula.—Amubone kabbokesi kakuti “ Martin Luther Mbwaakakulwaizyigwa Amakani aa Lefèvre.”

Akaambo kakuti wakazyalilwa mucikombelo ca Katolika, Lefèvre wakalisinizyide kuti kubambulula njiisyo zyacikombelo kwakali kukonzyeka lilikke buyo kuti Magwalo ayiisyigwa munzila iiluzi kubantu-bantu buyo. Pele ino mbuti bantu-bantu buyo mbobakali kukonzya kugwasyigwa a Magwalo aciindi eeco mbwaanga bunji bwamalembe aaya aasalala akalembedwe buyo muci Latin?

Akaambo kaluyandisisyo ndwaakajisi ku Jwi lya Leza, Lefèvre wakaba amakanze aakusandulula Bbaibbele kutegwa bantu banji bakonzye kulimvwisya. Kutegwa azuzikizye mbaakani eeyi, mu June 1523, wakamwaya tuma Bbaibbele tusyoonto-syoonto tobilo twabusanduluzi bwamabbuku aa Makani  Mabotu muci French. Tuma Bbaibbele ootu twalo itwakali kuulwa cisela camuulo wa Bbaibbele lipati, twakapa kuti cuube-ube kubantu bacete kuba akkopi lya Bbaibbele.

Bantu-bantu buyo bakafwambaana kutuula tuma Bbaibbele ootu. Bamaalumi abamakaintu bakaliyandide kubala majwi aa Jesu mumwaambo wabo cakuti makkopi aakasaanguna kusimbwa aali 1,200 akamana mumyezi misyoonto buyo.

Mumakani aantalisyo aamabbuku aa Makani Mabotu, Lefèvre wakaamba kuti wakaasandulula mumwaambo waci French kutegwa “bantu-bantu buyo” bamucikombelo “bakonzye kukazyiba kasimpe mbubwenya mbuli baabo ibakajisi Bbaibbele mumwaambo waci Latin.” Pele ino nkaambo nzi Lefèvre ncaakajisi luyandisisyo lwakugwasya bantu-bantu buyo kuti bazyibe Bbaibbele ncoliyiisya?

Lefèvre wakalizyi kabotu-kabotu kuti njiisyo zyabantu alimwi abusongo bwabantu zyakanyonganya Cikombelo ca Katolika. (Marko 7:7; Bakolose 2:8) Aboobo wakalisinizyide kuti ciindi cakalisikide cakuti Makani Mabotu “akambaukwe nyika yoonse, kutegwa bantu baleke kweenwa anjiisyo zyeenzu zyabantu.”

Lefèvre alimwi wakasolekesya kuyubununa kulubizya kwabaabo bakali kukasya kusandulula Bbaibbele mumwaambo waci French. Wakaamba mbobakali basikuupaupa ameso naakati: “Ino mbuti mbobakonzya kuyiisya [bantu] kutobela zintu zyoonse nzyaakalailila Jesu Kristo, ikuti naa kabatayandi  kuti bantu-bantu buyo baabone alimwi akwaabala Makani Mabotu aa Leza mumwaambo wabo?”—Baroma 10:14.

Tacigambyi kuti basyaazibwene mumakani aabukombi baku University of Paris—Sorbonne—bakasola kumulesya Lefèvre. Mu August 1523, bakatalika kukasya busanduluzi bwa Bbaibbele amabbuku aamba kujatikizya ndilyo mumyaambo imwi, akububona kuti “bunyonganya Cikombelo.” Naatakali Mwami Francis I waku France, iwakagwasyilizya, Lefèvre naakabonwa kuti muzangi.

Lefèvre taakalekela kukazyanya kwakaliko kujatikizya mulimo wakwe kuti kunyonganye mulimo wakwe wakusandulula Bbaibbele. Mu 1524, naakamana kusandulula Magwalo aa Chigiriki (aaitwa kuti Cizuminano Cipya), wakamwaya busanduluzi bwaci French bwa Intembauzyo kutegwa basyomi kabapaila “cakulyaaba alimwi akuzwa ansi aamoyo.”

Kakunyina akusowa ciindi, basyaazibwene mumakani aabukombi baku Sorbonne bakatalika kulanga-langa busanduluzi bwa Lefèvre cakulomya. Tiilyakalampa, bakabikka mulawo wakuti busanduluzi bwakwe bwa Magwalo aa Chigiriki buumpwe bantu kabalangilila, alimwi bakaamba malembe aamwi kuti “akali kukulwaizya njiisyo zyabuzangi zya Luther.” Ciindi basyaazibwene mumakani aabukombi nobakamwiita kutegwa apandulule mizeezo yakwe, Lefèvre “wakaumuna buyo” mpoonya akutijila ku Strasbourg. Okuya, cabupampu wakazumanana kusandulula Bbaibbele. Nokuba kuti bamwi bakabona mbuli kuti eeci ncaakacita cakali kutondezya kubula busicamba, walo wakabona kuti nenzila yakali mbotu kapati yakwiingula baabo batakali kulumba “ngale” ziyandisi zyakasimpe kamu Bbaibbele.—Matayo 7:6.

Kauyanda kukkwana mwaka omwe kuzwa ciindi naakaunka, Mwami Francis I wakasala Lefèvre kuti kayiisya Charles, mwanaakwe musankwa iwakajisi myaka yone. Mulimo ooyu wakapa Lefèvre kuba aciindi cinji cakumanizya mulimo wakwe wakusandulula Bbaibbele. Mu 1530, busanduluzi bwakwe bwa Bbaibbele lyoonse likkwene bwakasimbilwa ku Belgium, kunze aacisi ca France, mu Antwerp, kwiinda mukuzumizyigwa a Mweendelezi Charles V. *

Mubuumi bwakwe boonse, Lefèvre wakajisi bulangizi bwakuti cikombelo ciyootuleka tunsiyansiya twabantu akujokela kuluzyibo lwini-lwini lwamu Magwalo. Wakajisi lusyomo lwakuti “Munakristo umwi aumwi ulijisi lwaanguluko, inzya, mulimo wakubala alimwi akwiiya Bbaibbele.” Nkakaambo kaako wakabeleka canguzu kusandulula Bbaibbele kutegwa bantu boonse bakonzye kulimvwisya. Nokuba kuti makanze aakwe aakuti cikombelo cicince tanaakazwidilila, cikono ca Lefèvre tacikonzyi kukazyigwa—wakabagwasya bantu-bantu buyo kuzyiba Jwi lya Leza.