“Ndakabona cuuno cabwami aabusena bwancico kujulu, alimwi acuuno cabwami eeco kuli umwi wakakkede mpawo. Lino ooyo iwakakkede mpawo wakali kulibonya mbuli bbwe lyajasipa ambuli bbwe lyaasardiyo, alimwi cuuno cabwami cakazingulukidwe fulicoongo uulibonya mbuli bbwe lyaemarodi.”—Ciyubunuzyo 4:2, 3.

“Koonse-koonse wakazingulukidwe mumuni uumweka mbuli kumweka kwafulicoongo uulibonya mukkumbi ibuzuba noiwa mvwula. Oobu mbombubo mbowakali kulibonya mumuni uumweka iwakazingulukide. Eeci icakalibonya cakalikozyene abulemu bwa Jehova.”—Ezekieli 1:27, 28.

Zilengaano eezyi, izyakapegwa kumwaapostolo Johane alimwi amusinsimi Ezekieli zitondezya bulemu bwa Leza Singuzuzyoonse, Jehova, azintu nzyotukonzya kweezeezya—mabwe ayebeka, fulicoongo, alimwi abulemu bwacuuno cabwami. Zyoonse eezyi zitwaambila kuti abusena mpabede Jehova aleebeka kapati, alakkomanisya, alimwi kuli luumuno.

Oobu mbwapandulwidwe Leza kuleendelana amajwi aasintembauzyo walo iwakalemba kuti: “Jehova mupati alimwi weelede kutembaulwa kapati. Ulayoosya kapati kwiinda baleza bambi boonse. Baleza boonse babantu mbaaleza babuyo, pele Jehova ngonguwe wakalenga majulu. Bulemu abweebesi zili kumbele lyakwe; inguzu akubota zili mucikombelo cakwe.”—Intembauzyo 96:4-6.

Nokuba kuti Jehova Mupatikampatila, ulatutamba kuti katupaila kulinguwe alimwi utusyomezya kuti ulatuswiilila. (Intembauzyo 65:2) Leza ulatuyanda alimwi ulatubikkila maano kapati cakuti mwaapostolo Johane wakalemba kuti: “Leza nduyando.”—1 Johane 4:8.

“[Sikwiiya Munakristo Sitefano], kazwide muuya uusalala, wakalanga kujulu akubona bulemu bwa Leza a Jesu kaimvwi kujanza lya Leza lyalulyo, eelyo wakati: ‘Amubone! Ndibwene julu lijalukide a Mwanaamuntu kaimvwi kujanza lya Leza lyalulyo.’”—Milimo 7:55, 56.

Kakusyeede kaindi kasyoonto kuti Sitefano abone cilengaano eeci, Jesu bakamujaya mbabonya bantu mbaakali kwaambila Sitefano—basololi ba Juda.  Cilengaano cakasinizya kuti Jesu wakali muumi alimwi akuti wakabusyigwa akupegwa bulemu. Kujatikizya makani aaya, mwaapostolo Paulo wakalemba kuti: ‘[Jehova] wakamubusya [Jesu] kuzwa kubafwu akumukkazika kujanza lyakwe lyalulyo mumasena aakujulu, aasumpukide kapati kwiinda mfwulumende zyoonse, bweendelezi buli boonse, basinguzu boonse, bulelo buli boonse akulemekwa kwiinda zina lili lyoonse lyaambwa mubweende bwazintu obuno alimwi aboobo buboola kumbele.’—Baefeso 1:20, 21.

Kunze aakupandulula cuuno cakwe cisumpukide, Magwalo atondezya kuti Jesu, mbubwenya mbuli Jehova, ulababikkila maano kapati bantu. Ciindi naakali kubeleka mulimo wakwe anyika, Jesu wakaponya bakali kuciswa, balema, alimwi akubusya bafwide. Kwiinda mucipaizyo calufwu lwakwe, wakatondezya luyando ndwajisi kuli Leza alimwi akubantu. (Baefeso 2:4, 5) Kaimvwi kujanza lya Leza lyalulyo, ino-ino Jesu uyoozibelesya nguzu zyakwe akuleta zilongezyo zitaliboteli kubantu bamvwida, nyika yoonse.

“[Mebo ndemusinsimi Daniele] ndakazumanana kulangilila kusikila limwi zyuuno zyabwami zyakabikkwa mubusena bwanzizyo, eelyo Sinsiku [Jehova] wakakkala. . . . Kwakali cuulu cazyuulu zyabaabo bakali kukutauka kumbele lyakwe, abali zyuulu zili kkumi iziyungizyidwe ziindi zili zyuulu zili kkumi ibakaimvwi kumbele lyakwe.”—Daniele 7:9, 10.

Mucilengaano eeci cakujulu, Daniele wakabona makamu aabangelo kutali buyo mungelo omwe. Eelo kaka kweelede kuti eeci cakali cilengaano ciyoosya kapati! Bangelo, mbantu bamuuya balibedelede, basongo alimwi basinguzu. Akati kabo kuli baserafi alimwi abakerubi. Bbaibbele lilaamba kujatikizya bangelo ziindi ziinda ku 250.

Bangelo tabali bantu bakaindi ibakali kupona aano anyika. Leza wakabalenga bangelo katanalenga bantu. Ciindi nyika noyakali kulengwa, bangelo bakali kulangilila akoompolola cakubotelwa.—Jobu 38:4-7.

Inzila imwi bangelo mobamubelekela Leza nkwiinda mukutola lubazu mumulimo uuyandika kapati uucitwa anyika mazuba aano—kwaambilizya makani mabotu aa Bwami bwa Leza. (Matayo 24:14) Kutola lubazu kwabo mumulimo ooyu kwakatondezyegwa mucilengaano camwaapostolo Johane walo iwakalemba kuti: “Ndakabona mungelo uumbi kauluka mumulengalenga, alimwi wakajisi makani mabotu aatamani aakwaambilizya kuli baabo bakkala anyika,  kumasi oonse, kumisyobo yoonse, kumilaka yoonse alimwi akubantu bamisyobo yoonse.” (Ciyubunuzyo 14:6) Nokuba kuti bangelo tababandiki abantu mazuba aano mbuli mbobakali kucita kaindi zimwi ziindi, balabasololela aabo bakambauka makani mabotu kubantu babombemyoyo.

“Kwakabuka nkondo kujulu: Mikayeli [Jesu Kristo] abangelo bakwe bakalwana simwaaba, awalo simwaaba abangelo bakwe wakalwana pele tiibakazunda pe, alimwi tiibakacijisi busena kujulu. Aboobo wakawaalwa ansi simwaaba ooyo mupati, imuzoka ooyo wakaindi, uutegwa Diabolosi a Saatani, ooyo weena nyika yoonse; wakawaalwa ansi, anyika, abalo bangelo bakwe bakawaalwa ansi antoomwe anguwe.”—Ciyubunuzyo 12:7-9.

Kujulu kwakanyina luumuno. Kumatalikilo aakubako kwabantu, mungelo umwi wakamuzangila Jehova akaambo kakuyanda kukombwa mpoonya wakaba Saatani, icaamba “Sikukazya.” Mukuya kwaciindi bangelo bamwi bakamusangana mukuzanga mpoonya akuba madaimona. Cakutainda mumbali, myuuya mibi eeyi ilamukazya Jehova alimwi yapa kuti bantu banji batobele nzila iindene abusolozi bwa Jehova bwaluyando.

Saatani amadaimona aakwe mbabyaabi alimwi mbaasilunya. Mbaasinkondo babantu alimwi bagwasyilizya kumapenzi aacitika munyika. Mucikozyanyo, Saatani wakajaya zivwubwa ababelesi ba Jobu muntu iwakali kusyomeka. Kumane, wakabajaya bana ba Jobu boonse bali 10 kwiinda mukuleta “guwo pati” lyalo ilyakapa kuti ŋanda mobakabede ikolomoke. Mpoonya, Saatani wakapa kuti Jobu abe “azyuute zicisa kapati kuzwa kunsi aamaulu aakwe kusikila akatwikkilo kamutwe wakwe.”—Jobu 1:7-19; 2:7.

Pele ino-ino, Saatani tacinooliko. Kuzwa ciindi naakawaalwa anyika, ulizyi kuti “ujisi buyo kaindi kaniini.” (Ciyubunuzyo 12:12) Saatani uyoonyonyoonwa, eelo kaka aaya makani mabotu!

“[Jesu] wakaulila Leza bantu kuzwa kumisyobo yoonse amilaka yoonse amikowa yoonse azisi zyoonse, alimwi wakabapa kuti babe bwami abapaizi kuli Leza wesu, eelyo bayooba bami ibayoolela nyika.”—Ciyubunuzyo 5:9, 10.

Mbubwenya mbuli Jesu mbwaakabusyigwa anyika akuunka kujulu, abamwi bayoobusyigwa mbubwenya oobo. Jesu wakaambila baapostolo bakwe basyomeka kuti: “Nduunka kuyoomubambila busena. Alimwi, . . . ndiyooboola alimwi eelyo ndiyoomutolelezya kuŋanda yangu, kutegwa ooko nkondinoobede andinywe mukabe nkuko.”—Johane 14:2, 3.

Aabo baunka kujulu kuli kaambo ncobaunkila. Antoomwe a Jesu, bayoopanga mfwulumende ya  Bwami yalo mukuya kwaciindi iyooyendelezya bantu boonse baanyika akubaletela zilongezyo. Oobu mbo Bwami Jesu mbwaakaambila basikumutobela kuti kababupailila mumupailo wacikozyanyo naakati: “Taateesu ooli kujulu, alisalazyigwe zina lyako. Abuboole Bwami bwako. Akucitwe kuyanda kwako ansi aano mbubonya mbuli kujulu.”—Matayo 6:9, 10.

“[Mebo ndemwaapostolo Johane] ndakamvwa jwi pati kuzwa kucuuno cabwami kaliti: ‘Amubone! Tente lya Leza lili aabantu, . . . eelyo uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.’”—Ciyubunuzyo 21:3, 4.

Cilengaano cabusinsimi eeci caamba ciindi Bwami bwa Leza, ibweendelezyegwa a Jesu antoomwe abaabo ibayoobusyigwa kuzwa anyika, nobuyoonyonyoona bweendelezi bwa Saatani akuleta paradaiso anyika. Zyoonse zintu izibapa kupenga bantu akuusa tazicinooliko pe. Noluba lufwu luyoomana.

Ino mbuti kujatikizya mabbiliyoni aabantu ibakafwa balo ibatakabusyigwi kuunka kujulu? Kumbele, bayoobusyigwa kabajisi bulangizi bwakupona mu Paradaiso anyika.—Luka 23:43.