TOONSE tulasyoma kuti Jehova nguusololela bantu bakwe alimwi akubapa nzyobayandika kutegwa babe acilongwe anguwe “kumazuba aamamanino” aaya. (2Tim. 3:1) Aboobo toonse tweelede kumumvwida Jehova. Bukkale bwesu bulikozyenye abukkale bwabana Israyeli munkanda. Bakeelede kubweza ntaamu ciindi nobakali kumvwa kulila kwamweembo.

Jehova wakaambila Musa kupanga myeembo yobilo yansiliva iifwulidwe ansando iyakubelesya “kwiita mbungano akwaambila mbungano kuti inyamuke.” (My. 10:2) Bapaizi bakeelede kulizya myeembo munzila ziindene-indene ikutegwa baambile bantu ncobakeelede kucita. (My. 10:3-8) Mazuba aano, bantu ba Leza balatambula busolozi munzila ziindene-indene. Amubone nzila zyotatwe izitupa kuyeeya kulila kwamyeembo ikwakali kucitwa kaindi. Bantu ba Leza mazuba aano balatambwa kumiswaangano mipati, balangizi basalidwe balatambula lwiiyo, alimwi busolozi bupya naa ibwakabambululwa bulapegwa kumbungano zyoonse.

Ciindi Jehova naakali kuyanda kuti “mbungano yoonse” ibungane kulubazu lwakujwe lwamulyango watente lyakubunganina, bapaizi bakali kulizya myeembo yoonse yobilo. (My. 10:3) Misyobo yoonse, iyakayakide afwaafwi atente lyakubunganina, nkokuti misyobo yone, yakali kukumvwa kulila ooko. Aabo ibakayakide afwaafwi amulyango watente lyakubunganina bakali kukonzya kuboola mumaminiti masyoonto buyo. Ibambi bakali kulamfwu aboobo bakali kuyandika ciindi alimwi akusolelekesya canguzu kutegwa basike. Kufwumbwa naa bakali afwaafwi naa kulamfwu, Jehova wakali kuyanda kuti boonse babungane akuswiilila malailile aakwe.

Mazuba aano, tatuswaanganini kutente lyakubunganina, pele tulatambwa kumiswaangano yabantu ba Leza. Miswaangano eeyi ibikkilizya miswaangano yacooko alimwi aimbi yaalubazu, ooko nkotutambula makani abusolozi buyandika kapati. Mumasi aali munyika yoonse mboizulwa, bantu ba Jehova balakkomana apulogilamu iikozyenye. Aboobo aabo bazumina kutambwa kumiswaangano eeyi baba cibeela cankamu mpati iikkomene. Bamwi baleenda misinzo milamfwu kwiinda bamwi. Nokuba boobo, boonse ibajanika balazumina kuti cilagwasya kapati kucita boobo.

Ino mbuti kujatikizya baabo ibali mutubunga ituli kulamfwu kapati amiswaangano mipati iili yoonse? Akaambo katekinoloji yamazuba aano, ibanji bali boobu balakonzya kugwasyigwa apulogilamu iikozyenye alimwi buya akulimvwa kuti abalo ncibeela cankamu mpati eeyo. Mucikozyanyo, mukuswaya kumwi kwamwiiminizi wakumaofesi mapati, mutabi waku Benin wakakkonekita pulogilamu ku Arlit, Niger, mudolopo imuli mugodi wamabwe mu Sahara Desert. Bakwesu botatwe, bacizyi bobilo alimwi abasikubotelelwa bali 16 bakabungana. Nokuba kuti bakali kubusena buli kulamfwu, bakalimvwa kukamantana  antoomwe ankamu mpati yabantu ibali 44,131 ibakaswaangene. Mukwesu umwi wakalemba kuti: “Twamulumba kapati kuzwa ansi aamoyo akaambo kakutukkonekita kupulogilamu eeyi. Eeci cakatondezya mbomutuyanda kapati kuzwa ansi aamoyo.”

Ciindi bapaizi bana Israyeli nobakali kulizya buyo mweembo omwe, “balikke basilutwe bazyuulu” mbabakeelede kuunka kutente lyakubunganina. (My. 10:4) Ookuya, bakali kutambula malailile alimwi akuyiisyigwa a Musa. Eeci cakali kubagwasya kwiilanganya kabotu mikuli mumisyobo yabo. Ikuti nimwakali umwi wabasilutwe aabo, sena nomwatakacita zyoonse izyakali kuyandika kutegwa mujanike akugwasyigwa?

Mazuba aano, baalu bambungano tabali “basilutwe”; alimwi tabali basimalelo kubutanga bwa Leza oobo mbobapedwe kulanganya. (1Pet. 5:1-3) Pele balasolekesya kapati kweembela butanga. Aboobo balazumina camoyo woonse ciindi nobatambwa kuyoopegwa lwiiyo luyungizyidwe, mbuli ku Cikolo Camulimo wa Bwami. Muzikolo zili boobu, baalu balaiya mbobakonzya kuyaambele mukulanganya makani aajatikizya mbungano. Akaambo kalwiiyo oolu, baalu abaabo mbobalanganya mumbungano, balakonzya kuba acilongwe a Jehova. Nokuba kuti tamunajanikide kuli cimwi cazikolo eezyi, ncimwi buyo mulagwasyigwa akaambo kakuti aabo ibakajanika balazibelesya nzyobakaiya kutegwa bagwasye mbungano.

Zimwi ziindi bapaizi bana Israyeli bakali kulizya mweembo munzila iicinca-cinca. Eeci cakali kwaamba kuti Jehova wakali kuyanda kuti nkamu yoonse inyamuke akweenda. (My. 10:5, 6) Ciindi bantu nobakali kulonga, bakali kucita oobo munzila yabulondo kapati, pele boonse bakali kuyandika kubeleka canguzu. Zimwi ziindi bana Israyeli bamwi ambweni bakali kuwayawaya kulongela kubusena bumbi. Nkaambo nzi?

Ambweni bamwi bakali kuyeeya kuti makani aakulonga akali kucitika cakufwambaana alimwi acakutayeeyela. “Zimwi ziindi ikkumbi lyakali kwiima buyo kuzwa kumangolezya kusikila mafwumofwumo.” Mpoonya zimwi ziindi “mazuba obilo, mwezi naa mazuba manji.” (My. 9:21, 22) Alimwi ino mubwini nkamu yakalonga ziindi zyongaye? Lugwalo lwa Myeelwe caandaano 33 lwaamba masena aasika ku 40 nkobakalongela bana Israyeli.

Zimwi ziindi, bana Israyeli bakali kukkala mubusena ibwakajisi cimvwule. Ikukkala mubusena ibwakajisi cimvwule kweelede kuti kwakali kukkomanisya kapati “munkanda iilya mpati alimwi iiyoosya kapati.” (Dt. 1:19) Aboobo kulangilwa kuti kwakali kuba kulibilika akaambo kakuti kulonga kwakali kukonzya kubapa kuunka kubusena butali kabotu.

Ciindi nkamu noyakali kutalika kweenda, bamwi ambweni cakali kubakatazya kulindila ciindi cabo cakutalika kweenda. Boonse bakali kukumvwa kulila kwamweembo munzila iicinca-cinca, pele tabali boonse ibakali kunyamukila aciindi comwe. Kulila kwamweembo ooko munzila iicinca-cinca kwakali kutondezya kuti misyobo iyakayakide kulubazu lwakujwe, nkokuti Juda, Isakara alimwi a Zebuloni yakeelede kunyamuka. (My. 2:3-7; 10:5, 6) Bamana kuzwa, bapaizi bakali kulizya mweembo munzila iicinca-cinca kwaciindi cabili ikutondezya kuti nkamu yamisyobo yotatwe iyakayakilide kumusanza yakeelede kutalika kunyamuka. Bapaizi bakali kuzumanana kucita boobo kusikila nkamu yoonse yaunka.

Ambweni cakamukatazya kukutobela kucinca kumwi mumbunga. Nkaambo nzi? Ambweni mwakalimvwa kuti kuli kucinca kunji kapati. Naa ambweni mwakali kukkomana kujatikizya zintu zimwi mbozyakali kucitwa kaindi alimwi tiimwakali kuyanda kucinca. Kufwumbwa mbocikonzya kuba, andiza cakamuyumina kukazikka moyo kumwi kamulindila kuti mukuzyibile kucinca ooko. Pele ikuti twacita munzila yeelede, cakutadooneka tuyoobona kuti kucinca ooko kuli kabotu kulindiswe alimwi akuti Jehova ulatukkomanina.

Kuciindi ca Musa, Jehova wakasololela bantu banji munkanda. Ikuti naatakabalanganya alimwi akubasololela, nobatakafwutuka. Mazuba aano, Jehova ulatusololela mumazuba aakumamanino aaya aakatazya. Ulatugwasya kutegwa tube acilongwe anguwe akuti tuzumanane kuyumya lusyomo lwesu. Aboobo aabe makanze eesu toonse kucita zyoonse nzyotukonzya kutegwa katumvwida mbubonya mbobakali kucita bana Israyeli basyomeka kujatikizya kulila kwamyeembo!