Tupango ootu twaamba buyo bube buli fwuka: “Mucelo wamuuya ngooyu: luyando, lukkomano, luumuno, kukkazika moyo, luzyalo, bubotu, lusyomo, kubomba moyo, kulilesya.” Tatweelede kuyeeya kuti oobu mbobube bubotu bulikke bwamuuya wa Leza mbotukonzya kuba ambubo.

Amubone ncaakalemba mwaapostolo Paulo mutupango tulimusyule: “Milimo yanyama . . . njeeyi, bwaamu, busofwaazi, bukkale busesemya, kukomba mituni, kusyoma mizimo, businkondo, kuzwangana, munyono, kunyema, kukazyanya, kwaandaana, tukamu twabukombi tuzandukide, kunyonokela, bucakolwa, mapobwe aateendelezyeki, alimwi azintu zimbi zili boobu.” (Gal. 5:19-21) Aboobo Paulo naakazyaamba zintu zimbi izili akati ‘milimo yanyama’ mbuli zyeezyo zyaambidwe ku Bakolose 3:5. Mbubwenya buyo, naakamana kubandauka bube bubotu ibuli fwuka, wakaamba kuti: “Kunyina mulawo uukasya zintu eezyi pe.” Aboobo, Paulo tanaakabwaamba bube bubotu boonse mbotukonzya kuba ambubo kwiinda mukugwasyigwa amuuya uusalala.

Eeci cilalimvwisya ciindi notweezyanisya mucelo wamuuya kumucelo wamumuni ooyo Paulo ngwaakalembela mbungano yaku Efeso kuti: “Nkaambo micelo yamumuni misyobo yoonse yabubotu, bululami alimwi akasimpe.” (Ef. 5:8, 9) Inzya, “bubotu,” antoomwe abululami alimwi akasimpe, ncibeela ‘camucelo wamumuni,’ pele alimwi ncibeela ‘camucelo wamuuya.’

Alimwi tulakonzya kucimvwisya eeci ciindi notweezyanisya mucelo wamuuya kubube buli cisambomwe Paulo mbwaakakulwaizya Timoteyo kuba ambubo, nkokuti “bululami, kubelekela Leza cakulyaaba, lusyomo, luyando, kuliyumya alimwi akubomba moyo.” (1Tim. 6:11) Bube botatwe buyo akati kabube oobu (lusyomo, luyando alimwi akubomba moyo) mbobwaambidwe kuba cibeela ‘camucelo wamuuya.’ Aboobo tacidoonekwi buya kuti Timoteyo awalo wakali kuyandika lugwasyo lwamuuya kutegwa abe abube oobu, nkokuti bululami, kubelekela Leza cakulyaaba alimwi akuliyumya. Amweezyanisye Bakolose 3:12; 2 Petro 1:5-7.

Aboobo lugwalo lwa Bagalatiya 5:22, 23 talubwaambi bube boonse Munakristo mbwayelede kuba ambubo. Muuya wa Leza ulakonzya kutugwasya kuba azibeela zili ciloba izyaambidwe kuti “mucelo wamuuya.” Pele kuli bube bunji mbotweelede kuba ambubo kutegwa tube Banakristo basimide, alimwi “akusama buntu bupya ibwakalengwa kweelana akuyanda kwa Leza mubululami bwini-bwini alimwi amukusyomeka.”—Ef. 4:24.