Akaambo kakuti tulaabila mabbuku eesu aamba zyamu Bbaibbele kakunyina kubbadelesya, bamwi balimvwa kuti kwaakkopa alimwi akwaatuma aamawebbusaiti aambi kulizumizyidwe. Pele, kucita boobo takweendelani amalailile aali mucibeela cakuti Nzyomweelede Kuzumina * kujatikizya mawebbusaiti eesu alimwi caleta mapenzi mapati. Kweelana ambokwaambidwe cakusalazya mucibeela eeco, kunyina uuzumizyidwe kutuma “zifwanikiso, mabbuku aa Intaneti, zizibisyo, nyimbo, zifwoto, mavidiyo, naa zibalo kuzwa awebbusaiti yesu a Intaneti (webbusaiti iili yoonse, file-sharing site, video-sharing site, naa Intaneti).” Ino nkaambo nzi mulawo uuli boobo ncouyandika?

Zyoonse izili aamawebbusaiti eesu tazyeelede kulembululwa. Basiluleyo alimwi abasikukazya bambi balasola kubelesya mabbuku eesu aamawebbusaiti aabo kutegwa boongelezye Bakamboni ba Jehova alimwi abamwi. Zintu zibikkilizyidwe mumawebbusaiti aayo zyakabambilwa kupa basikubala kudooneka. (Int. 26:4; Tus. 22:5) Bamwi babelesya makani kuzwa mumabbuku eesu naa cizibisyo cawebbusaiti yesu ya jw.org mukwaambilizya makwebo, naa kubikka aazintu nzyobayanda kusambala, alimwi amuma app aamutuncini twamumaanza. Kwiinda mukukwabilila milawo iikasya kulembulula alimwi acizibyo, tulijisi twaambo kweelana amulawo itukwabilila kuti kutabi kuzibelesya munzila iitali kabotu. (Tus. 27:12) Pele ikuti acaali twazumizya bantu, nobaba bakwesu, kutuma makani aali aawebbusaiti yesu aamawebbusaiti aambi, naa kubelesya cizibyo ca jw.org kusambala  zintu, nkuta tazikonzyi kutugwasyilizya notusola kukasya basikukazya alimwi abasimakwebo.

Kulintenda ikukkopa mabbuku eesu kuzwa kumasena aambi muciindi ca jw.org. Jehova wakapa “muzike uusyomeka alimwi uucenjede” alikke, mukuli wakubamba cakulya cakumuuya. (Mt. 24:45) “Muzike” ooyu ubelesya buyo mawebbusaiti aazumizyidwe ikumwaya cakulya cakumuuya—www.jw.org, tv.dan124.com, alimwi a wol.dan124.com. Alimwi tujisi buyo ma app aamutuncini twamumaanza otatwe aazumizyidwe—JW Language^®, JW Library^®, alimwi a JW Library Sign Language^®. Tulakonzya kusyoma kuti muzibelesyo eezyi kunyina kwaambilizya makwebo naa kusofwaazyigwa anyika ya Saatani. Ikuti kwabelesyegwa nzila zimbi kujana cakulya cakumuuya, cilalangilwa kuti cakacincwa naa kunyonganizyigwa.—Int. 18:26; 19:8.

Kuyungizya waawo, kutuma mabbuku eesu mumawebbusaiti aazumizya bantu kuti baambe nzyobayeeya kupa coolwe kuli basiluleyo alimwi abasikukazya bamwi ikumwaya twaambo tupa kuti mbunga ya Jehova italike kudoonekwa. Bakwesu bamwi boongelezyegwa amibandi yakukazyanzya a Intaneti, aboobo bapa kuti zina lya Jehova lisampaulwe. Intaneti taili nzila yeelela kuti muntu ‘uubombede moyo kalailila baabo bakazya.’ (2Tim. 2:23-25; 1Tim. 6:3-5) Alimwi kwajanwa kuti kwabambwa maakkaunti akubandikila a Intaneti aakubeja alimwi kwabambwa amawebbusaiti aajisi zina lyambunga, lya Kabunga Keendelezya, alimwi amazina aabantu bali muli nkako. Pele, kunyina uuzulilwa mu Kabunga Keendelezya uujisi webbusaiti yakwe mwini naa uujanika mumawebbusaiti aakubandikila a Intaneti.

Kutondezya bantu webbusaiti ya jw.org kugwasya kumwaya “makani mabotu.” (Mt. 24:14) Zibelesyo zili a Intaneti nzyotutambula kutegwa katubelesya mumulimo wesu zilabambululwa lyoonse. Tuyanda kuti boonse kabagwasyigwa anzizyo. Aboobo, kweelana amalailile aali mucibeela cakuti Nzyomweelede Kuzumina mbwaatondezya, mulakonzya kumutumina muntu umwi bbuku a e-mail naa kumutumina liinki isololela ku jw.org. Kwiinda mukutondezya bantu balaaluyandisisyo webbusaiti yesu iizumizyidwe, tubaswaanganya kubusena bwini ikuzwa cakulya cakumuuya, “muzike uusyomeka alimwi uucenjede.”