1. Kweelana alugwalo lwa Baefeso 6:10-13, ninzila nzi imwi iikkomanisya kapati Jehova mwatondezya kuti ulatubikkila maano? Amupandulule.

NZILA imwi iikkomanisya kapati Jehova mwatondezya kuti ulatubikkila maano tobabelesi bakwe nkwiinda mukutugwasya kukazya basinkondoma. Basinkondoma ibatulwana kapati ngu Saatani alimwi amadaimona. Jehova ulatucenjezya kujatikizya basinkondoma aaba, alimwi ulatupa nzyotuyandika kutegwa tubakazye. (Amubale Baefeso 6:10-13.) Ikuti twalutambula lugwasyo lwa Jehova alimwi akumusyoma cakumaninina, tulakonzya kuzwidilila mukukazya Diabolosi. Tulakonzya kuba alusyomo mbuli ndwaakajisi mwaapostolo Paulo. Wakalemba kuti: “Ikuti Leza kalaandiswe, ino nguni uukonzya kutulwana?”—Rom. 8:31.

2. Ncinzi ncotutiilange-lange mucibalo eeci?

² Mbotuli Banakristo bakasimpe, tatumubikkili kapati maano Saatani alimwi amadaimona. Tubikkila kapati maano kwiiya kujatikizya Jehova alimwi akumubelekela. (Int. 25:5) Nokuba boobo, tweelede kuzyiba kujatikizya zintu nzyacita Saatani. Nkaambo nzi? Kutegwa tuteenwi anguwe. (2Kor. 2:11; bupanduluzi buyungizyidwe.) Mucibalo eeci, tulalanga-langa nzila mpati yalo Saatani alimwi amadaimona njobabelesya kweena bantu. Alimwi tulalanga-langa mbotukonzya kuzwidilila kubakazya.

3-4. (a) Ino kusyoma mizimo caamba nzi? (b) Ino kusyoma mizimo kwasakana kusikila aali?

³ Nzila mpati Saatani alimwi amadaimona njobabelesya kweena bantu nkusyoma mizimo. Aabo basyoma mizimo balitaminina kuzyiba naa kweendelezya zintu zyalo bantu kanji-kanji nzyobatakonzyi kuzyiba naa kuzyeendelezya. Mucikozyanyo, bamwi  balitaminina kuzyiba zintu zyakumbele kwiinda mukusonda naa kwiinda muli basikupandulula bweende bwanyenyeezi. Bamwi balakonzya kucita mbuli kuti balaambaula abantu bafwide. Bamwi mbalozi naa babelesya masalamuzi, alimwi balakonzya kusola kucitila muntu umwi masalamuzi. *

⁴ Mbuti kusyoma mizimo mbokwasakana? Buvwuntauzi ibwakacitwa muzisi izili 18 ku Latin America alimwi aku Caribbean bwakatondezya kuti aali bantu botatwe omwe ulaasyoma masalamuzi, bulozi, alimwi mweelwe wabantu uukozyenye ayooyu basyoma kuti cilakonzyeka kwaambaula amyuuya. Alimwi buvwuntauzi bumwi bwakacitwa muzisi izili 18 mu Africa. Ooku, mweelwe waakati-kati wabantu ibainda acisela ibakabuzyigwa-buzyigwa bakaamba kuti balabusyoma bulozi. Aboobo, kuli koonse nkotukkala, tweelede kulikwabilila kukusyoma mizimo. Kayi, Saatani uyandaula nzila yakweena “nyika yoonse.”—Ciy. 12:9.

5. Ino Jehova ulimvwa buti kujatikizya kusyoma mizimo?

⁵ Jehova ngu “Leza wakasimpe.” (Int. 31:5) Aboobo ino ulimvwa buti kujatikizya kusyoma mizimo? Cilamucima! Jehova wakaambila bana Israyeli kuti: “Takweelede kujanwa akati kanu muntu uumpa mwanaakwe musankwa naa musimbi mumulilo, muŋanga, simasalamuzi, sibusangu, mulozi, simabibo, muntu uubuzya makani kubaŋanga, simaloto naa muntu uubuzya makani kubafwu. Nkaambo kufwumbwa muntu uucita zintu eezyi ncisesemyo kuli Jehova.” (Dt. 18:10-12) Banakristo tabali ansi aa Mulawo Jehova ngwaakapa bana Israyeli. Nokuba boobo, tulizyi kuti Jehova tacincide mbwalimvwa kujatikizya kusyoma mizimo.—Mlk. 3:6.

6. (a) Mbuti Saatani mbwabelesya kusyoma mizimo kupenzya bantu? (b) Kweelana alugwalo lwa Mukambausi 9:5, makani nzi aamasimpe aajatikizya ciimo cabafwide?

⁶ Jehova ulatucenjezya kujatikizya kusyoma mizimo nkaambo ulizyi kuti Saatani ulaibelesya kupenzya bantu. Saatani ubelesya kusyoma mizimo kukulwaizya bubeji, nkokuti bubeji bwakuti bafwide balapona kubusena bumwi. (Amubale Mukambausi 9:5) Alimwi Saatani ubelesya kusyoma mizimo kukonga bantu alimwi akubazandula kuli Jehova. Ncayanda ncakuti bantu basyoma mizimo kabasyoma myuuya mibi muciindi cakusyoma Jehova.

7. Ncinzi Jehova ncatwaambila?

⁷ Kweelana ambokwaambwa kale, Jehova ulatwaambila ncotweelede kuzyiba kutegwa tuteenwi a Saatani alimwi amadaimona. Atubandike zintu zimwi nzyotukonzya kucita kutegwa tumulwane Saatani alimwi amadaimona.

8. (a) Ncinzi iciyandika kapati ncotweelede kucita kutegwa twiizunde myuuya mibi? (b) Mbuti lugwalo lwa Intembauzyo 146:4 mboluyubununa bubeji bwa Saatani kujatikizya bafwide?

⁸ Atulibale Jwi lya Leza alimwi akuzinzibala kuyeeya nzyotubala. Eeci ncecintu iciyandika kapati icikonzya kutugwasya kukaka bubeji ibusumpulwa amyuuya mibi. Ijwi lya Leza lili mbuli panga libosya ilikonzya kuyubununa bubeji Saatani mbwakulwaizya. (Ef. 6:17) Mucikozyanyo, Jwi lya Leza lilabuyubununa bubeji bwakuti bafwide balakonzya kwaambaula abantu bapona. (Amubale Intembauzyo 146:4) Alimwi lilatwaambila kuti alikke Jehova nguukonzya kuzyiba zili kumbele. (Is. 45:21; 46:10) Ikuti katulibala Jwi lya Leza cakusitikila alimwi akuzinzibala kuyeeya nzyotubala, tunoolibambilide  kukaka alimwi akusulaika bubeji oobo myuuya mibi mboiyanda kuti tusyome.

9. Micito nzi iiswaangene akusyoma mizimo njotweelede kutantamuka?

⁹ Atukake kucita cintu icili coonse icijatikizya kusyoma mizimo. Akaambo kakuti tuli Banakristo bakasimpe, tatusoli kusyoma mizimo naaceya. Mucikozyanyo, tatusondi naa kusola kwaambaula abantu bafwide munzila iili yoonse. Kweelana ambotwakaiya mucibalo cainda, tulazitantamuka zilengwa zyamalila izicitwa akaambo kakusyoma kuti bafwide balapona kubusena bumwi. Alimwi tatubelesyi basikupandulula bweende bwanyenyeezi naa kusonda kusola kuzyiba zyakumbele. (Is. 8:19) Tulizyi kuti micito iili boobu iletela ntenda alimwi ilakonzya kutupa kuba mumaanza aa Saatani alimwi amadaimona.

10-11. (a) Ino bantu bamwi bamumwaanda wamyaka wakusaanguna bakacita buti ciindi nobakaiya kasimpe? (b) Kweelana alugwalo lwa 1 Bakorinto 10:21, nkaambo nzi ncotweelede kwiiya cikozyanyo ca Banakristo bakusaanguna, alimwi mbuti mbotukonzya kucita oobo?

¹⁰ Atuzisowe zintu zyoonse izijatikizya mizimo. Bantu bamwi ibakali kukkala mu Efeso mumwaanda wamyaka wakusaanguna bakali kusyoma mizimo. Nobakaiya kasimpe, bakabweza ntaamu cakufwambaana. “Bantu banji akati kabasimasalamuzi bakabungika mabbuku aabo akwaaumpa bantu boonse kabalangilila.” (Mil. 19:19) Bantu aabo bakacita kufwumbwa ncobakali kukonzya kutegwa bazunde myuuya mibi. Mabbuku aabo aamasalamuzi akali kudula kapati. Pele muciindi cakwaapa bantu naa kwaasambala, bakaanyonyoona. Bakabikkilide maano kukukkomanisya Jehova muciindi cakubikkila maano kumweelwe wamali ngaakali kukonzya kuulwa mabbuku.

¹¹ Mbuti mbotukonzya kwiiya cikozyanyo ca Banakristo bamumwaanda wamyaka wakusaanguna? Inga caba camaano kusowa cintu icili coonse njotujisi iciswaangene amizimo. Eeci cibikkilizya zitumwa, misamu yakulikwabilila, naa zintu zimwi buyo nzyobasama bantu naa nzyobajisi kusola kulikwabilila kumyuuya mibi.—Amubale 1 Bakorinto 10:21.

12. Mibuzyo nzi njotweelede kulibuzya kujatikizya zyakulikondelezya nzyotusala?

 ¹² Atuzilange-lange cakubikkila maano zyakulikondelezya nzyotusala. Atulibuzye kuti: ‘Sena ndilabala mabbuku, mamagazini, naa zibalo izili aa Intaneti izijatikizya mizimo? Mbuti kujatikizya nyimbo nzyondiswiilila, mavidiyo alimwi amapulogilamu aa TV ngondeebelela, naa mavidiyo geemu ngondisobanya? Sena kuli cakulikondelezya cili coonse ncondisala icijatikizya kusyoma mizimo? Sena cilatondezya zintu mbuli zyeelo, bantu baungudwe, naa masalamuzi? Sena citondezya masalamuzi, kucitila muntu umwi masalamuzi, naa kucengeezya kusinganya?’ Nokuba boobo, tazili zyakulikondelezya zyoonse izitondezya zintu zyatakacitika ncobeni iziswaangene akusyoma mizimo. Ciindi notulanga-langa zyakulikondelezya zyesu, atube amakanze aakusala zintu iziyootugwasya kutantamuka cintu cili coonse ncasulide Jehova. Tuyanda kusoleka kusikila mpotugolela “kuba amanjezyeezya aasalala kuli Leza akubantu.”—Mil. 24:16. *

13. Ncinzi ncotuteelede kucita?

¹³ Tatweelede kubandika makani aajatikizya madaimona. Mumakani aaya, tuyanda kwiiya cikozyanyo ca Jesu. (1Pet. 2:21) Katanaboola anyika, Jesu wakapona kujulu, alimwi wakalizyi zintu zinji kujatikizya Saatani alimwi amadaimona. Pele kunyina naakali kwaamba makani aajatikizya zintu nzyoyakacita myuuya mibi eeyi. Jesu wakali kuyanda kuba kamboni wa Jehova, ikutali kamboni wa Saatani. Tulakonzya kumwiiya Jesu kwiinda mukutamwaya makani aajatikizya madaimona. Muciindi caboobo,  tulatondezya kwiinda mumajwi eesu kuti ‘moyo wesu uladuntaana akaambo kacintu cibotu,’ nkokuti, kasimpe.—Int. 45:1.

14-15. (a) Nkaambo nzi ncotuteelede kwiiyoowa myuuya mibi? (b) Mbumboni nzi buliko ibutondezya kuti Jehova ulabakwabilila bantu bakwe mazuba aano?

¹⁴ Tatweelede kwiiyoowa myuuya mibi. Munyika iino iitalondokede, zintu zibyaabi zilakonzya kutucitikila. Ntenda, kuciswa, naa kufwa buya kulakonzya kutusikila cakutayeeyela. Pele sena tweelede kuyeeya kuti myuuya iitalibonyi njooipa kuti zintu eezyi kazicitika? Ibbaibbele lilaamba kuti bantu boonse buyo “balasikilwa ziindi zyamapenzi akucitikilwa zintu zitalangilwi.” (Muk. 9:11) Kujatikizya madaimona, Jehova watondezya kuti ulaanguzu zinji kapati kwiinda ngawo. Mucikozyanyo, Leza kunyina naakazumizya Saatani kujaya Jobu. (Job. 2:6) Mumazuba aa Musa, Jehova wakatondezya kuti ulaanguzu zinji kapati kwiinda bapaizi basimasalamuzi bamu Egepita. (Kul. 8:18; 9:11) Kwiinda mukugwasyigwa a Jehova, Jesu iwakalemekwa wakatondezya nguzu zyakwe kuli Saatani alimwi amadaimona ciindi naakabawaala anyika. Alimwi lino-lino, bayakuwaalilwa mumulindi uutagoli, mwalo mobatakacikonzyi kweena muntu uuli woonse.—Ciy. 12:9; 20:2, 3.

¹⁵ Tulabubona bumboni bunji butondezya kuti Jehova ulabakwabilila bantu bakwe mazuba aano. Amuyeeye kujatikizya kaambo aaka: Tulakambauka alimwi akuyiisya kasimpe munyika yoonse. (Mt. 28:19, 20) Kwiinda mukucita boobo, tulaiyubununa milimo ya Diabolosi. Kwaamba masimpe, ikuti Saatani naali kucikonzya, naakaulesya kale mulimo wesu, pele takonzyi. Aboobo tatweelede kwiiyoowa myuuya mibi. Tulizyi kuti “meso aa Jehova alalanga-langa munyika yoonse kutegwa atondezye nguzu zyakwe ikugwasya baabo bamusyoma camoyo woonse.” (2Mk. 16:9) Ikuti katusyomeka kuli Jehova, madaimona taakonzyi kutuletela mapenzi aatamani.

16-17. Amupe cikozyanyo icitondezya mbobuyandika busicamba mukukazya myuuya mibi?

¹⁶ Kuyandika busicamba kukazya myuuya mibi, ikapati ciindi balongwe naa banamukwasyi nobatukazya akaambo kakuyeeya kuti tulakonzya kucitikilwa cintu cibyaabi kuti naa  tiitwabasangana mumicito iimwi. Pele Jehova ulabalongezya aabo ibatondezya busicamba buli boobu. Amubone cikozyanyo camucizyi wazina lya Erica, uukkala ku Ghana. Erica wakajisi myaka yakuzyalwa iili 21 ciindi naakazumina kwiiya Bbaibbele. Akaambo kakuti bausyi bakali bapaizi ibakali kusyoma masalamuzi, wakeelede kutola lubazu mucilengwa icijatikizya kulya nyama iyakali kupaizyigwa abaleza babausyi. Ciindi Erica naakakaka, banamukwasyi bakacibona kuti nkutukila baleza. Banamukwasyi bakali kusyoma kuti baleza aabo bakali kuyoobasubula kwiinda mukubapa kuti baciswe bulwazi bwakunyongana mumizeezo alimwi amalwazi aamwi.

¹⁷ Mukwasyi wa Erica wakasola kumusungilizya kuti atobele cilengwa eeco, pele wakakaka, nokuba kuti kucita boobo kwakapa kuti azwe aŋanda. Bakamboni bamwi bakamubweza kuti kabakkala anguwe. Munzila eeyo, Jehova wakamulongezya Erica kwiinda mukuba amukwasyi mupya, nkokuti basyominyina balo ibakaba mbuli banabokwabo. (Mk. 10:29, 30) Nokuba kuti banamukwasyi bakamukaka akumuumpila zintu, Erica wakazumanana kusyomeka kuli Jehova, wakabbapatizyigwa, alimwi lino ngupainiya waciindi coonse. Kunyina nayoowa madaimona. Kujatikizya mukwasyi wakwe, Erica wakaamba kuti: “Ndilapaila abuzuba kutegwa mukwasyi wangu ukabe alukkomano lwakuzyiba Jehova alimwi akuba alwaanguluko iluboola akaambo kakubelekela Leza wesu siluyando.”

18. Nzilongezyo nzi nzyotujana akaambo kakusyoma Jehova?

¹⁸ Tatuli toonse notuyoosunkwa munzila eeyi. Nokuba boobo, toonse tweelede kusyoma Jehova alimwi akukaka myuuya mibi. Ikuti twacita oobo, tuyootambula zilongezyo zinji, alimwi tatukeenwi abubeji bwa Saatani. Alimwi tatukaleki kubelekela Jehova akaambo kakuyoowa madaimona. Kwiinda zyoonse, tuyooyumya cilongwe cesu a Jehova. Sikwiiya Jakobo wakalemba kuti, “Amulibombye kuli Leza, pele amumukazye Diabolosi eelyo ulamutija. Amuswene kuli Leza, eelyo awalo ulaswena kulindinywe.”—Jak. 4:7, 8.