1. Ncinzi toonse ncotweelede kucita?

SENA inga mwayanda kutola lubazu mukubalika nkomuzyi buya kuti kulakatazya, kwaambisya ciindi nomucisidwe naa nomukatede? Kweelede kuti inga tiimwayanda. Nokuba boobo, mwaapostolo Paulo wakaamba kuti, Banakristo bakasimpe boonse bali mukubalika. (Heb. 12:1) Alimwi toonse buyo, bana naa bapati, balaanguzu naa batakwe nguzu, tweelede kuliyumya kusikila kumamanino ikuti katuyanda kuyootambula bulumbu mbwatubambilide Jehova.—Mt. 24:13.

2. Kweelana alugwalo lwa 2 Timoteyo 4:7, 8, nkaambo nzi Paulo ncaakaangulukide kwaamba majwi aaya?

² Paulo wakalaangulukide kwaamba majwi aaya akaambo kakuti wakazwidilila ‘kubalika mukusiyana mane kumamanino.’ (Amubale 2 Timoteyo 4:7, 8.) Pele ino nkubalika kuli buti nkwaakaamba mwaapostolo Paulo?

3. Ino nkubalika kuli buti nkwaakali kwaamba Paulo?

³ Paulo zimwi ziindi wakali kulemba zintu izyakali kucitika muzisobano izyakali kucitwa mu Girisi yansiku ikuyiisya ziiyo ziyandika kapati. (1Kor. 9:25-27; 2Tim. 2:5) Kwaziindi zili mbozibede, Paulo wakakozyanisya kubalika mumuzundano kubuumi bwa Bunakristo. (1Kor. 9:24; Gal. 2:2; Flp. 2:16) Muntu ulatalika “kubalika” ciindi naalyaaba kuli Jehova alimwi akubbapatizyigwa. (1Pet. 3:21) Ulasika aakeengo kamamanino ciindi Jehova naamupa bulumbu bwabuumi butamani.—Mt. 25:31-34, 46; 2Tim. 4:8.

4. Ino ncinzi ncotutiilange-lange mucibalo eeci?

⁴ Ino nkukozyanya nzi kuliko akati kakubalika musinzo mulamfwu mumuzundano alimwi akupona buumi bwa Bunakristo? Kuli kukozyanya kunji. Atulange-lange kukozyanya kotatwe. Kwakusaanguna, tweelede kutobela malailile aapegwa; kwabili, tweelede  kubikkila maano kukeengo kamamanino; mpoonya kwatatu, tweelede kuliyumya kumapenzi ngotujana ciindi notubalika.

5. Ninjiisyo nzi nzyotweelede kutobela, alimwi ino nkaambo nzi?

⁵ Kutegwa batambule bulumbu mumuzundano wancobeni, basikubalika beelede kutobela malailile aapegwa abasikubamba muzundano ooyo. Mbubwenya buyo, kuti katuyanda kuyootambula bulumbu bwabuumi butamani, tweelede kutobela njiisyo zyamu Bbaibbele. (Mil. 20:24; 1Pet. 2:21) Nokuba boobo, Saatani alimwi abaabo ibatobela cikozyanyo cakwe tabayandi kuti swebo katutobela njiisyo zyamu Bbaibbele; bayanda kuti ‘tuzumanane kubalika ambabo.’ (1Pet. 4:4) Balatufwubaazya akaambo kakuti tutobela njiisyo zyamu Bbaibbele alimwi balitaminina kuti buumi mbobapona mbubotu, akuti bupa lwaanguluko. Pele oobo mbubeji.—2Pet. 2:19.

6. Ncinzi ncomwaiya kucikozyanyo caba Brian?

⁶ Lino-lino buyo, kufwumbwa muntu uubalika antoomwe abaabo ibayungwa anyika ya Saatani uyoojana kuti nzila njaakasala taileteli lwaanguluko; muciindi caboobo, isololela kubuzike. (Rom. 6:16) Amubone cikozyanyo caba Brian. Bazyali babo bakali kubakulwaizya kupona buumi bwa Bunakristo. Pele ciindi nobakakubuka, bakatalika kudooneka naa nzila eeyi yakali kukonzya kubapa kukkomana. Ba Brian bakasala kubalika antoomwe abaabo ibakali kupona kweelana azyeelelo zya Saatani. Bakati: “Tiindakazyi kuti lwaanguluko oolo ndondakali kulombozya lwakali kuyoondipa kuba acilengwa cakubelesya misamu iikola. Tiilyakalampa, ndakatalika kubelesya misamu iikola, kunywa bukoko cakwiindilizya alimwi akupona buumi bwakutalilemeka. Kwamyaka minji yakatobela, ndakaibelesya amisamu iikola kapati alimwi ndakaba muzike wamisamu eeyo. . . . Ndakatalika kusambala misamu iikola kutegwa ndizumanane abuumi oobo.” Mukuya kwaciindi, ba Brian bakasala kupona kweelana azyeelelo zya Jehova. Bakaileka nzila njobakali kupona, mpoonya bakabbapatizyigwa mu 2001. Lino balikkomene ncobeni akaambo kakupona buumi bwa Bunakristo. *

7. Kweelana alugwalo lwa Matayo 7:13, 14, ino kuli nzila zyongaye?

⁷ Eelo kaka cilayandika kapati kusala nzila iiluzi alimwi akwiitobela! Saatani uyanda kuti toonse tuleke kubalika munzila nsyoonto “iitola kubuumi” akunjila munzila mpati mwalo bantu banji munyika eeyi mobabalikila. Nzila eeyi ilizyibidwe kapati alimwi ncuuba-uba kubalika mulinjiyo. Pele “itola kulunyonyooko.” (Amubale Matayo 7:13, 14.) Kutegwa tuzumanane  kuba munzila iiluzi akutanyonganizyigwa abaabo batatobeli zyeelelo zya Jehova, tweelede kusyoma Jehova alimwi akumumvwida.

8. Kuti sikubalika wawa, ino ncinzi ncacita?

⁸ Basikubalika mumuzundano wamusinzo mulamfwu balabikkila maano kulanga kumbele kutegwa batalebwi. Nokuba boobo, cakutazyiba balakonzya kulebwa asikubalikanyina naa kulyata mucilindi. Kuti bawa, balabuka akuzumanana kubalika. Babikkila maano kapati kukeengo kamamanino alimwi akubulumbu mbobalangila kupegwa, ikutali kucintu icapa kuti balebwe.

9. Ikuti naa twawa, ncinzi ncotweelede kucita?

⁹ Notubalika, tulakonzya kuwa ziindi zinji, kulubizya muzintu nzyotwaamba naa kucita. Naa ambweni basikubalikama balakonzya kucita zintu izikonzya kutucisa kapati. Eeci tweelede kucilangila. Toonse tatulondokede alimwi toonse tuli mukubalika munzila yomwe nsyoonto iitola kubuumi. Aboobo zimwi ziindi tulakonzya “kulebana.” Paulo wakaamba kuti zimwi ziindi tulakonzya kuba akaambo ‘kakutongookana.’ (Kol. 3:13) Pele muciindi cakubikkila maano kucintu cakatupa kuwa, atubikkile maano kubulumbu ibuli kumbele lyesu. Ikuti naa twawa, atunyamuke akuzumanana kubalika. Ikuti naa twanyema akukaka kunyamuka, tatukasiki akeengo kamamanino akutambula bulumbu. Kuyungizya waawo, tulalangilwa kuba cilebyo kuli bamwi ibali mukusolekesya kubalika munzila eeyi nsyoonto iitola kubuumi.

10. Mbuti mbotukonzya kweeleba kuba “cilebyo” kuli bamwi?

¹⁰ Inzila iimbi mbotukonzya kweeleba kuba “cilebyo” kubakwesu abacizyi nkwiinda mukubalekela kucita zintu munzila njobayanda kuti kacikonzyeka kucita boobo muciindi cakuti lyoonse katuyanda kuti zintu kazicitwa kweelana ambotuyanda. (Rom. 14:13, 19-21; 1Kor. 8:9, 13) Munzila eeyi iiyandika kapati, swebo tuliindene abasikubalika ibali mumuzundano wancobeni. Balo balazundana abasikubalika bambi alimwi sikubalika aumwi ulasolekesya kutegwa akalijanine bulumbu bwakwe alikke. Basikubalika aaba babikkila kapati maano kucintu cikonzya kubagwasya lwabo kuzunda mumuzundano kutegwa bakajane bulumbu. Aboobo balakonzya kubatonka basikubalika bamwi kutegwa balo kabali mbabo ibali kumbele mukubalika. Mukwiimpana, swebo tatuzundani buya pe.  (Gal. 5:26; 6:4) Makanze eesu ngakugwasya bantu banji kutegwa toonse tukasike akeengo kamamanino akuyootambula bulumbu bwabuumi butamani. Aboobo tulasolekesya kulutobela lulayo lwa Paulo lwakasololelwa amuuya ‘lwakutabikkila buyo maano kuzintu nzyotuyanda swebo zilikke, pele akuzintu nzyobayanda bamwi.’—Flp. 2:4.

11. Ncinzi ncabikkila maano sikubalika, alimwi ino nkaambo nzi?

¹¹ Kunze buyo aakubikkila maano kulanga kumbele nkobaya, basikubalika mumuzundano wancobeni balabikkila maano kusika akeengo kamamanino. Nokuba kuti tabakonzyi kukabona keengo aako, balakonzya kweezeezya kuti basika kale alinkako alimwi akutambula bulumbu. Balakulwaizyigwa kwiinda mukuyeeya bulumbu mbobayoopegwa.

12. Ncisyomezyo nzi ncaakatupa Jehova?

¹² Mukubalika nkotujisi, caluzyalo Jehova wakasyomezya bantu bakwe bulumbu businizyide ikuti babalika kusikila kumamanino, nkokuti buumi butamani kujulu naa muparadaiso anyika. Ibbaibbele lilabupandulula bulumbu oobu kutegwa tucikonzye kweezeezya mbobunooli bubotu buumi bwesu bwakumbele. Ikuti naa twazumanana kubuyeeya bulangizi oobu, tatukalekeli cintu cili coonse kutulebya cakumaninina.

13. Ncoolwe nzi ncotujisi calo ncobatajisi basikubalika bancobeni?

¹³ Basikubalika muzisobano zyabana Giriki bakeelede kuliyumya kubuyumuyumu mbobakali kujana ciindi nobakali kubalika, mbuli kukatala alimwi akumvwa kucisa. Pele cilikke buyo ncobakeelede kusyoma, nkuliyiisya beni alimwi anguzu zyabo. Andiswe tuli mbuli basikubalika aaba mukuti tulayiisyigwa mbotukonzya kubalika mumuzundano motubede. Pele tulijisi coolwe kwiinda basikubalika bancobeni. Tulajana nguzu kuli Jehova, alimwi lyoonse ulakonzya kutupa nguzu. Ikuti twamusyoma Jehova, utusyomezya kutuyiisya alimwi akutuyumya!—1Pet. 5:10.

14. Mbuti lugwalo lwa 2 Bakorinto 12:9, 10 mbolutugwasya kuliyumya kubuyumuyumu mbotujisi?

¹⁴ Paulo wakalwana buyumuyumu bunji. Kunze buyo lyakutukilwa akupenzegwa abamwi, zimwi ziindi wakali kubula nguzu alimwi wakeelede kuliyumya kucintu ncaakaamba kuti “mumvwa mumubili.” (2Kor. 12:7) Pele muciindi cakubona buyumuyumu oobo kuba kaambo ikakeelede kumupa kutyompwa, wakabubona kuba coolwe cakusyoma Jehova. (Amubale 2 Bakorinto 12:9, 10.) Akaambo kakuti Paulo wakali kuzyibona munzila iili boobu zintu, Jehova wakamugwasya kuliyumya mumasunko aakwe oonse.

15. Kuti twamwiiya Paulo, ino buyumuyumu tuyoobubona buti?

¹⁵ Andiswe tulakonzya kutukilwa naa kupenzyegwa akaambo kalusyomo lwesu. Alimwi inga twayandika kuliyumya kukuciswa-ciswa naa kukukatala kapati. Pele kuti twamwiiya Paulo, buyumuyumu bumwi abumwi tuyoobubona kuba coolwe cakusyoma Jehova.

16. Nokuba kuti mulaciswa-ciswa, ino ncinzi ncomukonzya kucita?

¹⁶ Sena muli basibukilwi bulo naa mweendela akacinga kabalema? Sena muciswa maulu naa meso? Kuti naa mbocibede oobo, sena inga mwabalika antoomwe abaabo ibacili bana-bana alimwi ibajisi buumi buli kabotu? Inzya inga mwabalika! Bacembeede alimwi abaciswa bali mukubalika munzila iitola kubuumi. Mulimo ooyu tabakonzyi kuucita munguzu zyabo beni. Muciindi caboobo, balatambula nguzu zya Jehova kwiinda mukuswiilila miswaangano ya Bunakristo kubelesya fooni naa kweebelela miswaangano kwiinda mukubelesya mavidiyo aakacitwa dawuniloodi a jw.org. Alimwi balatola  lubazu mumulimo wakugwasya bantu kuba basikwiiya kwiinda mukukambaukila bamadokota, bamanesi alimwi abacibbululu.

17. Ino Jehova ulimvwa buti kujatikizya baabo ibatakonzyi kucita zyoonse nzyobayanda mumulimo wakwe?

¹⁷ Kuti kamutakonzyi kucita zyoonse nzyomuyanda mumulimo wa Jehova, mutatyompwi akuyeeya kuti tamukonzyi kuliyumya mubweende bwazintu oobu. Jehova ulamuyanda kapati akaambo kalusyomo ndomujisi mulinguwe alimwi azintu nzyomwamucitila kwamyaka yoonse eeyi. Lino muyandika lugwasyo lwakwe kwiinda kaindi, alimwi kunyina nayoomulekelezya pe. (Int. 9:10) Muciindi caboobo, uyooswena afwaafwi kapati andinywe. Amubone ncaakaamba mucizyi uujisi penzi lyakuciswa-ciswa, wakaamba kuti: “Penzi lyakuciswa-ciswa nolyakali kuyabuyaambele kapati, ndakajana kuti zyoolwe zyakukambauka zyakatalika kuceya. Pele ndilizyi kuti kusolekesya nkondicita kukkomanisya moyo wa Jehova, alimwi eeci cilandikkomanisya kapati.” Ciindi nomutyompedwe, amuzyibe kuti Jehova ulaandinywe. Amuyeeye kujatikizya cikozyanyo ca Paulo, alimwi akuyeeya kujatikizya majwi aakwe aakulwaizya aakuti: “Ndilabotelwa eelyo nonditajisi nguzu, . . . nkaambo eelyo nonditajisi nguzu, ndendilyo nondijisi nguzu kapati.”—2Kor. 12:10.

18. Ino mbuyumuyumu nzi bupati mbobajana bamwi?

¹⁸ Bamwi ibali mukubalika munzila eeyi iitola kubuumi balajana buyumuyumu abumbi. Bajisi mapenzi bantu bambi ngobatakonzyi kubona alimwi akumvwisya. Mucikozyanyo, balwana penzi lyakutyompwa naa kulibilika kapati. Nkaambo nzi babelesi ba Jehova aaba bayandwa ncobajisi buyumuyumu kapati? Nkaambo kakuti muntu uutyokede kwaanza naa iweendela akacinga kabalema, bantu boonse balakonzya kulibona penzi ndyajisi alimwi balakonzya kumugwasya. Pele aabo balwana mapenzi aamumizeezo balakonzya kulibonya mbuli kuti tabajisi penzi lili lyoonse. Bali mubukkale buyumu mbubonya mbuli muntu uutyokede kwaanza, pele ambweni tabakonzyi kufwidwa lweetelelo kuli bamwi mbuli mbobakonzya kweetelela yooyo uutyokede kwaanza.

19. Ncinzi ncotwiiya kucikozyanyo ca Mefiboseti?

¹⁹ Kuti kamutakonzyi kucita zyoonse nzyomuyanda alimwi akulimvwa kuti bantu tababumvwisyi bukkale bwanu, mulayumizyigwa kapati acikozyanyo ca Mefiboseti. (2Sam. 4:4) Wakali mulema alimwi Mwami Davida wakamuyeeyela zintu zitali kabotu akumweendelezya calunya. Mefiboseti kunyina naakaliyandila kuti zintu zili boobu zimucitikile. Nokuba boobo, kunyina naakanyema, pele wakalumba kuzintu zibotu izyakacitika mubuumi bwakwe. Wakalumba kuluzyalo ndwaakamutondezya Davida musyule. (2Sam. 9:6-10) Aboobo ciindi Davida naakamuyeeyela zintu zitali kabotu, Mefiboseti wakabikkila maano kutwaambo toonse itwakajatikizyidwe.  Tanaakalekela kulubizya kwa Davida kuti kumunyemye. Alimwi kunyina naakatongooka Jehova kujatikizya ncaakacita Davida. Mefiboseti wakabikkila maano kubona ncaakali kukonzya kucita kutegwa agwasyilizye mwami iwakasalidwe a Jehova. (2Sam. 16:1-4; 19:24-30) Jehova wakapa kuti cikozyanyo ca Mefiboseti icibotu kapati cilembwe mu Jwi lyakwe kutegwa citugwasye.—Rom. 15:4.

20. Ino kulibilika kubajatikizya buti bamwi, pele ino ndusyomo nzi ndobakonzya kuba andulo?

²⁰ Akaambo kakulibilika kapati, bakwesu alimwi abacizyi bamwi balayoowa kapati mubukkale bwabuzuba abuzuba. Cilakonzya kubakatazya kapati kuba akati kabantu banji, pele balazumanana kujanika lyoonse kumiswaangano yambungano, yabbazu alimwi ayacooko. Cilabakatazya kubandika abantu mbobatazyi, nokuba boobo balabandika abantu mumulimo wamumuunda. Ikuti naa mbocibede oobo akulindinywe, amuzyibe kuti tamuli nyolikke pe. Bantu banji mbobalimvwa mbubwenya oobo. Amuzyibe kuti Jehova ulakkomana kapati amilimo njomubeleka camoyo woonse. Kuzumanana kwanu ncitondezyo cakuti uli mukumulongezya alimwi akumupa nguzu nzyomuyandika. * (Flp. 4:6, 7; 1Pet. 5:7) Kuti naa mulamubelekela Jehova nokuba kuti tamukonzyi kucita zyoonse nzyomuyanda akaambo kakuciswa naa penzi lyamumizeezo, mulakonzya kuba masimpe kuti mukkomanisya Jehova.

21. Kwiinda mulugwasyo lwa Jehova, ncinzi toonse ncotuyoocita?

²¹ Cikkomanisya ncakuti, kuli kwiindana kuliko akati kakubalika kwancobeni alimwi akooko nkwaakaamba Paulo. Mukubalika kwancobeni muntu omwe nguupegwa bulumbu. Pele mukubalika kwabuumi bwa Bunakristo, kufwumbwa ooyo uuliyumya cakusyomeka ulapegwa bulumbu bwabuumi butamani. (Joh. 3:16) Alimwi mukubalika kwancobeni, basikubalika beelede kuti bajisi buumi buli kabotu, buyo-buyo, inga tiibacikonzya kuzwidilila. Pele swebo, bunji bwesu tulaciswa-ciswa, nokuba boobo tulaliyumya. (2Kor. 4:16) Kwiinda mulugwasyo lwa Jehova, toonse tuyoozumanana kubalika mane kumamanino!