1. Ninzila nzi yakwiiya njaakali kubelesya Mukwesu Russell abeenzinyina, alimwi nkaambo nzi ncoyakali kugwasya?

MYAKA iinda ku 100 yainda, Mukwesu C.  T. Russell alimwi abeenzinyina, ikakamu kasyoonto kabasikwiiya Jwi lya Leza, bakatalika kuswaangana antoomwe. Bakali kuyanda kuzyiba icini ncoliyiisya Bbaibbele kujatikizya Jehova Leza, Jesu Kristo, ciimo cabantu bafwide alimwi acinunuzyo. Nzila njobakali kubelesya kwiiya tiiyakali kukatazya. Umwi wakali kubuzya mubuzyo, mpoonya boonse bakali kuvwuntauzya magwalo oonse aajatikizya kaambo aako. Kumamanino, bakali kulemba nzyobakali kujana mukuvwuntauzya kwabo. Jehova wakabagwasya bamaalumi aabo kumvwisya kasimpe kamu Bbaibbele ikayandika kapati, alimwi kasimpe aako kacibeleka akulindiswe mazuba aano.

2. Ncinzi cikonzya kupa kuti zimwi ziindi tubumvwe munzila iitaluzi businsimi bwamu Bbaibbele?

² Pele tiilyakalampa, Basikwiiya Bbaibbele aabo bakabona kuti cilakatazya kapati kumvwisya businsimi bwamu Bbaibbele kwiinda kumvwisya njiisyo zyamu Bbaibbele zyantalisyo. Nkaambo nzi ncocili boobo? Kaambo kamwi nkakuti, kanji-kanji businsimi bwamu Bbaibbele bulalimvwisya kabotu ciindi nobuli mukuzuzikizyigwa naa ciindi nobwamana kuzuzikizyigwa. Pele kuli akambi kaambo. Kutegwa tubumvwisye kabotu businsimi, tweelede kwaalanga-langa makani oonse aajatikizya businsimi oobo. Ikuti twabikkila buyo maano kucibeela cimwi cabusinsimi, mpoonya akutabikkila maano kuzibeela zimwi, tulakonzya kubumvwa munzila iitaluzi. Kulibonya kuti eeci ncecakacitika kubusinsimi ibuli kubbuku lya Joeli. Atubulange-lange alimwi businsimi oobu akubona kaambo ncotweelede kucinca kweelana ambotwali kubumvwisya.

3-4. Kusikila lino, mbuti mbotwali kubumvwisya businsimi ibujanika kulugwalo lwa Joeli 2:7-9?

 ³ Amubale Joeli 2:7-9. Joeli wakasinsima kuti cipenzyo cacikwikwi ciyoonyonyoona cisi ca Israyeli. Cikwikwi eeci icijisi meno alimwi amyeebo iili mbuli yabasyuumbwa, ciyoozinyonyoona zisyango zyoonse! (Joel. 1:4, 6) Kwamyaka minji, twali kuyeeya kuti businsimi oobu, munzila yacikozyanyo bwaamba nzila bantu ba Jehova mbobaubeleka mulimo wabo wakukambauka mbuli cikwikwi icitakonzyi kulesyegwa. Twakazyi kuti mulimo ooyu unyonyoona “nyika” naa bantu ibeendelezyegwa abasololi babukombi. *

⁴ Bupanduluzi oobu inga bwalimvwisya mbuli kuti buliluzi ikuti naa twabala buyo lugwalo lwa Joeli 2:7-9. Nokuba boobo, ikuti naa twaalanga-langa makani oonse aajatikizya businsimi oobu, tulakonzya kubona kuti tweelede kubumvwisya munzila iindene. Atulange-lange twaambo tone ncocili boobo.

5-6. Mubuzyo nzi ngotukonzya kubuzya ciindi notubala lugwalo lwa (a) Joeli 2:20? (b) Joeli 2:25?

⁵ Cakusaanguna, amubone cisyomezyo ca Jehova kujatikizya cipenzyo cacikwikwi: “Muntu wakunyika [cikwikwi] ndiyoomutandila kulamfwu andinywe.” (Joel. 2:20) Ikuti naa cikwikwi ciiminina Bakamboni ba Jehova ibatobela mulawo wa Jesu wakukambauka alimwi akugwasya bantu kuba basikwiiya, nkaambo nzi Jehova ncakonzya kusyomezya kubatandila kulamfwu? (Ezk. 33:7-9; Mt. 28:19, 20) Aboobo, calibonya kuti Jehova ncatandila kulamfwu, tabali babelesi bakwe basyomeka, pele cintu cimwi naa bantu aabo ibapenzya bantu bakwe.

⁶ Kaambo kabili, amubone majwi aali kulugwalo lwa Joeli 2:25. Jehova wakati: “Ndiyoomujolela zintu nzimwakasweekelwa mumyaka iilya nocakalya cikwikwi, cisozi citakwe mababa, cisozi cilya kapati, alimwi acikwikwi cinyonyoona, impi yangu mpati njindakatuma akati kanu.” Aawa Jehova usyomezya ‘kujola zintu nzibakasweekelwa’ akaambo kacikwikwi. Ikuti cikwikwi eeco ciiminina bakambausi ba Bwami, nkokuti inga caamba kuti mulumbe ngobakambauka ulanyonyoona. Pele mulumbe ooyu ufwutula buumi bwabantu alimwi ulakonzya kugwasya basizibi kweempwa. (Ezk. 33:8, 19) Eelo kaka inga cabota kuti bacita oobo!

7. Kweelana alugwalo lwa Joeli 2:28, 29, ino majwi aakuti “kuzwa waawo” atugwasya kumvwisya nzi?

⁷ Amubale Joeli 2:28, 29. Kaambo katatu kajatikizya mbozyakali kutobelana kucitika zintu izyaambidwe mubusinsimi oobu. Sena mwabona kuti Jehova wakaamba kuti: “Kuzwa waawo ndiyootila muuya wangu”; nkokuti, caakumana kucita mulimo wancico cikwikwi? Ikuti cikwikwi ciiminina bakambausi ba Bwami bwa Leza, nkaambo nzi Jehova ncakonzya kutila muuya wakwe alimbabo bamana kubeleka mulimo wabo wakukambauka? Mubwini, akaambo kakugwasyigwa amuuya uusalala wa Leza, bakacikonzya kuzumanana kukambauka kwamyaka minji nokuba kuti bakali kukazyigwa alimwi mulimo wabo wakali kulesyegwa.

8. Mbaani ibaimininwa acikwikwi icaambidwe kubbuku lya Ciyubunuzyo 9:1-11? (Amubone cifwanikiso icili aacivwumbyo.)

⁸ Amubale Ciyubunuzyo 9:1-11. Lino atulange-lange kaambo kane. Musyule, twakali kwaamba kuti cipenzyo cacikwikwi icakaambwa a Joeli ciiminina mulimo wesu wakukambauka akaambo kabusinsimi bukozyenye ibujanika kubbuku lya Ciyubunuzyo. Businsimi oobu bupandulula cikwikwi icijisi masyu aabantu alimwi ‘azilibonya mbuli misini yangolida’  amitwe yancinco. (Ciy. 9:7) Cakali kupenzya “bantu aabo batajisi ciganto ca Leza ankumo zyabo” kwamyezi yosanwe, nkokuti bulamfwu bwaciindi mbocikonzya kupona cikwikwi. (Ciy. 9:4, 5) Masimpe bupanduluzi oobu bulibonya kuti bwaamba babelesi ba Jehova ibananike. Cabusicamba balaambilizya lubeta lwa Leza kubweende bwazintu oobu bubyaabi, aboobo eeci cipa kuti boonse aabo ibali kulubazu lwanyika eeyi balimvwe bubi.

9. Nkwiindana nzi kupati ikuliko akati kacikwikwi ncaakabona Joeli alimwi aceeco ncaakabona Johane?

⁹ Mubwini, kuli kukozyanya kuliko akati kabusinsimi ibuli kubbuku lya Ciyubunuzyo alimwi abbuku lya Joeli. Nokuba boobo, kuli kwiindana kupati kuliko akati kabusinsimi oobu. Mucikozyanyo: Mubusinsimi bwa Joeli, cikwikwi cakanyonyoona zimena ansi zyamunyika. (Joel. 1:4, 6, 7) Mucilengaano ca Johane, cikwikwi “cakaambilwa kuti citanyonyooni zimena ansi zyamunyika.” (Ciy. 9:4) Cikwikwi ncaakabona Joeli cakazwa kulubazu lwakunyika. (Joel. 2:20) Eeco ncaakabona Johane cakazwa mumulindi uutagoli. (Ciy. 9:2, 3) Cikwikwi ncaakaamba Joeli cakatandilwa kulamfwu. Cikwikwi caambidwe kubbuku lya Ciyubunuzyo tiicakatandilwa kulamfwu pele cakazumizyigwa kuti cimanizye mulimo wancico. Kunyina bumboni buliko ibutondezya kuti bananike tiibakakkomaninwa a Jehova.—Amubone kabbokesi kakuti: “ Businsimi Ibujatikizya Cikwikwi—Kukozyanya Alimwi Akwiindana.”

10. Amupe cikozyanyo camu Magwalo icitondezya kuti cikwikwi icakaambwa a Joeli alimwi a Johane cilakonzya kwiiminina zintu ziindene.

 ¹⁰ Kwiindana kupati ikuli akati kabusinsimi oobu bobilo kutugwasya kumvwisya kuti kunyina mpobuswaangene. Sena aawa twaamba kuti cikwikwi icaambidwe kubbuku lya Joeli ciliindene acikwikwi eeco icaambidwe kubbuku lya Ciyubunuzyo? Inzya. Mu Bbaibbele, zimwi ziindi cintu cimwi cilakonzya kwiiminina cintu cimbi ikuti cintu eeco cabelesyegwa munzila iimbi. Mucikozyanyo, kulugwalo lwa Ciyubunuzyo 5:5, Jesu waambwa kuti “Syuumbwa wamusyobo wa Juda,” mpoonya kulugwalo lwa 1 Petro 5:8, Diabolosi waambwa kuti “syuumbwa wabutambo uuvwuluma.” Akaambo kamibuzyo yabuzyigwa kujatikizya kumvwisya kwesu kwakaindi, nkokuti tweelede kujana bupandulizi bumbi bwabusinsimi bwa Joeli. Ino businsimi oobu bupandulula nzi?

11. Mbuti lugwalo lwa Joeli 1:6 alimwi a 2:1, 8, 11 mbolutugwasya kumvwisya ibaimininwa acikwikwi icaambwa?

¹¹ Ciindi notulanga-langa tupango tumbi mubusinsimi bwa Joeli, tulamvwisya kuti musinsimi ooyu wakali kusinsima kulwanwa abasikalumamba. (Joel. 1:6; 2:1, 8, 11) Jehova wakaamba kuti wakali kuyoobelesya ‘impi yakwe mpati’ (basikalumamba bana Babuloni) kuti basubule bana Israyeli bazangi. (Joel. 2:25) Cakweelela, impi eeyo iitwa kuti “muntu wakunyika” akaambo kakuti bana Babuloni bakali kuyoosaala bana Israyeli kuzwa kulubazu lwakunyika. (Joel. 2:20) Impi eeyo ikozyanisyigwa kucikwikwi cikamantene. Kujatikizya basikalumamba aabo, Joeli wakati: “[Sikalumamba] umwi aumwi uluujisi kuya kumbele munzila yakwe. . . . Balawuumuka kunjila mumunzi, balabalika abwaanda. Balatanta aamaanda, balainda mumawindo mbuli mubbi.” (Joel. 2:8, 9) Sena inga mweezyeezya kujatikizya bukkale oobu? Kuli basikalumamba koonse-koonse. Kunyina kwakuyubila. Kunyina uukonzya kufwutuka kumpi yabana Babuloni!

12. Ino businsimi bwa Joeli ibujatikizya cikwikwi bwakazuzikizyigwa buti?

¹² Mbubwenya mbuli cikwikwi, bana Babuloni (naa bana Kasidi) bakausaala munzi wa Jerusalemu mu 607 B.C.E. Bbaibbele lyaamba kuti: “Mwami waba Kasidi, iwakajaya balombwana babo apanga . . . , tanaakafwida muntu luzyalo, abe mulombwana naba nakalindu, uucembeede naa uutabukili bulo. Leza wakazyaaba zintu zyoonse mumaanza aakwe. Wakaumpa ŋanda ya Leza mwini-mwini, wakamwaya bulambo bwa Jerusalemu, wakaumpa ngazi zyanguwo zikwabilidwe zyoonse akunyonyoona zintu zyoonse ziyandisi.” (2Mak. 36:17, 19) Bana Babuloni nobakamana kusaala akunyonyoona nyika, bantu bakaamba kuti: “Ma! Cisi eeci matongo buyo aatakwe muntu naba munyama, alimwi caabwa mumaanza aaba Kasidi.”—Jer. 32:43.

13. Amupandulule ncolwaamba lugwalo lwa Jeremiya 16:16, 18.

¹³ Nokwakainda myaka iili 200 kuzwa ciindi nobwakazuzikizyigwa businsimi bwa Joeli, Jehova wakabelesya Jeremiya kusinsima cintu cimwi kujatikizya kulwanwa ooku. Wakaamba kuti basikusaala bakali kuyoobikkila maano kuyandaula bana Israyeli boonse ibakacita zintu zibyaabi alimwi akubajata. “‘Mpaawa lino ndiita bazubi banji,’ mbwaamba Jehova, ‘eelyo bayoobazuba. Mpoonya ndiyakwiita bavwimi banji, eelyo bayoobavwima mumalundu oonse amutulundu toonse alimwi amuŋanzi zyamyala. . . . ndiyoobapa cisubulo ceelene acinyonyoono cabo alimwi acibi cabo.’” Bana Israyeli kunyina nobakali kukonzya kubayuba basikusaala bana Babuloni, mulwaanje naa mucisaka.—Jer. 16:16, 18.

14. Ndilili lugwalo lwa Joeli 2:28, 29 nolwakazuzikizyigwa?

¹⁴ Joeli uyanda kwaamba makani mabotu. Nyika iiyoozyala micelo alimwi. (Joel. 2:23-26) Mpoonya aciindi cimwi kumbele, kuyooba cakulya cakumuuya cinji. Jehova wakaamba kuti, “Ndiyootila muuya wangu amuntu uuli woonse, eelyo bana banu basankwa abasimbi bayoosinsima . . . Alimwi naaba abazike bangu basankwa abasimbi ndiyootila muuya wangu.” (Joel. 2:28, 29) Eeci tiicakacitika bana Israyeli mbobakasikila buyo kucisi cabo kuzwa ku Babuloni. Muciindi caboobo, cakacitika lya Pentekoste 33 C.E. kakwiindide myaka minji. Ino tuzyi buti oobo?

15. Kweelana alugwalo lwa Milimo 2:16, 17, majwi nzi aaindene aali kulugwalo lwa Joeli 2:28 ngaakabelesya Petro, alimwi ino eeco citondezya nzi?

¹⁵ Kwiinda mukusololelwa amuuya uusalala, mwaapostolo Petro wakalubelesya lugwalo lwa Joeli 2:28, 29 kwaamba cintu cigambya kapati icakacitika mubuzuba bwa Pentekoste. Mafwumina aayo cakuma 9 koloko, Leza wakatila muuya wakwe uusalala, mpoonya aabo ibakatilwa muuya bakatalika kwaambaula “kujatikizya milimo mipati ya Leza.” (Mil. 2:11) Kuyungizya waawo, kwiinda mukusololelwa amuuya uusalala, Petro wakabelesya majwi aayindene aasyoonto ciindi naakazubulula businsimi bwa Joeli. Sena mwaabona majwi aayo? (Amubale Milimo 2:16, 17.) Petro kunyina naakabelesya majwi aakuti, “Kuzwa waawo,” kweelana ambwaabelesyedwe mubusinsimi bwa Joeli, pele wakaamba kuti: “Kumazuba aakumamanino,” ikwaamba mazuba aamamanino abweende bwazintu bwaci Juda. Aciindi eeco, muuya wa Leza wakali kuyootilwa “amuntu uuli woonse.” Eeci citondezya kuti kwakainda ciindi icili mbocibede businsimi bwa Joeli kabutanazuzikizyigwa.

16. Ino muuya uusalala wa Leza wakagwasya buti mumulimo wakukambauka mumwaanda wamyaka wakusaanguna, alimwi mbuti mboutugwasya mazuba aano?

 ¹⁶ Leza naakamana kutila muuya wakwe ku Banakristo bamumwaanda wamyaka wakusaanguna, bakatalika mulimo wakukambauka walo mukuya kwaciindi iwakali kuyoocitwa munyika yoonse. Kuzikusika ciindi mwaapostolo Paulo naakalemba lugwalo lwakwe kubana Kolose, cakuma 61 C.E., wakali kukonzya kwaamba kuti makani mabotu akambaukwa “kuzilenge zyoonse zili ansi aajulu.” (Kol. 1:23) Ciindi Paulo naakaamba kuti “zilenge zyoonse,” wakali kwaamba masena walo abamwi nkobakali kuunka kuyookambauka. Kwiinda mulugwasyo lwamuuya uusalala wa Jehova, mulimo wakukambauka wayaambele kapati mumazuba eesu, nkokuti “kusikila kumagolelo aanyika”!—Mil. 13:47; amubone kabbokesi kakuti “ Ndiyootila Muuya Wangu.”

17. Mbuti kumvwisya kwesu kwabusinsimi bwa Joeli ibujatikizya cikwikwi mbokwacinca?

¹⁷ Ino ncinzi icacinca? Lino tubumvwisya munzila iiluzi businsimi ibuli kulugwalo lwa Joeli 2:7-9. Mubufwaafwi, tupango ootu tatwaambi mulimo wesu wakukambauka ngotucita cabusungu, pele twaamba mulimo wabasikalumamba bana Babuloni ibakasaala Jerusalemu mu 607 B.C.E.

18. Ino ncinzi icatacinca kujatikizya bantu ba Jehova?

¹⁸ Ino ncinzi icatacinca? Bantu ba Jehova bazumanana kukambauka makani mabotu kuli koonse, kubelesya nzila iili yoonse iikonzyeka. (Mt. 24:14) Kunyina mulawo wamfwulumende uuli woonse uukonzya kutupa kucileka kubeleka mulimo wesu wakukambauka. Kwiinda mukugwasyigwa a Jehova, lino tuli basungu kwiinda lyoonse, kukambauka makani mabotu aa Bwami cabusicamba! Cakulicesya, tulazumanana kusyoma Jehova kutegwa katugwasya kumvwisya businsimi bwamu Bbaibbele, alimwi tulijisi lusyomo lwakuti aciindi ceelede, uyootusololela ‘mukumvwisya kasimpe koonse’!—Joh. 16:13.