1. Ncinzi Jehova ncabona kubantu bakwe?

JEHOVA LEZA “ulabakkomanina bantu bakwe.” (Int. 149:4) Eelo kaka kaambo aaka kalakkomanisya! Jehova ulabubona bube bwesu bubotu; ulizyi kuti tulakonzya kuba bantu bali kabotu alimwi ulatugwasya kutegwa tube balongwe bakwe. Kuti twazumanana kusyomeka kulinguwe, uyoozumanana kuba mulongwe mane kukabe kutamani!—Joh. 6:44.

2. Nkaambo nzi bamwi ncocibakatazya kusyoma kuti Jehova ulabayanda?

² Bamwi balakonzya kwaamba kuti, ‘Ndilizyi kuti Jehova ulabayanda bantu bakwe kabali mbunga, pele mbuti mbondikonzya kusyoma kuti ulandiyanda mebo kundigama?’ Nkaambo nzi muntu umwi ncakonzya kubuzya boobo? Mucizyi Oksana *, iwakapenga kabapati ciindi naakali mwana wakaamba kuti: “Ndakakkomana kapati ciindi nondakabbapatizyigwa akutalika bupainiya. Pele nokwakainda myaka iili 15, ndakatalika kuyeeya zintu zibyaabi izyakandicitikila kubwana. Ndakatalika kuyeeya kuti Jehova tacindikkomanini alimwi akuti tandeeleli kuyandwa anguwe.” Mucizyi Yua imupainiya, awalo iwakajana mapenzi manji ciindi naakali mwana wakaamba kuti: “Ndakaaba buumi bwangu kuli Jehova nkaambo ndakali kuyanda kumukkomanisya. Pele ndakali masimpe kuti Jehova takonzyi kundiyanda.”

3. Ncinzi ncotutiilange-lange mucibalo eeci?

³ Mbubwenya mbuli bacizyi bobilo ibazwa akwaambwa, mulamuyanda kapati Jehova, pele ambweni muladooneka kuti naa  ulamuyanda. Nkaambo nzi ncomweelede kusinizya kuti ulamuyanda ncobeni? Alimwi ino ncinzi cikonzya kumugwasya ciindi nomuyeeya kuti tamuyandi? Atulange-lange bwiinguzi bwamibuzyo eeyi?

4. Nkaambo nzi ncocitali kabotu kudooneka luyando Jehova ndwajisi kulindiswe?

⁴ Kuti twasinizya kuti Jehova ulatuyanda, tuyooyanda kumubelekela kusikila mpotugolela, nokuba kuti tujisi buyumuyumu. Pele kuti katudooneka kuti Leza ulatuyanda, ‘nguzu zyesu zilaceya.’ (Tus. 24:10) Alimwi ciindi notwatyompwa akutalika kuyeeya kuti Leza tatuyandi, tuyakwaalilwa kumuzunda Saatani.—Ef. 6:16.

5. Ncinzi cikonzya kucitika ikuti muntu kadooneka luyando lwa Leza?

⁵ Banakristo basyomeka bamwi bamazuba aano, baunka ansi kumuuya akaambo kakudooneka. Mwaalu wazina lya James wakaamba kuti: “Nokuba kuti ndakali kubelekela a Beteli alimwi akuti ndakali kukukkomanina kukambauka mumbungano yamu mumwaambo wakunze aacisi, ndakali kudooneka naa Jehova wakali kwiitambula ncobeni milimo yangu. Mane buya aciindi cimwi, ndakali kudooneka naa Jehova wakali kwiitambula mipailo yangu.” Mucizyi Eva uubelekela a Beteli wakaamba kuti: “Ndakaiya kuti tacili kabotu kudooneka luyando lwa Jehova nkaambo kucita boobo kulazijatikizya zyoonse nzyocita mumulimo wa Jehova. Eeci cikupa kuleka kuba aluyandisisyo lwakucita zintu zyakumuuya alimwi akumaninwa lukkomano mumulimo wa Jehova.” Mukwesu Michael, imupainiya alimwi mwaalu wakaamba kuti: “Ikuti kotasyomi kuti Leza ulakuyanda, uyakuunkilila akusweeka.”

6. Ncinzi ncotweelede kucita ikuti twatalika kuyeeya kuti Leza tatuyandi?

⁶ Zyakuluula eezyi zitondezya buyo mbocikonzya kunyonganya lusyomo lwesu ikuti katuyeeya kuti Jehova tatuyandi. Pele ino ncinzi ncotweelede kucita kuti twatalika kuyeeya munzila iili boobu? Cakufwambaana atukukake kuyeeya kuli boobo! Amumulombe Jehova kuti amugwasye kugusya ‘mizeezo iimulibilisya,’ akumupa ‘luumuno lwa Leza oolo lwiinda maano oonse iluyookwabilila myoyo yanu amizeezo yanu.’ (Int. 139:23; bupanduluzi buyungizyidwe; Flp. 4:6, 7) Alimwi kamuyeeya kuti tamuli nyolikke nomulimvwa boobo. Abalo bakwesu abacizyi basyomeka  bamwi, balapenga akuyeeya kuli boobu. Nobaba babelesi ba Jehova bakaindi bakalwana abuyumuyumu buli boobu. Atulange-lange ncotukonzya kwiiya kucikozyanyo camwaapostolo Paulo.

7. Mapenzi nzi ngaakajana Paulo?

⁷ Sena zimwi ziindi mulimvwa kuti mujisi mikuli minji, alimwi akuti cilamuyumina kapati kucita zyoonse nzyomweelede kucita? Kuti naa mbocibede oobo, nkokuti mulabumvwisya bukkale bwa Paulo. Wakali kulibilika kutali kujatikizya buyo mbungano yomwe, pele “kujatikizya mbungano zyoonse.” (2Kor. 11:23-28) Sena mulaciswa-ciswa calo kanji-kanji icimumanina lukkomano? Paulo wakajisi penzi ilyakamupenzya kapati. Ambweni wakajisi penzi lyakuciswa, mpoonya wakali kuyanda kuti apone. (2Kor. 12:7-10) Sena mulityompedwe akaambo kakutalondoka kwanu? Awalo Paulo mbwaakali kulimvwa oobo zimwi ziindi. Wakalyaamba kuti ‘maawe ndemucaangu’ nkaambo lyoonse wakali kulwana akutalondoka kwakwe.—Rom. 7:21-24.

8. Ncinzi camugwasya Paulo kuliyumya mumapenzi aakwe?

⁸ Nokuba kuti wakajana masunko aayindene-indene alimwi abukkale butyompya, Paulo wakazumanana kubelekela Jehova. Ino ncinzi cakamugwasya kucita boobo? Nokuba kuti wakalikuzyi kabotu-kabotu kutalondoka kwakwe, wakajisi lusyomo luyumu mucinunuzyo. Alimwi wakalicizyi cisyomezyo ca Jesu cakuti ‘muntu uuli woonse uumusyoma Jesu ulakonzya kuba abuumi butamani.’ (Joh. 3:16; Rom. 6:23) Mubwini, Paulo wakalijisi lusyomo mucinunuzyo. Wakalisinizyide kuti Jehova ulilibambilide kubalekelela nobaba baabo ibakacita zibi zipati ikuti naa beempwa.—Int. 86:5.

9. Ncinzi ncotwiiya kumajwi aa Paulo aalembedwe ku Bagalatiya 2:20?

⁹ Kuyungizya waawo, Paulo wakalijisi lusyomo lwakuti Leza ulamuyanda kapati nkaambo wakatuma Jesu kuzoomufwida. (Amubale Bagalatiya 2:20.) Amubone majwi aakulwaizya aali kumamanino aakapango aaka. Wakaamba kuti: “Mwana wa Leza. . .wakandiyanda mebo alimwi akulyaaba akaambo kandime.” Paulo kunyina naakalimvwa kuti wakali mubi kapati cakuti Leza takonzyi kumuyanda. Aboobo wakayeezya bana Roma kuti: “Notwakacili basizibi, Kristo wakatufwida.” (Rom. 5:8) Luyando lwa Leza talukwe munyinza.

10. Ncinzi ncotwiiya kulugwalo lwa Baroma 8:38, 39?

¹⁰ Amubale Baroma 8:38, 39. Paulo wakalizyi mboluli lupati luyando lwa Leza. Wakalemba kuti kunyina cintu cikonzya “kutwaandaanya  kuluyando lwa Leza.” Paulo wakalizyi Jehova mbwaakaceendelezya cakukkazyika moyo cisi ca Israyeli. Alimwi wakalizyi Jehova mbwaakamutondezya luse. Aboobo munzila imwi, Paulo wakali kwaamba kuti, ‘mbwaanga Jehova wakatuma Mwanakwe kuzoofwida ndime, tandeelede kudooneka kuti ulandiyanda.’—Rom. 8:32.

11. Nokuba kuti Paulo wakacita zibi mbuli zeezyo izyaambwa kulugwalo lwa 1 Timoteyo 1:12-15, nkaambo nzi ncaakasinizyide kuti Leza wakali kumuyanda?

¹¹ Amubale 1 Timoteyo 1:12-15. Kweelede kuti Paulo wakali kulimvwa bubi ciindi naakali kuyeeya zintu nzyaakali kucita katanaba Munakristo. Nkakaambo kaako wakalyaamba kuti ngowakali sizibi ‘kwiinda.’ Katanaiya kasimpe, Paulo wakali kupenzya Banakristo mumunzi umwi aumwi, bamwi wakali kubabikka muntolongo akuzuminizya kuti bamwi bajaigwe. (Mil. 26:10, 11) Amweezeezye mbwaakali kunoolimvwa Paulo ikuti naakaswaanganya Munakristo uucili mwana-mwana uuli aabazyali bakajaigwa akaambo kanguwe! Paulo wakali kulimvwa bubi kujatikizya kulubizya kwakwe, pele wakalizyi kuti takonzyi kucinca zintu zyakacitika kale. Wakazumina kuti Kristo wakafwida nguwe, aboobo wakalemba kuti: “Kwiinda muluzyalo lwa Leza ndili boobu mbondibede lino.” (1Kor. 15:3, 10) Ino twiiya nzi? Mweelede kuba alusyomo lwakuti Jesu wakafwida ndinywe alimwi akupa kuti mucikonzye kuba acilongwe a Jehova. (Mil. 3:19) Iciyandika kapati kuli Leza nceeco ncotucita lino alimwi akumbele, ikutali kulubizya notwakacita musyule, tacikwe makani naa aciindi eeco twakali Bakamboni ba Jehova naa pe.—Is. 1:18.

12. Mbuti majwi aali kulugwalo lwa 1 Johane 3:19,20 mbwaakonzya kutugwasya ikuti katulimvwa kubula mpindu naa kutayandwa?

¹² Ciindi nomuyeeya kuti Jesu wakafwida zibi zyanu, mulakonzya kwaamba kuti, ‘Mebo ndilimvwa kuti cipego eeci tacindeeleli pe.’  Nkaambo nzi ncomukonzya kulimvwa boobo? Moyo wesu uutalondokede ulakonzya kutweena, kutupa kulimvwa kubula mpindu naa kutayandwa. (Amubale 1 Johane 3:19, 20.) Ciindi notwatalika kulimvwa boobo, tweelede kuyeeya kuti “Leza mupati kwiinda myoyo yesu.” Nokuba kuti tulimvwa kuti Jehova tatuyandi naa kuti takonzyi kutulekelela, Taateesu wakujulu ulatuyanda alimwi uyootulekelela. Tweelede kwiiya kusyoma kuti Jehova ulatuyanda. Kutegwa tucite oobo, tweelede kubala Jwi lyakwe ciindi aciindi, kupaila cakutaleka alimwi akuyanzana abantu bakwe basyomeka. Nkaambo nzi kucita zintu eezyi ncokuyandika kapati?

13. Mbuti kubala Jwi lya Leza mbokukonzya kutugwasya? (Amubone kabbokesi kakuti “ Mbolibagwasya Jwi lya Leza.”)

¹³ Amubale Jwi lya Leza buzuba abuzuba, mpoonya muyoobumvwisya kapati bube bubotu mbwajisi Jehova. Muyoobona mbwamuyanda kapati. Ciindi nomuzinzibala kuyeeya nzyomubala mu Bbaibbele abuzuba, muyoogwasyigwa kuyeeya kabotu, ‘kululamika zintu’ mumizeezo alimwi amumoyo wanu. (2Tim. 3:16) Mwaalu wazina lya Kevin iwakali kulimvwa kubula mpindu wakaamba kuti: “Kubala akuzinzibala kuyeeya lugwalo lwa Intembauzyo 103, kwakandigwasya kutalika kuyeeya kabotu akumvwisya cini Jehova ncayeeya kujatikizya ndime.” Mucizyi Eva, iwaambwa kale wakaamba kuti: “Kumamanino aabuzuba bumwi abumwi, ndilajana ciindi cakuzinzibala kuyeeya kujatikizya mbwalimvwa Jehova. Kucita boobu, kundipa kukkalwa moyo alimwi akuyumya lusyomo lwangu.”

14. Ino mupailo inga watugwasya buti?

¹⁴ Kamupaila cakutaleka. (1Tes. 5:17) Kuti kamuyanda kupanga cilongwe amuntu uumwi, mweelede kunoobandika anguwe ciindi aciindi akumwaambila mbomulimvwa. Oobo mbocibede akucilongwe cesu a Jehova. Ciindi notwaamba mbotulimvwa, mbotuyeeya alimwi anzyotulibilika mumupailo, tutondezya kuti tulijisi lusyomo mulinguwe alimwi tulizyi kuti ulatuyanda. (Int. 94:17-19; 1Joh. 5:14, 15) Ba Yua, ibaambwa kale bakaamba kuti: “Ciindi nondipaila, tandimwaambili buyo zintu zyandicitikila buzuba oobo. Ndilamwaambila kuzwa ansi aamoyo mbondilimvwa alimwi ambondiyeeya. Mukuya kwaciindi, ndakatalika kubona kuti ngu Taata uubayanda ncobeni bana bakwe, ikutali bboosi akkampani.”—Amubone kabbokesi kakuti “ Sena Mwakalibala?”

15. Mbuti Jehova mbwatondezya kuti ulatuyanda?

¹⁵ Kamuyanzana abalongwe basyomeka; Nzipego kuzwa kuli Leza. (Jak. 1:17) Taateesu wakujulu ulatondezya kuti ulatuyanda kwiinda mukutupa bakwesu abacizyi ibatondezya “luyando ciindi coonse.” (Tus. 17:17) Mulugwalo  ndwaakalembela bana Kolose, Paulo wakabandauka mazina aa Banakristo bamwi ibakamugwasyilizya, akubaamba kuti, “mbambabo ibanduumbulizya kapati.” (Kol. 4:10, 11) Naba Jesu Kristo wakali kuyandika lugwasyo alimwi wakalumba kulugwasyo ndwaakatambula kubalongwe bakwe, nkokuti bangelo alimwi abantu.—Lk. 22:28, 43.

16. Mbuti balongwe basyomeka mbobakonzya kutugwasya kuyumya cilongwe cesu a Jehova?

¹⁶ Sena mulagwasyigwa kuzwa kucipego cabalongwe basyomeka ncaakatupa Jehova? Kwaambila mulongwe uusimide kujatikizya mbotulimvwa tacili citondezyo cakubula lusyomo; ncilikwabilizyo. Ba James ibaambwa kale bakaamba kuti, “Kuba azilongwe zibotu a Banakristo basimide kwandigwasya kapati. Ciindi mizeezo iitali kabotu noindikatazya, balongwe aaba balandiswiilila cakukkazika moyo alimwi akundaambila kuti balandiyanda. Kwiinda mulimbabo, ndilabona kuti Jehova ulandiyanda alimwi akundibikkila maano.” Eelo kaka cilayandika kapati kuba acilongwe ciyumu abakwesu abacizyi!

17-18. Nguni ngotweelede kuswiilila, alimwi nkaambo nzi?

¹⁷ Saatani uyanda kuti tuleke kucita ciluzi. Uyanda kuti tusyome kuti Jehova tatuyandi, akuti tatweeleli kumubelekela. Pele kweelana ambotwabona, aaya taali masimpe pe.

¹⁸ Jehova ulamuyanda. Mulayandika kapati mumeso aakwe. Kuti mwamumvwida, ‘muyoozumanana muluyando lwakwe’ kukabe kutamani, mbubwenya Jesu mbwacita. (Joh. 15:10) Aboobo mutamuswiilili Saatani naa moyo wanu weena. Muciindi caboobo, amuswiilile Jehova uubona bubotu muli umwi aumwi wesu. Amusyome kuti “ulabakkomanina bantu bakwe,” kubikkilizya andinywe!