1. Ino bantu ba Jehova bakali kucita buti zintu mumwaanda wamyaka wakusaanguna?

 CIINDI Jehova napa bantu bakwe mulimo, uyanda kuti kabaucita munzila yeelede. (1Kor. 14:33) Mucikozyanyo, Leza uyanda kuti makani mabotu akambaukwe munyika yoonse. (Mt. 24:14) Jehova wakasala Jesu kusololela mulimo ooyu. Aboobo Jesu ulabikkila maano kubona kuti mulimo ooyu ulacitwa munzila yeelede. Mumwaanda wamyaka wakusaanguna, ciindi mbungano nozyakali kutalisyigwa mumasena ayindene-indene, baalu bakali kusalwa kutegwa kabapa malailile alimwi akusololela. (Mil. 14:23) Mu Jerusalemu kabunga keendelezya, ikakali kubikkilizya baapostolo alimwi abaalu bajisi luzyibo, kakapanga zyakusala izyakeelede kutobelwa ambungano zyoonse. (Mil. 15:2; 16:4) Akaambo kakuti bakaatobela malailile ngobakatambula, bantu “bamumbungano eezyo bakazumanana kuyumizyigwa mulusyomo alimwi bakali kuyaabuvwula.”—Mil. 16:5.

2. Kuzwa mu 1919, mbuti Jehova mbwaali kubasololela bantu bakwe akubapa cakulya cakumuuya?

² Jehova wazumanana kubasololela bantu bakwe naaba mazuba aano. Kuzwa mu 1919, Jesu wali kubelesya kabunga kasyoonto kabaalumi bananike kulanganya mulimo wakukambauka alimwi akupa cakulya cakumuuya kuli basikumutobela. a (Lk. 12:42) Cakutadooneka Jehova waulongezya mulimo ngobali mukucita.—Is. 60:22; 65:​13, 14.

3-4. (a) Amupe cikozyanyo citondezya mbotugwasyigwa akaambo kakukamantana. (b) Ino ncinzi ncotutiilange-lange mucibalo eeci?

 ³ Kuti notwatalikamantene, notwatali kukonzya kuuzuzikizya mulimo Jesu ngwaakatupa. (Mt. 28:​19, 20) Mucikozyanyo, ikuti bakwesu nobatali kubikka bubambe bwakuti tukambauke mumasena oonse aali mucilawo cambungano yesu, muntu uuli woonse naali kukambaukila kubusena buli boonse nkwayanda. Zilawo zimwi ambweni nozyali kubelekwa ziindi zinji, kumane zimwi nozyatali kubelekwa. Sena inga mwayeeya nzila zimbi mbokutugwasya kukamantana?

⁴ Mbubwenya Jesu mbwaakali kubasololela basikumutobela ciindi naakali anyika, wazumanana kucita oobo akubantu ba Leza mazuba aano. Mucibalo eeci, tulalanga-langa cikozyanyo ca Jesu alimwi akubona mbunga yesu mboicitobela. Alimwi tulabandika mbotukonzya kutondezya kuti tulaisyoma mbunga ya Jehova.

MBUNGA YESU ILACITOBELA CIKOZYANYO CA JESU

5. Muunzila nzi imwi mbunga yesu moitobela cikozyanyo ca Jesu? (Johane 8:28)

⁵ Jesu wakaiya kuzwa kuli Bausyi bakujulu kujatikizya ncayelede kucita alimwi akwaamba. Mbunga ya Jehova itobela cikozyanyo ca Jesu kwiinda mukubelesya Jwi lya Leza kutugwasya kuzyiba ciluzi acitaluzi alimwi akutusololela mubuumi. (Amubale Johane 8:28; 2Tim. 3:​16, 17) Ciindi aciindi tulayeezyegwa kubala Jwi lya Leza alimwi akuzibelesya eezyo nzyotubala. Ninzila nzi imwi yakwiiya Bbaibbele, alimwi ino tugwasyigwa buti?

6. Ninzila nzi imwi iiyandika kapati motugwasyigwa akaambo kakwiiya Bbaibbele?

⁶ Tulagwasyigwa kapati ciindi notwiiya Bbaibbele kwiinda mukubelesya mabbuku eesu. Mucikozyanyo, tulakonzya kweezyanisya njiisyo zyamu Bbaibbele amalailile ngotutambula kuzwa kumbunga. Ciindi notubona kuti malailile ngotutambula ayeeme a Magwalo, citupa kwiisyoma cakumaninina mbunga ya Jehova.—Rom. 12:2.

7. Mulumbe nzi Jesu ngwaakali kukambauka alimwi mbuti mbunga ya Jehova mboitobela cikozyanyo cakwe?

⁷ Jesu wakakambauka “makani mabotu aa Bwami bwa Leza.” (Lk. 4:​43, 44) Alimwi Jesu wakalailila basikwiiya bakwe kukambauka kujatikizya Bwami. (Lk. 9:​1, 2; 10:​8, 9) Mazuba aano, boonse aabo bayanzana ambunga ya Jehova balakambauka mulumbe uujatikizya Bwami tacikwe makani ankobakkala naa mukuli ngobajisi.

8. Ino ncoolwe nzi ncotujisi?

⁸ Eelo kaka tucibona kuba coolwe cilibedelede kwaambila bamwi kasimpe kajatikizya Bwami bwa Leza! Tabali boonse bajisi coolwe cili boobu. Mucikozyanyo, ciindi Jesu naakali anyika, tanaakazumizya myuuya mibi kupa bumboni kujatikizya nguwe. (Lk. 4:41) Mazuba aano, muntu katanatalika kukambauka abantu ba Jehova, weelede kuti kapona kweelana azyeelelo zya Jehova. Tulatondezya kuti tulalumba kujatikizya coolwe ncotujisi kwiinda mukupa bumboni kufwumbwa nkotubede alimwi anotwajana coolwe cakucita boobo. Tuyanda kuba mbuli Jesu, aboobo tulasolekesya kusikila mpotugolela kukambaukila bamwi alimwi akubayiisya kasimpe.—Mt. 13:​3, 23; 1Kor. 3:6.

9. Ino mbuti mbunga mboyalizyibya zina lya Leza?

⁹ Jesu wakalizyibya zina lya Leza. Ciindi Jesu naakali kupaila kuli Bausyi wakaamba kuti: “Ndabazyibya zina lyako.” (Joh. 17:26) Imbunga ya Jehova itobela cikozyanyo ca Jesu kwiinda mukucita kufwumbwa ncoikonzya kugwasya bamwi kulizyiba zina lya Leza. Bbaibbele lya Busanduluzi Bwanyika Mpya lyagwasya kapati mumbazu eeyi kwiinda mukupilusya zina lya Leza mumasena molyeelede. Bbaibbele eeli  nkolili lyoonse mbolizulwa naa kalili cibeela buyo mumyaambo yiinda ku 270. Mubupanduluzi buyungizyidwe A4 alimwi a A5 mu Bbaibbele eeli, kuli makani manji aamba kujatikizya kupilusyigwa kwa zina lya Leza mu Bbaibbele. Bupanduluzi buyungizyidwe C, ibujanika mu Study Bible, bulatondezya bumboni bunji bwakuti izina lya Leza lyeelede kujanika ziindi zili 237 mu Magwalo aa Banakristo aa Chigiriki.

10. Ncinzi ncomwaiya kumajwi ngaakaamba mukaintu waku Myanmar?

¹⁰ Mbubwenya mbuli Jesu, tuyanda kugwasya bantu banji kulizyiba zina lya Leza. Ciindi mukaintu umwi uujisi myaka iili 67 ku Myanmar naakazyiba kuti Leza ulijisi zina, wakatalika kulila kumane wakati: “Eeci nciindi cakusaanguna mubuumi bwangu kuzyiba kuti Leza ujisi zina lyakuti Jehova. . . . Mwandiyiisya cintu ciyandika kapati ncondatakali kukonzya kuzyiba.” Kweelana ambotwabona mucakuluula eeci, ciindi bantu nobalizyiba zina lya Leza cipa kuti buumi bwabo bucince.

ATUZUMANANE KWIISYOMA MBUNGA YESU

11. Mbuti baalu mbobakonzya kutondezya kuti balaisyoma mbunga ya Jehova? (Amubone acifwanikiso.)

¹¹ Ninzila nzi iimbi baalu mbobakonzya kutondezya kuti balaisyoma mbunga ya Leza? Ciindi baalu nobatambula malailile kuzwa kumbunga, beelede kwaabala cakubikkila maano alimwi akusolekesya kusikila mpobagolela kwaatobela. Mucikozyanyo, tabatambuli buyo malailile aajatikizya mbobeelede kweendelezya zibeela zyamuswaangano wambungano alimwi akupaila, pele balatambula amalailile aajatikizya mbobeelede kulanganya mbelele zya Kristo. Ciindi baalu nobatobela malailile oonse ngobatambula kuzwa kumbunga, bakwesu abacizyi inga balimvwa kuti Jehova ulabayanda alimwi akubabikkila maano.

12. (a) Nkaambo nzi ncotweelede kutobela malailile ngobatupa aabo basololela? (Bahebrayo 13:​7, 17) (b) Nkaambo nzi ncotweelede kubikkila maano kuzintu zibotu nzyobacita aabo basololela?

¹² Ciindi notutambula busolozi buzwa kubaalu, tweelede kubutobela kakunyina kusinikizyigwa buya. Kuti twacita oobo, tuyoopa kuti cibaubile kubeleka mulimo wabo aabo basololela. Bbaibbele litukulwaizya kumvwida alimwi akulibombya kuli baabo basololela. (Amubale Bahebrayo 13:​7, 17.) Pele zimwi ziindi cilakonzya kutuyumina. Nkaambo nzi? Nkaambo baalumi aaba tabalondokede. Nokuba boobo, kuti twabikkila maano kukulezya kwabo muciindi cakubikkila maano kuzintu zibotu nzyobacita, tunoogwasyilizya basinkondonyina. Munzila nzi? Kayi basinkondoma bayanda kuti tutalike kudooneka kuti Leza ubelesya mbunga kutusololela. Aboobo kuti twatalika kuyeeya zintu zitali kabotu kujatikizya baalu, ambweni ayalo mbunga inga twaleka kwiisyoma. Ino ncinzi ncotweelede kucita kutegwa tubazyibe basinkondoma alimwi akukaka bubeji bwabo?

MUTALEKELI BAMWI KUMUPA KULEKA KWIISYOMA MBUNGA

13. Muunzila nzi basikukazya Leza mobasola kupa kuti mbunga ya Jehova kailibonya kuti taili kabotu?

¹³ Basikukazya Leza basola kupa kuti zintu zibotu nzyoicita mbunga ya Jehova kazilibonya mbuli kuti zibi. Mucikozyanyo, mu Magwalo twakaiya kuti Jehova uyanda kuti bakombi bakwe kabasalala kumubili, mukulilemeka alimwi akumukomba munzila njayanda. Uyanda kuti aabo boonse bateempwi kabagusyigwa mumbungano. (1Kor. 5:​11-13; 6:​9, 10) Tulautobela mulawo ooyu wamu Magwalo. Akaambo kaceeci, basikutukazya baamba kuti tatubayandi bantu, tulababeteka alimwi akuti tatuyanzani abantu bayindene andiswe.

14. Nguni uuli mukuyunga bantu kumwaya makani aakubeja kujatikizya mbunga?

¹⁴ Amumuzyibe ooyo uulwana mbunga. Saatani  Diabolosi nguuli mukuyunga bantu kuti kabaamba zintu zibi kujatikizya mbunga. “Ngousyi wabubeji.” (Joh. 8:44; Matl. 3:​1-5) Aboobo taceelede kutugambya kuti Saatani ubelesya basinkondoma kumwaya makani aakubeja kujatikizya mbunga ya Jehova. Eeci ncecakacitika mumwaanda wamyaka wakusaanguna.

15. Ino basololi bazikombelo bakacita nzi kuli Jesu alimwi akuli basikumutobela?

¹⁵ Nokuba kuti Jesu Mwana wa Leza wakalilondokede alimwi wakacita maleele manji, Saatani wakabelesya bantu kumwaya makani aakubeja kujatikizya nguwe. Mucikozyanyo, basololi bazikombelo bakali kwaambila bantu kuti inguzu nzyaakali kubelesya Jesu kutanda madaimona zyakali kuzwa ‘kumweendelezi wamadaimona.’ (Mk. 3:22) Ciindi Jesu naakali kusunkwa, basololi bazikombelo bakamubejekezya kuti wakali sikusampaula alimwi bakoongelezya makamu aabantu kuti bamujaye. (Mt. 27:20) Kumbele, basikutobela Kristo nobakali kukambauka makani mabotu, basikubakazya “bakanyonganya bantu bamasi akubayunga” kuti bapenzye Banakristo aaba. (Mil. 14:​2, 19) Kujatikizya lugwalo lwa Milimo 14:​2, Ngazi Yamulindizi ya December 1, 1998 yakaamba kuti: “Kabatasalalidwe mukutatobela mulumbe lwabo, iba Juda basikukazya bakabikkila maanu aakutamikizya, kusola kwaambila Bamasi twaambo twakubeja kujatikizya Banakristo.”

16. Ncinzi ncotweelede kuyeeya ciindi notwamvwa makani aakubeja?

¹⁶ Saatani ucizumanana kubeja naaba mazuba aano. Wazumanana ‘kweena nyika yoonse.’ (Ciy. 12:9) Kuti mwamvwa makani aakubeja kujatikizya mbunga naa bakwesu basololela, amuyeeye basikukazya Leza mbobakamweendelezya Jesu alimwi abasikwiiya bakwe bamumwaanda wamyaka wakusaanguna. Jesu wakaamba kuti babelesi ba Jehova  bayookazyigwa alimwi akubejekezyegwa. Alimwi eeci ncencico cilimukucitika mazuba aano. (Mt. 5:​11, 12) Kunyina notuya kwaasyoma makani aakubeja ikuti katumuzyi ooyo waamwaya alimwi akubweza ntaamu yakulikwabilila mpoonya-mpoonya. Ino nintaamu nzi njotweelede kubweza?

17. Mbuti mbotukonzya kukaka kunyongazinizyigwa amakani aakubeja? (2 Timoteyo 1:13) (Amubone akabbokesi kakuti “ Ncotweelede Kucita Ciindi Notwamvwa Makani Aakubeja.”)

¹⁷ Amwaakake makani aakubeja. Mwaapostolo Paulo wakapa malailile aasalede kujatikizya ncotweelede kucita ciindi notwamvwa makani aakubeja. Wakaambila Timoteyo ‘kulailila bamwi kuti baleke. . . kubikkila maano kutwaano twakubeja’ alimwi ‘akukaka twaano twakubeja.’ (1Tim. 1:​3, 4; 4:7) Amuyeeye kujatikizya kaambo aaka: mwana ulakonzya kulya cakulya calokela aansi, pele muntu mupati takonzyi kucita boobo nkaambo ulizyi kuti cilakonzya kupa kuti aciswe. Andiswe tulaakaka makani aakubeja nkaambo tulikubwene nkwaazwida. Muciindi caboobo, tuswiilila buyo “majwi mabotu” aakasimpe.—Amubale 2 Timoteyo 1:13.

18. Mbuti mbotukonzya kutondezya kuti tulaisyoma mbunga ya Jehova?

¹⁸ Twabandika buyo nzila zyotatwe akati kanzila zinji imbunga ya Leza moitobela cikozyanyo ca Jesu. Nomwiiya Bbaibbele amujane nzila zimbi mbunga moitobela cikozyanyo ca Jesu. Amubagwasye bamwi mumbungano yanu kwiisyoma mbunga cakumaninina. Amuzumanane kutondezya kuti mulaisyoma kwiinda mukubelekela Jehova cakusyomeka alimwi akukakatila kumbunga yakwe yalo njabelesya kuzuzikizya makanze aakwe. (Int. 37:28) Atuzumanane kucibikkila maano coolwe eeci ncotujisi cakuba cibeela cabantu ba Jehova ibasyomeka alimwi ibajisi luyando.