MWAAPOSTOLO PAULO kwiinda mukusololelwa amuuya wakalemba kujatikizya bube buli fwuka ibuboola akaambo kakubeleka kwamuuya uusalala. (Gal. 5:22, 23) Wakabupandulula bube oobu ibuyandika kapati kuti bupanga cintu comwe—“mucelo wamuuya.” * Mucelo ooyu ncitondezyo cakuba ‘abuntu bupya.’ (Kol. 3:10) Mbubwenya cisamu mbocikonzya kuzyala micelo akaambo kakulanganizyigwa kabotu, awalo muntu ulakonzya kutondezya mucelo wamuuya ciindi muuya uusalala noubeleka mubuumi bwakwe.—Int. 1:1-3.

Cibeela cakusaanguna camucelo wamuuya ncaakaamba Paulo mbube buyandika kapati bwaluyando. Ino nkaambo nzi bube oobu ncobuyandika kapati? Paulo wakaamba kuti, kakunyina luyando, wakali “wabuyo.” (1Kor. 13:2) Pele ino luyando ninzi, alimwi mbuti mbotukonzya kuba aandulo akulutondezya buzuba abuzuba?

Nokuba kuti majwi taakonzyi kubupandulula bwini ncobwaamba bube oobu bwaluyando, Ibbaibbele lilapandulula luyando mbolutondezyegwa. Mucikozyanyo, tubala kuti luyando “lulakkazika moyo alimwi lulaaluzyalo.” Kuyungizya waawo, “lukkomanina kasimpe” alimwi “lulajatila zintu zyoonse, lulasyoma zintu zyoonse, lulalangila zintu zyoonse, lulaliyumya muzintu zyoonse.” Luyando alimwi lubikkilizya kuyanda bamwi, kubabikkila maano alimwi akumvwana kapati ambabo. Kulubazu lumbi, ikubula luyando kulalibonya kwiinda mukuba amunyono, kulisumpula, kutalilemeka, kuliyanda alimwi akuba amuuya wakubikkilila alimwi akutalekelela. Mukwiimpana abube bubi buli boobu, luyando ndotuyanda kuba andulo “talubikkili buyo maano kuzintu nzyoluyanda.”—1Kor. 13:4-8.

“Leza nduyando.” Inzya, luyando luzwa kuli Jehova. (1Joh. 4:8) Milimo yakwe yoonse alimwi azintu nzyacita zilapa bumboni kuluyando lwakwe. Nzila mpati mbwaakatondezya luyando kubantu ndileelyo naakatuma Jesu kuzootufwida. Mwaapostolo Johane wakaamba kuti: “Lino oobu mbolwakayubununwa luyando lwa Leza kulindiswe, Leza wakatuma Mwanaakwe simuzyalwaalikke munyika ikutegwa tukonzye kuba abuumi kwiinda mulinguwe. Iluyando lwaambwa waawa taluli akaambo kakuti swebo twali kumuyanda Leza pe, pele walo nguwakatuyanda akutuma Mwanaakwe kuti abe cipaizyo cakumanya zibi zyesu akutuyanzanya a Leza.” (1Joh. 4:9, 10) Akaambo kaluyando lwa Leza, tulakonzya kulekelelwa, kuba abulangizi alimwi abuumi kumbele.

Jesu wakatondezya luyando kubantu kwiinda mukulisungula kucita kuyanda kwa Leza. Paulo wakalemba kuti: “[Jesu] waamba kuti: ‘Bona! Ndaboola kuti ndicite kuyanda kwako.’ . . . Kwiinda mu ‘kuyanda’ ooko, twakasalazyigwa kwiinda mucituuzyo camubili wa Jesu Kristo ciindi comwe buyo kukabe kutamani.” (Heb. 10:9, 10) Taakwe muntu uukonzya kutondezya luyando luli boobu. Jesu wakaamba kuti: “Kunyina uujisi luyando lwiinda loolu, lwakuti muntu umwi atuulile beenzinyina buumi bwakwe.” (Joh. 15:13) Sena swebo tobantu ibatalondokede inga twalwiiya luyando  ndotwakatondezyegwa a Jehova alimwi a Jesu? Inzya! Atubone mbotukonzya kucita oobo.

Paulo utukulwaizya kuti: “Amwiiye Leza, mbomuli bana bayandwa, alimwi amuzumanane kweenda muluyando, mbubonya awalo Kristo mbwaakatuyanda akulyaaba akaambo kandiswe.” (Ef. 5:1, 2) ‘Tulazumanana kweenda muluyando’ ciindi notutondezya bube oobu mumbazu zyoonse zyabuumi bwesu. Tulatondezya luyando luli boobu kwiinda mumilimo yesu kutali kwiinda mumajwi alikke. Johane wakalemba kuti: “Nobana bangu bayandwa, luyando lwesu lutabi lwamajwi buyo naa lwaamulomo pe, pele alube lwamumilimo amukasimpe.” (1Joh. 3:18) Mucikozyanyo, ikuti katweenda muluyando a Leza alimwi abasimukoboma, eeci ciyootupa kubakambaukila “makani mabotu aa Bwami” bantu. (Mt. 24:14; Lk. 10:27) Alimwi tuleenda muluyando ciindi notukkazika moyo, notutondezya lubomba alimwi anotulekelela bamwi. Aboobo Ibbaibbele litwaambila kuti: “Mbubonya Jehova mbwaakamulekelela camoyo woonse, andinywe mweelede kucita mbubonya oobo.”—Kol. 3:13.

Nokuba boobo, luyando lwini-lwini luli boobo, luliindene akulendekezya. Mucikozyanyo, kutegwa awumbulizye mwana uulila, muzyali ulakonzya kumulendekezya mwanaakwe kwiinda mukumupa kufwumbwa ncayanda. Pele imuzyali uumuyanda ncobeni mwanaakwe takonzyi kwiile kumupa kufwumbwa ncaalilila mwanaakwe. Ncimwi buyo, Leza nduyando, pele “aabo mbayanda Jehova ulabalaya.” (Heb. 12:6) Ikuti tweenda muluyando, tuyoopa lulayo lweelede ikuti kwayandika kucita oobo. (Tus. 3:11, 12) Inzya, notucita oobo tweelede kuyeeya kuti andiswe tulalubizya alimwi tulakonzya kucita zintu zibyaabi. Aboobo, toonse tulijisi mbazu motweelede kubambulula mukutondezya luyando. Ino mbuti mbotukonzya kucita oobo? Atulange-lange nzila zyotatwe.

Cakusaanguna, amulombe muuya uusalala kuli Leza, walo uupa kuti tube aluyando. Jesu wakaamba kuti Jehova ulabapa “muuya uusalala aabo ibamulomba.” (Lk. 11:13) Ikuti twapaila kulomba muuya uusalala alimwi akusolekesya “kweenda amuuya,” zintu nzyotucita ziyoolibonya antangalala kuti nzyaluyando. (Gal. 5:16) Mucikozyanyo, ikuti kamuli mwaalu mumbungano ya Bunakristo, mulakonzya kulomba muuya uusalala kutegwa umugwasye kupa bamwi lulayo lwamu Magwalo munzila yaluyando. Ikuti kamuli bazyali, inga mwalomba kuti muuya wa Leza umugwasye kulaya bana banu caluyando ikutali calunya.

Cabili, amuyeeye kujatikizya Jesu mbwaakatondezya luyando noliba leelyo naatakali kweendelezyegwa kabotu. (1Pet. 2:21, 23) Kuyeeya cikozyanyo ca Kristo inga kwayandika kapati kwaambisya ciindi notwanyemezyegwa naa kucitilwa cakutalulama. Muziindi zili boobu inga cabota kulibuzya kuti, ‘Ino Jesu naacita buti?’ Mucizyi wazina lya Leigh wakajana kuti ikulibuzya mubuzyo uuli boobu kwakamugwasya kusaanguna kuyeeya katanacita cili coonse. Mucizyi ooyu wakati: “Cimwi ciindi, mubelesima umwi wakatuma kagwalo kubabelesima bambi ikakajisi makani mabi kujatikizya ndime alimwi amulimo ngondakali kubeleka. Eeci cakandicisa kapati. Pele ndakalibuzya kuti, ‘Ino inga ndamwiiya buti Jesu ciindi nondibamba twaambo amuntu ooyu?’ Nondakazinzibala kuyeeya Jesu ncaakali kukonzya kucita mubukkale oobu, ndakayeeya kuti makani aaya ndaawumune buyo. Mukuya kwaciindi, ndakazoozyiba kuti mubelesima ooyu wakali kuciswa bulwazi bumwi bupati cakuti wakalityompedwe kapati. Ndakayeeya buyo kuti andiza tanaakasinizyide ncaakalemba mukagwalo aakaya. Kuyeeya cikozyanyo ca Jesu cakutondezya luyando noliba leelyo bamwi nobatunyemya kwakandigwasya kutondezya luyando luli boobu kumubelesima.” Masimpe, ikuti twamwiiya Jesu, lyoonse tunoocita zintu munzila yaluyando.

Catatu, amutondezye luyando lwakulyaaba, lwalo iluzyibya Banakristo bakasimpe. (Joh 13:34, 35) Mumakani aaya, Magwalo atukulwaizya kuba “amuzeezo” ngoonya ngwaakajisi Jesu. Kwiinda mukuboola kuzwa kujulu, “wakasiya zintu zyoonse nzyaakajisi” akaambo kandiswe, mane buya “kusikila kulufwu.” (Flp. 2:5-8) Ciindi notwiiya luyando lwakwe lwakulyaaba, mizeezo yesu iyookozyanya  aya Kristo alimwi tuyookulwaizyigwa kuzibikkila maano nzyobayandika bamwi. Ino mbubotu nzi abumwi ibuboola akaambo kakutondezya luyando?

Ciindi notutondezya luyando, tulajana mpindu zitalivwulili. Atulange-lange zikozyanyo zyobilo buyo:

• BUNYINA BWANYIKA YOONSE: Akaambo kakuti tulijisi luyando akati kesu, tulizyi kuti kufwumbwa mbungano njotukonzya kuswaya nyika yoonse mbwiizulwa, bakwesu abacizyi bayootutambula camaanza obilo. Eelo kaka ncoolwe kutondezyegwa luyando ‘aciinga coonse cabakwesu munyika’! (1Pet. 5:9) Ino nkuukuli kumbi kunze lyabantu ba Leza luyando luli boobu nkolukonzya kujanwa?

• LUUMUNO: “Kweengelelana caluyando” kutupa kuba “alukamantano lwamuuya mucaanzyo caluumuno.” (Ef. 4:2, 3) Tulalubona luumuno luli boobu kumiswaangano yambungano, yabbazu alimwi ayacooko. Sena tamuzumini kuti luumuno luli boobu lulilibedelede ncobeni munyika eeyi iitakamantene? (Int. 119:165; Is. 54:13) Kwiinda mukukkala muluumuno abantu bamwi, tutondezya bwini mbotubayanda, calo icimukkomanisya Taateesu wakujulu.—Int. 133:1-3; Mt. 5:9.

Paulo wakalemba kuti: “Luyando lulayaka.” (1Kor. 8:1) Ino luyando luyaka buti? Caandaano 13 calugwalo lwakusaanguna Paulo ndwaakalembela bana Korinto lwalo ilwaambwa kuti “Lwiimbo lwa Luyando,” mwaapostolo wakapandulula luyando mboluyaka. Cakusaanguna, lubikkila buyo maano kuzintu nzyobayanda bamwi. (1Kor. 10:24; 13:5) Kuyungizya waawo, akaambo kakuti luyando lulabikkila maano kuzintu nzyobayandika bamwi, lulakkazika moyo alimwi lulaaluzyalo, lupa kuti kakuli kumvwana kapati akati kamikwasyi alimwi ambungano.—Kol. 3:14.

Luyando toonse ndotujisi kuli Leza ndoluyando lwiinda kubota alimwi lulayaka. Luyando luli boobu lulabakamantanya bantu ibazwa mubukkale busiyene-siyene, baindene mubala alimwi ibaindene myaambo kutegwa antoomwe calukkomano babelekele Jehova “calukamantano.” (Zef. 3:9) Atube amakanze aakutondezya cibeela eeci ciyandika kapati camucelo wamuuya uusalala wa Leza buzuba abuzuba.