1. Kweelana a 1 Batesalonika 5:11, mulimo nzi toonse motutola lubazu?

 SENA mbungano yanu kuli noyakaba acoolwe cakuyaka naa kubambulula Ŋanda ya Bwami? Kuti kacili boobo, tacidoonekwi buya kuti mulaciyeeya ciindi cakusaanguna nomwakaswaangana mu Ŋanda ya Bwami mpya. Mwakamulumba kapati Jehova. Alimwi buya, mwakakkomana kapati cakuti mwakali kuyanda kulila akwaalilwa kwiimba lwiimbo lwakujalula. Maanda eesu aa Bwami aayakidwe kabotu alamutembaula Jehova. Pele tulamutembaula kapati ciindi notutola lubazu mumulimo uumbi wakuyaka. Mulimo ooyu ubikkilizya cintu cimwi ciyandika kapati kwiinda kuyaka kwini. Ubikkilizya kuyaka bantu ibaboola mumasena aakukombela aayo. Kweelede kuti mwaapostolo Paulo wakali kuyeeya mulimo ooyu wakuyaka ciindi naakalemba majwi aali ku 1 Batesalonika 5:11, ilugwalo aayeeme cibalo cesu.—Amubale.

2. Ino ncinzi ncotutiilange-lange mucibalo eeci?

² Mwaapostolo Paulo ncikozyanyo cibotu kapati camuntu iwakazyi kuyaka basyominyina. Wakali kubeetelela. Mucibalo eeci, tulalanga-langa Paulo mbwaakagwasya bakwesu abacizyi (1) kuliyumya mumasunko, (2) kubamba luumuno, alimwi (3) akuyumya lusyomo lwabo muli Jehova. Atulange-lange mbotukonzya kumwiiya alimwi akubona mbotukonzya kuyaka bakwesu abacizyi mazuba aano.—1Kor. 11:1.

3. Mbuti Paulo mbwaakali kuzilanga munzila iili kabotu zintu?

³ Paulo wakali kubayanda kapati bakwesu abacizyi nokuba kuti awalo wakalijisi buyumuyumu. Wakali kubafwida luzyalo  basyominyina ciindi nobakali kusunkwa. Aciindi cimwi, Paulo wakabula mali alimwi wakeelede kujana mulimo wakuti kaligwasyilizya walo abeenzinyina. (Mil. 20:34) Mulimo wakwe wakali wakupanga matente. Ciindi naakasika ku Korinto, cakusaanguna wakabeleka abasikupanga matentenyina ba Akula a Purisila. Pele “sabata imwi aimwi” wakali kukambaukila ba Juda aba Giriki. Ciindi Sila a Timoteyo nibakasika, “Paulo wakatalika kubelesya ciindi cakwe coonse kukukambauka jwi lya Leza.” (Mil. 18:2-5) Paulo kunyina naakaluba cintu ciyandika kapati mubuumi ikubelekela Jehova. Akaambo kakubeleka canguzu Paulo wakali kweelela kukulwaizya bakwesu abacizyi. Wakabayeezya kuti tiibakeelede kulekela makatazyo aamubuumi naa zintu ziyandika zyamukwasyi kupa kuti baleke kubikkila maano “zintu ziyandika kapati”—nkokuti milimo yoonse iijatikizya kukomba Jehova.—Flp. 1:10.

4. Mbuti Paulo a Timoteyo mbobakagwasya basyominyina kuliyumya?

⁴ Nokwakainda ciindi cisyoonto buyo kuzwa ciindi mbungano yaku Tesalonika noyakapangwa, basyomi bapya bakakazyigwa citaambiki. Ciindi nkamu yabasikukazya noyakajana kuti Paulo a Sila tabako, nkamu eeyo ‘yakakwelaanya bakwesu bamwi kubatola kubeendelezi bamumunzi, kaboompolola kuti: “Bantu aaba boonse tabaitobeli milawo ya Kaisara.”’ (Mil. 17:6, 7) Amweezyeezye buyo mbobakayoowa Banakristo aabo bapya ciindi nobakabona kuti bantu bamumunzi bababukila! Akaambo kaceeci, bakali kukonzya kuyaansi mukubelekela Jehova, pele Paulo tanaakali kuyanda kuti eeco cicitike. Nokuba kuti walo a Sila bakalizwide kale mumunzi ooyo, bakabona masimpe kuti mbungano mpya yalanganizyigwa kabotu. Paulo wakayeezya bana Tesalonika kuti: ‘Twakatuma Timoteyo, imukwesu kutegwa amuyumye akumuumbulizya mulusyomo lwanu, kutegwa kutabi muntu naba omwe uuzungaanizyigwa amapenzi aaya.’ (1Tes. 3:2, 3) Kweelede kuti Timoteyo wakapenzyegwa kapati mumunzi ookwabo wa Lustro. Wakabona Paulo mbwaakabayumyayumya bakwesu okuya. Naakabona mbwaakabagwasya Jehova, Timoteyo wakabakulwaizya bakwesu abacizyi bapya kuti abalo zintu zyoonse zilabeendela buyo kabotu.—Mil. 14:8, 19-22; Heb. 12:2.

5. Mbuti mukwesu Bryant mbwaakagwasyigwa amwaalu?

⁵ Muunzila nzi aimwi Paulo mwaakayumya basyominyina? Nobakapiluka ku Lustro, Ikoniyo, alimwi a Antiokeya, Paulo a Barnaba “bakabasalila baalu mumbungano imwi aimwi.” (Mil. 14:21-23) Tacidoonekwi buya kuti aabo baalu ibakasalwa bakali kupa luumbulizyo kumbungano mbubwenya mbobacita baalu mumbungano mazuba aano. Amumvwe ncaakaamba mukwesu Bryant, wakaamba kuti: “Nondakali amyaka iili 15, bataata bakazwa aŋanda, mpoonya baama bakagwusyigwa mumbungano. Ndakatyompwa akulimvwa kulekelezyegwa.” Ino ncinzi cakapa mukwesu Bryant kuliyumya? Wakaamba kuti: “Ba Tony, imwaalu, bakali kubandika andime kumiswaangano alimwi aaziindi buyo zimwi. Bakali kundaambila kujatikzya baabo ibakajana masunko, pele bakalikkomene. Bakanditondezya Intembauzyo 27:10 alimwi kanji-kanji bakali kundaambila zya Hezekiya, walo iwakazumanana kusyomeka nokuba kuti bausyi tiibakali cikozyanyo cibotu.” Ino eeci cakamugwasya buti mukwesu Bryant? Wakaamba kuti “Kwiinda mukukulwaizyigwa aba Tony, mukuya kwaciindi, ndakatalika mulimo waciindi coonse.” Nobaalu, amubabikkile maano aabo mbubwenya mbuli mukwesu Bryant, ibayandika “jwi libotu” lyakubakulwaizya.—Tus. 12:25.

6. Mbuti Paulo mbwaakabelesya zyakuluula kukulwaizya bakwesu abacizyi?

 ⁶ Paulo wakabayeezya bakombinyina kuti kwiinda mukugwasyigwa a Jehova, ‘nkamu mpati yabakamboni’ yakaliyumya kubuyumuyumu. (Heb. 12:1) Paulo wakabona kuti zyakuluula zyabaabo ibakazwidilila kukuliyumya kubuyumuyumu bwiindene-indene zyakali kukonzya kubakulwaizya bakwesu abacizyi kuba abusicamba alimwi akubikkila maano ‘kumunzi wa Leza uupona.’ (Heb. 12:22) Oobu mbocibede amazuba aano. Toonse tulayumizyigwa ciindi notubala kujatikizya Jehova mbwaakagwasya Gideoni, Baraki, Davida, Samuele, alimwi abamwi banji? (Heb. 11:32-35) Mbuti kujatikizya zikozyanyo zyalusyomo zyamazuba aano? Okuno kumaofesi mapati kanji-kanji tulatambula magwalo aatondezya bakwesu abacizyi mbobakayumizyigwa nobakamana kubala cakuluula camubelesi wa Jehova umwi wamazuba aano.

7. Ncinzi ncomwaiya kululayo lwa Paulo luli ku Baroma 14:19-21?

⁷ Tulabakulwaizya bakwesu abacizyi kwiinda mukwaamba akucita zintu zikulwaizya luumuno mumbungano. Kwiindana mbotuzibona zintu takweelede kutwaandaanya. Tatubasinikizyi bamwi kutobela mizeezo yesu kuti kakunyina njiisyo yamu Magwalo yatyolwa. Amubone cikozyanyo eeci. Mbungano yaku Roma yakapangidwe a Banakristo ba Juda alimwi a Bamasi. Ciindi mulawo wa Musa nowakaleka kubeleka, bakombi ba Jehova tiibakeelede kuzumanana kutobela mulawo uujatikizya zyakulya zimwi. (Mk. 7:19) Kuzwa ciindi eeco, Banakristo ba Juda bamwi bakalaangulukide kulya musyobo uuli woonse wazyakulya. Pele Banakristo ba Juda bamwi, tiibakaangulukide kucita boobo. Makani aaya akapa kuti mbungano yaandaane. Paulo wakakulwaizya mbociyandika kubamba luumuno ciindi naakaamba kuti: “Cilainda kubota kutalya nyama, naa kutanywa waini nokuba kutacita cintu cili coonse icilebya munyoko.” (Amubale Baroma 14:19-21.) Kwiinda mukucita boobu, Paulo wakagwasya basyominyina kubona kuti kukazyanya kuli boobu kwakali kukonzya kuleta lwaandaano akati kabo alimwi amumbungano yoonse. Alimwi awalo wakalilibambilide kucinca kutegwa atalebyi bamwi. (1Kor. 9:19-22) Mbubwenya buyo andiswe tulakonzya kubayumya bamwi alimwi akubamba luumuno kuti katutakazyanyi mumakani aumwi ngayelede kulisalila.

8. Ncinzi Paulo ncaakacita ciindi makani mapati naakali kuyanda kunyonganya mbungano?

⁸ Paulo wakapa cikozyanyo cibotu cakubamba luumuno abaabo ibakali kukazya mumakani aayandika kapati. Mucikozyanyo, bamwi mumbungano yamumwaanda wamyaka wakusaanguna bakali kwaamba kuti Bamasi ibakaba Banakristo bakeelede kupalulwa, kutegwa ba Juda kabatabafwubaazyi. (Gal. 6:12) Paulo wakaukaka muzeezo ooyo, pele muciindi cakuzumanana kuti bamwi batobele muzeezo wakwe, cakulicesya wakatola makani aaya kubaapostolo ku Jerusalemu. (Mil. 15:1, 2) Akaambo kakucita boobo, wakagwasya Banakristo aabo kuba alukkomano aluumuno mumbungano.—Mil. 15:30, 31.

9. Mbuti mbotukonzya kutobela cikozyanyo camwaapostolo Paulo?

⁹ Ikuti kwaba mazwanga, tulakonzya kukulwaizya luumuno kwiinda mukutobela busolozi ibuzwa kuli baabo Jehova mbasalide kulanganya mbungano. Kanji-kanji, busolozi bwamu Bbaibbele bulajanika mumabbuku naa mumalailile aapegwa ambunga. Kuti twabikkila maano kutobela malailile aayo muciindi cakusumpula  mizeezo yesu, tuyoobamba luumuno mumbungano.

10. Ncinzi cimbi Paulo ncaakacita kutegwa akulwaizye luumuno mumbungano?

¹⁰ Paulo wakakulwaizya luumuno kwiinda mukubikkila maano kubube bubotu bwabakwesu abacizyi, ikutali kukulezya kwabo. Mucikozyanyo, kumamanino aalugwalo ndwaakalembela bana Roma, Paulo wakabandauka bantu banji alimwi ziindi zinji wakali kubikkilizya amajwi aakulwaizya naa kaambo kamwi ikajatikizya mbabo. Tulakonzya kumwiiya Paulo kwiinda mukuba acilengwa cakwaamba bube bubotu bwabakwesu abacizyi. Ciindi notucita boobo, tukulwaizya cilongwe akati kabakwesu abacizyi calo iciyaka mbungano muluyando.

11. Mbuti mbotukonzya kubamba luumuno ciindi nokwaba kutamvwana?

¹¹ Zimwi ziindi, nobaba Banakristo basimide balakonzya kuzwangana. Eeci cakacitika kuli Paulo amulongwe wakwe Barnaba. Baalumi aaba tiibakazuminana kuti naa bakeelede kuunka a Marko mulweendo lwabo lwabumisyinali ilwakali kutobela. Kwakaba ‘kuzwangana kapati’ akati kabo, mpoonya bakaandaana. (Mil. 15:37-39) Pele Paulo, Barnaba alimwi a Marko bakabamba luumuno, ikutondezya kuti bakabikkilide maano kuluumuno alimwi alukamantano lwambungano. Kumbele Paulo wakaamba zintu zibotu kujatikizya Barnaba a Marko. (1Kor. 9:6; Kol. 4:10) Andiswe tulakonzya kubamba luumuno abamwi mumbungano akuzumanana kubikkila maano kubube bubotu mbobajisi. Munzila eeyo, tuyookulwaizya luumuno alukamantano.—Ef. 4:3.

12. Mbuyumuyumu nzi bumwi mbobajana bakwesu abacizyi?

¹² Tulabayaka bakwesu abacizyi ciindi notuyumya lusyomo lwabo muli Jehova. Bamwi balafwubaazyigwa abanamukwasyi ibatali Bakamboni, babelesinyina naa basicikolonyina. Bamwi balaciswa kapati naa kucisigwa moyo akaambo kakuti bamwi bakabanyemya. Mpoonya bamwi bakaba Banakristo kaindi alimwi balikulindila kwaciindi cilamfwu kuti bweende bwazintu oobu bumane. Bukkale buli boobu bulakonzya kusunka lusyomo lwa Banakristo mazuba aano. Basimbungano bamumwaanda wamyaka wakusaanguna bakajana buyumuyumu bukozyenye aboobu. Pele ino Paulo wakacita nzi kutegwa ayumye bakwesu abacizyi?

13. Mbuti Paulo mbwaakabagwasya aabo ibakali kufwubaazyigwa akaambo kazintu nzyobakali kusyoma?

¹³ Paulo wakabelesya Magwalo kuyaka lusyomo lwabakwesu abacizyi. Mucikozyanyo, Banakristo ba Juda ambweni bakali kwaalilwa kubaingula banamukwasyi ibatali basyomi ibakali kwaamba kuti bukombi bwaci Juda bwakali bubotu kwiinda bwa Bunakristo. Tacidoonekwi buya kuti lugwalo lwa Paulo kubana Hebrayo lwakabayumya Banakristo aabo. (Heb. 1:5, 6; 2:2, 3; 9:24, 25) Bakali kukonzya kubelesya majwi aa Paulo ikwiingula basikubakazya. Mazuba aano, tulakonzya kubagwasya basyomima ibafwubaazyigwa ikuti kababelesya mabbuku aamba zyamu Bbaibbele ikupandulula zintu nzyobasyoma. Ikuti bakubusi kabafwubaazyigwa akaambo kakusyoma kuti zintu zyakalengwa buya, tulakonzya kubagwasya ikujana makani mubroshuwa yakuti Was Life Created? alimwi ayakuti The Origin of Life—Five Questions Worth Asking kutegwa batondezye icibapa kusyoma kuti buumi bwakalengwa buya.

14. Nokuba kuti Paulo wakajisi bubi kukambauka akuyiisya, ncinzi ncaakali kucita?

¹⁴ Paulo wakakulwaizya bakwesu alimwi abacizyi ikutondezya luyando kwiinda ‘mumilimo  mibotu.’ (Heb. 10:24) Wakali kubagwasya bakwesu abacizyi ikutali buyo kwiinda muzintu nzyaakali kwaamba, pele amuzintu nzyaakali kucita. Mucikozyanyo, iciindi basyominyina bamu Judaya nobakali anzala, Paulo wakabagwasya kwiinda mukubatumina nzyobakali kuyandika. (Mil. 11:27-30) Mubwini, nokuba kuti Paulo wakajisi bubi kukambauka akuyiisya, lyoonse wakali kujana nzila zyakubagwasya aabo ibakali kuyandika lugwasyo lwakumubili. (Gal. 2:10) Kwiinda mukucita boobo, wakagwasya basyominyina kuti kabasyoma kuti Jehova wakali kubalanganya. Mazuba aano, notulyaaba kubelesya ciindi cesu, nguzu alimwi aluzyibo kugwasyilizya ciindi nokwacita ntenda, andiswe tulaluyaka lusyomo lwabakwesu abacizyi. Munzila eezyi tulakonzya kucita oobo iciindi notusanga lyoonse kumulimo wanyika yoonse. Munzila eezyi azimwi buyo, tulabagwasya bakwesu abacizyi ikusyoma kuti Jehova takabalekelezyi pe.

15-16. Ino tweelede kubeendelezya buti aabo ibali alusyomo luyaabuceya?

¹⁵ Paulo wakazumanana kubakulwaizya aabo bakali aalusyomo ilwakali kuyaabuceya. Wakatondezya lweetelelo kulimbabo alimwi akwaambaula munzila iikulwaizya. (Heb. 6:9; 10:39) Mucikozyanyo, mulugwalo lwakwe ndwaakalembela bana Hebrayo, kanji-kanji wakali kubelesya bbala lyakuti “swebo,” kutondezya kuti awalo wakali kulubelesya lulayo ndwaakabapa. (Heb. 2:1, 3) Mbubwenya mbuli Paulo, tatubalekelezyi aabo ibali alusyomo luyaabuceya. Muciindi caboobo, tulabayaka kwiinda mukutondezya kuti tulababikkila maano. Munzila eeyo, tutondezya luyando ndotujisi kulimbabo. Mbotwaambaula kulakonzya kubakulwaizya.

¹⁶ Paulo wakabaambila bakwesu abacizyi kuti Jehova wakaliizyi milimo yabo mibotu. (Heb. 10:32-34) Tulakonzya kucita mbubwenya  ciindi notugwasyilizya musyomima uulaalusyomo luyaabuceya. Tulakonzya kumulomba kutwaambila mbwaakaiya kasimpe naa kumukulwaizya kuyeeya ciindi naakali kulimvwa kuti Jehova ulamugwasya. Mpoonya tulakonzya kubelesya coolwe eeci kumusyomezya kuti Jehova tailubide milimo yakwe yaluyando yakaindi alimwi akuti kunyina nayakumulekelezya. (Heb. 6:10; 13:5, 6) Mibandi iili boobu ilakonzya kubagwasya bakwesu abacizyi ibali mubukkale oobu kuzumanana kubelekela Jehova.

17. Ncinzi ncotweelede kuzumanana kucita?

¹⁷ Mbubwenya mbuli muyaki mbwayungizya luzyibo lwakwe mukuya kwaciindi, andiswe tulakonzya kuyaambele mukuyakana umwi amweenzinyina. Tulakonzya kubagwasya bamwi ikuba anguzu zyakuliyumya mumasunko kwiinda mukubaambila zikozyanyo zyabaabo ibakaliyumya kaindi. Tulakonzya kukulwaizya luumuno kwiinda mukwaamba bube bubotu mbotubona muli bamwi, ikubamba luumuno ciindi nokwaba zintu zikonzya kulunyonganya, naa nokwaba mazwanga akati kesu. Alimwi tulakonzya kuzumanana ikuyaka lusyomo lwabakwesu abacizyi, kwiinda mukubaambila kasimpe kamu Bbaibbele ikayandika kapati, ikubagwasya munzila zyacigaminina alimwi akwiinda mukugwasyilizya baabo ibali alusyomo luyaabuceya.

18. Ino tukanzide kucita nzi?

¹⁸ Aabo babeleka mumulimo wamayake aabelesyegwa mubukombi, balikkomene akukkutila. Andiswe tulakonzya kuba alukkomano akukkutila ciindi notuyaka lusyomo lwabakwesu abacizyi mumbungano. Mukwiimpana amayake eeni-eni alo aakonzya kunyonyooka mukuya kwaciindi, bubotu bwamulimo wesu wakuyaka bamwi bulazumanana mane kukabe kutamani! Aboobo atube amakanze ‘aakuzumanana kukulwaizyanya umwi amweenzinyina.’—1Tes. 5:11.