1. Mbuti mbotugwasyigwa kwiinda mukubandika mbotwakaiya “kasimpe”?

 “INO mwakakaiya buti kasimpe?” Cakutadooneka mwakawiingula kale mubuzyo ooyu ziindi zinji. Ooyu ngumwi wamibuzyo yakusaanguna musyomima ngwakonzya kutubuzya ciindi notuyanda kupanga cilongwe. Tulakkomana kumvwa bakwesu abacizyi mbobakamuzyiba Jehova alimwi akumuyanda, andiswe cilatukkomanisya kubaambila mbotwakakaiya kasimpe. (Rom. 1:11) Aboobo kwiinda mumibandi iili boobu, tulayeezyegwa mbokayandika kapati kasimpe. Alimwi tulaba amakanze ‘aakuzumanana kweenda mukasimpe,’ nkokuti kupona munzila iitupa kulongezyegwa alimwi akukkomaninwa a Jehova.—3Joh. 4.

2. Ncinzi ncotutiilange-lange mucibalo eeci?

² Mucibalo eeci, tulalanga-langa twaambo tumwi tutupa kukayanda kasimpe. Mpoonya tulabona mbotukonzya kuzumanana kutondezya kuti tulaciyanda kapati cipego eeci ciyandika kapati. Cakutadooneka kucita boobo kulatupa kumuyanda kapati Jehova akaambo kakutukwelela kukasimpe. (Joh. 6:44) Kuyungizya waawo, cilayumya makanze eesu aakwaambila bamwi kasimpe.

3. Nkaambo nzi kapati katupa kukayanda kasimpe?

³ Kuli twaambo tunji itutupa kukayanda kasimpe. Kaambo kapati, tulamuyanda Jehova Leza, Ikasensa kakasimpe. Kwiinda mu Jwi lyakwe Bbaibbele, twakazyiba kuti tali buyo Mulengi wajulu anyika singuzu, pele alimwi ngu Taateesu wakujulu siluyando, ooyo uutubikkila maano. (1Pet. 5:7) Tulizyi kuti Leza wesu ngu “Leza siluse alimwi silweetelelo, uutafwambaani kukalala alimwi uuzwide luyando lutamani akasimpe.” (Kul.  34:6) Jehova ulabuyandisya bululami. (Is. 61:8) Cilamucisa kapati kubona mbotupenga, aboobo ulilibambilide alimwi ulayandisisya kuyakwaamana mapenzi woonse aciindi ceelede. (Jer. 29:11) Eelo kaka aaya makani mabotu! Nkakaambo kaako tulamuyanda kapati Jehova!

4-5. Nkaambo nzi mwaapostolo Paulo ncaakakozyanisya bulangizi bwesu kungobyo?

⁴ Nkaambo nzi akambi katupa kukayanda kasimpe? Kasimpe kalayandika kapati kulindiswe. Atulange-lange cikozyanyo. Kasimpe kamu Bbaibbele kabikkilizya bulangizi bwesu bwakumbele. Kutondezya mbobuyandika bulangizi bwesu, mwaapostolo Paulo wakalemba kuti: “Oobu bulangizi tulibujisi mbuli ngobyo yiimika bwato yabuumi bwesu, ibusinizyide alimwi ibuyumu nta.” (Heb. 6:19) Mbubwenya mbuli ngobyo mboyiimika bwato, bulangizi bwesu ibuyeeme a Bbaibbele bulakonzya kutupa kukkalwa moyo ciindi notuli mumapenzi.

⁵ Mukapango aaka, Paulo wakali kubandika bulangizi bwakujulu mbobajisi Banakristo bananike. Pele majwi aaya alakonzya kubeleka aku Banakristo ibalangila kuyoopona kukabe kutamani muparadaiso anyika. (Joh. 3:16) Masimpe, kwiiya kujatikizya bulangizi bwabuumi butamani kwakatupa kuba abuumi bulaampindu.

6-7. Mbuti mucizyi Yvonne mbwaagwasyigwa kwiinda mukwiiya kasimpe kajatikizya bulangizi bwakumbele?

⁶ Amulange-lange cakuluula camucizyi Yvonne. Tanaakakomenena mukasimpe, aboobo naakacili mwana wakali kuluyoowa lufwu. Ulayeeya ciindi naakabala majwi amwi ngatakalubi aakuti: “Bumwi buzuba buumi buyoogola.” Wakayungizya kuti: “Majwi aayo akali kundipa kuba acilabila masiku kuyeeya kujatikizya kumbele. Ndakali kulyaambauzya mumoyo, ‘Masimpe kweelede kuti nzinji zijatikizyidwe mubuumi. Nkaambo nzi ncondiponena?’ Tiindakali kuyanda kufwa!”

⁷ Kumbele kali mukubusi, mucizyi Yvonne wakaswaangana a Bakamboni ba Jehova. Wakaamba kuti: “Ndakatalika kusyoma kuti ndilakonzya kuba abulangizi bwakupona kukabe kutamani mu Paradaiso anyika.” Mbuti kwiiya kasimpe mbokwamugwasya mucizyi ooyu? Wakaamba kuti: “Lino tandicijisi cilabila masiku kuyeeya kujatikizya kumbele naa lufwu.” Kweelana ambomwabona, mucizyi Yvonne ulakayandisya kapati kasimpe, alimwi ulakkomana kapati kwaambila bamwi kujatikizya bulangizi bwakumbele.—1Tim. 4:16.

8-9. (a) Mucikozyanyo cimwi ca Jesu, mbuti mwaalumi umwi mbwaakatondezya mboluyandika kapati lubono ndwaakajana? (b) Nkaambo nzi kasimpe ncokayandika kapati kulindinywe?

⁸ Kasimpe kamu Bbaibbele kalabikkilizya amakani mabotu aajatikizya Bwami bwa Leza. Jesu wakakozyanisya kasimpe aaka kulubono lusisidwe. Kulugwalo lwa Matayo 13:44, Jesu wakati: “Bwami bwakujulu buli mbuli lubono lusisidwe mumuunda, oolo muntu ndwaakajana akulusisa; mpoonya akaambo kalukkomano ndwajisi, ulaunka akusambala zintu zyoonse nzyajisi akuula muunda ooyo.” Amubone kuti mwaalumi ooyo kunyina naakali kuyandaula lubono. Pele naakalujana, wakaaba zintu nzyaakajisi kutegwa alubweze. Alimwi buya, wakasambala zintu zyoonse nzyaakajisi. Nkaambo nzi? Wakalizyi mbolwakali kuyandika kapati lubono oolo. Lwakali kuyandika kapati kwiinda cintu cili coonse ncaakaaba.

⁹ Sena mbomulimvwa oobo kujatikizya kasimpe? Cakutadooneka mbomulimvwa oobo! Tulizyi kuti kunyina cintu cili coonse munyika eeyi iceelene alukkomano ndotujana kwiinda mukubelekela Jehova lino, katujisi bulangizi bwabuumi butamani kumbele mubweendelezi bwa Bwami bwa Leza. Coolwe ncotujisi  cakuba acilongwe a Jehova cilayandika kapati kwiinda cintu cili coonse ncotukonzya kwaaba. Cintu ncotuyandisya kapati ‘nkumukkomanisya Jehova cakumaninina.’—Kol. 1:10.

10-11. Ncinzi cakabakulwaizya ba Michael kucinca bukkale bwabo?

¹⁰ Bunji bwesu twakalyaaba kuleka zintu zimwi kutegwa katukkomaninwa a Jehova. Bamwi bakazileka zintu zimwi izyakali kukonzya kubaletela mali manji munyika eeyi. Ibambi bakasiya lubono lwabo. Mpoonya bamwi bakacinca bukkale bwabo cakumaninina ciindi nobakaiya kujatikizya Jehova. Oobo mbocakacitika kuli ba Michael. Tiibakakomenena mukasimpe. Nobakali bakubusi, bakayiisyigwa cisobano ca Karate. Bakati: “Ndakali kukukkomanina kunyanyaasya mubili. Zimwi ziindi, ndakali kuIimvwa kuti kunyina uukonzya kunduuma.” Pele nobakazumanana kwiiya Bbaibbele, ba Michael bakazyiba Jehova mbwaayibona nkondo. (Int. 11:5) Kujatikizya banabukwetene Bakamboni ibakali kubayiisya, ba Michael bakati: “Kunyina nobakandaambila kuti ndicileke cisobano eeci; pele bakazumanana buyo kundiyiisya kasimpe kamu Bbaibbele.”

¹¹ Ba Michael nobakazumanana kwiiya kujatikizya Jehova, luyando lwabo lwakayuma. Bakakulwaizyigwa kapati aluzyalo ndwajisi Jehova kubakombi bakwe. Mukuya kwaciindi, ba Michael bakazyiba kuti bakeelede kucinca kapati. Bakaamba kuti, “Ndakalizyi kuti kuleka cisobano eeci cakali ciyumu kapati. Pele alimwi ndakalizyi kuti cakali kuyoomukkomanisya Jehova, alimwi ndakalisinizyide kuti kubelekela Jehova kwakali kuyandika kapati kwiinda cintu cili coonse.” Ba Michael bakazyiba kuti kasimpe nkobakajana kakali kuyandika kapati alimwi bakalilisungwide kucinca bukkale bwabo.—Jak. 1:25.

12-13. Mbuti kasimpe kamu Bbaibbele mbokakabagwasya ba Mayli?

¹² Nolyaamba mpindu yakasimpe, Bbaibbele likozyanisya kasimpe kulambe limunika mumudima. (Int. 119:105; Ef. 5:8) Ba Mayli, ibakkala ku Azerbaijan, balalumba kapati kulugwasyo ndobajana mu Jwi lya Leza. Bakakomenena mumukwasyi mobaindene bukombi. Bausyi bakali ba Mozilemu, mpoonya banyina bakali ba Juda. Bakaamba kuti: “Nokuba kuti tiindakali kudooneka kuti Leza nkwali, pele kuli mibuzyo iyakali kundikatazya. Ndakali kulibuzya kuti, ‘Ino Leza wakabalengela nzi bantu, alimwi nkaambo nzi muntu ncakonzya kupenga buumi bwakwe boonse akuyoopya kukabe kutamani mumulilo wahelo?’ Mbwaanga bantu baamba kuti zyoonse zicitika nkuyanda kwa Leza, ndakali kulibuzya kuti, ‘Sena Leza nguubeendelezya bantu, mpoonya akukkomana kubabona kabapenga?’”

¹³ Ba Mayli bakazumanana kuyandaula bwiinguzi kumibuzyo yabo. Mukuya kwaciindi, bakazumina kwiiya Bbaibbele alimwi bakaba umwi wa Bakamboni ba Jehova. Bakaamba kuti: “Bupanduluzi bulimvwisya mbondakajana mu Jwi lya Leza bwakacinca mbondakali kuzibona zintu. Bupanduluzi oobu bundiletela luumuno lwamumizeezo.” Mbubwenya mbuli ba Mayli, tulamutembaula Jehova, ‘ooyo iwakatwiita kuzwa mumudima akutunjizya mumumuni wakwe uutaliboteli.’—1Pet. 2:9.

14. Ncinzi cikonzya kutugwasya kukayanda kasimpe? (Amubone kabbokesi kakuti “ Zikozyanyo Zimbi.”)

¹⁴ Eezyi nzikozyanyo buyo zisyoonto izitondezya bubotu bwakasimpe. Tacidoonekwi buya kuti mulakonzya kuyeeya azimbi zinji. Notucita ciiyo cesu tobeni tulakonzya kulibikkila mbaakani yakujana twaambo tumbi  tutupa kukayanda kasimpe. Notuzumanana kukayanda kasimpe, tuyoojana twaambo atumbi tutupa kukayanda kasimpe.

15. Muunzila nzi motukonzya kutondezya kuti tulakayanda kasimpe?

¹⁵ Tulakonzya kutondezya kuti tulakayanda kasimpe kwiinda mukubala Bbaibbele amabbuku aamba zyamu Bbaibbele ciindi aciindi. Kufwumbwa naa twakkala ciindi cilamfwu buti mukasimpe, tweelede kuzumanana kwiiya. Magazini yakusaanguna ya Ngazi Yamulindizi eeyi iyakamwaigwa mu July 1879 yakaamba kuti: “Mbubwenya mbuli kaluba kaniini ikali munkanda, kasimpe kazingulukidwe aansaku zitalivwulili zyabubeji. Kuti kamuyanda kukajana, mweelede kulangisisya kapati. . . . Kuti kamuyanda kubona bubotu bwankako mweelede kusintama kutegwa mukabweze. Mutakkutili akaluba komwe buyo kakasimpe. . . . Kamuujisi kubwezelela, kamuciyandaula.” Kubala kuyandika kubeleka canguzu, pele kulagwasya kapati.

16. Ninzila nzi yakwiiya iimubelekela kabotu? (Tusimpi 2:4-6)

¹⁶ Tobanji tatukukkomanini kubala akwiiya. Pele Jehova utwaambila kuti tweelede ‘kuzumanana  kuyandaula’ alimwi ‘akuzumanana kulangaula’ kutegwa tukamvwisye kabotu kasimpe. (Amubale Tusimpi 2:4-6.) Ciindi notubeleka canguzu, tulagwasyigwa kapati. Kujatikizya ciiyo cakwe ca Bbaibbele, mukwesu Corey wakaamba kuti ubikkila maano kukapango komwe aciindi comwe. Wakati: “Ndilabala bupanduluzi ibuli mumajwi aayungizyidwe, Magwalo aamba makani aakozyenye aatondezyedwe mukapango aako alimwi ndilavwuntauzya. . . . tandimanizyi kumvwuntauzya makani oonse aali mukapango aciindi comwe nondibelesya nzila eeyi, pele ndilagwasyigwa kapati!” Kufwumbwa naa tubelesya nzila eeyi naa imbi, tulatondezya kulumba kukasimpe kwiinda mukubelesya ciindi alimwi anguzu kukaiya.—Int. 1:1-3.

17. Ino kupona kweelana akasimpe caamba nzi? (Jakobo 1:25)

¹⁷ Mubwini, tulizyi kuti kwiiya buyo kasimpe takuzulide pe. Kutegwa tugwasyigwe cakumaninina, tweelede kupona kweelana akasimpe, nkokuti tweelede kuzibelesya nzyotwiiya. Kuti twacita oobo, ndendilyo lilikke notukonzya kuba alukkomano lwini-lwini. (Amubale Jakobo 1:25.) Mbuti mbotukonzya kuba masimpe kuti tulapona kweelana akasimpe? Mukwesu umwi wakapa muzeezo wakuti tweelede kulilingula kutegwa tubone mbazu motucita kabotu amoomo motweelede kubambulula. Mwaapostolo Paulo wakaamba kuti: “Kweelana akuyaambele nkotwacita kale, atuzumanane kweenda kabotu acilengwa nciconya eeci.”—Flp. 3:16.

18. Nkaambo nzi ncotusolekesya ‘kuzumanana kweenda mukasimpe’?

¹⁸ Amuyeeye buyo mbotugwasyigwa kwiinda ‘mukuzumanana kweenda mukasimpe’! Tulapona buumi bubotu, tulamukkomanisya Jehova alimwi abasyomima. (Tus. 27:11; 3Joh. 4) Ootu ntotwaambo twiinda itutondezya ncotweelede kukayanda kasimpe alimwi akupona kweelana ankako.