Ciindi notubala Bbaibbele, tulakonzya kubelesya zibelesyo zigwasya kwiiya Bbaibbele ziindene-indene kutegwa tumvwisye nzyotubala. Nokuba boobo, tatuyandi kwiile kwiiya buyo kutegwa tuyungizye luzyibo lwesu lwamu Bbaibbele. Pele tuyanda kujana mbono yakumuuya iijatikizya bube bwa Jehova yalo iikonzya kutupa kuti tumuyande kapati. Kutegwa tucite oobo, tweelede kulibuzya kuti, ‘Ino cibalo eeci camu Bbaibbele cindiyiisya nzi kujatikizya Jehova?’

Mucikozyanyo, mulakonzya kwiiya kujatikizya Jehova mbwaakatondezya bube buyandika kapati mbuli luyando, busongo, bululami alimwi anguzu. Nokuba boobo, bube bwa Jehova tabugoleli buyo waawa alikke pe. Pele kuli bube bunji bubotu mbwajisi Jehova bwalo mbotukonzya kwiiya. Ino nkuli nkomukonzya kujana makani manji aajatikizya bube oobu?

Amubone mulongo uujisi bube abumbi buli 50 mu Watch Tower Publications Index ansi aamutwe wamakani wakuti “Jehovah” akatwe kamakani kakuti “Qualities by Name.” Amuvwuntauzye makani aayendelana acibalo camu Bbaibbele ncomubala. (Ikuti kamujisi buyo Bbuku Ligwasya Kuvwuntauzya lya Bakamboni ba Jehova, amulange ansi aamutwe wamakani wakuti “Jehova Leza” akatwe kakuti “Bube bwa Jehova.”)