CIBALO CAKWIIYA 31
LWIIMBO 12 O Jehova, Uli Leza Mupati
Ncaakacita Jehova Kutegwa Anunune Bantu
“Leza wakaiyanda kapati nyika cakuti wakapa Mwanaakwe simuzyalwaalikke.”—JOH. 3:16.
ZILAAYIIGWE
Tulabona Jehova ncaakacita ikutugwasya kulwana cibi alimwi akumukkomanisya. Kunze lyaboobo, tulabona mbwaapa kuti cikonzyeke kulindiswe kuyoopona kukabe kutamani katulondokede.
1-2. (a) Ino cibi ninzi, alimwi mbuti mbotukonzya kucizunda? (Amubone a “Bupanduluzi Bwamabala.”) (b) Ncinzi ncotutiilange-lange mucibalo eeci amuzibalo zimbi zili mu Ngazi Yamulindizi eeyi? (Amubone a “Makani Kuli Basikubala” aali mumagazini eeyi.)
SENA inga mwayanda kuzyiba Jehova Leza mbwamuyanda kapati? Njeeyi nzila mbotu mbomukonzya kuzyiba: Amwiiye ncaakacita kutegwa amununune kucibi alufwu. Cibi a ngusinkondo mubyaabi kapati ngomutakonzyi kuzunda munguzu zyanu nyolikke. Buzuba abuzuba toonse tulabisya, aboobo tulafwa akaambo kacibi. (Rom. 5:12) Nokuba boobo, kuli makani aakkomanisya. Kwiinda mukugwasyigwa a Jehova tulakonzya kucizunda cibi. Alimwi eeco tacidoonekwi buya!
2 Jehova Leza wali kubagwasya bantu kulwana cibi kwamyaka iibalilwa ku 6,000. Nkaambo nzi? Nkaambo kakuti ulatuyanda kapati. Jehova wali kubayanda bantu kuzwa ciindi naakabalenga. Akaambo kaceeci, wacita zintu zinji kutegwa abagwasye ciindi nobacita cibi. Leza ulizyi kuti cibi cisololela kulufwu alimwi tayandi kuti katufwa, muciindi caboobo uyanda kuti katupona mane kukabe kutamani. (Rom. 6:23) Eeci ncencico ncayanda akulindinywe. Aboobo mucibalo eeci, tulalanga-langa mibuzyo yotatwe: (1) Mbuti Jehova mbwaakabapa bulangizi bantu batalondokede? (2) Ncinzi ncobakacita bantu batalondokede kaindi kutegwa bamukkomanisye Jehova? (3) Ncinzi Jesu ncaakacita kutegwa anunune bantu kucibi alufwu?
MBUTI JEHOVA MBWAAKABAPA BULANGIZI BANTU BATALONDOKEDE?
3. Ncinzi cakacitika mumuunda wa Edeni?
3 Ciindi Jehova naakalenga mwaalumi amukaintu wakusaanguna, wakali kuyanda kuti kabakkomene. Aboobo, wakabapa busena bubotu bwakukkala, cipego cacikwati alimwi amulimo uukkomanisya. Bakeelede kuzyala bana akuzuzya nyika akupanga nyika yoonse kuba Paradaiso mbubwenya mbuli muunda wa Edeni. Pele wakabapa buyo mulawo omwe iwatakali kukatazya kutobela. Alimwi wakabacenjezya kuti, ikuti naa bautyola mulawo ooyu kwiinda mukutamumvwida acaali, bakali kuyoofwa. Tulicizyi cakacitika. Imungelo mubyaabi iwatakali kubayanda bantu naba Leza, wakasunka Adamu a Eva kutamvwida Leza. Cuusisya ncakuti, Adamu a Eva bakacita ceeco ncaakali kuyanda mungelo ooyu mubyaabi, Saatani. Akaambo kakwaalilwa kumusyoma Usyi wabo siluyando, bakabisya. Mbubwenya mbotuzyi, ncaakaamba Jehova cakacitika ncobeni. Akaambo kakutamvwida, ba Adamu a Eva bakapenga mubuumi bwabo boonse. Bakatalika kucembaala, kuciswa mane buya akufwa.—Matl. 1:28, 29; 2:8, 9, 16-18; 3:1-6, 17-19, 24; 5:5.
4. Nkaambo nzi Jehova ncacisulide kapati cibi? (Baroma 8:20, 21)
4 Jehova wakapa kuti cibalo eeci cilembwe mu Bbaibbele kutegwa tugwasyigwe. Mubuti? Cilatugwasya kumvwisya kaambo ncacisulide kapati cibi. Kayi cibi cinyonganya cilongwe ncotujisi a Jehova alimwi cisololela kulufwu. (Is. 59:2) Saatani ulimusulide Jehova abantu, nkakaambo kaako wakasunka Adamu a Eva kutegwa babisye. Alimwi wazumanana kusunka bantu amazuba aano. Aboobo ciindi ba Adamu a Eva nobakabisya, kweelede kuti wakali kuyeeya kuti waanyonganya makanze aa Leza kujatikizya bantu. Pele tanaakazyi Jehova mbwali siluyando. Kayi Leza kunyina naakaacinca makanze aakwe kujatikizya bana ba Adamu a Eva. Akaambo kakuti ulabayanda bantu, cakufwambaana wakabapa bulangizi. (Amubale Baroma 8:20, 21.) Jehova wakalizyi kuti bamwi akati kabana aaba bakali kuyooba bantu bamuyanda alimwi ibamumvwida. Aboobo, wakabikka bubambe bwakuti cikonzyeke kuli baaba kuba acilongwe anguwe akunununwa kucibi alufwu. Ino wakacita buti kutegwa eeci cikonzyeke?
5. Ndilili Jehova naakapa bulangizi kubantu? Ino lugwalo lwa Matalikilo 3:15 lwakasinsima nzi?
5 Amubale Matalikilo 3:15. Kakunyina kusowa ciindi, Jehova wakaamba kuti wakali kuyoomunyonyoona Saatani calo icakapa bulangizi kubantu boonse. Wakaamba kuti kwakali kuyooba “lunyungu” lwalo lwakali kuyoonununa bantu. Mukuya kwaciindi, lunyungu oolu lwakali kuyoomunyonyoona Saatani akumanizya mapenzi oonse ngaakatalisya mumuunda wa Edeni. (1Joh. 3:8) Nokuba boobo, lunyungu oolu lwakali kuyoopenga alwalo. Nkaambo Saatani wakali kuyoomuluma akupa kuti afwe. Eeci cakali kuyoomucisa kapati Jehova. Nokuba boobo, wakalilisungwide kupenga akuzumizya lunyungu kuti alwalo lupenge kutegwa anunune bantu kucibi alufwu.
NCINZI NCOBAKACITA BANTU BATALONDOKEDE KAINDI KUTEGWA BAMUKKOMANISYE JEHOVA?
6. Ncinzi baalumi ibakajisi lusyomo mbuli Abelo a Nowa ncobakacita kutegwa babe acilongwe a Jehova?
6 Buce-buce, Jehova wakali kuyaabucisalazya kuti bantu batalondokede bakali kukonzya kuba acilongwe anguwe. Abelo imwana wabili wa Adamu a Eva, ngomuntu wakusaanguna iwakasyoma Jehova kuzwa ciindi nobwakatalika buzangi mu Edeni. Mucikozyanyo, akaambo kakuti wakali kumuyanda Jehova alimwi wakali kuyanda kumukkomanisya akuba acilongwe anguwe, wakatuula cipaizyo. Mbwaanga Abelo wakali mweembezi, wakabweza bana bambelele bataanzi akubatuula kuli Jehova. Ino Jehova wakalimvwa buti? Bbaibbele lyaamba kuti ‘wakamukkomanina Abelo acituuzyo cakwe.’ (Matl. 4:4) Jehova wakazikkomanina azipaizyo zyabantu bambi ibakali kumuyanda akumusyoma mbuli Nowa. (Matl. 8:20, 21) Aboobo kwiinda mukuzumina zipaizyo zili boobu, Jehova wakatondezya kuti bantu batalondokede bakali kukonzya kukkomaninwa alimwi akuba acilongwe anguwe. b
7. Ncinzi ncotwiiya kukulisungula kwa Abrahamu kutuula mwanaakwe?
7 Abrahamu wakajisi lusyomo luyumu muli Jehova, aboobo Jehova wakamwaambila kucita cintu cimwi icakali kukatazya kapati. Wakamwaambila kutuula mwanaakwe ngwaakali kuyandisya kapati Izaka kali cituuzyo. Kweelede kuti eeci cakali cintu cityompya kapati kuli Abrahamu. Nokuba boobo, wakamumvwida Jehova. Pele ciindi Abrahamu naakali kuyanda kujaya mwanaakwe, Leza wakamukasya. Cikozyanyo eeci cituyiisya cintu Jehova ncaakali kuyoocita kumbele. Wakali kuyoolisungula kwaaba mwanaakwe ngwayandisya kacili cituuzyo nkaambo ulabayanda kapati bantu.—Matl. 22:1-18.
8. Ino zipaizyo zyabanyama izyakali kupegwa kweelana a Mulawo zyakali kutondezya nzi? (Levitiko 4:27-29; 17:11)
8 Ciindi Jehova naakapa Mulawo kubana Israyeli, wakabaambila kunootuula zipaizyo zyabanyama kutegwa kabalekelelwa zibi zyabo. (Amubale Levitiko 4:27-29; 17:11.) Zipaizyo eezyi zyakatondezya kuti Jehova wakali kuyoopa cipaizyo ciinda kubota icakali kuyoonununa bantu cakumaninina kucibi. Aboobo, Leza wakasololela basinsimi bakwe ikulemba kujatikizya lunyungu lwakasyomezyedwe. Bakaamba kuti Mwana wa Leza wakali kuyoopenga alimwi akujaigwa. Wakali kuyoojaigwa mbuli mbelele yacipaizyo. (Is. 53:1-12) Amuciyeeyele buyo: Jehova wakasyomezya kuti wakali kuyakwaaba Mwanaakwe ngwayandisya kapati kacili cipaizyo ikutegwa anunune bantu kucibi alufwu, kubikkilizya andinywe!
NCINZI JESU NCAAKACITA KUTEGWA ANUNUNE BANTU KUCIBI?
9. Ncinzi ncaakaamba Johane Mubbapatizi kujatikizya Jesu? (Bahebrayo 9:22; 10:1-4, 12)
9 Mumwaka wa 29 C.E., Johane Mubbapatizi wakabona Jesu muna Nazareta akwaamba kuti: “Amubone, Mwanaambelele wa Leza ooyo uugusya cibi canyika!” (Joh. 1:29) Majwi aaya aakasololelwa amuuya akatondezya kuti Jesu ngonguwe wakali lunyungu lwakasyomezyedwe. Aboobo wakali kuyootuula buumi bwakwe kacili cipaizyo. Lino bantu batalondokede bakaba abulangizi bwakucizunda cibi cakumaninina.—Amubale Bahebrayo 9:22; 10:1-4, 12.
10. Ino Jesu wakatondezya buti kuti ‘wakaboolela kwiita’ basizibi?
10 Jesu wakabikkila kapati maano kugwasya bantu ibakali kulimvwa bubi akaambo kakuti bakali basizibi. Wakabatamba ikutegwa babe basikumutobela. Wakalizyi kuti kaambo kapati ikakali kupa bantu kupenga, ncibi. Aboobo wakabikkila maano kugwasya bamaalumi abamakaintu ibakazyibidwe kuti mbaasizibi. Kwiinda mukubelesya cikozyanyo wakaamba kuti: “Bantu bataciswi tabayandiki musilisi, pele aabo baciswa mbabayandika musilisi.” Wakayungizya kwaamba kuti: “Ndakaboolela kwiita basizibi ikutali bantu baluleme.” (Mt. 9:12, 13) Alimwi buya oobo mbwaakali kucita Jesu. Caluyando, wakamulekelela mukaintu iwakasanzya maulu aakwe amisozi. (Lk. 7:37-50) Wakayiisya mukaintu muna Samariya kasimpe kayandika kapati, nokuba kuti wakalizyi kuti mukaintu ooyu wakali kupona buumi bwakutalilemeka. (Joh. 4:7, 17-19, 25, 26) Mane Leza wakapa Jesu nguzu zyakumana cintu ciboola akaambo kacibi, nkokuti lufwu. Mubuti? Kayi Jesu wakacikonzya kubusya bantu nkokuti bamaalumi, bamakaintu, bana alimwi abapati.—Mt. 11:5.
11. Nkaambo nzi bantu ibakali kucita zintu zibi ncobakali kulikwaya kubandika a Jesu?
11 Kuli kaambo bantu ibakali kucita zintu zibi ncobakali kumuyanda Jesu. Wakali kubafwida lubomba alimwi alweetelelo. Aboobo bakali kulikwaya kubandika anguwe. (Lk. 15:1, 2) Kunze lyaboobo, Jesu wakabalumbaizya bantu bali boobu akaambo kakutondezya lusyomo mulinguwe alimwi wakabeendelezya caluzyalo. (Lk. 19:1-10) Aboobo wakabatondezya bantu, mbwali siluse Jehova. (Joh. 14:9) Kwiinda munzila Jesu mbwaakali kubandika abantu alimwi akubeendelezya, twiiya kuti Jehova ngusiluse, ulabayanda bantu batalondokede alimwi uyanda kubagwasya. Jesu wakabagwasya basizibi kucinca bukkale bwabo akumutobela.—Lk. 5:27, 28.
12. Ncinzi ncaakaamba Jesu kujatikizya lufwu lwakwe?
12 Jesu wakalizyi cakali kuyoomucitikila kumbele. Kwaziindi zili mbozibede, wakaambila basikumutobela kuti wakali kuyakwaabwa alimwi akujaigwa acisamu. (Mt. 17:22; 20:18, 19) Wakalizyi kuti cipaizyo cakwe cakali kuyoogusya cibi canyika, mbubwenya Johane Mubbapatizi mbwaakaambide alimwi abasinsimi. Kuyungizya waawo, Jesu wakaamba kuti aakumana kutuula buumi bwakwe, wakali ‘kuyoobakwelela kulinguwe bantu bamisyobo yoonse.’ (Joh. 12:32) Aboobo bantu batalondokede bakali kukonzya kumukkomanisya Jehova kwiinda mukuzumina Jesu kuba Mwami wabo akutobela mikondo yakwe. Kwiinda mukucita boobo, bakali kukonzya ‘kwaangununwa kucibi.’ (Rom. 6:14, 18, 22; Joh. 8:32) Aboobo Jesu cabusicamba wakalilisungwide kufwa lufwu lucisa kapati kutegwa atununune.—Joh. 10:17, 18.
13. Ino Jesu wakafwa buti? Ino lufwu lwakwe lutuyiisya nzi kujatikizya Jehova Leza? (Amubone acifwanikiso.)
13 Jesu wakaabwa, kwaangwa, kusampaulwa, kubejekezyegwa, kupegwa mulandu wakujaigwa mane buya akusubulwa. Kumane basikalumamba bakamutola kubusena bwakujailwa akumugagaila acisamu. Pele cakusyomeka, Jesu wakaliyumya mumapenzi oonse aaya alimwi akukucisa. Tacidoonekwi buya kuti Jehova wakapenga kapati kwiinda Jesu ciindi naakali kulangilila Mwanaakwe kapenga. Nokuba kuti wakalijisi nguzu zyakumukwabilila Mwanaakwe, kunyina naakazibelesya pe. Nkaambo nzi? Ncinzi cakapa Usyi siluyando kucita boobo? Akaambo kakuti ulatuyanda. Jesu wakaamba kuti: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.”—Joh. 3:16.
Jehova cakamucisa kapati ciindi naakazumizya Mwanaakwe kujaigwa kutegwa atununune kucibi alufwu (Amubone muncali 13)
14. Ino cipaizyo ca Jesu citondezya nzi?
14 Cipaizyo ca Jesu mbumboni butakonzyi kuzumbauzyigwa bwakuti Jehova ulabayanda bana ba Adamu a Eva. Ncitondezyo cakuti Jehova ulamuyanda kapati nywebo. Nkaambo wakapa Mwanaakwe ngwayandisya kapati akuliyumya kukucisa kutaambiki, kutegwa amununune kuzwa kucibi alufwu. (1Joh. 4:9, 10) Masimpe, uliyandide kumugwasya umwi aumwi wesu kumubelekela nokuba kuti tatulondokede alimwi akuyoocigusya cibi.
15. Ncinzi ncotweelede kucita kutegwa tugwasyigwe acipego ca Leza cacipaizyo cacinunuzyo ca Jesu?
15 Cipaizyo cacinunuzyo ca Mwanaakwe ncaakatupa Leza kacili cipego, cipa kuti tukonzye kulekelelwa zibi. Pele kutegwa tulekelelwe zibi zyesu, tuyandika kucita cintu cimwi. Ino ncintu nzi eeco? Johane Mubbapatizi a Jesu Kristo bakapa bwiinguzi nobakati: “Amweempwe, nkaambo Bwami bwakujulu bwaswena afwaafwi.” (Mt. 3:1, 2; 4:17) Aboobo tweelede kweempwa ikuti katuyanda kuba acilongwe a Jehova alimwi akulekelelwa zibi. Pele ino kweempwa kubikkilizya nzi alimwi mbuti mbokutugwasya kumukkomanisya Jehova nokuba kuti tuli basizibi? Bwiinguzi tuyoobujana mucibalo citobela.
LWIIMBO 18 Kulumba Akaambo ka Cinunuzyo
a BUPANDULUZI BWAMABALA: Mu Bbaibbele, ibbala lyakuti “cibi,” lilakonzya kwaamba kucita zintu zitaluzi, nkokuti kwaalilwa kupona kweelana azyeelelo zya Jehova. Kunze lyaboobo, lilakonzya kwaamba kutalondoka bantu boonse nkobakakona kuli Adamu. Akaambo kacibi ncotwakakona, toonse tulafwa.
