Mwaapostolo Paulo wakalembela Banakristo baku Tesalonika kuti: “Ikuti umwi kataaswiilili majwi eesu aali mulugwalo oolu, amumucenjelele kapati ooyo.” (2Tes. 3:14) Kaindi, twakali kwaamba kuti eeci ceelede kucitwa abaalu. Ikuti umwi wazumanana kutatobela njiisyo zyamu Bbaibbele nokuba kuti wagwasyigwa cakwiinduluka-induluka, baalu bakali kukonzya kupa makani aakucenjezya kumbungano. Mpoonya, basikumwaya bakeelede kuleka kuyanzana anguwe.

Nokuba boobo, kuli kucinca mukumvwisya. Kulibonya kuti lulayo lwa Paulo lwaamba ntaamu njobeelede kubweza basikumwaya mubukkale bumwi. Aboobo, baalu tabayandiki kupa makani aakucenjezya. Pele nkaambo nzi ncokwaba kucinca ooku mukumvwisya? Amubone Paulo ncaakali kwaamba ciindi naakapa lulayo oolu.

Paulo wakabona kuti bantu bamwi mumbungano bakali “kweenda cakupilingana.” Wakabapa lulayo lwakayeeme aa Jwi lya Leza, pele bakakaka kulutobela. Naakabaswaide musyule, wakabapa lulayo oolu lwakuti: “Ikuti naa muntu umwi katayandi kubeleka, akulya atalyi pe.” Nokuba boobo, ibamwi bakacili kukaka kubeleka kutegwa bajane nzyobakali kuyandika, nokuba kuti bakali kukonzya kucita boobo. Kunze lyaboobo, bakali kunjililila mumakani aabamwi aatakali kubajatikizya. Ino Banakristo bakeelede kubeendelezya buti bantu bali boobu?—2Tes. 3:6, 10-12.

Paulo wakaamba kuti: “Amumucenjelele kapati ooyo.” Ibbala lya Chigiriki ilyakasandululwa aawa lipa muzeezo wakumuzyiba muntu ooyo alimwi akucenjela kapati kutegwa tutayungwi anguwe. Paulo wakali kupa malailile aaya kumbungano yoonse ikutali buyo kubaalu. (2Tes. 1:1; 3:6) Aboobo, ciindi sikumwaya umwi aumwi naabona muntu uutayandi kutobela lulayo lwakasololelwa amuuya, ulakonzya kusala ‘kuleka kuyanzana amuntu ooyo’ weenda cakupilingana.

Sena eeci caamba kuti muntu ooyo weelede kweendelezyegwa mbuli muntu wagusyigwa mumbungano? Peepe, nkaambo Paulo wakayungizya kwaamba kuti: “Amuzumanane kumulaya mbuli munyoko.” Aboobo, basikumwaya balakonzya kuzumanana kuswaangana antoomwe kumiswaangano amuntu ooyo weelede kucenjelelwa alimwi akutola lubazu anguwe mumulimo wamumuunda, pele ikutali kuyanzana anguwe muzyakulikondelezya. Nkaambo nzi? Paulo wakaamba kuti: “Ikutegwa afwe nsoni.” Ciindi notuleka kuyanzana amuntu ooyu munzila eeyi, cilakonzya kupa kuti afwe nsoni akaambo kaceeco ncacita mpoonya akucinca.—2Tes. 3:14, 15.

Mbuti Banakristo mbobakonzya kulubelesya lulayo oolu mazuba aano? Cakusaanguna, tweelede kuba masimpe kuti bukkale bwamuntu ooyo ‘bulipilingene’ ncobeni kweelana ambwaakaamba Paulo. Aawa tanaakali kwaamba bantu ibacita zintu zikazyanya amanjezyeezya eesu pele izitakazyanyi anjiisyo zyamu Bbaibbele naa milawo yamu Bbaibbele. Alimwi tanaakali kwaamba bantu ibacita zintu ziindene anzyotuyanda naa aabo ibakatunyemya. Muciindi caboobo, Paulo wakali kwaamba baabo ibakaka kutobela milawo ya Leza acaali.

Mazuba aano, ikuti twabona Munakristoma uutondezya muuya wakutamvwida, a tulakonzya kusala kuleka kuyanzana anguwe ciindi notulikondelezya. Mbwaanga aaya makani aakulisalila, tatweelede kwaambila bamwi mbotutakkali limwi aŋanda kujatikizya kusala kwesu. Pele tulakonzya kuzumanana kuyanzana amuntu ooyo kumiswaangano amumulimo wamumuunda. Mpoonya ciindi naacinca bukkale bwakwe, tulakonzya kuzumanana kuyanzana anguwe muli zyoonse.