Kulugwalo lwa 2 Bakorinto 12:2, 3, Paulo waamba muntu umwi ‘iwakakwempelwa kujulu lyatatu.’ Ino muntu ooyo wakali ni? Kalembela mbungano yaku Korinto, Paulo wakakankaizya kuti Leza wakali kumubelesya kali mwaapostolo. (2Kor. 11:5, 23) Mpoonya wakaamba “zilengaano zigambya alimwi aziyubunuzyo zya Mwami.” Mucibalo eeci Paulo kunyina naakaamba kujatikizya bakwesu bamwi. Aboobo, wakali kulyaamba kuti ngonguwe iwakatambula zilengaano zigambya alimwi aziyubunuzyo.—2Kor. 12:1, 5.

Aboobo Paulo ngonguwe ‘iwakakwempelwa kujulu lyatatu’ alimwi ‘amuparadaiso.’ (2Kor. 12:2-4) Wakabelesya bbala lyakuti “ziyubunuzyo,” icaamba kuti wakaambilwa kujatikizya cintu ciyoocitika kumbele.

Ino ncinzi Paulo ncaakabona kuti ‘ndijulu lyatatu’?

Mu Bbaibbele, “julu” lilakonzya kwaamba julu lini kuligama. (Matl. 11:4; 27:28; Mt. 6:26) Pele “julu” alimwi lilabelesyegwa munzila zimwi. Ziindi zimwi lyaamba bweendelezi bwabantu. (Dan. 4:20-22) Alimwi lilakonzya kwaamba bweendelezi bwa Leza, mbuli kweendelezyegwa a Bwami bwa Leza.—Ciy. 21:1.

Paulo wakabona “julu lyatatu.” Ino wakali kwaamba nzi? Ziindi zimwi Bbaibbele lilainduluka kwaamba cintu cimwi ziindi zyotatwe kutondezya kukankaizya, naa kutondezya nguzu nzyocijisi. (Is. 6:3; Ezk. 21:27; Ciy. 4:8) Kulibonya kuti kwiinda mukwaamba “julu lyatatu,” Paulo wakali kwaamba bweendelezi busumpukide kapati, nkokuti Bwami bwabu Mesiya buyooyendelezyegwa a Jesu Kristo alimwi abasikulelanyina ibali 144,000. (Amubone Ngazi Yamulindizi yamu November 1, 2004, peeji 8 muncali 5.) Bwami bwabu Mesiya oobu mbombubo Petro mbwaakali kwaamba ciindi naakaamba kuti tulangila “majulu mapya” kweelana acisyomezyo ca Leza.—2Pet. 3:13.

Ino ncinzi ncaakali kupandulula Paulo naakaamba kujatikizya “paradaiso”?

Mbubwenya buyo ibbala lyakuti “paradaiso” lilakonzya kwaamba zintu ziindene-indene: (1) Kujatikizya munzi wabantu wakusaanguna, “paradaiso” cakweelela ilakonzya kwaamba Paradaiso yaanyika iini-ini iili kumbele. (2) Ilakonzya kwaamba bukkale bwakumuuya bwalo bantu ba Leza mbobayooba munyika mpya. (3) Kuyungizya waawo, ilakonzya kwaamba bukkale bubotu bwakujulu, “paradaiso ya Leza” iyaambidwe kulugwalo lwa ciyubunuzyo 2:7.—Amubone Ngazi Yamulindizi yamu July 15, 2015, peeji 8. muncali 8.

Ciindi naakali kwaamba cakamucitikila, kweelede kuti Paulo wakali kwaamba kujatikizya zintu zyoonse zyotatwe izili kulugwalo lwa 2 Bakorinto 12:4.

Mubufwaafwi:

“Julu lyatatu” ilyaambidwe kulugwalo lwa 2 Bakorinto 12:2 kweelede kuti lyaamba Bwami bwabu Mesiya ibuli mumaanza aa Jesu Kristo alimwi aba 144,000, nkokuti “majulu mapya.” —2Pet. 3:13.

Lyaambwa kuti “julu lyatatu” akaambo kakuti Bwami mbweendelezi bubotu, ibusumpukide kapati.

“Paradaiso” mwalo Paulo ‘mwaakakwempelwa’ mucilengaano kweelede kuti yaamba (1) Paradaiso iini kwiigama iiyooboola anyika, (2) paradaiso yakumuuya iyooba kumbele, yalo iyookomena kapati kwiinda paradaiso yakumuuya iiliko lino, alimwi (3) ‘aparadaiso ya Leza’ iili kujulu yalo iiyoobako aciindi comwe munyika mpya.

Aboobo nyika mpya inoobikkilizya majulu mapya alimwi anyika mpya. Bunooli bubambe bupya, ibubikkilizya mfwulumende ya Bwami bwa Leza yakujulu alimwi abantu babelekela Jehova muparadaiso anyika.