Peepe, kunyina Bbaibbele naa makani aakaindi naatondezya kuti cili boobu cakali kucitwa.

Mbokasanduludwe kapango aaka muma Bbaibbele manji cipa bantu bamwi kuyeeya kuti kubbapatizyigwa akaambo kabantu bafwide kwakali kucitwa mumazuba aa Paulo. Mucikozyanyo: “Kuti taakwe bubuke bwabafwu, ino nkaambonzi bantu nibabapatizigwa nkaambo kabafwu?”—The Bible in Tonga 1963.

Nokuba boobo, amubone nzyobakaamba basikwiiya zyamu Bbaibbele bobilo. Ba Dr. Gregory Lockwood bakaamba kuti kunyina bumboni mu Bbaibbele naa mumakani aakaindi butondezya kuti muntu wakali kubbapatizyigwa akaambo kamuntu uufwide. Awalo sikwiiya zyamu Bbaibbele Syaabupampu wazina lya Gordon D. Fee wakazuminizya. Wakalemba kuti, mu Bbaibbele naa mumakani aakaindi kunyina cikozyanyo calubbapatizyo luli boobu. Wakaamba kuti, mucibeela ca Cizuminano Cipya mu Bbaibbele, kunyina aali bumboni butondezya kuti cintu cili boobu cakali kucitwa a Banakristo bakusaanguna naa mucikombelo cili coonse icakatalisyigwa ciindi cisyoonto buyo kuzwa nobakamana kufwa Baapostolo.

Bbaibbele lyaamba kuti basikutobela Jesu bakeelede ‘kuyiisya bantu bazisi zyoonse kuti babe basikwiiya, kubabbapatizya . . . , akubayiisya kutobela zintu zyoonse’ nzyaakabalailila. (Mt. 28:19, 20) Aboobo muntu katanaba sikwiiya uubbapatizyidwe, wakeelede kwiiya kujatikizya Jehova alimwi a Mwanaakwe, kubasyoma alimwi akubamvwida. Muntu uufwide alimwi uuli mucuumbwe tanaakali kucikonzya kucita boobo; naba Munakristo buya uucipona tanaakali kukonzya kumucitila boobo.—Muk. 9:5, 10; Joh. 4:1; 1Kor. 1:14-16.

Pele ino ncinzi ncaakali kupandulula Paulo?

Bana Korinto bamwi bakali kukazya kuti kunyina bubuke bwabafwu. (1Kor. 15:12) Paulo wakabatondezya kuti kuyeeya kuli boobu takuluzi. Mbuti mbwaakacita oobo? Wakabaambila kuti ‘abuzuba wakali kujanika muntenda yalufwu,’ pele wakalijisi lusyomo lwakuti aakufwa uyoobusyigwa kubuumi bwakujulu mbubwenya mbuli Jesu.—1Kor. 15:30-32, 42-44.

Bana Korinto bakeelede kuzyiba kuti kuba Munakristo uunanikidwe cakali kupandulula kuti bakali kunoojana masunko buzuba abuzuba alimwi akufwa kabatanabusyigwa. Aboobo ciindi ‘nobakabbapatizyigwa muli Kristo Jesu’ nkokuti alimwi ‘bakabbapatizyigwa mulufwu lwakwe.’ (Rom. 6:3) Eeci caamba kuti mbubwenya mbuli Jesu, bakali kunoojana mapenzi alimwi bakeelede kufwa kabasyomeka kutegwa bakabusyigwe kubuumi bwakujulu.

Kakwiindide myaka iinda kuli yobilo kuzwa ciindi Jesu naakabbapatizyigwa mumaanzi, wakaambila basikwiiya bakwe bobile kuti: “Lubbapatizyo ndondibbapatizyigwa, muyoobbapatizyigwa.” (Mk. 10:38, 39) Aawa Jesu tanaakali kubbapatizyigwa buya mumaanzi. Wakali kupandulula kuti kusyomeka kuli Leza kusololela kulufwu. Paulo wakalemba kuti bananike bakali ‘kuyoopenga a Jesu kutegwa bakapegwe bulemu antoomwe anguwe.’ (Rom. 8:16, 17; 2Kor. 4:17) Aboobo abalo beelede kufwa kutegwa babusyigwe kubuumi bwakujulu.

Aboobo majwi aamwaapostolo Paulo alakonzya kwaamba munzila iiluzi kuti: “Ikuti naa bafwu tabakabusyigwi, ino nimpindu nzi njobayoojana aabo babbapatizyigwa kutegwa babe bafwu? Ikuti naa bafwu kunyina nobayoobusyigwa, ino nkaambo nzi abalo ncobali mukubbapatizyigwa kutegwa babe bafwu?”