1. Ino mbube nzi bubotu mbobatondezya bantu ba Jehova?

 BBAIBBELE lyakasinsima kuti bantu ba Leza bakali ‘kuyoolyaaba cakuliyandila’ mumulimo wa Jehova kwiinda mukusololelwa a Mwanaakwe. (Int. 110:3) Businsimi oobu buli mukuzuzikizyigwa mazuba aano. Mwaka amwaka, babelesi ba Jehova balalyaaba kubeleka mawoola manji mumulimo wakukambauka. Balacita oobo cakuliyandila alimwi tababbadelwi. Alimwi balaaba ciindi cinji kugwasya basyominyina kumubili, alimwi akubakulwaizya kumuuya. Bakwesu basalidwe balabeleka mawoola manji kulibambila zibeela zyamiswaangano alimwi akucita nyendo zyabweembezi kubasyominyina. Ncinzi cibakulwaizya kucita boobo? Nduyando ndobajisi kuli Jehova akubantu.—Mt. 22:37-39.

2. Kweelana a Baroma 15:1-3, ncikozyanyo cili buti Jesu ncaakatusiila?

² Jesu wakatusiila cikozyanyo cibotu cakubabikkila maano bamwi. Tulasolekesya kumwiiya. (Amubale Baroma 15:1-3.) Aabo bamwiiya balagwasyigwa kapati. Nkaambo Jesu wakaamba kuti: “Kupa kulakkomanisya kapati kwiinda kupegwa.”—Mil. 20:35.

3. Ino tulalanga-langa nzi mucibalo eeci?

³ Mucibalo eeci, tulabandika zintu zimwi Jesu nzyaakacita kutegwa agwasye bamwi alimwi tulabona mbotukonzya kumwiiya. Mpoonya tulabandika mbotukonzya kuyungizya luyandisisyo lwesu lwakugwasya bamwi.

4. Mbuti Jesu mbwaakabikkila maano kuzintu nzyobakali kuyandika bamwi?

⁴ Jesu wakabagwasya bamwi noliba leelyo naakakatede. Amubone Jesu ncaakacita ciindi naakabona makamu aabantu aakaboola kulinguwe kumbali amulundu ambweni afwaafwi a Kapernauma. Jesu wakali kupaila busiku boonse. Kweelede kuti wakalikatede kapati, pele naakabona nkamu mpati yabantu, wakabeetelela bacete alimwi abaciswa ibakali munkamu. Aboobo tanaakaponya buyo baciswa pele wakapa amakani aakulwaizya aatakalubwi, Mulumbe Waacilundu.—Lk. 6:12-20.

5. Mbuti basilutwe bamukwasyi mbobaiya cikozyanyo ca Jesu mukutondezya luyando ciindi nobakatede?

⁵ Mbobamwiiya Jesu basilutwe bamukwasyi. Amweezyeezye bukkale oobu: Silutwe wamukwasyi ulikatede kapati naazwa kumulimo. Nokuba kuti walikuyanda kukusumpya Kukomba Kwamukwasyi mangolezya aayo, wamulomba Jehova kuti amupe nguzu zyakusololela. Jehova wawiingula mupailo wakwe, aboobo wacikonzya kusololela. Kuliceeci bana baiya ciiyo ciyandika kapati cakuti, kubazyali babo, zintu zyakumuuya zilayandika kapati kwiinda cintu cili coonse.

6. Amupandulule Jesu mbwaakaaba ciindi cakwe kugwasya bamwi.

⁶ Jesu wakali kwaaba ciindi cakwe. Amwezyeezye buyo mbwaakalimvwa ciindi naakazyiba kuti mulongwe wakwe Johane mubbapatizi wajaigwa! Kweelede kuti Jesu wakausa kapati. Bbaibbele lyaamba kuti: “Naakamvwa boobu, Jesu wakatanta bwato akuzwa ooko, wakaunka kubusena bunyina bantu kutegwa abe alikke.” (Mt. 14:10-13) Tulakonzya kumvwisya ncaakali kuyanda kuba alikke. Tobanabunji tulayanda kuba tolikke notuuside. Pele kuli Jesu, eeci tiicakakonzyeka. Nkamu mpati yabantu yakasaanguna kusika kubusena oobo walo katanasika. Ino Jesu wakacita buti? Wakayeeya nzyoyakali kuyandika nkamu yabantu eeyo, aboobo ‘wakabeetelela.’ Wakabona mbobakali kuyandika kukatalusyigwa kumuuya,  aboobo cakufwambaana wakacita oobo. ‘Mpoonya wakatalika kubayiisya ikutali zintu zisyoonto, pele zintu zinji.’—Mk. 6:31-34; Lk. 9:10, 11.

7-8. Mbuti baalu basiluyando mbobamwiiya Jesu ciindi umwi nayandika lugwasyo mumbungano?

⁷ Baalu basiluyando mbobamwiiya Jesu. Eelo kaka tulalumba kumilimo yakulyaaba baalu njobabeleka! Amana buya milimo minji taibonwi abasimbungano. Mucikozyanyo, ciindi musyominyina naaciswa kapati, bakwesu babeleka mu Hospital Liaison Committee balafwambaana kumugwasya. Kanji-kanji eeci cicitika akati kamasiku. Akaambo kalweetelelo ndobajisi kubakwesu abacizyi bali mumapenzi, baalu aaba amikwasyi yabo, babikka nzyobayandika basyominyina mubusena bwakusaanguna.

⁸ Kuyungizya waawo, baalu balatola lubazu mukuyaka maanda aa Bwami amasena aamwi alimwi balagwasyilizya nokwacitika ntenda. Kunze lyaboobo, baalu balabelesya ciindi cinji kutuyiisya alimwi akutukulwaizya. Bakwesu aaba amikwasyi yabo beelede kulumbwa kapati. Jehova akulongezye kulyaaba kwabo. Nokuba boobo, mbubwenya mbuli ndiswe toonse, baalu beelede kuzilanga kabotu zintu. Tabeelede kubelesya ciindi cinji kapati mumilimo yakumuuya eeyi cakuti mikwasyi yabo yapenga.

9. Kweelana alugwalo lwa Bafilipi 2:4, 5, muuya uuli buti ngobeelede kuba anguwo Banakristo?

⁹ Amubale Bafilipi 2:4, 5. Tabali buyo baalu balikke, toonse tulakonzya kumwiiya  Jesu kwiinda mukubikka nzyobayandika bamwi mubusena bwakusaanguna. Bbaibbele lyaamba kuti: “Wakabweza ciimo camuzike.” (Flp. 2:7) Amuyeeye buyo ncotukonzya kwiiya kukapango aaka. Muzike naa mubelesi uusyomeka ulasolekesya kujana nzila zyakukkomanisya simalelaakwe. Mbwaanga tuli babelesi ba Jehova alimwi tulayanda kubelekela bakwesu, tacidoonekwi buya kuti tulayanda kubelesyegwa kapati a Jehova alimwi abakwesu. Tulakonzya kucita oobo kwiinda mukulanga-langa mizeezo iitobela.

10. Mibuzyo nzi njotweelede kulibuzya?

¹⁰ Amulilingule. Amulibuzye mibuzyo mbuli yeeyi: ‘Sena ndililyaabide kwaaba ciindi cangu kugwasya bamwi? Mucikozyanyo, ino ndicita buti kuti ndalombwa kuswaya mukwesu uucembeede naa kugwasya mucizyi uucembeede kujanika kumiswaangano? Sena ndilalisungula kugwasyilizya kusalazya busena aacitilwa muswaangano wacooko naa kubambulula Ŋanda ya Bwami?’ Jehova ulakkomana ciindi notubelesya ciindi cesu alimwi alubono, kazili zintu zyaabidwe kulinguwe kugwasya bamwi. Ikuti kuli mbazu motweelede kubelekela, ino tweelede kucita nzi?

11. Mbuti mupailo mboukonzya kutugwasya kuba amuuya wakulyaaba?

¹¹ Amupaile kuli Jehova kuzwa ansi amoyo. Ambweni kuli mbazu momweelede kubelekela, pele tamujisi luyandisisyo lwakucita boobo. Kuti kacili boobo, amupaile kuli Jehova kuzwa ansi amoyo. Mutamusisi pe. Amumwaambile Jehova mbomulimvwa alimwi akumulomba kuti ‘amupe kuti kamukanza alimwi anguzu zyakucita zintu.’—Flp. 2:13.

12. Mbuti bakwesu bacili bana-bana ibabbapatizyidwe mbobakonzya kugwasya mbungano?

¹² Ikuti kamuli mukubusi uubbapatizyidwe, amumulombe Jehova kuti amupe kuba aluyandisisyo lwakugwasya bamwi mumbungano. Mumasi amwi kuli baalu banji kwiinda bakutausi, amana buya bunji bwabakutausi aaba mbapati. Ciindi mbunga noiyaabukomena, kuyandika bakwesu banji bacili bana-bana kugwasyilizya baalu kulanganya bantu ba Jehova. Ikuti kamulyaabide kubeleka kufwumbwa mpomuyandika, muyookkomana. Nkaambo nzi? Nkaambo mukkomanisya Jehova, muyooba ampuwo mbotu, alimwi muyookkomana kubelekela bamwi.

13-14. Ncinzi ncotukonzya kucita kutegwa tugwasye bakwesu abacizyi? (Amubone cifwanikiso icili aacivwumbyo.)

¹³ Amubone mbazu mobayandika lugwasyo bamwi. Mwaapostolo Paulo wakaambila Banakristo ibakali kukkala mu Judaya kuti: “Mutalubi kucita zibotu akwaabana zintu nzyomujisi abamwi, nkaambo Leza ulabotelwa azipaizyo zili boobo.” (Heb. 13:16) Eelo kaka oolu lwakali lulayo lubotu! Kakutanainda ciindi kuzwa nobakatambula lugwalo oolu, Banakristo ibakali kukkala mu Judaya bakeelede kusiya maanda aabo, makwebo aabo, banamukwasyi ibatakali basyomi alimwi ‘akutijila kumalundu.’ (Mt. 24:16) Kuciindi eeco, cakali kuyandika kapati kugwasyanya abamwi. Kuti naa bakali kulutobela lulayo lwa Paulo lwakwaabana zintu abamwi, nkokuti cakabaubila kupona azintu zisyoonto mubukkale bupya.

¹⁴ Talili lyoonse bakwesu abacizyi nobakonzya kutwaambila nzyobayandika. Mucikozyanyo, amweezyeezye kuti mukwesu  wafwidwa mukaintu. Sena inga wayandika lugwasyo lwazyakulya, zyakweendela, naa milimo yaaŋanda? Ambweni takonzyi kutwaambila akaambo kakuyoowa kuti inga watusyupa. Pele inga walumba kapati kuti twabelesya bupampu akupa lugwasyo luyandika. Tatweelede kuyeeya kuti umwi ulamugwasya naa kuti lyoonse unootwaambila kuti uyandika lugwasyo. Amulibuzye kuti, ‘Ikuti nondali mubukkale bwakwe, ino inga ndayandika lugwasyo luli buti?’

15. Ncinzi ncotweelede kucita kutegwa tugwasye bamwi?

¹⁵ Amube bantu basikilika. Cakutadooneka kuli bakwesu abacizyi mumbungano yanu mbomuzyi kuti lyoonse balibambilide kugwasya bamwi. Kunyina nobalimvwa kuti mulabasyupa. Lyoonse inga balilibambilide kutugwasya alimwi tuyanda kubaiya. Ba Alan, mwaalu uujisi myaka iili 45, bayanda kuba muntu uusikilika. Ba Alan bakaamba boobu kujatikizya cikozyanyo ca Jesu: “Jesu wakajisi bubi, pele bantu baziimo zyoonse bakali kwaanguluka kusika kulinguwe akulomba lugwasyo. Bakalizyi kuti ulababikkila maano kapati. Aboobo ndiliyandide kapati kwiiya cikozyanyo ca Jesu cakuba muntu uusikilika, uusangalizya alimwi uubabikkila maano bamwi.”

16. Mbuti majwi aali ku Intembauzyo 119:59, 60 mbwaakonzya kutugwasya kumwiiya Jesu?

¹⁶ Tatweelede kutyompwa kuti naa twaalilwa kumwiiya Jesu cakulondoka. (Jak. 3:2) Sicikolo takonzyi kumwiinda mwiiyi wakwe. Pele ciindi sikwiiya naiya kukulubizya kwakwe alimwi akasolekesya kwiiya cikozyanyo camwiiyi wakwe, ulazumanana kucita kabotu. Mbubwenya buyo, kuti katuzibelesya nzyotwiiya muciiyo cesu ca Bbaibbele  alimwi akusolekesya kucinca, tulakonzya kumwiiya Jesu kabotu-kabotu.—Amubale Intembauzyo 119:59, 60.

17-18. Mbubotu nzi mbotukonzya kujana kwiinda mukwiiya cikozyanyo ca Jesu cakulyaaba?

¹⁷ Kulyaaba nkotucita kulabakulwaizya bamwi. Mwaalu wazina lya Tim wakaamba kuti: “Bakwesu bamwi ibacili bana-bana bakaba bakutausi akaambo kakuti bakali kubona bamwi mbobakalyaabide kugwasya, mpoonya bakabaiya. Aaba bakwesu ibacili bana-bana balilyaabide kugwasyilizya baalu alimwi ambungano.”

¹⁸ Bantu banji munyika mazuba aano balaliyanda kapati. Pele bantu ba Jehova baliindene. Twakulwaizyigwa amuuya wakulyaaba ngwaakajisi Jesu, aboobo tuliyandide kumwiiya. Nokuba boobo, tatukonzyi kumwiiya cakulondoka, pele tulakonzya “kwiitobelesya mikondo yakwe.” (1Pet. 2:21) Ciindi notusolekesya kumwiiya Jesu, tuyookkomana nkaambo tukkomanisya Jehova.