1-2. Ncinzi cikonzya kutugwasya kumvwisya Jehova mbwaakalimvwa ciindi naakatamikizyigwa makani aakubeja?

 AMWEEZEEZYE bukkale oobu: Muntu ngomuyanda kapati waamba zintu zibi kujatikizya ndinywe. Mulizyi buya kuti zintu eezyo nzyakubeja, pele bamwi bazisyoma. Ciinda kubija ncakuti, bantu aabo abalo batalika kwaambila bamwi, mpoonya abalo bazisyoma. Ino inga mwalimvwa buti? Ikuti kamubabikkila maano bantu alimwi ampuwo yanu, inga mwalimvwa bubi kapati, tee kayi?—Tus. 22:1.

² Bukkale oobu bulatugwasya kumvwisya mbwaakalimvwa Jehova ciindi naakatamikizyigwa makani aakubeja alo aakabisya mpuwo yakwe. Umwi wabangelo bakwe wakaambila Eva makani aakubeja kujatikizya Jehova. Kumane Eva wakaasyoma. Makani aaya aakubeja akapa kuti bazyali besu bakusaanguna bamuzangile Jehova. Akaambo kaceeci, bantu boonse bakabisya akutalika kufwa. (Matl. 3:​1-6; Rom. 5:12) Aboobo, mapenzi oonse ngotubona munyika mbuli lufwu, nkondo alimwi akupenga, zyakatalika akaambo kamakani aakubeja Saatani ngaakamwaya mumuunda wa Edeni. Sena Jehova cilamucisa akaambo kamakani aaya aakubeja alimwi amapenzi aacitika? Inzya cilamucisa kapati. Nokuba boobo, Jehova tauside pe. Muciindi caboobo, wazumanana kuba “Leza uukkomene.”—1Tim. 1:11.

3. Ncoolwe nzi ncotujisi?

³ Tulijisi coolwe cakugwasyilizya kutondezya kuti Saatani wakamubejekezya Jehova. Tulacita oobo kwiinda mukutobela mulawo  wakuti: “Amutembaule zina lya Jehova.” (Int. 113:1) Tulalitembaula zina lya Jehova ciindi notwaambila bamwi kasimpe kajatikizya nguwe. Sena andinywe muyoocita oobo? Lino atulange-lange zintu zyotatwe zitukulwaizya kutembaula zina lya Leza camoyo woonse.

TULAMUKKOMANISYA JEHOVA CIINDI NOTUTEMBAULA ZINA LYAKWE

4. Nkaambo nzi Jehova ncakkomana ciindi notumutembaula? Amupandulule. (Amubone acifwanikiso.)

⁴ Tulamukkomanisya Taateesu wakujulu ciindi notutembaula zina lyakwe. (Int. 119:108) Pele sena eeci caamba kuti Leza singuzuzyoonse uli mbuli bantunsi balo ibayanda kutembaulwa kutegwa bakulwaizyigwe? Peepe. Amubone cikozyanyo eeci. Amweezeezye kuti kana kasimbi kabalikila bausyi akubakumbata kumane kaamba kuti, “Bataata, taakwe uuli mbuli ndinywe!” Bausyi bakkomana kapati akutalika kumweta-mweta akaambo kancokacita kana kabo. Nkaambo nzi? Sena nkaambo kakuti bayanda kukulwaizyigwa akutembaulwa kuzwa kukana kabo? Peepe. Pele bakkomana akaambo kakuti balakayanda kana kabo akuti akalo katondezya kuti kalabayanda alimwi akulumba. Balizyi kuti bube buli boobu, buyoopa kuti kakali kana kakkomene noliba leelyo kaakukomena. Mbubwenya buyo, awalo Jehova, Taateesu mupati ulakkomana ciindi notumutembaula.

5. Ciindi notumutembaula Jehova, makani nzi ngotutondezya kuti ngakubeja?

⁵ Ciindi notumutembaula Taateesu wakujulu, tutondezya kuti nzyaakaamba Saatani kujatikizya ndiswe nzyakubeja. Saatani wakaamba kuti kunyina muntu uukonzya kuzumanana kuliiminina zina lya Leza. Munzila imwi, wakaamba kuti taakwe muntu uukonzya kuzumanana kusyomeka kuli Leza ikuti naa wasunkwa. Wakaamba kuti toonse tulakonzya kuleka kumubelekela Leza ikuti naa twabona kuti kucita boobo inga kwatugwasya. (Job. 1:​9-11; 2:4) Pele Jobu wakazumanana kusyomeka kuli Leza akutondezya kuti Saatani mubeji. Mbuti kujatikizya ndinywe? Umwi aumwi wesu ulakonzya kusala kumwiiminina Taateesu akupa kuti akkomane kwiinda mukuzumanana kumubelekela cakusyomeka. (Tus. 27:11) Eelo kaka eeci ncoolwe citaliboteli!

6. Mbuti mbotukonzya kumwiiya Mwami Davida aba Levi? (Nehemiya 9:5)

⁶ Aabo bamuyanda Jehova balayanda kulitembaula zina lyakwe camoyo woonse. Mwami Davida wakalemba kuti: “Anditembaule Jehova; zyoonse zili mukati kangu azitembaule zina lyakwe lisalala.” (Int. 103:1) Davida wakalizyi kuti, kutembaula zina lya Jehova ncimwi buyo akutembaula Jehova lwakwe. Zina  lya Jehova libikkilizya mpuwo yakwe, aboobo lituyeezya bube bwakwe boonse bubotu alimwi azintu zitaliboteli nzyacita. Davida wakali kuyanda kulitembaula zina lya Bausyi alimwi akutondezya kuti lilasalala. Wakali kuyanda kucita oobo ‘azyoonse zili mukati kakwe,’ nkokuti camoyo woonse. Mbubwenya buyo, ba Levi bakali kumutembaula Jehova. Cakulicesya, bakazumina kuti majwi aabo tanaakali kukonzya kulitembaula zina lya Jehova lisetekene kweelana ambolyakeelede. (Amubale Nehemiya 9:5.) Cakutadooneka, kutembaula ooku ikwakali kuzwa ansi aamoyo kwakali kumukkomanisya kapati Jehova.

7. Ino inga twamutembaula buti Jehova mumulimo wesu wakukambauka alimwi amubuumi bwesu bwabuzuba abuzuba?

⁷ Mazuba aano, tulakonzya kumukkomanisya Jehova kwiinda mukwaambila bamwi kujatikizya nguwe munzila iitondezya kuti tulalumba alimwi akumuyanda kapati. Ciindi notuli mumulimo wakukambauka, makanze eesu mapati ngakugwasya bamwi kuti babe acilongwe a Jehova alimwi akulimvwa mbuli mbotulimvwa kujatikizya Taateesu. (Jak. 4:8) Tulakkomana kwaambila bamwi kujatikizya Bbaibbele mbolimupandulula Jehova, mboliyubununa luyando lwakwe, bululami, busongo, nguzu alimwi abube bumwi bubotu mbwajisi. Kunze lyaboobo, tulamutembaula Jehova akumukkomanisya kwiinda mukusolekesya kumwiiya. (Ef. 5:1) Ciindi notucita oobo, bamwi balakonzya kubona kuti tuliindene kapati abantu bamunyika iino mbyaabi. (Mt. 5:​14-16) Mpoonya ciindi notucita zintu zyabuzuba abuzuba ambabo, tulakonzya kubaambila kaambo ncotwiindene abamwi. Akaambo kaceeci, babombe myoyo balakonzya kuyanda kuba acilongwe a Leza wesu. Aboobo ciindi notumutembaula Jehova munzila eeyi, tupa kuti moyo wakwe ukkomane.—1Tim. 2:​3, 4.

TULAMUKKOMANISYA JESU CIINDI NOTUTEMBAULA ZINA LYA JEHOVA

8. Mbuti Jesu mbwaakali kulitembaula zina lya Jehova?

⁸ Jesu, nguumuzyi kabotu Jehova kwiinda cilenge cimbi cili coonse. (Mt. 11:27) Jesu ulabayanda kapati Bausyi, alimwi wakaluujisi kutembaula zina lya Jehova. (Joh. 14:31) Mumupailo ngwaakapaila kuli Bausyi busiku katanafwa, wakaamba boobu kujatikizya mulimo wakwe waanyika: “Ndabazyibya zina lyako.” (Joh. 17:26) Ino wakali kupandulula nzi?

9. Mbuti Jesu mbwaakapandulula bwini mbobabede Bausyi?

⁹ Jesu tanaakagolela buyo akwaambila bantu kuti zina lya Leza ngu Jehova. Kayi ba Juda mbaakali kuyiisya bakalilizyi kale zina lya Leza. Pele Jesu “ngonguwe wakamupandulula” bwini mbwabede. (Joh. 1:​17, 18) Mucikozyanyo, Magwalo aa Chihebrayo atondezya kuti Jehova ngusiluse alimwi ngusilweetelelo. (Kul. 34:​5-7) Jesu wakakasalazya kaambo aaka ciindi naakaamba cikozyanyo camwana mutaka abausyi. Ciindi notubala kuti bausyi nobakamubona mwanaabo iwakeempwa “kacili kulaale,” bakamubalikila akumukumbata mpoonya akumulekelela camoyo woonse, tulamvwisya kuti Jehova ngusiluse alimwi ngusilweetelelo kapati. (Lk. 15:​11-32) Aboobo Jesu wakabagwasya bantu kuzyiba bwini mbwabede Jehova.

10. (a) Ino tuzyi buti kuti Jesu wakali kulibelesya zina lya Bausyi akuti wakali kuyanda kuti abamwi kabacita oobo? (Marko 5:19) (Amubone acifwanikiso.) (b) Ncinzi Jesu ncayanda kuti katucita mazuba aano?

¹⁰ Sena Jesu wakali kuyanda kuti abamwi kabalibelesya zina lya Bausyi? Inzya. Basololi bazikombelo bamwi bakali kusyoma kuti nkubula bulemu kubelesya zina lya Leza. Pele Jesu kunyina naakalekela tunsiyansiya ootu tutali twamumagwalo kumulesya kulemeka zina lya Bausyi. Mucikozyanyo, amuyeeye ciindi naakaponya  muntu iwakanjidwe madaimona mucooko ca Gerasa. Bantu bakayoowa kapati akutalika kukombelezya Jesu kuti azwe mucooko cabo. (Mk. 5:​16, 17) Nokuba boobo, Jesu wakali kuyanda kuti bantu bakubusena oobo balizyibe zina lya Jehova. Aboobo wakaambila muntu ngwaakaponya kuti akaambile bantu zintu nzyaakamucitila Jehova, ikutali Jesu. (Amubale Marko 5:19.) a Eeci ncayanda kuti andiswe katucita mazuba aano, ikuzyibya zina lya Bausyi munyika yoonse. (Mt. 24:14; 28:​19, 20) Ikuti twacita oobo, tulamukkomanisya Mwami wesu, Jesu.

11. Ino Jesu wakabayiisya kupailila nzi basikumutobela? Nkaambo nzi eeci ncociyandika kapati? (Ezekieli 36:23)

¹¹ Jesu wakalizyi kuti makanze aa Jehova ngakusalazya zina lyakwe, nkokuti kulisalazya kuzintu zyoonse zyakubeja izyakaambwa kujatikizya nguwe. Nkakaambo kaako wakayiisya basikumutobela kupaila kuti: “Taateesu ooli kujulu, alisalazyigwe zina lyako.” (Mt. 6:9) Jesu wakalizyi kuti aaya ngamakani aayandika kapati kuzilenge zyoonse. (Amubale Ezekieli 36:23.) Jesu ngowakainda kulisalazya zina lya Jehova kwiinda cilenge cimbi cili coonse. Pele ciindi naakaangwa, ino mulandu nzi ngobakamutamikizya basinkondonyina? Nkusampaula Leza. Tacidoonekwi buya kuti Jesu wakali kulimvwa kuti, kusampaula zina lya Bausyi lisalala, ncecakali cibi ciinda kukomena. Aboobo cakamucisa kapati akaambo kakutamikizigwa mulandu uuli boobu. Ambweni aaka nkakaambo ikakapa kuti ‘apenge kapati mumoyo’ kakusyeede mawoola masyoonto kuti ajatwe.—Lk. 22:​41-44.

12. Mbuti Jesu mbwaakalisalazya zina lya Bausyi?

¹² Kutegwa asalazye zina lya Bausyi, Jesu wakaliyumya kukupenzyegwa kuli koonse. Wakalizyi kuti wakali kubamvwida Bausyi muzintu zyoonse, aboobo kunyina cakeelede kumupa kuusa. (Heb. 12:2) Alimwi wakalizyi kuti Saatani nguwakali kumulwana aciindi eeci cikatazya. (Lk. 22:​2-4; 23:​33, 34) Saatani wakali kuyanda kupa kuti Jesu aleke kusyomeka, pele wakaalilwa. Cakutainda mumbali, Jesu wakatondezya kuti Saatani mubeji akuti Jehova ulijisi babelesi basyomeka, balo ibazumanana kusyomeka kulinguwe nomuba muziindi zikatazya kapati.

13. Ino inga mwamukkomanisya buti Mwami wanu uulela?

 ¹³ Sena mulayanda kumukkomanisya Mwami wanu uulela? Ikuti kacili boobo, amuzumanane kutembaula zina lya Jehova akugwasya bamwi kuzyiba bube bubotu mbwajisi. Kwiinda mukucita boobo, mutobela mikondo ya Jesu. (1Pet. 2:21) Mbubwenya mbuli Jesu, mupa kuti Jehova akkomane akutondezya kuti Saatani mubeji.

TULABAGWASYA BAMWI KUTI BAKAFWUTUKE CIINDI NOTUTEMBAULA ZINA LYA JEHOVA

14-15. Mbubotu nzi bukonzya kuboola ciindi notuyiisya bantu kujatikizya Jehova?

¹⁴ Ciindi notutembaula zina lya Jehova, tugwasya bamwi kuti bakafwutuke. Munzila nzi? Katuyeeya kuti Saatani ‘woofwaazya mizeezo yabantu batasyomi.’ (2Kor. 4:4) Akaambo kaceeci, batalika kusyoma makani aakubeja aazwa kuli Saatani mbuli aakuti: Leza tako pe, Leza uli kule kapati akuti tababikkili maano bantu, Leza ngusilunya alimwi ulabapenzya basizibi mane kukabe kutamani. Saatani nguwaamba makani woonse aaya aakubeja kutegwa abisye zina lya Jehova lisalala akulesya bantu kuyanda kuba acilongwe anguwe. Aboobo ciindi notukambauka, tupa kuti makanze aa Saatani atazwidilili. Tulabayiisya bantu kasimpe kujatikizya Taateesu, ikutembaula zina lyakwe lisalala. Ncinzi cazwa mpawo?

¹⁵ Kasimpe kali mu Jwi lya Leza kalaanguzu kapati. Kwiinda mukuyiisya bantu kujatikizya Jehova alimwi abwini mbwabede, tulabubona bubotu buzwa mpawo. Bantu balaleka koofwaazyigwa abubeji bwa Saatani akutalika kubona bube bubotu mbwajisi Taateesu. Balagambwa kubona nguzu zyakwe zinji kapati. (Is. 40:26) Balatalika kumusyoma akaambo kabululami bwakwe. (Dt. 32:4) Balaiya zinji kujatikizya busongo bwakwe bunji kapati. (Is. 55:9; Rom. 11:33) Alimwi balaumbulizyigwa kuzyiba kuti ngusiluyando. (1Joh. 4:8) Mbobayaabuba acilongwe a Jehova, bulangizi bwabo bwakupona kukabe kutamani kabali bana bakwe bulayuma. Eelo kaka ncoolwe cilibedelede kugwasya bantu kuba acilongwe a Usyi wabo! Ciindi notucita boobo, Jehova utubona kuti tuli “basimilimonyina.”—1Kor. 3:​5, 9.

16. Ino bamwi balimvwa buti ciindi nobalizyiba zina lya Leza? Amupe zikozyanyo.

 ¹⁶ Kumatalikilo, bantu tulakonzya kubayiisya buyo kuti zina lya Leza ngu Jehova. Kuzyiba kaambo aaka kulakonzya kucinca buumi bwababombe myoyo. Mucikozyanyo, mukaintu umwi uucili mwana-mwana wazina lya Aaliyah b wakakomenena mucikombelo citali ca Bunakristo. Pele kunyina naakali kukkutila anjiisyo zyacikombelo eeci alimwi wakali kulimvwa kuba kule a Leza. Cikkomanisya ncakuti, wakaleka kulimvwa boobu ciindi naakatalika kwiiya a Bakamboni. Wakatalika kubona Leza kuba mulongwe wakwe. Alimwi wakagambwa kuzyiba kuti zina lya Leza lyakagwisyigwa muma Bbaibbele manji akubikka buyo mazina aabulemu mbuli lyakuti Mwami. Aboobo, kuzyiba zina lya Leza kwakacinca buumi bwakwe. Cakugambwa wakaamba kuti: “Ani Mulongwe wangu ulijisi zina!” Ncinzi cakatobela? Wakaamba kuti: “Lino ndijisi luumuno lwamumizeezo alimwi ndilimvwa kulongezyegwa kapati akaambo kakuzyiba zina lya Jehova.” Ba Steve bakali baimbi ibakakomenena mubukombi bwaci Juda. Nobakabona kuupaupa ameso ikwakali kucitika muzikombelo, bakasala kulyaandaanya. Pele nobakafwidwa banyina, bakazumina kujanika aciiyo ca Bbaibbele cakali kusololelwa a Bakamboni ba Jehova. Nobakaiya kujatikizya zina lya Leza bakakkomana kapati. Mane buya bakaamba kuti: “Kunyina nondakalimvwide kale zina lya Leza.” Bakayungizya kwaamba kuti: “Ndakazyiba kuti Leza muntu mwini-mwini, tali wakuyeeyela buyo. Kumane ndakazyiba kuti ndamujana Mulongwe.”

17. Nkaambo nzi ncomukanzide kuzumanana kutembaula zina lya Jehova? (Amubone acifwanikiso.)

¹⁷ Ciindi nomukambauka akuyiisya, sena mulabazyibya bantu kujatikizya zina lya Jehova lisetekene? Sena mulabagwasya kuzyiba bwini mbwabede Leza wesu? Kwiinda mukucita boobo, mutembaula zina lya Leza. Aboobo, amuzumanane kutembaula zina lya Jehova lisalala kwiinda mukugwasya bantu kuti bamuzyibe bwini mbwabede. Ikuti mwacita oobo, muyoobagwasya bantu kutegwa bakafwutuke. Munootobela cikozyanyo ca Mwami wanu, Kristo Jesu. Kwiinda zyoonse, muyookkomanisya Jehova, Uso wanu siluyando. Aboobo amuzumanane ‘kutembaula zina lyakwe lyoonse alyoonse mane kukabe kutamani.’—Int. 145:2.