Bbaibbele lilaamba cakusalazya kuti Jehova ulakonzya kuzyibila limwi iziyoocitika kumbele. (Is. 45:21) Nokuba boobo, talyaambi makani oonse aajatikizya mbwacita oobo, ciindi nacita boobo naa kuvwula kwazintu nzyayanda kuzyibila limwi. Aboobo tatukonzyi kutumvwisya twaambo toonse kujatikizya makani aaya. Pele amuleke tulange-lange twaambo tumwi.

Jehova ulakonzya kucita kufwumbwa ncayanda, pele zimwi ziindi usala buyo kutacita. Ulakonzya kubelesya busongo bwakwe buteeli kuzyibila limwi cintu cili coonse ncayanda. (Rom. 11:33) Pele akaambo kakuti ulijisi bube bwakulilesya, ulakonzya kusala kuti atazyibi iziyoocitika kumbele.—Amweezyanisye a Isaya 42:14.

Jehova ulakonzya kupa kuti kuyanda kwakwe kucitike. Mbuti eeci mbocitugwasya kumvwisya nguzu nzyajisi izyakuzyibila limwi zyakumbele? Lugwalo lwa Isaya 46:10 lwaamba kuti: “Kuzwa kumatalikilo ndaambila limwi ciyoocitika kumbele, alimwi kuzwa kaindi ndaambila limwi zintu zitanacitika. Ndime ndaamba kuti, ‘Makanze aangu ayoozwidilila, alimwi zyoonse nzyondiyanda ndiyoozicita.’”

Aboobo, kaambo kamwi kapa Jehova kwaambila limwi iziyoocitika kumbele nkakuti ulijisi nguzu zyakupa kuti zintu eezyo zicitike. Amana buya tayandiki kuzyibila limwi iziyoocitika kumbele mbuli mbotucita swebo zimwi ziindi ciindi notweebelela filimu kwiinda mukwiilanga nkoili kumamanino kutegwa tuzyibe mboitiimane. Muciindi caboobo, Jehova ulakonzya kusala kuti cintu cimwi cikacitike aciindi cigaminide akupa kuti cicitike casika ciindi eeco.—Kul. 9:​5, 6; Mt. 24:36; Mil. 17:31.

Akaambo kaceeci, Bbaibbele libelesya mabala akuti ‘kubamba,’ ‘kwaanza’ alimwi ‘akukanza’ ciindi nolipandulula ncacita Jehova kujatikizya zintu iziyoocitika kumbele. (2Bam. 19:25; bupanduluzi buyungizyidwe; Is. 46:11) Mabala aaya akasandululwa kuzwa kubbala lyamumwaambo wakusaanguna lyalo likozyenye abbala lyakuti ‘mubumbi.’ (Jer. 18:4) Mbubwenya mubumbi uucibwene mbwakonzya kubumba cintu cimwi cibotu kwiinda mukubelesya bulongo, Jehova ulakonzya kucinca naa kucita zintu zimwi kutegwa azuzikizye makanze aakwe.—Ef. 1:11.

Jehova ulacilemeka cipego calwaanguluko lwakulisalila. Kunyina nasalila limwi cintu ceelede kucitikila muntu umwi aumwi mubuumi bwakwe; naa kupa kuti bantu bali kabotu bacite cintu iciyoobapa kunyonyoonwa. Muciindi caboobo, ulabazumizya boonse kulisalila mbobayanda kunoopona, pele ulabayiisya mbobakonzya kupona munzila iiluzi.

Amubone zikozyanyo zyobilo. Cakusaanguna cijatikizya bana Nineve. Jehova wakaamba kuti munzi ooyu wakali kuyoonyonyoonwa akaambo kabubi bwanguwo. Pele ciindi bana Nineve nobakeempwa, Jehova “wakacinca mizeezo kujatikizya mapenzi ngaakaambide kuti ulabaletela, aboobo tanaakaaleta pe.” (Jon. 3:​1-10) Jehova wakacinca mizeezo yakwe kujatikizya ncaakaambide akaambo kakuti bana Nineve bakasala kweempwa ciindi nobakamvwa kucenjezya kwakwe.

Cikozyanyo cabili ncabusinsimi bujatikizya Koresi, walo iwakali kuyakwaangununa ba Juda kuzwa mubuzike akulailila kuti tempele lya Jehova liyakululwe. (Is. 44:26–45:4) Mwami Koresi wa Persia wakabuzuzikizya businsimi oobu. (Ezr. 1:​1-4) Nokuba boobo, Koresi tanaakali kukomba Leza wakasimpe. Pele Jehova wakamubelesya kuzuzikizya businsimi oobu kakunyina kumusinikizya kuti atalike kukomba nguwe.—Tus. 21:1.

Mubwini, ootu ntwaambo buyo tusyoonto tujatikizyidwe ciindi Jehova nasala kuzyibila limwi zyakumbele pele kuli atumbi. Kwaamba masimpe, kunyina muntu uukonzya kuzimvwisya cakumaninina nzila zya Jehova. (Is. 55:​8, 9) Pele nzyotuzyi kujatikizya nguwe zitupa kuba alusyomo lwakuti zintu zyacita lyoonse inga zililuzi, kubikkilizya aleelyo naamba kujatikizya zyakumbele.