SENA kuli nomwakajisi penzi akulimvwa kuti kunyina uukonzya kumugwasya? Tupona ‘muziindi zikatazya ncobeni’ zyalo izikonzya kutupa kutyompwa alimwi akulimvwa kuba tolikke. (2Tim. 3:1) Nokuba boobo, ciindi notujisi mapenzi, nkobali bantu bakonzya kutugwasya. Bbaibbele lyaamba kuti balongwe beni-beni balakonzya kutugwasya kapati “muziindi zyamapenzi.”—Tus. 17:17.

Mwaapostolo Paulo wakagwasyigwa kapati akaambo kabalongwe mbaakali kweenda limwi. (Kol. 4:​7-11) Ciindi naakaangidwe mu Roma, balongwe bakwe bakali kumugwasya kucita milimo njaatakali kukonzya kucita. Mucikozyanyo, Epafrodita wakali kumutolela Paulo zintu nzyaakali kuyandika izyakali kuzwa kubakwesu abacizyi baku Filipi. (Flp. 4:18) Mpoonya Tukiko wakali kutola magwalo aa Paulo kumbungano ziindene-indene. Kwiinda mukugwasyigwa abalongwe bakwe, Paulo wakazumanana kucita mulimo wakwe nokuba kuti wakalaangidwe muŋanda naa muntolongo. Pele mbuti mbomukonzya kuba mulongwe mwini-mwini mazuba aano?

Zikozyanyo zyamazuba aano zilatondezya mbociyandika kuba mulongwe mwini-mwini. Amubone mucizyi umwi mbwaakatondezya kuba mulongwe mwini-mwini kumucizyi Elisabet, mupainiya waciindi coonse waku Spain. Ciindi banyina nobakajanwa abulwazi bwakkansa, mucizyi ooyu wakatumina ba Elisabet tugwalo tunji tukulwaizya itwakayeeme atupango twamu Bbaibbele. Ba Elisabet bakaamba kuti: “Tugwalo ootu twakali kundiyumya kapati akundipa kutalimvwa kulendelelwa.”—Tus. 18:24.

Tulakonzya kuyumya cilongwe cesu abasyomima kwiinda mukubagwasya kuunka kukukambauka naa kumiswaangano yambungano. Mucikozyanyo, mulakonzya kulyaaba kuunka amukwesu naa mucizyi uucembeede kumuswaangano naa mumulimo wamumuunda. Ikuti mwacita oobo, tacidoonekwi buya kuti muyakuba acoolwe cakukulwaizyanya. (Rom. 1:12) Nokuba boobo, Banakristo bamwi tabacikonzyi kuzwa aŋanda. Mbuti mbotukonzya kuba mulongwe mwini-mwini kuli mbabo?

Basyomima bamwi balaciswa naa bajisi bukkale bwalo bukonzya kubapa kuti kabatacikonzyi kujanika kumiswaangano cacigaminina. Amubone cikozyanyo caba David balo ibakajanwa abulwazi bwakkansa. Kwamyezi yiinda ku 6 bakali kusilikwa kubelesya nzila ya chemotherapy. Ciindi nobakali kusilikwa, ba David abakaintu babo ba Lidia, bakali kuswaangana kabali kuŋanda.

Ndugwasyo nzi ndobakatambula kuzwa kubakwesu abacizyi bakumbungano? Wamana muswaangano, bakwesu abacizyi bamwi ibakali a Ŋanda ya Bwami  bakali kusolekesya kubandika aba David aba Lidia kubelesya videoconference. Kuyungizya waawo, ciindi nobakali kupa bwiinguzi lyamuswaangano, bakwesu abacizyi bakali kubatumina tugwalo wamana muswaangano ikubalumba kujatikizya bwiinguzi bwabo. Ino eeci cakali kubapa kulimvwa buti ba David aba Lidia? Bakalimvwa kuyandwa abakwesu abacizyi.

Tulakonzya kupanga bubambe bwakubeleka mubukambausi abaabo ibatacikonzyi kuzwa aŋanda. Tulakonzya kupanga kucinca kusyoonto kumulongo wesu kutegwa tukonzye kubeleka ambabo. Munzila eeyi, tulabatondezya kuti tatubalubide pe. (Tus. 3:27) Mucikozyanyo, mulakonzya kubeleka ambabo kwiinda mukulemba magwalo naa kutuma fooni. Mpoonya baalu balakonzya kupanga bubambe bwakuti aabo ibatacikonzyi kuzwa aŋanda kabakonzya kujoina kumiswaangano yakuunka mumulimo wamumuunda kubelesya videoconference. Ba David aba Lidia bakalumba kapati akaambo kabubambe oobu. Ba David bakaamba kuti: “Kujanika buyo abakwesu abacizyi kumubandi ooyu mufwaafwi alimwi amupailo, cakali kutukulwaizya kapati.” Zimwi ziindi, mulakonzya kubuzya mukwesu naa mucizyi uutacikonzyi kuzwa aŋanda ikuti naa inga mwaboola asikwiiya Bbaibbele wanu kutegwa musololele ciiyo anguwe.

Ciindi notubeleka abakwesu abacizyi ibatacikonzyi kuzwa aŋanda, tulakonzya kubazyiba kabotu abube bubotu mbobajisi calo cikonzya kupa kuti tube acilongwe ciyumu ambabo. Mucikozyanyo, ciindi notubeleka ambabo mumulimo wamumuunda akubona mbobalibelesya kabotu Jwi lya Leza kutegwa bamusike amoyo sikwiiya, cilakonzya kupa kuti tubayande kapati. Kuyungizya waawo, mulakonzya kapanga balongwe bapya ciindi nomugwasya bakwesu abacizyi kuunka kukukambauka akumiswaangano.—2Kor. 6:13.

Paulo wakaumbulizyigwa kapati kuba antoomwe amulongwe wakwe Tito. (2Kor. 7:​5-7) Cibalo eeci cituyeezya kuti, tulakonzya kubakulwaizya bakwesu abacizyi ikutali buyo kwiinda mukwaamba majwi aakulwaizya, pele alimwi akuba antoomwe ambabo akucita kufwumbwa ncotukonzya kutegwa tubagwasye.—1Joh. 3:18.

Bakwesu abacizyi ku Russia bapa cikozyanyo cibotu cakugwasyanya umwi amweenzinyina. Amumvwe cakuluula caba Sergey abakaintu babo ba Tatyana. Ciindi bakapokola nobakamana kusecca muŋanda yabo, bakabatola kutegwa bakabuzyigwe-buzyigwe. Ba Tatyana mbabakasaanguna kupiluka kuŋanda nobakamana kubuzyigwa-buzyigwa. Ba Sergey bakaamba kuti: “Mbobakasikila buyo kuŋanda [ba Tatyana], mucizyi uumwi sicamba wakaboola. Kumane, bakwesu abacizyi bambi bakaboola akutugwasya kuzibamba kabotu zintu muŋanda.”

Ba Sergey bakayungizya kwaamba kuti: “Lyoonse ndali kwaakkomanina majwi aali kulugwalo lwa Tusimpi 17:​17, alo aamba kuti: ‘Mulongwe mwini-mwini ulatondezya luyando ciindi coonse alimwi ngomunyoko wakazyalilwa kuti akugwasye muziindi zyamapenzi.’ Pele ndaabona mbwaali aamasimpe majwi aaya ciindi eeci cakupenzyegwa. Jehova wandipa balongwe basicamba ibandigwasya.” a

Mbotunooyaabujana mapenzi aambi aakatazya kapati, tunooyandika balongwe kutegwa batugwasye. Alimwi tuyooyandika lugwasyo lwabo kwaambisya lyamapenzi mapati. Aboobo atusolekesye kusikila mpotugolela lino kuba mulongwe mwini-mwini.—1Pet. 4:​7, 8.