1. Ino mapenzi nzi ngotweelede kulwana, pele ino nkaambo nzi ikapa kuti Jehova abakkomanine babelesi bakwe basyomeka? (Amubone zifwanikiso izili kumatalikilo aacibalo.)

KWEELANA ambomuzyi, buumi mubweende bwazintu oobu buzwide mapenzi. Bunji bwanu nywebo nobakwesu abacizyi ibayandwa mulaciswa-ciswa. Bamwi, nokuba kuti bakomena abalo, balanganya banamukwasyi bacembeede. Alimwi bamwi balakatazyigwa kujanina banamukwasyi kutali buyo zintu zidula, pele nozyiba zintu ziyandika zyamumukwasyi. Alimwi tulizyi kuti ibanji balayaanya ikutali penzi lyomwe, pele mapenzi manji aali boobu aciindi comwe! Eeci ciyanda ciindi cinji alimwi anguzu—ikuyungizya amali aayandika. Nokuba boobo, lusyomo lwanu muzisyomezyo zya Leza ndupati; lusyomo ndomujisi lwabuumi bubotu kumbele, taluzungaani. Eelo kaka Jehova ulakkomana!

2. Ino nkukulwaizya kuli buti nkotujana kulugwalo lwa Isaya 40:29, pele ino nkulubizya kuli buti kupati nkotukonzya kucita?

² Pele, sena zimwi ziindi mulaakulimvwa kuti mapenzi amubuumi amukatazya kapati cakuzwa munzila? Kuti naa mbomulimvwa oobo, tamuli molikke pe. Bbaibbele liyubununa kuti ibabelesi basyomeka bakaindi bakali kulimvwa kuti inga tiibazumanana. (1Bam. 19:4; Job. 7:7) Nokuba boobo, muciindi cakuti batyompwe, bakalomba Jehova  kuti abape nguzu. Kunyina nobakatyompwa pe, nkaambo Leza wesu “muntu uukatede ulamupa nguzu.” (Is. 40:29) Cuusisya ncakuti, mazuba aano ibantu ba Leza bamwi babona kuti nzila mbotu yakumana mapenzi aamubuumi ‘nkucileka kutobela kasimpe,’ nobaamba kuti, cili mbuli kuti milimo yesu ya Bunakristo ilaminya muciindi cakuletela zilongezyo. Aboobo balaleka kubala Jwi lya Leza, kujanika kumiswaangano yambungano, alimwi akutola lubazu mumulimo wamumuunda—kweelana ambwalombozya kuti kabacita Saatani.

3. (a) Ino mbuti mbotukonzya kupa kuti atazwidilili makanze aa Saatani akututyompya? (b) Ino ncinzi ncotutiilange-lange mucibalo eeci?

³ Diabolosi ulizyi kabotu kuti tulayumizyigwa ciindi notutola lubazu cakutaleka mumilimo ya Bunakristo, alimwi tayandi kuti tube bayumu. Aboobo, ciindi nomulimvwa kutyompwa, tamweelede kumusiya Jehova. Amuswene kulinguwe, nkaambo “uyoomuzyatika, uyoomuyumya.” (1Pet. 5:10; Jak. 4:8) Mucibalo eeci, tulalanga-langa bukkale bobilo ibukonzya kutupa kujoka munsi mumulimo wesu kuli Leza alimwi tulabandika mbuli kubelesya njiisyo zyamu Bbaibbele mbokukonzya kutugwasya. Pele cakusaanguna, atubikkile maano kubona Jehova mbwakonzya kutuyumya, kweelana ambolutondezya lugwalo lwa Isaya 40:26-31.

4. Ino nciiyo nzi ncotukonzya kwiiya kuzwa kulugwalo lwa Isaya 40:26?

⁴ Amubale Isaya 40:26. Kunyina muntu uuli woonse wacikonzya kuzyibala nyenyezi zyoonse zili mububumbo. Basayaansi basyoma kuti mumulalabungu wesu uutegwa Milky Way galaxy ulikke ujisi nyenyezi izili 400 bbiliyoni. Pele Jehova ulaipa zina nyenyezi imwi aimwi. Ino twiiya nzi? Ikuti naa Jehova ulazibikkila maano zilenge zyakwe zitaponi, amuyeeye buyo mbwalimvwa kujatikizya ndinywe nomumubelekela, kutali kuti mbomwakabambwa kuti kamucita oobo, pele akaambo kakuti mulamuyanda! (Int. 19:1, 3, 14) Taateesu uuyandwa ulimuzyi kabotu. “Naaba masusu aakumutwe wanu alibalidwe oonse” anguwe. (Mt. 10:30) Alimwi sintembauzyo utusyomezya kuti: “Jehova ulizizyi zintu zibacitikila bantu batakwe kampenda.” (Int. 37:18) Inzya, ulaabona masunko ngomuyaanya, alimwi ulakonzya kumupa nguzu kutegwa muliyumye kuli imwi aimwi yangawo.

5. Ino mbuti mbotukonzya kuba masimpe kuti Jehova ulakonzya kutuyumya-yumya?

⁵ Amubale Isaya 40:28. Jehova nguupa nguzu. Mucikozyanyo, amubone kujatikizya nguzu nzyapa kuzwa kuzuba lyesu. Mulembi wasayaansi wazina lya David Bodanis kweelana ambwaakabona wakaamba kuti: “Inguzu zuba nzyoligusya mukavwaluvwalu komwe zileelene azizwa kumabbiliyoni aamabbomba.” Sikuvwuntauzya umwi wakajana kuti izuba “mukavwaluvwalu komwe lilagusya nguzu nzyobakonzya kubelesya bantu mumyaka iili 200,000”! Sena kuli uukonzya kudooneka kuti ooyo “weendelezya” zuba ulakonzya kutupa nguzu nzyotuyandika kutegwa tuliyumye mupenzi lili lyoonse?

6. Ino muubuti joko lya Jesu molitakatazyi kunyamuna, alimwi ino mbuti kuzyiba boobo mbokutujatikizya?

⁶ Amubale Isaya 40:29. Kubelekela Jehova kuletela kukondwa kapati. Jesu wakaambila basikwiiya bakwe kuti: “Amulikulike joko lyangu.” Alimwi wakayungizya kuti: “Eelyo mulakatalusyigwa. Nkaambo joko lyangu talikatazyi kunyamuna, alimwi mukuli wangu muuba.” (Mt. 11:28-30) Eelo kaka majwi aaya aliluzi! Ziindi zimwi, ambweni tulakonzya kulimvwa kukatala ciindi notuzwa aŋanda kuya kumuswaangano wambungano naa kuya mumulimo wamumuunda. Pele ino tulimvwa buti ciindi twajoka? Tulakatalukwa—alimwi tulalibambila kabotu kulwana masunko amubuumi. Eelo kaka joko lya Jesu talikatazyi kunyamuna ncobeni!

7. Amwaambe cakuluula icitondezya mbwaali amasimpe majwi aali kulugwalo lwa Matayo 11:28-30.

⁷ Mucizyi ngotulaaite kuti Kayla wakali kulwana  penzi lyakulimvwa kukatala lyoonse, kutyompwa, alimwi amutwe wakali kucisa kapati cakutaleka. Aboobo, zimwi ziindi wakali kwaalilwa kujanika kumiswaangano yambungano. Pele, ciindi naakasolekesya kutegwa ajanike kumuswaangano wamakani abuleya, wakalemba kuti: “Makani akali kwaamba kujatikizya zintu zikonzya kututyompya. Akaambwa munzila iisika amoyo cakuti ndakazwa misozi. Ndakayeezyegwa kuti ndeelede kuti kandijanika kumiswaangano.” Eelo kaka wakakkomana akaambo kakusolekesya kwakwe kutegwa ajanike!

8, 9. Ino ncinzi mwaapostolo Paulo ncaakali kupandulula naakalemba kuti: “Eelyo nonditajisi nguzu, ndendilyo nondijisi nguzu kapati”?

⁸ Amubale Isaya 40:30. Nokuba kuti inga katujisi luzyibo lunji buti, tulalezya kujatikizya zintu nzyotukonzya kucita munguzu zyesu. Eeci nceciiyo toonse ncotweelede kwiiya. Nokuba kuti wakali mwaalumi uucibwene, mwaapostolo Paulo wakali kulezya mumbazu zimwi calo cakali kumupa kuti aalilwe kucita zyoonse nzyaakali kuyanda kucita. Ciindi naakaambila Leza kujatikizya kulibilika kwakwe, wakaambilwa kuti: “Nguzu zyangu zilalondolwa mukubula nguzu kwako.” Paulo wakakabona kaambo. Wakamanizya kwiinda mukwaamba kuti: “Eelyo nonditajisi nguzu, ndendilyo nondijisi nguzu kapati.” (2Kor. 12:7-10) Ino ncinzi ncaakali kupandulula naakaamba boobo?

⁹ Paulo wakalizyi kuti nzisyoonto zintu nzyaakali kukonzya kucita kakunyina kugwasyigwa amuntu uusumpukide. Muuya uusalala wa Leza wakali kukonzya kumupa Paulo nguzu nzyaakabulide. Tacili ceeco buyo pe, pele alimwi muuya uusalala wa Leza wakali kukonzya kumupa nguzu Paulo zyakucita milimo eeyo njaatakali kukonzya kuzuzikizya munguzu zyakwe mwini. Ncimwi buyo andiswe mazuba aano. Ikuti naa nguzu nzyotujisi zizwa kuli Jehova, tuyooba bayumu ncobeni!

10. Ino Jehova wakamugwasya buti Davida kuliyumya kubuyumuyumu mbwaakali kuyaanya?

¹⁰ Sintembauzyo Davida ziindi zinji wakali kulibonena nguzu zyamuuya uusalala wa Leza. Wakaimba kuti: “Kwiinda mukugwasyigwa anduwe ndilakonzya kutandaanya zigwebenga zisaala; kwiinda munguzu zya Leza ndilakonzya kutanta bwaanda.” (Int. 18:29) Kuli bwaanda—mapenzi aamwi—mbotutakonzyi “kutanta” munguzu zyesu tobeni, tuyandika kugwasyigwa a Jehova.

11. Amupandulule mboubeleka muuya uusalala ikutugwasya kuliyumya kumapenzi eesu.

¹¹ Amubale Isaya 40:31. Sikwaze tauluki kuya mujulu alimwi akuuluka misinzo milamfwu ikubelesya buyo nguzu zyakwe. Muya uukasaala uuya mujulu kuzwa ansi ulamugwasya kuyaabuya mujulu, akupa kuti sikwaze atabelesyi nguzu zyakwe. Aboobo ciindi nomujisi mukuli uukatazya kapati, amuyeeye sikwaze. Amumulombe Jehova kuti ‘amugwasye’ kwiinda ‘mumugwasyi, nkokuti muuya uusalala.’ (Joh. 14:26) Icikkomanisya ncakuti, tulakonzya kuba anguwo kufwumbwa notuuyanda—buzuba boonse. Alimwi tulakonzya kuyandisisya kugwasyigwa a Leza ciindi notwaimpana amuntu umwi mumbungano. Pele ino nkaambo nzi ncokuba kutamvwana kuli boobu?

12, 13. (a) Ino nkaambo nzi kutamvwana akati ka Banakristo ncokucitika? (b) Ino cibalo caamba Josefa cituyiisya nzi kujatikizya Jehova?

¹² Kutamvwana akati kabantu kulacitika akaambo kakuti toonse tatulondokede. Aboobo, kuyooba ziindi notuyoonyemezyegwa amajwi naa micito yabasyomima—naa ziindi nobayoonyema akaambo kandiswe. Eeli lilakonzya kuba sunko lipati kapati. Mbubwenya mbuli masunko ambi, Jehova ulazumizya kutegwa tutondezye kusyomeka kwesu kwiinda mukwiiya kubeleka calukamantano abaalumi abamakaintu ibalyaabide balo mbayanda nokuba kuti tabalondokede.

¹³ Cibalo ca Josefa cilatondezya kuti Jehova kunyina nalesya kuti babelesi bakwe batasunkwi. Kali mukubusi, Josefa wakasambalwa  mubuzike abanabokwabo ibakali abbivwe akutolwa ku Egepita. (Matl. 37:28) Jehova wakabona cakali kucitika alimwi tacidoonekwi kuti wakausa kubona mbuli mulongwe wakwe, Josefa mululami, mbwaakapenzyegwa. Nokuba boobo, kunyina naakanjilila pe. Nokwakainda ciindi, Josefa naakatamikizyigwa kuti wakali kuyanda kujata muka Potifara akubikkwa muntolongo, Jehova tanaakabweza ntaamu iili yoonse alimwi. Pele sena Leza wakamulekelezya Josefa? Muciindi caboobo, “Jehova wakapa kuti kufwumbwa zintu nzyaakali kucita [Josefa] kazwidilila.”—Matl. 39:21-23.

14. Ino nimpindu nzi ziboola kumuuya alimwi akumubili kwiinda ‘mukuleka’ kunyema?

¹⁴ Nceeci acimbi cikozyanyo. Mbasyoonto bantu ibakeendelezyegwa munzila mbyaabi mbuli mbwaakeendelezyegwa Davida. Nokuba boobo, imulongwe wa Leza ooyo kunyina naakalekela kunyema kuti kumweendelezye. Muciindi caboobo, wakalemba kuti: “Koleka kunyema abukali; utacimwi akutalika kucita cibi.” (Int. 37:8) Ikaambo kapati ncotweelede ‘kuleka’ kunyema nkakuti tuyanda kwiiya Jehova, ooyo ‘uutatucitili kweelana azibi zyesu.’ (Int. 103:10) Pele alimwi kuli mpindu zigwasya kwiinda ‘mukuleka’ kunyema. Kunyema kulakonzya kuleta malwazi mbuli BP alimwi amalwazi aakufwundilila. Kulakonzya kuleta mapenzi kumuni alimwi akukalulizya, alimwi akuleta mapenzi aamwida. Ciindi notunyemede, talili lyoonse notuyeeya kabotu. Alimwi zimwi ziindi kunyema kulakonzya kupa kutyompwa kwaciindi cili mbocibede. Kulubazu lumwi, Bbaibbele lyaamba kuti, “moyo uukkede upa buumi kumubili.” (Tus. 14:30) Aboobo ino mbuti mbotukonzya kucita ikuti mukwesu watunyemya mpoonya akubamba luumuno anguwe? Tulakonzya kucita boobo cakuzwidilila kwiinda mukutobela lulayo lwabusongo lwamu Bbaibbele.

15, 16. Ino mbuti mbotweelede kumusikila muntu umwi iwakatulubizyila?

¹⁵ Amubale Baefeso 4:26. Tatugambwi ciindi notuyandika kuliyumya kukupenzyegwa kuli munyika. Pele ciindi musyomima naa munamukwasyi naamba naa naacita cintu cimwi catucisa kapati, tulakonzya kutyompwa. Ino mbuti kuti naa tatucikonzyi kuciluba buyo cacitika? Sena tuyoozumanana kunyema kwamyaka minji? Naa tuyootobela lulayo lwabusongo lwamu Bbaibbele lwakubamba twaambo cakufwambaana? Ikuti twatola ciindi cilamfwu kubamba twaambo, ciyootuyumina kubamba luumuno amukwesu.

¹⁶ Amweezyeezye kuti mukwesu wamulubizyila pele tamukonzyi kuumuna buyo. Ino nintaamu nzi zibotu nzyomukonzya kubweza kutegwa mubambe luumuno? Cakusaanguna, amupaile kuli Jehova kuzwa ansi amoyo. Amumulombe kutegwa amugwasye kuba amubandi ugwasya amunyoko. Amuyeeye kuti, ngumwi wabalongwe  ba Jehova. (Int. 25:14) Leza ulamuyanda. Jehova ulabacitila caluzyalo balongwe bakwe, alimwi ncalangila akulindiswe. (Tus. 15:23; Mt. 7:12; Kol. 4:6) Mpoonya, amwiinduluke mumizeezo yanu ncomulaambe. Mutayeeyeli kuti munyoko wacitila caali kutegwa amunyemye; amumubone munzila iiluzi. Alimwi kamuzyi kuti munzila imwi ambweni andinywe mwakapa kuti cibe boobo. Mulakonzya kutalika mubandi kwiinda mukwaamba majwi mbuli aakuti, “Ambweni ndime ndakacibweza butaasi, pele ciindi nomwakali kwaambaula andime jilo, ndakalimvwa . . . ” Ikuti mubandi watalika kuba mbomwatali kuyeeyela, amujane nzila imbi yakubamba luumuno. Aciindi eeci, amumupailile munyoko, amumulombe Jehova kuti amulongezye. Amumulombe Jehova kutegwa amugwasye kubikkila maano kubube bubotu bwamunyoko. Kufwumbwa mbozikonzya kuba, mulakonzya kuba masimpe kuti Jehova uyookukkomanina kusolekesya kwanu kubamba luumuno amunyoko—imulongwe wa Leza.

17. Ino ninzila nzi Jehova njakonzya kubelesya kutegwa tujokele munzila yeelede ciindi notwacita cibi, alimwi ino nkaambo nzi ncotweelede kugwasyigwa abubambe oobu?

¹⁷ Bamwi balimvwa kuteelela kubelekela Jehova akaambo kakuti bakacita cibi cipati. Cibi cilakonzya kuba mbuli simalelo silunya. Mwami Davida, iwakapenga akaambo kacibi wakaamba boobu: “Ciindi nindakaumwine buyo, ndakagonkelwa mumafwuwa akaambo kakutongela buzuba boonse. Nkaambo isyikati amasiku ijanza lyako lyakandilemena.” Cikkomanisya ncakuti, Davida wakalilwana penzi cabusicamba, mbuli muntu uusimide kumuuya. Wakalemba kuti: “Mpoonya ndakalyaambilila cibi cangu kulinduwe . . . Eelyo yebo wakandijatila mulandu wazibi zyangu.” (Int. 32:3-5) Ikuti naa mwakacita cibi cipati, Jehova ulilibambilide kumugwasya kutegwa mujokele munzila yeelede. Pele mweelede kulutambula lugwasyo ndwapa kwiinda mumbungano. (Tus. 24:16; Jak. 5:13-15) Mutawayi-wayi pe—buumi bwanu butamani bwakumbele buli muntenda! Pele ino kuti, nokuba kuti kwainda ciindi cilamfwu kuzwa nomwakalekelelwa cibi eeco, manjezyeezya aanu acimukatazya kujatikizya zibi nzyomwakacita kaindi?

18. Ino cikozyanyo ca Paulo inga cabagwasya buti aabo bapenga akaambo kakulimvwa kuti tabeeleli?

¹⁸ Cakutadooneka kwakali ziindi zimwi mwaapostolo Paulo naakali kutyompwa akaambo kazintu zibi nzyaakacita kaindi. Wakazuminizya ategwa: “Ndendime muniini akati kabaapostolo boonse, alimwi tandeeleli kwiitwa kuti ndimwaapostolo, nkaambo ndakapenzya mbungano ya Leza.” Nokuba boobo, Paulo wakayungizya kuti: “Pele kwiinda muluzyalo lwa Leza ndili boobu mbondibede lino.” (1Kor. 15:9, 10) Jehova wakamutambula Paulo mbweena mbwaakabede, alimwi wakali kuyanda kuti Paulo kazyi oobo. Kuti naa mwakeempwa ncobeni kujatikizya zibi zyanu zyakaindi alimwi mwakalyaambilila, mulakonzya kuba masimpe kuti Jehova uyoomufwida luse. Aboobo amulisyome jwi lya Jehova, alimwi akutambula kulekelela kwakwe!—Is. 55:6, 7.

19. Ino lugwalo lwamwaka wa 2018 ndugwalo nzi, alimwi nkaambo nzi ncolweelela?

¹⁹ Bweende bwazintu oobu mbobuyaabuya kumamanino, tulakonzya kulangila kuti zintu zitukatazya mubuumi ziyooyungizyika. Nokuba boobo, amusyome kuti, ooyo uupa ‘muntu uukatede nguzu alimwi abaabo batajisi nguzu uubapa nguzu zinji’ ulakonzya kumupa kufwumbwa nzyomuyandika kutegwa muzumanane. (Is. 40:29; Int. 55:22; 68:19) Mumwaka wa 2018, tunakuyeezyegwa kujatikizya kasimpe aaka kayandika kapati ciindi coonse notujanika kumiswaangano ku Ŋanda ya Bwami. Kali mumajwi aatondezyedwe mu Ŋanda ya Bwami kuzwa mulugwalo lwesu lwamwaka lwakuti: “Aabo balangila Jehova bayooba anguzu.”—Is. 40:31.