1. Ino nkaambo nzi ciindi ncotupona ncocilibedelede?

TUPONA muciindi cilibedelede kapati mubuumi bwabantu. Kweelana ambolyakasinsima Bbaibbele, Jehova uli mukubunganya “nkamu mpati yabantu . . . ibazwa muzisi zyoonse, mumisyobo yoonse, mumikowa yoonse alimwi amumilaka.” Aabo ibabunganizyigwa babamba “cisi cilaanguzu” cabantu bakkomene ibainda ku 8 miliyoni balo ‘ibamubelekela [Leza] mulimo uusetekene isyikati amasiku.’ (Ciy. 7:9, 15; Is. 60:22) Kunyina nokwakabede kale ibantu banji boobu ibamuyanda Leza alimwi abantunyina.

2. Ino musyobo nzi waluyando uutali kabotu uulibonya mubantu bazandukide kuli Leza? (Amubone cifwanikiso icili kumatalikilo aacibalo.)

² Nokuba boobo, alimwi Magwalo akasololelwa amuuya akaambila limwi kujatikizya mazuba eesu, imusyobo waluyando uutali kabotu uusumpula kuliyanda kuti uyootondezyegwa abantu bazandukide kuli Leza. Mwaapostolo Paulo wakalemba kuti: “Kumazuba aamamanino . . . , bantu bayooba basikuliyanda, bayandisya mali, . . . bayandisya zyakulikondelezya kwiinda kuyandisya Leza.” (2Tim. 3:1-4) Musyobo waluyando ooyu uusumpula kuliyanda uliindene aluyando lwa  Bunakristo; taweendelani pe. Kubikkila maano kumbaakani zisumpula kuliyanda takuleteli lukkomano ndobalangila bantu. Masimpe, luyando luli boobo lusumpula kuliyanda kwamunyika ‘iikatazya.’

3. Ino ncinzi ncotutiilange-lange mucibalo eeci, alimwi nkaambo nzi?

³ Paulo wakalizyi kuti kuliyanda ooko ikwakadumide, kwakali kukonzya kuleta ntenda ku Banakristo. Aboobo, wakacenjezya ‘kubatantamuka’ aabo ibatondezya musyobo waluyando uutali kabotu. (2Tim. 3:5) Nokuba boobo, tatukonzyi kubatantamukila limwi bantu ibali boobo. Aboobo mbuti mbotukonzya kubutantamuka bube bwamunyika ibutuzingulukide mpoonya akusolekesya kukkomanisya Jehova, Leza siluyando? Atweezyanisye luyando lwa Leza aluyando lupanduludwe mulugwalo lwa 2 Timoteyo 3:2-4. Kucita boobo kulatugwasya kulanga-langa akusinizya luyando ndotweelede kutondezya, musyobo waluyando uuletela kukkutila kwini-kwini alimwi alukkomano.

4. Ino nkaambo nzi ncocitalubide kuliyanda munzila yeelede?

⁴ Mwaapostolo iwakasololelwa amuuya wakalemba kuti: “Bantu bayooba basikuliyanda.” Sena cililubide kuliyanda? Peepe, cili kabotu, alimwi cilayandika kuliyanda tobeni munzila yeelede. Oobo mbombubo mbwaakatulenga Jehova. Jesu wakaamba kuti: “Weelede kuyanda simukobonyoko mbubonya mbuli mboliyanda omwini.” (Mk. 12:31) Ikuti katutaliyandi tobeni, tatukonzyi kubayanda basimukoboma. Alimwi mu Magwalo tubala kuti: “Balumi abalo beelede kuyanda bakaintu babo mbuli mbobayanda mibili yabo beni. Mwaalumi uuyanda mukaintu wakwe ulaliyanda mwini, nkaambo kunyina muntu wakasulide kale mubili wakwe mwini, pele ulausanina akuubamba kabotu.” (Ef. 5:28, 29) Aboobo, kuliyanda munzila yeelede kuli kabotu.

5. Ino inga mwabapandulula buti aabo ibaciindizya kuliyanda?

⁵ Kuliyanda ikwaambidwe mulugwalo lwa 2 Timoteyo 3:2 takuli kabotu pe. Nkuliyanda kwalo ikulemenena buyo kulubazu lomwe. Bantu ibaliyanda cakwiindilila babikkila kapati maano lwabo beni kwiinda mbokweelede. (Amubale Baroma 12:3.) Mubuumi bwabo bayanda buyo zintu zigwasya mbabo balikke. Tabababikkili maano bamwi. Ikuti zintu zyanyongana, batongooka bamwi muciindi cakuzumina bulubizi mbobacita. Bbuku limwi lipandulula makani aamu Bbaibbele lyakaamba baabo ibaliyanda kuti bali mbuli kanyama kategwa “hedgehog kalo . . . ikalivwunga kuba mbuli bbola, kutegwa kakasaalilwe kalikke mpokali aakati akaambo kaboya mbokajisi . . . akusiya buyo moongolola kutunyama tutajisi boya bwakulikasaazya.” Bantu ibaliyanda bali boobo mubwini tabakkomene pe.

6. Ino mbubotu nzi buboola akaambo kaluyando lwa Leza?

⁶ Basikwiiya zyamu Bbaibbele baamba kuti amulongo wabube butali kabotu ngwaakalemba mwaapostolo Paulo kuti buyoovwula kapati kumazuba aamamanino, kuliyanda nkokusaanguna akaambo kakuti bube bumbi boonse buzwa kukuliyanda. Mukwiimpana, bantu ibamuyanda Leza batondezya musyobo wabube bwiindene kapati. Bbaibbele liswaanganya luyando lwabunaleza kulukkomano, luumuno, kukkazika moyo, luzyalo, bubotu, lusyomo, kubomba moyo alimwi akulilesya. (Gal. 5:22, 23) Sintembauzyo wakalemba kuti: “Balikkomene bantu aabo bajisi Jehova kali Leza wabo!” (Int. 144:15) Jehova ngu Leza uukkomene, alimwi bantu bakwe balatondezya bube oobo. Kuyungizya waawo, mukwiimpana abaabo ibaliyanda alimwi ibayanda buyo kutambula, babelesi ba Jehova balakkomana kulyaaba kutegwa bagwasye bamwi.—Mil. 20:35.

7. Ino mibuzyo nzi iyootugwasya kulanga-langa mbolubede luyando lwesu kuli Leza?

⁷ Ino mbuti mbotukonzya kuzyiba kuti luyando lwesu kuli Leza luli mukunjililwa busena  akuliyanda? Amubone kucenjezya ikuli kulugwalo lwa Bafilipi 2:3, 4 ilwaamba kuti: “Mutaciti cintu cili coonse amuuya wakuzwangana naa cakulisumpula, pele amucite zintu zyoonse cakulicesya akubona bamwi kuti balamwiinda. Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.” Tulakonzya kulibuzya kuti: ‘Sena ndilalubelesya lulayo oolu mubuumi bwangu? Sena ndili mukuyandaula kucita kuyanda kwa Leza kuzwa ansi amoyo? Sena ndilasoleka kugwasya bamwi, mumbungano alimwi amumulimo wamumuunda?’ Talili lyoonse nocili cuuba-uba kulyaaba. Ciyanda kubeleka canguzu alimwi akulyaaba. Pele ino ncinzi cikonzya kutupa kukkomana kapati kwiinda kuzyiba kuti tulakkomaninwa a Mweendelezi wabubumbo boonse?

8. Ino luyando lwa Leza lwabapa kucita nzi bamwi?

⁸ Luyando lwa Leza lwapa kuti bamwi baleke milimo yaatala kutegwa babelekele Jehova cakumaninina. Ba Ericka, ibakkala ku United States, mbaadokota mubusilisi. Pele muciindi cakuti babikkile maano kumulimo waatala mubusilisi, bakasala kuba bapainiya baciindi coonse alimwi babeleka muzisi zili mbozibede abalumi babo. Nobayeeya mulimo ngobabeleka, baamba kuti: “Zyakuluula zinji nzyotwajana mukubelekela muzisi zimbi, alimwi abalongwe mbotwajana, masimpe zyatugwasya kapati mubuumi bwesu. Ndicibeleka mulimo wabusilisi, pele ikucikonzya kubelesya ciindi cangu cinji alimwi anguzu mukugwasya bantu kumuuya alimwi akulanganya ziyandika mumbungano, kwandiletela lukkomano lwini-lwini alimwi akukkutila.”

9. Ino nkaambo nzi kuyandisya mali ncokutaleteli lukkomano?

⁹ Paulo wakalemba kuti bantu bayooba ‘basikuyandisya mali.’ Myaka iili mbwiibede yainda, mupainiya umwi mucisi ca Ireland wakabandika amwaalumi umwi kujatikizya Leza. Mwaalumi ooyo wakagusya mpotomona yakwe yamali, wagusya mali, waatambika mujulu, akwaamba cakulisumpula kuti, “Ooyu ngo leza wangu!” Nokuba kuti tabali banji bakonzya kwaamba caantangalala kujatikizya makani aaya, nyika izwide bantu bayandisya mali azintu nzyaakonzya kuula. Nokuba boobo, Bbaibbele licenjezya kuti: “Muntu uuyandisya nsiliva takakkutili ansiliva pe, awalo muntu uuyandisya buvwubi takakkutili azyeezyo nzyajana.” (Muk. 5:10) Bantu bali boobo banooyanda mali manji lyoonse, alimwi akusolekesya kutegwa baajane, bayooliletela “macise manji.”—1Tim. 6:9, 10.

10. Ino ncinzi Aguri ncaakalemba kujatikizya buvwubi abucete?

¹⁰ Mubwini, toonse tulaayanda mali. Alakonzya kutukwabilila mumbazu zimwi. (Muk. 7:12) Pele sena muntu ulakonzya kukkomana ncobeni ikuti kajisi buyo zintu nzyayandika? Inzya! (Amubale Mukambausi 5:12.) Aguri mwana wa Jake wakalemba kuti: “Utandipi bucete naa buvwubi. Andilye buyo cakulya cindikkwene.” Tulakonzya kumvwisya kaambo ncaatakali kuyanda kucetaalila limwi. Mbubwenya mbwaakayungizya kupandulula, tanaakali kuyanda kusunkwa kubba nkaambo kubba kwakali kukonzya kuleta masampu kuli Leza. Pele ino nkaambo nzi ncaakapaila kuti atabi muvwubi kapati? Wakalemba kuti: “Kutegwa nditakkuti mpoonya akukukaka kandaamba kuti, ‘Ino Jehova nguni?’” (Tus. 30:8, 9) Ambweni mulakonzya kuyeeya bantu bamwi ibasyoma lubono lwabo muciindi cakusyoma Leza.

11. Ino ndulayo nzi Jesu ndwaakapa kujatikizya mali?

¹¹ Aabo ibayandisya mali tabakonzyi kumukkomanisya Leza. Jesu wakaamba kuti: “Taakwe uukonzya kubelekela basimalelo bobilo; nkaambo uyoosula umwi akuyanda umbi, naa uyoosyomeka kuli umwi akusampula umbi. Tamukonzyi kubelekela Leza alimwi a Lubono.” Wakayungizya kwiinda mukwaamba kuti: “Amuleke kuliyobweda lubono anyika, aawo mpoluligwa zyuuka ankalaya alimwi ababbi mpobanjila akubba. Muciindi caboobo, amuliyobwede lubono kujulu, kwalo nkolutaligwi azyuuka naa nkalaya  alimwi ababbi nkobatanjili akubba.”—Mt. 6:19, 20, 24.

12. Ino mbuti buumi buuba-uba mbobukonzya kupa kuti cuube-ube kubelekela Leza? Amupe cikozyanyo.

¹² Banji bakajana kuti kupona buumi buuba-uba takubaleteli buyo lukkomano pele alimwi kubapa ciindi cinji cakubelekela Jehova. Ba Jack, ibakkala ku United States, bakasambala ŋanda yabo mpati alimwi amakwebo nkaambo bakalizyi kuti kucita boobo kwakali kukonzya kupa kuti bacikonzye kubeleka mulimo wabupainiya antoomwe abakaintu babo. Bakaamba kuti: “Cakali ciyumu kusambala ŋanda yesu mbotu, mayake antoomwe abusena ibwakali mucisi. Pele kwamyaka minji, ndakali kusika kuŋanda kandityompedwe akaambo kamapenzi aakumulimo. Bakaintu bangu, bapainiya baciindi coonse, bakalikkomene kapati ciindi coonse. Bakali kwaamba kuti, ‘Ndilijisi mupati wamulimo wiinda boonse!’ Lino mbwaanga andime ndili mupainiya, toonse tobilo tubelekela muntu omwe, Jehova.”

13. Ino mbuti mbotukonzya kuzyiba mbuli mbotwaabona mali?

¹³ Kutegwa tuzyibe mbuli mbotwaabona mali, inga twalanga-langa cakusyomeka mbuli mbotukonzya kwiingula mibuzyo eeyi: ‘Sena masimpe ndilasyoma alimwi akupona kweelana ancolyaamba Bbaibbele kujatikizya mali? Sena kujana mali nkokuli mubusena bwakusaanguna mubuumi bwangu? Sena zintu zyakumubili ndizibona kuba zintu ziyandika kapati kwiinda cilongwe cangu a Jehova alimwi abantu? Sena masimpe ndisyoma muli Jehova kuti kandipa nzyondiyandika?’ Tulakonzya kuba masimpe kuti kunyina nayoobalekelezya aabo ibamusyoma.—Mt. 6:33.

14. Ino mbuti mbotukonzya kukubona munzila iili kabotu kulikondelezya?

¹⁴ Kweelana ambokwakasinsimwa, bantu banji mazuba aano “bayandisya zyakulikondelezya.” Mbubwenya mbocitalubide kukubona munzila yeelede kuliyanda alimwi amali, kunyina cilubide kukubona munzila yeelede kulikondelezya. Jehova tayandi kuti katuciindizya kuliimya naa kutantamuka zintu zili kabotu izikonzya kutuletela lukkomano. Bbaibbele likulwaizya baabo basyomeka kuti: “Koya, ukalye cakulya cako kokkomene akunywa waini wako amoyo uukondedwe.”—Muk. 9:7.

15. Ino nkulikondelezya kuli buti ikwaambwa kulugwalo lwa 2 Timoteyo 3:4?

¹⁵ Lugwalo lwa 2 Timoteyo 3:4 lwaamba kujatikizya  zyakulikondelezya zitamubikkilizyi Leza. Amubone kuti lugwalo talwaambi kuti bantu banooyanda zyakulikondelezya kapati kwiinda Leza, ikwaamba kuti banoojisi luyando lusyoonto kulinguwe. Lwaamba kuti ‘kwiinda Leza.’ Syaazibwene umwi wakalemba kuti: “Cakutadooneka lugwalo oolu talwaambi kuti alimwi balamuyanda Leza asyoonto. Lwaamba kuti tabamuyandi Leza naaceya pe.” Eelo kaka ooku nkucenjezya kupati nkobeelede kuyeeyesya aabo ibayandisya kulikondelezya! Majwi aakuti “bayandisya zyakulikondelezya” cakweelela aamba baabo ‘banyonganizyigwa . . . azyakulikondelezya zyamubukkale oobu.’—Lk. 8:14.

16, 17. Ino ncikozyanyo nzi Jesu ncaakapa mumakani aakulikondelezya?

¹⁶ Jesu wakatondezya cakulondoka kuti kulikondelezya ukubona munzila yeelede. Wakajanika ‘kupobwe lyabwiinga’ alimwi ‘akupobwe pati.’ (Joh. 2:1-10; Lk. 5:29) Kubwiinga, camaleele wakasandula maanzi kuba waini, walo iwakalimanide. Mpoonya aciindi cimwi, wakaikazya mizeezo yabaabo ibakali kulibona kululama balo ibakali kumupa mulandu akaambo kakulya akunywa.—Lk. 7:33-36.

¹⁷ Pele Jesu kunyina naakabikkila kapati maano kuzyakulikondelezya. Wakabikka Jehova mubusena bwakusaanguna alimwi akulitakata kubelekela bamwi. Aboobo kutegwa banji bakazumanane kupona, cakulyaaba wakaliyumya kulufwu lucisa acisamu cakupenzyezya. Naakali kwaambila baabo ibakali kuyootobela mikondo yakwe, Jesu wakaamba kuti: “Mulikkomene nywebo ciindi bantu nobamusampaula akumupenzya akumubejelezya zintu zibi ziindene-indene akaambo kandime. Amukondwe akusekelela, mbwaanga bulumbu bwanu mbupati kujulu, nkaambo mbubonya oobo mbubakabapenzya basinsimi ibakamusaangunina.”—Mt. 5:11, 12.

18. Ino mibuzyo nzi iyootugwasya kuzyiba mbuli mbotukuyandisya kulikondelezya?

¹⁸ Ino mbuti mbotukonzya kuzyiba mbuli mbotukuyandisya kulikondelezya? Tulakonzya kulibuzya kuti: ‘Sena miswaangano amulimo wamumuunda zili mubusena bwabili kuzwa kukulikondelezya? Sena ndililisungwide kuliimya akaambo kakuyanda kubelekela Leza? Ciindi nondiyandaula zyakulikondelezya, sena ndilabikkila maano kubona mbuli Jehova mbwayoozibona zyakusala zyangu?’ Kuti katumuyanda ncobeni Leza, tuyoobona masimpe kuti twazitantamuka zintu kutali buyo nzyotuzyi kuti tazikkomanini pele azyeezyo nzyotuyeeyela kuti inga tazikkomanini.—Amubale Matayo 22:37, 38.

19. Ino mbaani ibatakonzyi kukkomana ncobeni?

¹⁹ Lino kwiindide myaka iisika ku 6,000 kabapenga bantu, nyika ya Saatani ilaafwaafwi kumana. Nyika izwide bantu ibaliyanda cakuzwa munzila, ibayandisya mali alimwi azyakulikondelezya. Mbantu ibabikkilide maano kujana kufwumbwa nzyobayanda, alimwi ibabikka zintu nzyobayandisya lwabo beni mubusena bwakusaanguna mubuumi bwabo. Bantu ibali boobo kunyina nobakonzya kukkomana ncobeni. Muciindi caboobo, cili buyo mbubonya mbwaakalemba sintembauzyo kuti: “Ulikkomene ooyo uujisi Leza wa Jakobo kali mugwasyi wakwe, uulangila Jehova Leza wakwe.”—Int. 146:5.

20. Ino mbuti luyando lwa Leza mbolwamuletela lukkomano?

²⁰ Luyando lwa Leza nkoluli akati kabantu ba Jehova, alimwi tuyaabuvwula mwaka amwaka. Oobu mbumboni bwakuti Bwami bwa Leza bulalela alimwi ino-ino buyooleta zilongezyo zitaambiki anyika. Lukkomano lwini-lwini alimwi lutamani lulaboola kwiinda mukucita kuyanda kwa Leza, akuzyiba kuti tukkomanisya Mupatikampatila. Alimwi aabo ibamuyanda Jehova bayookkomana kukabe kutamani! Mucibalo citobela, tuyoolanga-langa bube bumwi ibuboola akaambo kakuliyanda alimwi akubona mbobwiindene abube bujanwa akati kababelesi ba Jehova.