1-2. Ino ncinzi mungelo ncaakaambila bamakaintu kucuumbwe ca Jesu, alimwi malailile nzi Jesu lwakwe ngaakabapa?

AKALI mafwumofwumo, mu Nisani 16, 33 C.E. Bamakaintu bayoowa Leza, kalibalekede kapati bakaunka kucuumbwe nkwaakazikkilidwe Mwami Jesu Kristo, lino kwakaindide mazuba obilo kuzwa ciindi naakazikkwa. Ciindi nobakasika munsi-munsi aacuumbwe, kabajisi makanze aakubikka tununkilizyo akuunanika mafwuta aanunkilila mubili, bakagambwa kapati kujana kuti mubili tiiwakaliko mucuumbwe! Mungelo wakaambila bamakaintu aaba kuti Jesu wabusyigwa kuzwa kubafwu, alimwi wakayungizya kuti: “Wamusolweda kuya ku Galilaya. Muyoomubona okuya.”—Mt. 28:1-7; Lk. 23:56; 24:10.

² Bamakaintu nobakazwa kucuumbwe, Jesu lwakwe wakabayaanya akubaambila kuti: “Kamuya, mukabaambile bakwesu kuti baunke ku Galilaya, eelyo ooko bayoondibona.” (Mt. 28:10) Kweelede kuti Jesu wakajisi malailile aayandika kapati ngaakali kuyanda kwaambila basikwiiya bakwe, nkaambo ooyu ngomuswaangano wakusaanguna ngwaakapanga naakabusyigwa!

3-4. Nkaambo nzi ncotukonzya kwaamba kuti malailile aali kulugwalo lwa Matayo 28:19, 20 tanaakapegwa buyo kubaapostolo balikke? (Amubone cifwanikiso icili aacivwumbyo.)

³ Amubale Matayo 28:16-20. Amuswaangano ooyo Jesu ngwaakapanga, wakaamba mulimo uuyandika kapati basikwiiya ngobakeelede kubeleka mumwaanda wamyaka wakusaanguna nkokuti, mulimo nguwenya ngotuli mukuzuzikizya mazuba aano. Jesu wakati: “Aboobo kamuya mukayiisye bantu bazisi zyoonse kuti babe basikwiiya, . . . mukabayiisye kutobela zintu zyoonse nzyondakamulailila.”

 ⁴ Jesu uyanda kuti basikumutobela boonse kabakambauka. Malailile aaya tanaakaapa buyo kubaapostolo bakwe bali 11 ibasyomeka. Ino tuzyi buti oobo? Ciindi Jesu naakapa mulawo ooyu wakuyiisya bantu kuba basikwiiya, kwakali bantu banji kunze buyo lyabaapostolo acilundu mu Galilaya. Ino tuzyi buti oobo? Amuyeeye kuti mungelo wakaambila bamakaintu kuti: “Muyoomubona  [ku Galilaya].” Aboobo kweelede kuti bamakaintu basyomeka aaba abalo bakaliko amuswaangano ooyo. Pele tabali buyo mbabo balikke ibakaliko. Mwaapostolo Paulo wakaamba kuti Jesu “wakalibonya kubakwesu bainda ku 500 aciindi comwe.” (1Kor. 15:6) Ikuli?

5. Ncinzi citupa kusyoma kuti lugwalo lwa 1 Bakorinto 15:6 lwaamba muswaangano waku Galilaya iwaambidwe ku Matayo caandaano 28?

⁵ Tulijisi twaambo tubotu itutupa kusyoma kuti Paulo wakali kuyeeya muswaangano nguwenya ooyo waku Galilaya iwaambidwe kulugwalo lwa Matayo caandaano 28. Ino ntwaambo nzi ooto? Kakusaanguna, basikwiiya ba Jesu banji bakali bana Galilaya. Aboobo cakali cuuba-uba kuba amuswaangano abantu banji kucilundu ku Galilaya ikutali muŋanda yamuntu ku Jerusalemu. Kabili, Jesu iwakabusyigwa wakaliswaangene kale abaapostolo bakwe ibali 11 muŋanda ku Jerusalemu. Ikuti Jesu naakali kuyanda kupa malailile aajatikizya kukambauka alimwi akugwasya bantu kuba basikwiiya kubaapostolo balikke, naakacita oobo ku Jerusalemu muciindi cakubalomba balo, bamakaintu aabo alimwi abantu bambi buyo kuti bakaswaangane anguwe ku Galilaya.—Lk. 24:33, 36.

6. Mbuti lugwalo lwa Matayo 28:20 mbolutondezya kuti mulawo wakugwasya bantu kuba basikwiiya ulabeleka amazuba aano, alimwi ino bantu bautobela buti?

⁶ Amubone kaambo katatu ikayandika kapati. Mulawo wa Jesu wakugwasya bantu kuba basikwiiya tiiwakapegwa buyo ku Banakristo ibakali kupona mumwaanda wamyaka wakusaanguna. Ino tuzyi buti oobo? Jesu wakamanizya kupa malailile kuli basikumutobela kwiinda mukwaamba majwi aakuti: “Ndilaandinywe mazuba oonse mane kusikila kumamanino aabweende bwazintu.” (Mt. 28:20) Mbubwenya mbwaakaamba Jesu, bantu banji mazuba aano bali mukutola lubazu mumulimo wakugwasya bantu kuba basikwiiya. Amuciyeeyele buyo! Bantu batandila ku 300,000 mwaka amwaka balabbapatizyigwa kuba Bakamboni ba Jehova alimwi akuba basikwiiya ba Jesu Kristo.

7. Ncinzi ncotutiibandike lino alimwi nkaambo nzi?

⁷ Basikwiiya Bbaibbele banji balaunka ambele akubbapatizyigwa. Nokuba boobo, bamwi kuboneka kuti balawaya-waya kuba basikwiiya. Balazikkomanina nzyobaiya, pele tabaunki ambele kutegwa babbapatizyigwe. Ikuti naa kamusololela ciiyo ca Bbaibbele, tuli masimpe kuti mulayanda kumugwasya ngomwiiya limwi kuzitobela nzyaiya alimwi akuti abe sikwiiya wa Kristo. Mucibalo eeci tulabandika mbotukonzya kumusika amoyo sikwiiya alimwi ambotukonzya kumugwasya kuyaambele kumuuya. Nkaambo nzi ncotweelede kukabandika kaambo aaka? Akaambo kakuti aciindi cimwi inga twayandika kusala naa tweelede kuzumanana aciiyo eeco naa pe.

8. Nkaambo nzi ncocikonzya kukatazya kubasika amoyo basikwiiya?

⁸ Jehova uyanda kuti bantu kabamubelekela akaambo kakuti balamuyanda. Aboobo makanze eesu ngakugwasya basikwiiya besu kumvwisya kuti Jehova ulabalanganya alimwi akuti ulabayanda kapati. Tuyanda kubagwasya kuzyiba kuti Jehova ngu “usyi wabamucaala alimwi mukwabilizi wabamukabafwu.” (Int. 68:5) Ciindi basikwiiya Bbaibbele banu baakubona kuti Leza ulabayanda kapati, ambweni abalo bayootalika kumuyanda. Basikwiiya Bbaibbele bamwi cilakonzya kubayumina kubona Jehova kuba Usyi siluyando akaambo kakuti kunyina nobakatondezyegwa luyando abamausyi. (2Tim. 3:1, 3) Aboobo ciindi nomusololela ciiyo, amukankaizye kujatikizya  bube bubotu mbwajisi Jehova. Amubagwasye basikwiiya banu kumvwisya kuti Leza wesu siluyando uyanda kuti bakajane buumi butamani, alimwi ulilibambilide kubagwasya kutegwa bakacikonzye kucita oobo. Ncinzi acimbi ncotweelede kucita?

9-10. Ino mabbuku nzi ngotweelede kubelesya ciindi notusololela ziiyo zya Bbaibbele, alimwi nkaambo nzi ncotweelede kwaabelesya mabbuku aayo?

⁹ Amubelesye bbuku lyakuti “Ncinzi Bbaibbele Ncolituyiisya?” alimwi alyakuti “Mbomukonzya Kukkala Muluyando lwa Leza.” Mabbuku aaya akalembelwa kutugwasya kubasika amoyo basikwiiya besu. Mucikozyanyo, cibalo 1 cabbuku lya Bbaibbele Ncolituyiisya cilapa bwiinguzi kumibuzyo eeyi yakuti: Sena Leza ulatubikkila maano naa ngusilunya? Ino Leza ulimvwa buti ciindi bantu nobapenga? alimwi awakuti Sena mulakonzya kuba mulongwe wa Jehova? Mbuti kujatikizya bbuku lya Luyando lwa Leza? Bbuku eeli liyoomugwasya sikwiiya kumvwisya kuti kutobela njiisyo zyamu Bbaibbele kulakonzya kumupa kuba abuumi bubotu alimwi akuba acilongwe ciyumu a Jehova. Nokuba kuti mwakaayiya kale mabbuku aaya abasikwiiya bamwi, amulibambile  kabotu ciiyo cimwi acimwi alimwi akuziyeeya zintu zigaminide nzyayandika lugwasyo sikwiiya.

¹⁰ Pele ino ncinzi ncomweelede kucita ikuti naa sikwiiya wanu kuli kaambo kambi nkayandisya kuzyiba, pele bbuku libandika kaambo aako taliko mucibeela ca Zibelesyo Nzyotubelesya Kapati Mukuyiisya? Ambweni mulakonzya kumukulwaizya kulibalila mubbuku eelyo kutegwa muzumanane kusololela ciiyo mumabbuku ngotwakapegwa kuti katubelesya notusololela ciiyo ca Bbaibbele.

11. Ndiilili notweelede kutalika ciiyo amupailo akujala amupailo, alimwi nkaambo nzi ncociyandika kupandulula mbouyandika mupailo?

¹¹ Amutalike ciiyo amupailo. Mubwini, cilagwasya kapati kutalika ciiyo alimwi akujala amupailo kakutanainda ciindi cilamfwu kuzwa nomwatalisya ciiyo. Kanji-kanji, mweelede kucita oobo nsondo zisyoonto buyo kuzwa nomwatalisya ciiyo ca Bbaibbele cisitikide. Tweelede kumugwasya sikwiiya kuzyiba kuti tulakonzya kulimvwisya Jwi lya Leza lilikke buyo kuti twagwasyigwa amuuya wa Leza. Basikuyiisya Bbaibbele bamwi balapandulula mbokuyandika kupaila aciiyo kwiinda mukubala lugwalo lwa Jakobo 1:5, ilwaamba kuti: “Ikuti muntu umwi akati kanu kabulizyide busongo, azumanane kumulomba Leza.” Mpoonya balamubuzya sikwiiya kuti, “Mbuti mbotukonzya kumulomba busongo Leza?” Sikwiiya ulakonzya kwiingula kuti, nkwiinda mukupaila kuli Leza.

12. Mbuti mbomukonzya kulubelesya lugwalo lwa Intembauzyo 139:2-4 kugwasya sikwiiya kubona mbwakonzya kupaila mipailo iimvwika?

¹² Amumuyiisye sikwiiya wanu mbwayelede kupaila. Amumupandulwide kuti Jehova ulayanda kuuswiilila mupailo wakwe uuzwa ansi aamoyo. Amumupandulwide kuti mumipailo yesu yakaumuumu, tulakonzya kumwaambila Jehova zyoonse izili mumoyo, nkokuti kumwaambila mbotulimvwa calo ncotutakonzyi kwaambila muntu uuli woonse. Alimwi buya, Jehova uliizyi kale mizeezo yesu iili ansi aamoyo. (Amubale Intembauzyo 139:2-4.) Alimwi tulakonzya kumukulwaizya sikwiiya wesu kulomba lugwasyo lwa Leza kutegwa acikonzye kucinca mizeezo mibyaabi alimwi akuzunda zilengwa zibyaabi. Mucikozyanyo, amweezyeezye kuti muntu umwi iwali kwiiya kwaciindi cilamfwu uyandisya buzuba bwakulyookezya bumwi ibwakatalisyigwa abantu batakombi Leza. Ulizyi kuti eeci cililubide, pele ucizikkomanina zintu zimwi ziswaangene abuzuba bwakulyookezya oobo. Amumukulwaizye kumwaambila Jehova bwini mbwalimvwa alimwi akulomba lugwasyo kutegwa kayanda buyo eezyo Leza nzyayanda.—Int. 97:10.

13. (a) Nkaambo nzi ncotweelede kufwambaana kubatamba kumiswaangano basikwiiya besu? (b) Mbuti mbotukonzya kupa kuti sikwiiya alimvwe kwaanguluka ku Ŋanda ya Bwami?

¹³ Cakufwambaana amumutambe sikwiiya wanu kumiswaangano. Nzyakonzya kumvwa alimwi akubona sikwiiya kumiswaangano ya Bunakristo zilakonzya kumusika amoyo alimwi akumugwasya kuyaambele. Amumutondezye kavidiyo kakuti Ino Ncinzi Cicitika ku Ŋanda ya Bwami? alimwi akumutamba kuti akamusangane. Ikuti kacikonzyeka, mulakonzya kumugwasya kujana cakweendela kuunka kumiswaangano. Cilagwasya kapati kulomba basikumwaya baindene-indene kuti kabamusangana nomuunka kuyoosololela ciiyo. Kwiinda mukucita boobo, sikwiiya wanu uyoobazyiba bamwi mumbungano alimwi cakutadooneka uyoolimvwa kwaanguluka ciindi najanika kumiswaangano yesu.

14. Ino ncinzi cikonzya kumukulwaizya sikwiiya kuyaambele kumuuya?

¹⁴ Makanze eesu ngakugwasya sikwiiya Bbaibbele wesu kuyaambele kumuuya. (Ef. 4:13) Ciindi umwi nazumina kwiiya Bbaibbele, ulakonzya kuyandisya kuzyiba mbwayoogwasyigwa kwiinda mukwiiya Bbaibbele. Mboluyaabukomena luyando lwakwe kuli Jehova, ulakonzya kutalika kuyeeya kuti weelede kugwasya bamwi, kubikkilizya abaabo ibali kale cibeela cambungano. (Mt.  22:37-39) Ikuti kacikonzyeka, amumwaambile coolwe cakugwasyilizya mulimo wa Bwami kwiinda mukusanga.

15. Mbuti mbotukonzya kumugwasya sikwiiya wesu kucita ciluzi ciindi najana mapenzi?

¹⁵ Amumuyiisye sikwiiya wanu ncakonzya kucita ciindi najana mapenzi. Mucikozyanyo, amweezyeezye kuti sikwiiya wanu, walo uuli ngusikumwaya uutanabbapatizyigwa, wamwaambila kuti kuli muntu umwi iwakamutyompya mumbungano. Mutamwaambili uuluzi alimwi ayooyo uulubizyide akati kabo, pele amumupandulwide ncayelede kucita kweelana ancolyaamba Bbaibbele. Ulakonzya kusala kumulekelela Munakristonyina naa ikuti katakonzyi kwaaluba buyo makani, ulakonzya kumusikila muntu ooyo caluzyalo alimwi caluyando kajisi makanze ‘aakumupilusya munyina.’ (Amweezyanisye Matayo 18:15.) Amumugwasye sikwiiya wanu ikulibambila nzyayakwaamba. Amumutondezye mbwakonzya kubelesya JW Library^® app, Bbuku Ligwasya Kuvwuntauzya lya Bakamboni ba Jehova alimwi a jw.org^® kutegwa aiye nzila zigwasya mbwakonzya kucita ciindi najana mapenzi. Ikuti naa waiya mbwakonzya kwaamana mapenzi ngajana abantu katanabbapatizyigwa, cakutadooneka uyoocikonzya kweendelana abantu mumbungano noliba leelyo aakubbapatizyigwa.

16. Mbubotu nzi buliko kwiinda mukutamba basikumwaya bamwi kuciiyo cesu?

¹⁶ Amubatambe bamwi mumbungano kuciiyo alimwi amulangizi wabbazu ciindi naswaya mbungano. Nkaambo nzi? Kuyungizya atwaambo twaambwa kale, basikumwaya bamwi balakonzya kumugwasya sikwiiya munzila njomutakonzyi nywebo. Mucikozyanyo, sikwiiya ulakonzya kuti walikusolekesya kwaziindi zinji kuti aleke cilengwa cakufweba, pele waalilwa kucileka. Aboobo, amutambe Kamboni umwi iwakazunda cilengwa eeci naakamana kusolekesya kwaziindi zinji pele kaalilwa kucileka, kuti amusangane kuciiyo. Kamboninyoko ooyu ulakonzya kumugwasya sikwiiya mumbazu zigaminide kujatikizya cilengwa eeci. Ikuti naa tamulimvwi kwaanguluka kusololela ciiyo nomuli aamukwesu uusimide, amumulombe kuti asololele nguwe mubukkale oobo. Ciindi nomutamba bamwi kuciiyo, sikwiiya wanu ulakonzya kugwasyigwa kuzwa kulimbabo. Amuyeeye kuti, makanze eesu ngakugwasya sikwiiya kuyaambele kumuuya.

17-18. Ino ncinzi ncomweelede kulanga-langa ciindi nomuyanda kusala ikuti naa mweelede kucileka kwiiya amuntu naa pe?

¹⁷ Ikuti naa sikwiiya Bbaibbele wanu kataunki ambele kumuuya, aciindi cimwi inga mwayandika kulibuzya kuti, ‘Sena ndeelede kucileka kwiiya amuntu ooyu?’ Kamutanasala ncomweelede kucita, mweelede kubulanga-langa bukkale bwamuntu ooyo. Bantu bamwi cilabatolela ciindi kutegwa bayaambele kwiinda bambi. Amulibuzye kuti: ‘Sena sikwiiya wangu uyaambele munzila yeelede kweelana abukkale bwakwe?’ ‘Sena wakatalika ‘kuzitobela,’ naa kuzibelesya zintu nzyaiya?’ (Mt. 28:20) Cilakonzya kutola ciindi kutegwa muntu umwi abe sikwiiya wa Kristo. Pele mukuya kwaciindi weelede kucinca.

 ¹⁸ Pele ino mbuti kuti naa muntu umwi iwali kwiiya kwaciindi cili mbocibede tatondezyi kuti ciiyo cilayandika kapati kulinguwe? Amubone bukkale oobu: Sikwiiya wanu wakalimanizya kuliiya bbuku lyakuti Bbaibbele Ncolituyiisya, alimwi ambweni wakatalika bbuku lyakuti Luyando lwa Leza, pele tanabuzuba wajanika kumiswaangano yambungano, nokuba ku Ciibalusyo! Alimwi kanji-kanji ulasotaukila kwiiya akaambo katwaambo tutayi koomoonga. Mubukkale buli boobo, mweelede kubandika anguwe cakutamwiinda mumbali. *

19. Ino ncinzi ncomukonzya kumubuzya sikwiiya uulibonya kuti talumbi kujatikizya ciiyo ca Bbaibbele, alimwi ncinzi ncomweelede kubikkila maano?

¹⁹ Inga mwatalika kwiinda mukubuzya sikwiiya kuti, ‘Ino muyeeya kuti ncinzi ciyoomukatazya kuba umwi wa Bakamboni ba Jehova?’ Sikwiiya ulakonzya kwiingula kuti, ‘Ndilayanda kwiiya Bbaibbele, pele kunyina nondiyooba umwi wa Bakamboni ba Jehova!’ Ikuti naa ngamakanze aakwe aaya naamana kwiiya kwaciindi cili mbocibede, sena inga tiimwacileka kwiiya amuntu uuli boobu? Nokuba boobo, sikwiiya wanu ulakonzya kumwaambila kwaciindi cakusaanguna icimupa kutayaambele. Mucikozyanyo, ulakonzya kulimvwa kuti takacikonzyi kukambauka kuŋanda aŋanda. Aboobo ciindi nomuzyiba mbwalimvwa, inga camugwasya kubona mbomukonzya kumugwasya.

20. Mbuti kulumvwisya lugwalo lwa Milimo 13:48 mbokukonzya kutugwasya kubona naa tweelede kuzumanana kusololela ciiyo naa pe?

²⁰ Cuusisya ncakuti, basikwiiya bamwi bali mbuli bana Israyeli bakuciindi ca Ezekieli. Kujatikizya bantu aaba, Jehova wakaambila Ezekieli kuti: “Bona! Yebo uli mbuli muntu wiimba nyimbo zibotu zyaluyando, iwiimba ajwi libotu alimwi uucibwene kulizya kantimbwa. Bayoomvwa majwi aako, pele kunyina naba omwe uuyakwaacita.” (Ezk. 33:32) Cilakonzya kutukatazya kwaambila muntu umwi kuti tulacileka kwiiya anguwe. Nokuba boobo, “ciindi casyaala caceya.” (1Kor. 7:29) Muciindi cakusowa ciindi cinji kusololela ciiyo ca Bbaibbele citaunki ambele, tweelede kujana muntu uutondezya kuti ‘ulilibambilide kutambula buumi butamani.’—Amubale Milimo 13:48.

21. Ino ndugwalo nzi lwamwaka wa 2020, alimwi nkaambo nzi ncolweelela?

²¹ Mumwaka wa 2020, lugwalo lwesu lwamwaka luyootugwasya kubikkila maano kapati kujatikizya mbotukonzya kuyaambele mumulimo wesu wakugwasya bantu kuba basikwiiya. Lujisi majwi aamwi ngaakaamba Jesu kumuswaangano uuyandika kapati acilundu ku Galilaya aakuti: “Aboobo kamuya mukayiisye bantu . . .  kuti babe basikwiiya, akubabbapatizya.”—Mt. 28:19.