1, 2. Nkaambo nzi ncotweelede kubandika makani aaya aajatikizya mbotukonzya kuumbulizya baabo ibakafwidwa? (Amubone cifwanikiso icili kumatalikilo aacibalo.)

BA SUSI bakaamba kuti: “Twakaciluuside kapati kakwiindide myezi minji kuzwa ciindi mwaneesu musankwa naakafwa.” Munakristo aumwi wakaamba kuti ciindi bakaintu bakwe nobakafwa cakutayeeyelwa, ‘moyo wakwe wakacisa citaambiki.’ Cuusisya ncakuti, bantu banji balausa munzila njiyona eeyi. Bantu banji mumbungano ya Bunakristo balakonzya kuti tiibakali kuyeeyela kuti muyandwa wabo inga wafwa kaitanasika Amagedoni. Kufwumbwa naa mwakafwidwa kale muyandwa wanu naa kuti kuli muntu ngomuzyi iwakafwidwa, ambweni inga mwabuzya kuti, ‘Ino mbuti aabo ibakafwidwa mbobakonzya kuumbulizyigwa mubuumba bwabo?’

² Ambweni mwakamvwa kale bantu kabaamba kuti zintu zilakonzya kuba kabotu mukuya kwaciindi. Nokuba boobo, sena eeci caamba kuti ciindi kucigama cilakonzya kupa kuti buumba bwamuntu bumane? Mukamufwu umwi wakaamba kuti, “Cintu cigwasya kapati kuti buumba bumane, nceeco ncacita muntu ciindi nali mubuumba.” Inzya, mbubwenya mbuli cilonda, kucisa kwamoyo kulakonzya kumana mukuya kwaciindi ikuti kwalanganizyigwa kabotu. Ino nintaamu  nzi zigaminide nzyomukonzya kubweza kutegwa mugwasye bantu bauside kuti buumba bwabo bumane?

3, 4. Ino nkaambo nzi ncotukonzya kusinizya kuti Jehova ulamvwisya ikaambo muntu uuli mubuumba ncayandika luumbulizyo?

³ Cakutadooneka, Jehova, Taateesu wakujulu silweetelelo ngonguwe uupa luumbulizyo. (Amubale 2 Bakorinto 1:3, 4.) Jehova, walo iwiinda kutondezya lweetelelo, wakaambila bantu bakwe kuti: “Mebo lwangu ndime uumuumbulizya.”—Is. 51:12; Int. 119:50, 52, 76.

⁴ Taateesu siluzyalo walo kumugama wakafwidwa kale bayandwa bakwe, mbuli Abrahamu, Izaka, Jakobo, Musa alimwi a Mwami Davida. (My. 12:6-8; Mt. 22:31, 32; Mil. 13:22) Ijwi lya Leza litwaambila kuti Jehova ulalangila kapati alimwi ulalindila cakuyandisisya eelyo nayoobusya bafwide. (Job. 14:14, 15) Aabo ibayoobusyigwa banookkomene alimwi banoopona buumi bubotu. Alimwi amuyeeye kuti Mwana wa Leza, walo “ngwaakali kuyanda kapati,” wakafwa lufwu lucisa kapati. (Tus. 8:22, 30) Majwi taakonzyi kupandulula bwini mbocakamucisa Jehova.—Joh. 5:20; 10:17.

5, 6. Ino muunzila nzi Jehova mwatuumbulizya?

⁵ Tulakonzya kuba alusyomo lutazungaani lwakuti Jehova uyootuumbulizya. Aboobo tatweelede kuwayawaya pe kupaila kulinguwe camoyo woonse kulomba lugwasyo kujatikizya buumba mbotujisi. Eelo kaka cilaumbulizya kapati kuzyiba kuti Jehova ulakumvwisya kucisa nkotumvwa alimwi ulapa luumbulizyo ndwayandika umwi aumwi wesu kumugama! Pele ino mbuti mbwacita oobo?

⁶ Nzila imwi Leza mbwatuumbulizya nkwiinda “muluumbulizyo lwamuuya uusalala.” (Mil. 9:31) Muuya uusalala wa Leza ninzila iiyandika kapati motujana luumbulizyo. Jesu wakasyomezya kuti Taateesu uuli kujulu caluyandisisyo ‘ulabapa muuya uusalala aabo ibamulomba.’ (Lk. 11:13) Ba Susi ibaambwa kumatalikilo aacibalo bakaamba kuti: “Kuli ziindi zinji notwakali kufwugama ansi kukombelezya Jehova kuti atuumbulizye. Muziindi zyoonse eezyo, masimpe luumuno lwa Leza lwakakwabilila myoyo yesu amizeezo yesu.”—Amubale Bafilipi 4:6, 7.

7, 8. Nkaambo nzi ncotukonzya kuba masimpe kuti Jesu ulakonzya kupa luumbulizyo?

⁷ Luzyalo lwa Jehova lwakatondezyegwa cakumaninina kwiinda mumajwi alimwi azintu nzyaakali kucita mwanaakwe silweetelelo, Jesu, ciindi naakali anyika. (Joh. 5:19) Jesu wakatumwa kutegwa aumbulizye “batyompedwe mumoyo,” alimwi ‘abaabo boonse ibalila.’ (Is. 61:1, 2; Lk. 4:17-21) Nkakaambo kaako ncaakali silweetelelo—ibube bwalo ibugwasya muntu kuzyiba mapenzi ngobajisi bantu alimwi ibupa muntu kuyandisya kubweza ntaamu yakumana mapenzi ngobajisi.—Heb. 2:17.

⁸ Cakutadooneka, ciindi Jesu naakacili mwana wakali kufwidwa banamukwasyi alimwi abalongwe. Kulibonya kuti Josefa, bausyi Jesu bakujana bakafwa ciindi Jesu naakacili mwaalumi mwana-mwana. * Amuyeeyele buyo Jesu mubombe moyo mbwaakalimvwa kusweekelwa bayandwa kacili mukubusi alimwi akuumbulizya banyina abanabokwabo balo ibakali mubuumba.

9. Mbuti Jesu mbwaakatondezya lweetelelo ciindi Lazaro naakafwa?

⁹ Ciindi Jesu naakatalika mulimo wakwe wakukambauka, wakali kubabikkila kapati maano bantu alimwi wakali kubeetelela. Mucikozyanyo, amubone ciindi mulongwe wakwe Lazaro naakafwa. Nokuba kuti Jesu wakalizyi kuti wakali  kuyoomubusya Lazaro, awalo wakausa alimwi cakamucisa mbubwenya mbuli Marta a Mariya. Lufwu oolo lwakamuyasa kapati kumoyo cakuti wakalila.—Joh. 11:33-36.

10. Nkaambo nzi ncotukonzya kusyoma kuti Jesu ulatweetelela mazuba aano?

¹⁰ Mbuti majwi ngaakaamba Jesu aakuumbulizya bamwi mbwaatugwasya kapati mazuba aano? Magwalo atukulwaizya kuti “Jesu Kristo tacinci pe, uli buyo mbubonya mbuli jilo asunu alimwi mane kukabe kutamani.” (Heb. 13:8) Mbwaanga “Musololi Mupati wabuumi” kumugama ulizyi mbocibede kuba mubuumba, “ulakonzya kubagwasya aabo ibasunkwa.” (Mil. 3:15; Heb. 2:10, 18) Aboobo tulakonzya kusyoma kuti Kristo wazumanana kubeetelela bantu noliba lino, ulabumvwisya buumba bwabo alimwi ulabaumbulizya “aciindi ceelede.”—Amubale Bahebrayo 4:15, 16.

11. Ino magwalo nzi aawumbulizya ngomuyandisya kapati?

¹¹ Cibalo icaamba kujatikizya buumba mbwaakajisi Jesu ciindi Lazaro naakafwa, ncikozyanyo comwe buyo icuumbulizya akati kazikozyanyo zinji nzyotujana mu Jwi lya Leza. Nkakaambo kaako, “zintu zyoonse izyakalembwa kaindi zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.” (Rom. 15:4) Ikuti naa muli mubuumba, andinywe mulakonzya kuumbulizyigwa amagwalo mbuli yaaya aatobela:

• “Jehova ulaafwaafwi abaabo batyompedwe mumoyo; aabo bapengede mumizeezo ulabafwutula.”—Int. 34:18, 19.

• “Mizeezo minji iilibilisya neyakandikatazya, yebo [Jehova] wakanduumbulizya akunditontozya.”—Int. 94:19.

• “Mwami wesu Jesu Kristo lwakwe a Leza Taateesu, ooyo wakatuyanda akutupa luumbulizyo lutamani abulangizi bubotu kwiinda muluzyalo lwakwe, abakkazike myoyo yanu akumuyumya mumilimo mibotu iili yoonse alimwi amajwi.”—2Tes. 2:16, 17. *

12. Ino ninzila nzi imwi mbotukonzya kuumbulizya bamwi?

¹² Kumwi nkobakonzya kujana luumbulizyo bantu, nkuumbungano ya Bunakristo. (Amubale 1 Batesalonika 5:11.) Ino mbuti mbomukonzya kubayumya alimwi akubaumbulizya aabo ‘bapengana mumizeezo’? (Tus. 17:22) Mutalubi kuti kuli “ciindi cakuumuna aciindi cakwaambaula.” (Muk. 3:7) Mukamufwu wazina lya Dalene wakapandulula kuti: “Bantu ibakafwidwa beelede kwaamba nzyobayeeya alimwi ambobalimvwa. Aboobo cintu ciyandika kapati ncomukonzya kucitila muntu iwakafwidwa, nkuswiilila kakunyina kumunjila mukanwa.” Ba Junia, ibakafwidwa mwanookwabo walo iwakalijaya bakayungizya kuti: “Nokuba kuti tamukonzyi kubumvwisya cakumaninina buumba mbobajisi bantu, iciyandika kapati nkuyandisya kuzyiba mbobalimvwa.”

13. Ncinzi ncotuteelede kuluba kujatikizya buumba?

¹³ Alimwi mutalubi kuti, muntu umwi aumwi uliindene mbwajatikizyigwa alufwu alimwi ambwatondezya buumba mbwajisi. Zimwi ziindi, muntu mwini kumugama nguuzyiba mbwalimvwa kucisa mumoyo, alimwi cilakonzya kumuyumina kwaamba mbwalimvwide mumoyo wakwe. Ijwi lya Leza lyaamba kuti: “Moyo wamuntu ulikuzyi kuusa kwanguwo, alimwi kunyina muntu uumbi uukonzya kutola lubazu mulukkomano lwanguwo.” (Tus. 14:10) Noliba leelyo muntu nakonzya kwaamba mbwalimvwide, talili lyoonse nocikonzya kubaubila bamwi kumvwisya cini ncasola kwaamba.

14. Mbuti mbotukonzya kubaumbulizya aabo ibakafwidwa?

 ¹⁴ Aboobo cilalimvwisya kuti, cilakonzya kuyuma kuzyiba ncotukonzya kumwaambila muntu uuside kapati. Nokuba boobo, Bbaibbele lyaamba kuti “mulaka wabasongo ulaponya.” (Tus. 12:18) Ibanji bajana twaambo tuumbulizya ntobakonzya kwaambila bantu kuzwa mubroshuwa yakuti Iciindi Muntu Ngomuyanda Nafwa. * Nokuba boobo, kanji-kanji cintu cigwasya kapati ncomukonzya kucita, ‘nkulila abaabo ibalila.’ (Rom. 12:15) Ba Gaby, ibakafwidwa balumi bakaamba kuti zimwi ziindi inzila ilikke kulimbabo njobatondezya mbobalimvwa nkwiinda mukulila. Aboobo bakayungizya kuti: “Nkakaambo kaako ndilaumbulizyigwa kapati ciindi balongwe bangu nobalila antoomwe andime. Aciindi eeco, tandilimvwi kuti ndili endikke mubuumba bwangu.”

15. Mbuti mbotukonzya kubaumbulizya bamwi ikuti naa catuyumina kucita boobo cacigaminina? (Alimwi amubone kabbokesi kakuti “ Majwi Mabotu Aawumbulizya.”)

¹⁵ Ikuti naa camuyumina kwaamba cacigaminina, ambweni cilakonzya kuubauba kubaumbilizya bamwi kwiinda mukubalembela kkaadi, email, kagwalo kaafooni naa lugwalo. Mulakonzya kuzubulula lugwalo luumbulizya, kwaamba cimwi cintu ncomuyeeyede naa bube mbwaakajisi sikwaazwa, naa kwaamba cimwi cintu cikkomanisya kujatikizya nguwe. Ba Junia bakaamba kuti: “Ikutambula mulumbe mufwaafwi uukulwaizya naa kutambwa kuyooswaya Munakristoma kulandigwasya kapati cakuti tandikonzyi akupandulula mbondilimvwa. Zintu eezyo zindipa kulimvwa kuti ndilayandwa alimwi ndilabikkilwa maano.”

16. Ino ninzila nzi iigwasya kapati yakuumbulizya bamwi?

¹⁶ Mipailo yesu ayalo ilakonzya kubagwasya bakwesu abacizyi ibalila. Tulakonzya kubapailila naa buya kupaila ambabo. Nokuba  kuti cilakonzya kukatazya kutwaamba kabotu twaambo twanu mumupailo mubukkale ibuli boobo, mupailo wakukombelezya kujatikizya mbabo ngomupaila camoyo woonse, ambweni kumwi misozi kayeenda alimwi ajwi kalidedema, ulakonzya kugwasya kapati kumana buumba. Ba Dalene balayeeya kuti: “Zimwi ziindi bacizyi baboola kuti banduumbulizye, ndilabalomba naa balakonzya kupaila. Balatalika kupaila, kanji-kanji kabapengaana zyakwaamba, pele lyoonse bamana kwaamba buyo majwi masyoonto, ijwi lyabo lilatalika kupasuluka alimwi balaamba mupailo uusika amoyo kapati. Lusyomo lwabo luyumu, luyando lwabo alimwi ambobabikkila maano zyali kuluyumya kapati lusyomo lwangu.”

17-19. Nkaambo nzi ncociyandika kuzumanana kupa luumbulizyo?

¹⁷ Kulampa kwaciindi ncobatola bantu kabali mubuumba ciliindene. Aboobo kamujanika ciindi aciindi, ikutali buyo kwamazuba masyoonto ciindi balongwe alimwi abanamukwasyi banji nobaciliko, pele amumyezi iitobela ciindi bamwi baakujokela kumaanda aabo. “Mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.” (Tus. 17:17) Banakristonyina muntu balakonzya kumuumbulizya kapati tacikwe makani aciindi ncocikonzya kumutolela kuti ajane luumbulizyo.—Amubale 1 Batesalonika 3:7.

¹⁸ Amuyeeye kuti aabo ibakafwidwa balakonzya kuba abuumba ciindi aciindi bwasika buzuba bwakusekelela cikwati cabo, bamvwa nyimbo nzyaakali kuswiilila sikwaazwa, babona zifwoto, azintu zimwi nokuba buyo kununkilila kumwi, ijwi limwi naa ziindi zimwi zyamwaka. Zintu zinji sikufwidwa nzyacita kwaciindi cakusaanguna kuzwa naakafwidwa, mbuli kujanika kumuswaangano wabbazu naa Ciibalusyo, zilakonzya kumucisa kapati kumoyo. Mukwesu umwi wakaluula kuti, “Ndakali kucilangila buya kuti ciindi cakusaanguna kuzwa mukaintu wangu naakafwa, ikusekelela buzuba mbotwakakwatana, cakali kuyookatazya. Pele bakwesu abacizyi basyoonto buyo bakabamba kapobwe kaniini abakwesu mbotwakali kumvwana limwi kutegwa nditabi endikke.”

¹⁹ Nokuba boobo, amuyeeye kuti aabo ibakafwidwa bayandwa bayandika kukulwaizya ciindi aciindi ikutali buyo ciindi camazuba aalibedelede. Ba Junia bakaamba kuti: “Kanji-kanji lugwasyo lupegwa kwiinda mu Magwalo alimwi akuyanzana kwabulongwe ciindi nokunyina kwiibaluka buzuba buli boonse bulibedelede lulagwasya kapati. Ziindi eezyi zilayandika alimwi zilaumbulizya kapati.” Kwaamba masimpe, tatukonzyi kubumana buumba boonse naa kucilekela limwi kumuyeeya muyandwa wesu iwakafwa, pele tulakonzya kujana luumbulizyo luli mbolubede kwiinda mukubweza ntaamu ziyandika kutegwa tugwasye baabo ibakafwidwa. (1Joh. 3:18) Ba Gaby bakaamba kuti: “Ndilamulumba kapati Jehova akaambo kalubomba lwabaalu ibali kundigwasyilizya mubuyumuyumu boonse mbondalijisi. Masimpe, bandipa kulimvwa kuti Jehova ulindibukete mumaanza aakwe.”

20. Nkaambo nzi ncotukonzya kwaamba kuti zisyomezyo zya Jehova zilaumbulizya kapati?

²⁰ Eelo kaka cilaumbulizya kuzyiba kuti Jehova, Leza siluumbulizyo loonse, uyoogwisya zintu zyoonse zileta buumba alimwi akubakatalusya bantu kukabe kutamani ciindi “aabo boonse ibali muzyuumbwe nobayoomvwa ijwi [lya Kristo]”! (Joh. 5:28, 29) Leza usyomezya kuti “uyoolumana lufwu mane kukabe kutamani, alimwi Mwami Singuzuzyoonse Jehova uyoosindula misozi kumasyu oonse.” (Is. 25:8, bupanduluzi buyungizyidwe) Mpoonya muciindi ‘cakulila abaabo balila,’ bantu boonse munyika ‘bayookondwa abaabo ibakondwa.’—Rom. 12:15.